လါအီကူး ၁၉ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲတနံၤအံၤလါအီကူး ၁၉ သီအံၤ ပယီၤသုးခးလီၤဝဲ ကျိဖးဒိၣ် ဆူပလိၥ်ခံသဝီပူၤအဃိ ဃုၥ်ဒီးတတီၤကၠိဖိသံဝဲ(၃)ဂၤဒီး ဘၣ်ဒိဘၣ်ထံးဝဲ(၉)ဂၤအဂ့ၢ်န့ၣ် ကီၢ်ရ့ၣ်ပှၤဘၣ်မူ ဘၣ်ဒါစံးဝဲန့ၣ်လီၤ.
ဖဲတနံၤအံၤမုၢ်ဘူးကထူၣ် ၁၁း၂၄ မံးနံးအဆၢကတီၢ်န့ၣ် လၢပလိၥ်ခံကရူၢ်အပူၤ ပယီၤသုး(၃၁၀)အမျိၥ်သုးရ့ၣ်လၢအိၣ်ဆီလီၤသး ဖဲန့ၣ်တဖၣ် ခးလီၤဝဲ(၁၂၀ မမ)ကျိဖးဒိၣ်(၂)ဖျၢၣ် လီၤတဲၥ်ပိၢ်ဖးထီၣ်ဝဲလၢပလိၥ်ခံ-၅ ဖျၢၣ်ထူပျီပူၤတဖျၢၣ်ဒီး လၢပလိၥ်ခံ-၆ သဝီဃၢၤ တဖျၢၣ် န့ၣ်လီၤ.
ဒီးကျိဖးဒိၣ်လၢအလီၤတဲၥ်လၢပလိၥ်ခံ-၅ ဖျၢၣ်ထူပျီပူၤအံၤန့ၣ် ဖဲအလီၤတဲၥ်ပိၢ်ဖးထီၣ်အခါ ဘၣ်လၢပှၤကၠိဖိသ့ၣ်တဖၣ်ဂဲၤလိၥ်ကွဲ ဖျၢၣ်ထူအဃိ ဖဲန့ၣ်တတီၤကၠိဖိပိၥ်ခွါလၢအသးနံၣ်အိၣ်ဒံးဒၣ်ထဲ(၅)နံၣ်အံၤ သံဝဲဖဲန့ၣ်တဘျီဃီဒီး ဘၣ်ဒိဘၣ်ထံးဝဲ(၁၁)ဂၤအဂ့ၢ်န့ၣ် လီၢ်ကဝီၤပှၤဘၣ် မူဘၣ်ဒါ စံးဝဲန့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိး ပှၤလၢအဘၣ်ဒိဘၣ်ထံး(၁၁)ဂၤအံၤအကျါ (၆)ဂၤန့ၣ် ဘၣ်ဒိဘၣ်ထံးနးနးကျံၤကျံၤ အဖီခိၣ် ဖဲန့ၣ်သံအါထီၣ်ကဒီးဝဲ(၂)ဂၤဒီး လၢကျိဖးဒိၣ်အံၤအဃိ ပှၤသံဟဲအိၣ်ထီၣ်တုၤဝဲလၢ(၃)ဂၤဘၣ်ဟဲကဲထီၣ်ဝဲဒ်အံၤ လီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖိသၣ်တတီၤကၠိဖိပိၥ်ခွါ(၅)နံၣ်အံၤအမဲၥ်ညါ ပှၤလၢအသံအါထီၣ်ခံဂၤအံၤ မ့ၢ်ဖိသၣ်(မ့တမ့ၢ်)ပှၤနီၢ်ဒိၣ်လဲၣ် ဒီးမ့ၢ်ပိၥ်မုၣ်/ပိၥ်ခွါ ဧါလဲၣ်န့ၣ် ပခ့ၣ်အဲးစံၣ်- ကညီတၢ်ကစီၣ်မၤလီၤတံၢ်အီၤအဖၢမုၢ်ဘၣ်န့ၣ်လီၤ.
တကးဒံးဘၣ်လၢန့ၣ်အမဲၥ်ညါလၢပယီၤသုးအတၢ်ခးလီၤကျိဖးဒိၣ်ဘျီဝဲအံၤစ့ၢ်ကီး ဟံၣ်ဟးဂီၤဝဲ(၁)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
(၃၁၀)အမျိၥ်သုးရ့ၣ်လၢအခးလီၤကျိဖးဒိၣ်ခဲအံၤန့ၣ် ဟီၣ်ကဝီၤဖဲန့ၣ်အပူၤတၢ်ဒုးကဲထီၣ်အိၣ်ဂ့ၤတအိၣ်ဂ့ၤ ညီနုၢ်ပညိၣ်ခးလီၤဝဲ ကျိဖးဒိၣ်လၢဒူသဝီကမျၢၢ်တၢ်ဖံးအီၣ်မၤအီၣ်လီၢ်ကျဲအိၣ်ဝဲတလီၢ်လီၢ်ဒီး လၢအတၢ်ခးလီၤဝဲကျိဖးဒိၣ်အံၤအဃိစ့ၢ်ကီး ကမျၢၢ်ဃုၥ်ဒီး ဖိဒံဖိသၣ်သံဘၣ်ဒိဘၣ်ထံးကဲထီၣ်အိၣ်ဝဲခဲအံၤခဲအံၤန့ၣ်လီၤ.