လါစဲးပထ့ဘၢၣ် ၂၈ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) ကမၤမိၢ်-ကတၢတံၥ်ကျဲတၢ်ဒ့ၣ်စၢၤဟီၣ်ကဝီၤပူၤလၢပယီၤသုး ကျိၤဟဲထီၣ်ဟူးဂဲၤဝဲအံၤ တၢ်ဒုးဆဲးကဲထီၣ်ဝဲဒီး တၢ်မၤန့ၢ်ကဒီးဝဲကျိ(၇)ခိၣ်လၢပယီၤသုးအအိၣ်အဂ့ၢ်န့ၣ် သ့ၣ်ညါဘၣ် န့ၣ် လီၤ.
ဖဲလါစဲးပထ့ဘၢၣ် ၂၅ သီ ဂီၤခီ ၈း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးလၢအဟဲထီၣ်ဟူးဂဲၤဝဲဒၣ်ဖဲဒွဲၣ်လိကီၢ်ဆၣ် တီသူကျါဒီး ဖယါကိသဝီဘၢၣ်စၢၤအံၤတဖၣ် ဘၣ်တၢ်နုၥ်လီၤခးအဝဲသ့ၣ်လၢဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA)သုးပၥ်ဖှိၣ်သ့ၣ်တဖၣ်န့ၣ်လီၤ.
ဒီးဖဲလၢတၢ်နုၥ်လီၤခးပယီၤသုးဘျီဝဲအံၤအပူၤန့ၣ် (KNLA)မၤန့ၢ်ဝဲပယီၤသုး MA-1 ကျိ(၃)ခိၣ်, MA-3 စဲးလးကျိ(၁)ခိၣ်ဒီး K3 ကျိ (၃)ခိၣ် ပၥ်ဖှိၣ်ခဲလၢၥ်(၇)ခိၣ် န့ၣ်လီၤ.
လၢကထီၣ်ဒိၣ်စိက့ၤဝဲဟီၣ်ကဝီၤတၢ်လီၢ်လၢဘၣ်ဟ့ၣ်ဆှူဝဲတဖၣ်အံၤဃုၥ်ဒီးဖၣ်ပူၣ်ဝ့ၢ်လၢတၢ်ပၢၢ်ဆၢသုးကရူၢ်ထီၣ်န့ၢ်ဒိၣ်ဝဲဒၣ်အံၤအဂီၢ် ပယီၤသုးကျိၤဟဲထီၣ်ဂုၥ်ကျဲးစၢးဟူးဂဲၤဝဲလၢကျဲအဘိဘိအဃိ လၢတၢ်ဆၢကတီၢ်(၆)လါဃၣ်ဃၣ်အတီၢ်ပူၤအံၤ ဒုးယၤတၢ်ဖ့ၣ်စၢ ဆဲးကဲထီၣ်ဒံးဝဲလၢခံခီခံကပၤအဘၢၣ်စၢၤကိးမုၢ်နံၤဒဲးဃၣ်ဃၣ်န့ၣ်လီၤ.
ဒ်န့ၣ်အအသိး လၢတၢ်ဒီသဒၢလီၤက့ၤဟီၣ်ကဝီၤအံၤအဂီၢ်(KNLA)သုးပၥ်ဖှိၣ်တကပၤစ့ၢ်ကီးဂုၥ်ကျဲးစၢးမၤရှဲလဲဝဲအဃိ ပယီၤသုး တကပၤသဂၢၢ်ဘၣ်ဝဲတၢ်သံတၢ်ဘၣ်ဒိဘၣ်ထံး,တၢ်မၤန့ၢ်အဝဲသ့ၣ်တၢ်စုကဝဲၤတကးဒံးဘၣ်ဃ့ၢ်ဖျိးထီၣ်ဝဲစ့ၢ်ကီးကဲထီၣ်အိၣ်ဝဲ တပယူၥ်ဃီအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒီးလၢတၢ်နုၥ်လီၤခးဝဲအံၤအဃိ အဘူးကတၢၢ်ဖဲအပူၤကွံၥ်တလါအံၤလါစဲးပထ့ဘၢၣ် ၁၄ သီ ဒီး ၁၆ သီအနံၤန့ၣ်စ့ၢ်ကီး ပယီၤသုး လၢဟဲထီၣ်နုၥ်လီၤဟူးဂဲၤလၢ လ့ဖိထၣ်ကရူၢ် နိၥ်ဃဲထၣ်ဟီၣ်ကဝီၤဒီး ထံသဘျုၣ်ထၣ်ကရူၢ် ဝၣ်သိခိၣ်ဟီၣ်ကဝီၤ အပူၤသ့ၣ်တဖၣ် အံၤ ဘၣ်တၢ်နုၥ်လီၤခးအဝဲသ့ၣ်လၢ(KNLA)သုးပၥ်ဖှိၣ်အဃိ ဖဲန့ၣ်တၢ်မၤန့ၢ်ဒံးဝဲတၢ်စုကဝဲၤ(၇)ခိၣ်လၢအပၣ်ဃုၥ်ဝဲ MA-1 /MA-3 ကျိတဖၣ်အံၤဒံးန့ၣ်လီၤ.