လါအီကူး ၁၇ သီ, ၂၀၂၆ နံၣ်, ခ့ၣ်အဲးစံၣ်
ပယီၤသုးလၢဟံန့ၢ်ကျဲတၢ်ဘံၣ်တၢ်ဘၢလၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဒွဲၣ်လိကီၢ်ဆၣ် ကမၤမိၢ်-ကတၢတံၥ်ကျဲ အံၤတဖၣ် ဖဲမဟါအနံၤ ဟီၣ်ကဝီၤ(KNLA)နုၥ်လီၤခးအဝဲသ့ၣ်ဒီး ဖဲန့ၣ်တၢ်မၤန့ၢ်ဝဲကျိ(၈)ခိၣ်အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤ ပှၤဘၣ်မူ ဘၣ်ဒါအအိၣ်န့ၣ်လီၤ.
ဖဲမဟါလါအီကူး ၁၆ သီ ဂီၤခီ ၅း၅၀ မံးနံးအဆၢကတီၢ်န့ၣ် ပယီၤသုးလၢအဟဲထီၣ်နုၥ်လီၤဟူးဂဲၤဟံန့ၢ်ကျဲတၢ်ဘံၣ်တၢ်ဘၢဖဲ မဲၤဝ့ၤကရူၢ် ဝၣ်သိခိၣ်တၢ်လီၢ် ဖိသွံကျိအံၤတဖၣ် ဘၣ်တၢ်နုၥ်လီၤခးအဝဲသ့ၣ်လၢဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) အပှၤတဖၣ် န့ၣ်လီၤ.
ဒီးလၢတၢ်နုၥ်လီၤခးတၢ်ဒုးကဲထီၣ်လၢခံခီခံကပၤအဘၢၣ်စၢၤဘျီဝဲန့ၣ်အပူၤန့ၣ် တၢ်ပၢၢ်ဆၢသုးကရူၢ်မၤန့ၢ်ဝဲပယီၤသုးအကျိ MA-1 (၇)ခိၣ်,ကျိဖုၣ်(၁)ခိၣ်ဃုၥ်ဒီး အဆၣ်ဒၢတစှၤန့ၢ်(၁၃)ခါ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ပယီၤသုးအံၤလၢကဆှၢထီၣ်ဆှၢလီၤအပှၤလၢအဘၣ်ဒိဘၣ်ထံးတဖၣ်ဒီးတၢ်အီၣ်တၢ်အီအဂီၢ်န့ၣ် စးထီၣ်လၢအဝဲသ့ၣ်ဟဲ ထီၣ်ဟူး ဂဲၤန့ၣ် ဆီလီၤဝဲအပှၤလၢကျဲတၢ်ဒ့ၣ်စၢၤလၢကဟံဝဲတၢ်ဘံၣ်တၢ်ဘၢအံၤအိၣ်ဝဲဒီး ဖဲမဟါတၢ်ခးလိၥ်သးကဲထီၣ်ဝဲန့ၣ်အခါ ဘၣ်ဃး ပယီၤသုးသံဘၣ်ဒိဘၣ်ထံးတၢ်အိၣ်သးခီန့ၣ်မၤလီၤတံၢ်ဝဲတန့ၢ်ဒံးဘၣ်အဂ့ၢ်န့ၣ် ပှၤလၢဘူးဒီးတၢ်ပၢၢ်ဆၢကရူၢ်အံၤ တဖၣ် စံးဝဲန့ၣ် လီၤ.
ဒ်န့ၣ်အသိးတကီၢ်ခါခဲအံၤလၢကလဲၤထီၣ်မၤပှဲၤအါထီၣ်အသုးဂံၢ်ဘါဆူဖၣ်ပူၣ်အံၤအဂီၢ် ပယီၤသုးကျိၤလၢအဟဲထီၣ်တဖၣ် ထီၣ်ဆူ ညါတန့ၢ်အိၣ်ထီၣ်ဂၢၢ်ဒံးဝဲဖဲဖါလိသဝီအဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီၤဘ့ၤ စံးဝဲန့ၣ်လီၤ.
“ခဲအံၤပယီၤသုးအတၢ်အိၣ်သးဒု အိၣ်ထီၣ်ဂၢၢ်ဒံးဖဲဖါလိဟီၣ်ကဝီၤလီၤ. တိကျဲကိးနံၤဒုတိဝဲတကဲဘၣ်,တိဝဲပူၤနံၤပူၤနံၤ. တိဝဲမ့န့ၢ် တစဲးဒီးဟဲထီၣ်ဝဲတစဲး, သၢသီလွံၢ်သီမးတိဝဲန့ၢ်တစဲးလီၤ.
မ့မ့ၢ်ကဘီယူၤဒုဟးခးဝ့ၢ်ခးဝီၤတၢ်မၢ်မၢ်လီၤ. အသုးကျိၤန့ၣ်ထီၣ်ဝဲတန့ၢ် ဘၣ်ဘျီအိၣ်ဒၣ်ခးနၢၤဝဲလၢကဘီယူၤန့ၣ်လီၤ. သုးထီၣ်သးန့ၢ်တစဲးဘၣ်ဆၣ်တတုၤဒံးလၢထံကဆီမဲဒံးဘၣ်. အဃိဖဲတၢ်သၢသီ လွံၢ်သီအတီၢ်ပူၤအံၤအါဒၣ်တက့ၢ် တူၢ်ဘၣ်က့ၤဝဲလၢပပှၤအတၢ်နုၥ်လီၤခးဝဲအီၤတတီၤဝံၤတတီၤအဃိဖဲမဟါန့ၣ် ပပှၤနုၥ်လီၤခးအီၤ ဖဲဝၣ်သိခိၣ်တၢ်လီၢ်န့ၣ် မၤန့ၢ်ဝဲကျိ(၈)ခိၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
စးထီၣ်လၢအပူၤကွံၥ်လါမ့ၤတၢ်ယီၤခါ ကမၤမိၢ်-ကတၢတံၥ်ကျဲဒီတကျိၤ ပယီၤသုးကျိၤလၢအဟဲထီၣ်တဖၣ်အံၤဒီး ဟီၣ်ကဝီၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) အဘၢၣ်စၢၤ တၢ်ဒုးကဲထီၣ်အိၣ်ဝဲကိးမုၢ်နံၤဒဲးဃၣ်ဃၣ် ဒီး တုၤလၢခဲအံၤဒုးယၤ တၢ်ဖ့ၣ်စၢဆဲးကဲထီၣ်ဒံးဝဲအဖၢမုၢ်န့ၣ်လီၤ.