လါစဲးပထ့ဘၢၣ် ၃၀ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်ဟီၣ်ကဝီၤအပူၤ သုးမီၤစိရိၤအံၤဆဲးသူဝဲ (Jet fighter)ဒီး(Y-12)ကဘီယူၤ လဲၤတ့ၢ်လီၤဝဲမ့ၣ်ပိၢ်ဒီးကျိဒိၣ်သ့ၣ်တဖၣ်တပယူၥ်ဃီကိးမုၢ်နံၤဒဲးဃၣ်ဃၣ် အဂ့ၢ်န့ၣ် သ့ၣ်ညါဘၣ် န့ၣ်လီၤ.
ကၠဲးထိၣ်ကီၢ်ဆၣ်အပူၤ ဖဲလါစဲးပထ့ဘၢၣ် ၂၈ သီ မုၢ်နၤခီ ၁၂း၀၁ မံးနံးတုၤဃီၤဝဲလၢ ၁၂း၁၈ မံးနံးအဆၢကတီၢ်တစု တၢ်ဒုးကဲထီၣ် တအိၣ်သုးမီၤစိရိၤ(Jet fighter)ကဘီယူၤ(၂)ဘ့ၣ် လဲၤတ့ၢ်လီၤဝဲပီၣ်(၃၀၀)မ့ၣ်ပိၢ် ၃ ဖျၢၣ်, ပီၣ်(၅၀၀)မ့ၣ်ပိၢ် ၁ ဖျၢၣ် တကးဒံး ဘၣ် (Y-12)ကဘီယူၤတဘ့ၣ် လဲၤတ့ၢ်လီၤစ့ၢ်ကီးဝဲ(၁၂၀ မမ)ကျိဖးဒိၣ်အသၣ်(၁၈)ဖျၢၣ်ဆူ ဆီသုးခံ(ကျောက်ဖျာ)ကရူၢ် ခၠီစီၣ်(ချောင်းစောက်)သဝီသီအံၤန့ၣ်လီၤ.
ကဘီယူၤအမဲၥ်ညါ ပယီၤသုးလၢအိၣ်လဲၣ်ပၤ(လက်ပံ)သဝီအံၤတဖၣ် လဲၤတ့ၢ်လီၤကဒီးဝဲဒြိမ့ၣ်ပိၢ်(၄)ဖျၢၣ်အံၤလၢ ဆီသုးခံကရူၢ် ခၠီစီၣ်သဝီ အံၤန့ၣ်လီၤ.
တၢ်ကဲထီၣ်သးဖဲန့ၣ်ဝံၤမုၢ်ဆ့ၣ်ထီၣ်လါစဲးပထ့ဘၢၣ် ၂၉ သီ ဂီၤခီ ၇း၃၈ မံးနံးအဆၢကတီၢ်န့ၣ်စ့ၢ်ကီး (၄၄)ခီၣ်ချ့အသုးဝဲၤလီၢ်ခိၣ် သ့ၣ် စုတီၤဖီလၥ်ခီၣ်ချ့သုးရ့ၣ်(ခမရ-၂၀၇)အံၤ ခးလီၤစ့ၢ်ကီးဝဲ(၁၂၀ မမ)ကျိဖးဒိၣ် ၆ ဖျၢၣ်လၢဝီၢ်က့(ဝင်းကံ)ကရူၢ် ဒီး ခရၢၢ်(ခရွဲ) ကရူၢ် ဘၢၣ်စၢၤ ဝီၢ်က့သဝီဒီးကၠီၣ်ယ့ၤတွ့(ကျောက်ရေတွင်း)သဝီအခိၣ်အဃၢၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်ဂီၤခီတၢ်ကဲထီၣ်သးဖဲန့ၣ်ဝံၤလီၢ်ခံ ဖဲဂီၤခီ ၁၀း၀၀ ဃၣ်ဃၣ်အဆၢကတီၢ်န့ၣ်စ့ၢ်ကီး (၄၄)ခီၣ်ချ့အသုးဝဲၤလီၢ်ခိၣ်သ့ၣ် အံၤ ခးလီၤကဒီးဝဲ(၆၀ မမ)ကျိဖးဒိၣ် ၂ ဖျၢၣ်ဆူ တကွံပူၤကရူၢ် တကွံပူၤသဝီဃၢၤအံၤန့ၣ်လီၤ.
လၢသုးမီၤစိရိၤကဘီယူၤအတၢ်ဟဲခးလီၤတၢ်ဒီးပယီၤသုးခးလီၤကျိဖးဒိၣ်လၢကၠဲးထိၣ်ကီၢ်ဆၣ်ပူၤလၢ(၂)သီတပယူၥ်ဃီအတီၢ်ပူၤဘျီဝဲအံၤ ကမျၢၢ်သံဘၣ်ဒိဘၣ်ထံးမ့တအိၣ်ဘၣ်ဘၣ်ဆၣ် ကမျၢၢ်အတၢ်ထူၣ်တၢ်ဘိတဖၣ်ဘၣ်ဒိဘၣ်ထံး ဟးဂီၤ ဝဲဒၣ်အိၣ်အဂ့ၢ် န့ၣ် လီၢ်ကဝီၤပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.
တကွံပူၤကရူၢ်, ဆီသုးခံကရူၢ် လၢသုးမီၤစိရိၤကဘီယူၤလဲၤခးလီၤတၢ်ဒီးပယီၤသုးခးလီၤကျိဖးဒိၣ်ခဲအံၤဃုၥ်ဒီး ပလိၥ်ခံကရူၢ်ပူၤ ဒူသဝီတဖၣ်အံၤ ဖဲအပူၤကွံၥ်လါစဲးပထ့ဘၢၣ် ၂၄ သီ, ၂၅ သီ ဒီး ၂၆ သီအနံၤစ့ၢ်ကီး ကျိဖးဒိၣ်အမဲၥ်ညါကဘီယူၤလဲၤတ့ၢ်လီၤဒံးဝဲ ပီၣ် (၅၀၀), ပီၣ်(၃၀၀)မ့ၣ်ပိၢ်ကဲထီၣ်ဒံးဝဲဒီး အခါဖဲန့ၣ်ကမျၢၢ်သံဘၣ်ဒိဘၣ်ထံးဒံးဝဲန့ၣ်လီၤ.