လါအီကူး ၂၁ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဒွဲၣ်လိကီၢ်ဆၣ် ဖါလိဒိၣ်ဟီၣ်ကဝီၤလၢပယီၤသုးကျိၤဟဲထီၣ်ဟူးဂဲၤဝဲခဲအံၤ တၢ်ဒုးအတီၢ်ပူၤ ဟီၣ်ကဝီၤတၢ်ပၢၢ်ဆၢသုးကရူၢ်တကပၤမၤန့ၢ်ဝဲပယီၤသုးကျိ(၃)ခိၣ် အဂ့ၢ်န့ၣ် သ့ၣ်ညါဘၣ်လၢသုးက့ပှၤဘၣ်မူဘၣ်ဒါ အအိၣ်န့ၣ်လီၤ.
ဖဲလါအီကူး ၁၉ သီအနံၤ ပယီၤသုးလၢအဟဲထီၣ်တဖၣ်အံၤဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤ တၢ်ဒုးဆဲကဲထီၣ်ဝဲဒၣ်ဖဲကတၢတံၥ်ကရူၢ် ဖါလိဒိၣ်ဟီၣ်ကဝီၤအပူၤ ဒီး တၢ်ဒုးအပူၤတၢ်မၤန့ၢ်ဝဲပယီၤသုးအစုကဝဲၤအမဲၥ်ညါ ဘၣ်ဒိဘၣ်ထံးအိၣ်ဝဲ အဂ့ၢ်န့ၣ် (သုးက့ ၅) ပှၤကတိၤ တၢ်ပၢ ပဒိၣ်စီၤထိၣ်ရီၤဘ့ၤ စံးဝဲဒ်အံၤန့ၣ်လီၤ.
“တၢ်ဒုးဒုကဲထီၣ်ဝံၤက့ၤဝံၤက့ၤလီၤ. ကဲထီၣ်လၢမုၢ်ဆါခီဒီးအိၣ်ကဲထီၣ်လၢမုၢ်နၤခီဒီးအိၣ်လီၤ. ကဲထီၣ်လၢဖါလိဟီၣ်ကဝီၤအိၣ်အသိး လၢလၥ်ခီလီၤဆူကမၤမိၢ်တဆီဘၣ်တဆီန့ၣ်စ့ၢ်ကီးတၢ်ဒုးကဲထီၣ်အိၣ်လီၤ. ဖဲလါအီကူး ၁၉ သီ ဖဲဖါလိဒိၣ်ဟီၣ်ကဝီၤန့ၣ် တၢ်ဒုးကဲထီၣ်. ပပှၤမၤန့ၢ်ဝဲဒုၣ်ဒါအကျိ (၃)ခိၣ်. တၢ်ဒုးကဲထီၣ်ဒုဒုၣ်ဒါန့ၣ်တၢ်သံတၢ်ဘၣ်ဒိဘၣ်ထံးအိၣ်လီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢတၢ်ဒုးကဲထီၣ်ဘျီဝဲအံၤအပူၤ စုကဝဲၤကျိလၢတၢ်မၤန့ၢ်ဝဲ(၃)ခိၣ်န့ၣ်မ့ၢ်ဝဲ(MA.1)တခိၣ်ဒီး (M.79)ခံခိၣ်တကးဒံးဘၣ် ပယီၤသုး တကပၤသံဘၣ်ဒိဘၣ်ထံးအိၣ်အဃိ ဖဲမဟါလါအီကူး ၂၀ သီအနံၤန့ၣ် ပှၤလၢအဘၣ်ဒိဘၣ်ထံး(၉)ဂၤတၢ်က့ၤဆှၢ လီၤအီၤဆူ အိတီ(အုန်းတော)တကပၤ အဂ့ၢ်န့ၣ် ပဒိၣ်စီၤထိၣ်ရီၤဘ့ၤ စံးအါထီၣ်ဝဲန့ၣ်လီၤ.
(သုးက့ ၅)ဟီၣ်ကဝီၤလၢသုးမီၤစိရိၤအဲၣ်ဒိးဟဲထီၣ်ဒိၣ်စိက့ၤဝဲအံၤ စးထီၣ်လၢအဝဲသ့ၣ်ဟဲထီၣ်ဟူးဂဲၤတၢ်ဆၢကတီၢ်(၅)လါဃၣ်ဃၣ် အတီၢ်ပူၤတၢ်ဒုးကဲထီၣ်ဝဲကိးမုၢ်နံၤဒဲးဃၣ်ဃၣ်ဒီး ဖဲအပူၤကွံၥ်လါအီကူး ၁၆ သီ လ့ဖိထၣ်ကရူၢ် ဝၣ်သိခိၣ်တၢ်ဒုးအပူၤန့ၣ်စ့ၢ်ကီး ဟီၣ်ကဝီၤ(KNLA) မၤန့ၢ်ဝဲပယီၤသုး အစုကဝဲၤကျိ(၈)ခိၣ်ဒံးန့ၣ်လီၤ.