လါအီးကထိဘၢၣ် ၇ သီ, ၂၀၂၆ နံၣ်, ခ့ၣ်အဲးစံၣ်
ကရ့ၣ်နံၣ်ကီၢ်စဲၣ်ဟီၣ်ကဝီၤ လါစဲးပထ့ဘၢၣ် ၁ သီတုၤ ၃၀ သီ လၢတလါအတီၢ်ပူၤ လၢသုးမီၤစိရိၤ ခးလီၤကျိဖးဒိၣ်,ဒြိဒီး ကဘီယူၤအံၤ အဃိ လီၢ်ကဝီၤကမျၢၢ်ဃုၥ်ဒီးဖိသၣ်သံပၥ်ဖှိၣ်အိၣ်ဝဲ(၁၄)ဂၤ ဒီး ကၠိ,ဟံၣ်ဟးဂီၤဝဲ(၅၀)ဘျဲၣ် အဂ့ၢ်န့ၣ် ကရ့ၣ်နံၣ် ဂ့ၢ်ဝီခွဲးယၥ်ကရူၢ် (KnHRG) ထုးထီၣ်ပၥ်ဖျါဝဲန့ၣ်လီၤ.
လွဲၤကီၤ,ဖရူၤစိၤ,ဒံမီၣ်စိၤ,ဖဲၤခိၤ,ဘီလ်ခဲ,ဖါဆီဒီးရှါတီကီၢ်ဆၣ်ဟီၣ်ကဝီၤအပူၤ သုးမီၤစိရိၤသူဝဲဒြိ(၁၇)ဘျီ, ကဘီယူၤ (၁၀)ဘျီ, ခးလီၤဝဲ ကျိဖးဒိၣ်(၂)ဘျီ ဒီးဖီၣ်ဝဲကမျၢၢ်ကဲထီၣ်(၁)ဘျီအဃိ လၢတလါအတီၢ်ပူၤအံၤ သုးမီၤစိရိၤမၤထီဒါဝဲပှၤဂ့ၢ်ဝီခွဲးယၥ် ကဲထီၣ် ပၥ်ဖှိၣ်အိၣ် ဝဲ(၃၀)ဘျီ အဂ့ၢ်န့ၣ် KnHRG တၢ်မၤနီၣ်ပူၤအသိးသ့ၣ်ညါဘၣ်န့ၣ်လီၤ.
ဒီးဒြိ,ကျိဖးဒိၣ်,ကဘီယူၤလၢသုးမီၤစိရိၤခးလီၤဝဲတဖၣ်အံၤအိၣ်ဝဲဒီးတၢ်ပညိၣ်လိၤလိၤဆူကမျၢၢ်ဒူသဝီ,တၢ်ဖံးအီၣ်မၤအီၣ်လီၢ်ကျဲ အဖီခိၣ် လီၢ်ကဝီၤကမျၢၢ်ပိၥ်မုၣ်/ပိၥ်ခွါသံပၥ်ဖှိၣ်အိၣ်ဝဲ(၁၄)ဂၤအကျါပၣ်ဃုၥ်ဝဲဖိသၣ်(၄)ဂၤဒီး ဘၣ်ဒိဘၣ်ထံးဝဲ(၄၇)ဂၤအကျါ ပၣ်ဃုၥ်စ့ၢ်ကီးဝဲဖိသၣ်(၁၄)ဂၤန့ၣ်လီၤ.
ဒ်န့ၣ်အသိးလီၢ်ကဝီၤကမျၢၢ်ဃုၥ်ဒီးဖိဒံဖိသၣ်လၢအသံ(၁၄)ဂၤအံၤစ့ၢ်ကီး သံဝဲဒၣ်ခီဖျိလၢ သုးမီၤစိရိၤအကဘီယူၤဒီး ဒြိတၢ်ထီၣ်ဒုး အဃိ သ့ၣ်တဖၣ်လီၤအဂ့ၢ်န့ၣ် (KnHRG)စံးဝဲန့ၣ်လီၤ.
တကးဒံးဘၣ်လၢကဘီယူၤ,ဒြိဒီးကျိဖးဒိၣ်အံၤအဃိ လီၢ်ကဝီၤကမျၢၢ်အဟံၣ်(၄၃)ဖျၢၣ်, ကၠိ(၃)ဖျၢၣ်, တၢ်ဘူၣ်တၢ်ဘါတၢ်သူၣ် ထီၣ်(၅)ဖျၢၣ်,သိလ့ၣ်(၇)ခိၣ်,တၢ်ဖံးအီၣ်မၤအီၣ်လီၢ်ကျီး(၉)ဘ့ၣ်,တိၤ(၁)ဟးဂီၤဘၣ်ဒိဘၣ်ထံးဝဲအသိး ဆၣ်ဖိကီၢ်ဖိစ့ၢ်ကီးသံဘၣ်ဒိ ဘၣ်ထံးအိၣ်ဝဲဒၣ်န့ၣ်လီၤ.
ဒီးလၢသုးမီၤစိရိၤအတၢ်ဟူးတၢ်ဂဲၤဒ်အံၤအဖီခိၣ် ပှၤကၠိဖိသ့ၣ်တဖၣ်နီၢ်သးအမဲၥ်ညါတဖံးလိမၤဒိးဘၣ်တၢ်လၢ တၢ်ဘံၣ်တၢ်ဘၢ အပူၤဘၣ်ဒီး ပၢၢ်တုၤလၢတၢ်ပံးဃၥ်ဝဲကၠိတစိၢ်တလီၢ်အိၣ်ဝဲအသိး လီၢ်ကဝီၤကမျၢၢ်ဃုၥ်ဒီးပှၤလီၢ်အိၣ်ကမှံဖိ တဖၣ်လၢတၢ်လုၢ် အီၣ်နီၣ်ခိသးသမူဒီးကအီၣ်ကအီဝဲအဂီၢ် သဂၢၢ်ဘၣ်ဝဲတၢ်ကီတၢ်ခဲနးဒိၣ်ထီၣ်ဝဲဒၣ်ကွ့ၢ်ကွ့ၢ်အဂ့ၢ်န့ၣ် KnHRG လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
တကီၢ်ခါခဲအံၤကရ့ၣ်နံၣ်ကီၢ်စဲၣ်ဟီၣ်ကဝီၤအပူၤ သုးမီၤစိရိၤဆဲးမၤဒံးဝဲတၢ်ထီၣ်ဒုးဒီးဆဲးမၤထီဒါဝဲပှၤဂ့ၢ်ဝီခွဲးယၥ်တပယူၥ်ဃီအဃိ လွဲၤကီၤမုၢ်ထီၣ် ကမျၢၢ်ပှၤလီၢ်အိၣ်ကမှံအဂၤ(၃၀၀)ဘျဲၣ်, ဖရူၤစိၤကီၢ်ဆၣ်မုၢ်ထီၣ် ပှၤလီၢ်အိၣ်ကမှံဒီး မုၢ်နုၥ်ပှၤလီၢ်အိၣ်ကမှံဖိတဖၣ် ဘၣ်သုးကဒီးအလီၢ်အကျဲဆူတၢ်လီၢ်ဘံၣ်ဘၢအိၣ်လီၢ်စ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤ.