လါအီကူး ၂၄ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)လူၤသီကီၢ်ဆၣ် စီၤမုၢ်ပျီကရူၢ် (၄)သီအတီၢ်ပူၤ ပယီၤသုးခးလီၤကျိဖးဒိၣ်(၇၇)ဖျၢၣ်ဆူ ကမျၢၢ် တၢ်ဖံးအီၣ်မၤလီၢ်ကျဲပူၤအဃိ ကမျၢၢ်တဖၣ်ကလဲၤဖံးမၤတၢ်အဂီၢ်အိၣ်ဒီးပျံၤတၢ်ဖုးတၢ်ဘၣ်ယိၣ်ဘၣ်ဘှီအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါစံးဝဲန့ၣ်လီၤ.
စးထီၣ်ဖဲလါအီကူး ၁၈ သီတုၤ ၂၂ သီ လၢတၢ်(၄)သီအတီၢ်ပူၤအံၤ ပယီၤသုးခးလီၤဝဲကျိဖးဒိၣ်တပယူၥ်ဃီဆူ စီၤမုၢ်ပျီကရူၢ် ဒူသဝီ(၉)ဖျၢၣ် တၢ်ဖံးအီၣ်မၤလီၢ်ကျဲအပူၤန့ၣ်လီၤ.
ဒ်လီၢ်ကဝီၤတၢ်မၤနီၣ်ပူၤအိၣ်ဝဲအသိးန့ၣ် ဖဲလါအီကူး ၁၈ သီအနံၤန့ၣ် ပိၥ်ဃ့ခိၣ်သုးကလၢၤခးလီၤဝဲ(၁၂၀ မမ)ကျိဖးဒိၣ် ၁၁ ဖျၢၣ် ဆူ မိၢ်လၢ်ခိၣ်သဝီဒီး ထိၣ်ကိးပျီသဝီတဖၣ်အံၤအပူၤဒီး မုၢ်ဆ့ၣ်ထီၣ် ၁၉ သီအနံၤ ပိၥ်ဃ့ခိၣ်သုးကလၢၤအံၤဒီးဖါဂီၤလိ,ဝၣ်ကျ့ၣ်တူၢ် သုးကလၢၤအံၤတဖၣ် ခးလီၤကဒီးဝဲ(၈၁ မမ)ကျိဖးဒိၣ်(၆၀)ဖျၢၣ်ဆူ ထိၣ်ကိးထၣ်,လံၣ်ပှ့ၤခံ,ပျိၢ်ဝီခံသဝီသ့ၣ်တဖၣ်အံၤအပူၤ န့ၣ် လီၤ.
တကးဒံးဘၣ်လၢန့ၣ်အမဲၥ်ညါတၢ်ကဲထီၣ်သးဖဲန့ၣ်ဝံၤမၤကဒီးဖဲလါအီကူး ၂၀, ၂၁ သီ ဒီး ၂၂ သီအနံၤန့ၣ်စ့ၢ်ကီး လၢထိၣ်ဒိၣ်ပျီ, ထံဆံၣ်ပီၤခံသဝီ, လၢၢ်ဒိၣ်ထံးသဝီ,ပီၤမုၢ်သံၣ်ပျီသဝီဒီး လၢၢ်ဒိၣ်ထံးသဝီသ့ၣ်တဖၣ်အံၤအပူၤ ပယီၤသုးလၢအိၣ် ပိၥ်ဃ့ခိၣ် သုးကလၢၤ, ဖါဂီၤလိသုးကလၢၤ,ဝၣ်ကျ့ၣ်တူၢ်သုးကလၢၤသ့ၣ်တဖၣ်အံၤ ခးလီၤကဒီးဝဲ(၁၂၀ မမ)ကျိဖးဒိၣ်(၆)ဖျၢၣ် အဂ့ၢ်န့ၣ် စံးဝဲန့ၣ်လီၤ.
ဒီးဖဲလၢတၢ်(၅)သီအတီၢ်ပူၤအံၤ မ့ဘၣ်ကွၢ်ပယီၤသုးခးလီၤဝဲကျိဖးဒိၣ်ပၥ်ဖှိၣ်ခဲလၢၥ်အိၣ်တဲ(၇၇)ဖျၢၣ်အသိး ဒူသဝီလၢဘၣ်ကွၢ်ဆၢၣ် မဲၥ်ပယီၤသုးအတၢ်ခးလီၤကျိဖးဒိၣ်သ့ၣ်တဖၣ်အံၤန့ၣ် အိၣ်ဝဲဒၣ်လၢကရူၢ်တဖျၢၣ်ဃီအပူၤန့ၣ်လီၤ.
လၢတၢ်န့ၣ်အဃိဘၣ်ဃးတၢ်ကဲထီၣ်သးဘျီဝဲအံၤန့ၣ် ဖဲပခ့ၣ်အဲးစံၣ်-ကညီတၢ်ကစီၣ်ဆဲးကျိးသံကွၢ်ဝဲ(သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီၤဘ့ၤ အခါစံးဝဲဒ်အံၤန့ၣ်လီၤ.
“ပယီၤသုးအတၢ်ခးလီၤတၢ်အံၤတၢ်ဒုးကဲထီၣ်တအိၣ်ဘၣ် အိၣ်ဒၣ်လူၤခးဝ့ၢ်ဝီၤတၢ် ကွၢ်လၢအဲၣ်ဒိးခးသးဝဲန့ၣ်ခးဝဲလီၤ. အခးလီၤ တၢ်အံၤလၢပှၤဖံးအီၣ်မၤအီၣ်တၢ်လီၢ်ကျဲလီၤ. အဃိတၢ်သ့ၣ်တဖၣ်အံၤလိၤလိၤလၢကမျၢၢ်လီၤ. ဒူသဝီကျိဖးဒိၣ်လၢအလီၤတဲၥ် တဖၣ်အံၤ မ့ၢ်ဝဲစီၤမုၢ်ပျီကရူၢ်တဘ့ၣ်ဃီလီၤ. ကျိချံန့ၣ်လီၤဝဲဒၣ်လၢ မိၢ်လၢ်ခိၣ်သဝီ,ထိၣ်ကိးပျီ,ထိၣ်ကိးထၣ်, လံၣ်ပှ့ၤခံ,ပျိၢ်ဝီခံ, ထိၣ်ဒိၣ်ပျီ,ထံဆံၣ်ပီၤခံ,လၢၢ်ဒိၣ်ထံး,ပီၤမုၢ်သံၣ်ပျီသဝီတဖၣ်အံၤ လီၤတဲၥ်လၢကမျၢၢ်မၤအီၣ်တၢ်လီၢ်ပူၤလဲလဲလီၤ. အဃိတၢ်အံၤ လီၤဂၥ်ဒ်သိးအခးသဘှံးက့ၤတၢ်ခီ”အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်လၢန့ၣ်အမဲၥ်ညါပယီၤသုးအံၤတုၤလၢခဲအံၤသူဝဲကဘီယူၤ,ကျိဖးဒိၣ်ဒီးမ့ဆဲးမၤထီဒါဝဲထံဂုၤကီၢ်ဂၤပှၤဂ့ၢ်ဝီခွဲးယၥ် အိၣ်တပယူၥ်ဃီဘၣ်ဆၣ် ဘၣ်တၢ်ကွၢ်ကပၥ်အီၤလၢထံဂုၤကီၢ်ဂၤဒီးကညီဖီၣ်စုကဝဲၤကရူၢ်ကရၢလၢအိၣ်သုးမီၤစိရိၤစုတီၤဖီလၥ် တဖၣ်အံၤ အဂ့ၢ်န့ၣ် ပဒိၣ်စီၤထိၣ်ရီၤဘ့ၤ စံးအါထီၣ်ထီၣ်တဲန့ၣ်လီၤ.
“တၢ်လၢယအဲၣ်ဒိးတဲအါထီၣ်န့ၣ်တၢ်လၢဒုၣ်ဒါတဖၣ်န့ၣ်လူၤမၤဒၢၣ်ကမျၢၢ်လၢကဘီယူၤ,လူၤမၤသံကမျၢၢ်လၢကျိဖးဒိၣ်ဒုမၤဝဲဆဲးတဲးမၤဝဲကိးနံၤဒဲးလီၤ. တၢ်မၤအသးထဲထဲအံၤသုးမီၤစိရိၤအအၢအသီလၢလူၤမၤဒၢၣ်ကမျၢၢ်အံၤန့ၣ်ကဲထီၣ်တၢ်လီၤကမၢကမၣ်.တၢ တထံၣ်န့ၣ် ထံဂုၤကီၢ်ဂၤတၢ်သိၣ်တၢ်သီတၢ်ဘျၢတဖၣ်န့ၣ်မ့ၢ်အလဲၤက့ၤဖဲလဲၣ်လၢကမျၢၢ်အဂီၢ်န့ၣ်. ခံထံၣ်တထံၣ်န့ၣ်ထံကီၢ်သ ဘျံးသ့ၣ်တဖၣ်န့ၣ် ပယီၤသုးခိၣ်နၢ်လဲၤဟးလၢအအိၣ်န့ၣ်တူၢ်လိၥ်ခီၣ်ဆၢဝဲဟ့ၣ်ဝဲအမဲၥ်သၣ်,ဟ့ၣ်ဝဲအလၤကပီၤအဃိ တၢ်မၤအသး ဒ်အံၤမ့ၢ်အသ့ၣ်ညါဝဲဘၣ်ဧါ.မ့ဝံၤသၢထံၣ်တထံၣ်န့ၣ်လီၤဆီဒၣ်တၢ်ကညီဖီၣ်စုကဝဲၤလီၤဖှံၣ်တဖၣ်လၢကညီဖိတၢ်တီတၢ်တြၢ်အဂီၢ်န့ၣ် မ့ၢ်အတၢ်ပၥ်သူၣ်ပၥ်သးအိၣ်ဒ်လဲၣ်,ဟံဒံးဝဲတၢ်ဆၢကတီၢ်ဘၣ်ဖၢလီၤဧါ”အဂ့ၢ်န့ၣ် စံးဝဲန့ၣ်လီၤ.
တကီၢ်ခါခဲအံၤ ခီဖျိလၢပယီၤသုးအတၢ်ဟးခးလီၤနါစိၤကျိဖးဒိၣ်အံၤအဃိ ဒူသဝီကမျၢၢ်သ့ၣ်တဖၣ်အံၤအိၣ်ဒီးတၢ်ပျံၤတၢ်ဖုး ,လၢကလဲၤဆူကျီးပူၤတၢ်ဖံးအီၣ်မၤအီၣ်လီၢ်အဂီၢ်စ့ၢ်ကီး ဘၣ်အိၣ်ဒီးတၢ်ဘၣ်ယိၣ်ဘၣ်ဘှီထံၣ်ဘၣ်ဝဲတၢ်ကီတၢ်ခဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
၂၀၂၁ သုးဟံန့ၢ်တၢ်စိတၢ်ကမီၤဝံၤလီၢ်ခံ မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤလၢဘၣ်ကွၢ်ဆၢၣ်မဲၥ်ဝဲသုးမီၤစိရိၤအတၢ်ဟူးတၢ်ဂဲၤ ဆူၣ်ဆူၣ်ကိၤကိၤလၢအလံၤကျါမ့ၢ်ဂ့ၤ, လၢဟီၣ်ခိၣ်မဲၥ်ဖံးခိၣ်မ့ၢ်ဂ့ၤအံၤန့ၣ် စးထီၣ်ဖဲတနံၣ်အံၤလါမ့ၤအံၤန့ၣ် ပယီၤသုးမၤထီဒါဝဲ ပှၤဟီၣ်ခိၣ်ဖိခွဲးယၥ်ဟဲအါထီၣ်ဝဲတပယူၥ်ဃီန့ၣ်လီၤ.
ဒ်န့ၣ်အသိးလၢဟီၣ်ခိၣ်မဲၥ်ဖံးခိၣ်အံၤတဆီခီဖျိပယီၤသုးအတၢ်ဟဲထီၣ်ဟူးဂဲၤဒီးကဘီယူၤ,ကျိဖးဒိၣ်တၢ်ဟူးတၢ်ဂဲၤသ့ၣ်တဖၣ်အံၤအဃိ တုၤလၢခဲအံၤဒူသဝီကမျၢၢ်ပှၤနီၣ်ဂံၢ်လၢအကလးလၢအဃ့ၢ်ထီၣ်တဖၣ်အံၤ က့ၤဟံၣ်က့ၤဃီတဘူၣ်ဘၣ်ဃ့ၢ်မှံဟးဖျိးဒံးဝဲအဖၢမုၢ် အဂ့ၢ်န့ၣ် သ့ၣ်ညါဘၣ်န့ၣ်လီၤ.