သုးမီၤစိရိၤကဘီယူၤလဲၤခးလီၤတၢ်လၢဖၣ်ပူၣ်ဝ့ၢ်ကဝီၤဒ့ပူၤ ကမျၢၢ်သံ(၁)ဂၤဒီးဟံၣ်,လံၥ်ရိဒၢးဟးဂီၤ

လါအီးကထိဘၢၣ် ၁၇ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဘူသိၣ်ကီၢ်ဆၣ် ဖၣ်ပူၣ်ဝ့ၢ်အပူၤ သုးမီၤစိရိၤကဘီ ယူၤလဲၤခး လီၤတၢ်အဃိ ကမျၢၢ်ပိၥ်ခွသံကဒီးဝဲ(၁)ဂၤဒီး ဟံၣ်,လံၥ်ရိဒၢးတၢ်သူၣ်ထီၣ်လီၤပှီၢ်ဟးဂူၥ်ဟးဂီၤဝဲအဂ့ၢ်န့ၣ် သ့ၣ်ညါဘၣ် လၢပှၤဘၣ် မူဘၣ်ဒါအအိၣ်န့ၣ်လီၤ.

ဖဲမဟါလါအီးကထိဘၢၣ် ၁၆ သီ မုၢ်နၤခီ ၁၁း၃၀ ဃၣ်ဃၣ်အဆၢကတီၢ် တၢ်ဒုးကဲထီၣ်တအိၣ်သုးမီၤစိရိၤ(Jet fighter) ကဘီယူၤတဘ့ၣ် လဲၤတ့ၢ်လီၤဝဲပီၣ်မ့ၣ်ပိၢ်(၁)ဖျၢၣ်လၢဖၣ်ပူၣ်ဝ့ၢ် ကဝီၤဒ့-၃ ပူၤဒီး ဖဲန့ၣ်ဘၣ်သံဝဲ အူအီၤထိလွ့ၤ(၄၇)နံၣ်အံၤဒီး တကးဒံးဘၣ် ဟံၣ်(၁)ဖျၢၣ်,လံၥ်ရိဒၢး(၁)ဖျၢၣ်လီၤပှီၢ်ဟးဂူၥ်ဟးဂီၤဝဲဒၣ်န့ၣ်လီၤ.

(သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီၤဘ့ၤ စံးဝဲလၢ“ပှၤကမျၢၢ်သံကဒီးတဂၤလံ အတၢ်ကမၣ်တအိၣ်နီမံၤဘၣ်. ဟံၣ်ဟးဂီၤ တဖျၢၣ်ဒီးလံၥ်ရိဒၢးဟးဂီၤစ့ၢ်ကီးတဖျၢၣ်လီၤ. သူအီၣ်တသ့နီတစဲးလၢၤဘၣ်. မ့မ့ၢ်ကဘီယူၤမ့ၣ်ပိၢ်အလီၢ်န့ၣ် လဲၢ်ဒိၣ်န့ၢ် ယိၥ်ဒိၣ် န့ၢ် ဒံးပီၣ်(၅၀၀)ဒံးလီၤ.ပတဲလီၤတံၢ်ဒုတဘၣ်ဘၣ် ဘၣ်ဆၣ်ပသ့ၣ်ညါလၢမ့ၣ်ပိၢ်သ့ၣ်တဖၣ်န့ၣ် အမၤဒိၣ်ထီၣ်ဝဲ မီၤနီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

ဖၣ်ပူၣ်ဝ့ၢ်လၢကဘီယူၤလဲၤခးလီၤတၢ်ခဲအံၤန့ၣ် စးထီၣ်လၢဟီၣ်ကဝီၤ(KNLA)သုးပၥ်ဖှိၣ်ထီၣ်န့ၢ်ဒိၣ်စိဝဲဝံၤလီၢ်ခံန့ၣ် ကျိဖးဒိၣ် အမဲၥ်ညါ ကဘီယူၤလဲၤခးလီၤတၢ်လဲၤတ့ၢ်လီၤဝဲမ့ၣ်ပိၢ်အိၣ်ဝဲတလီၢ်လီၢ်ဒီး ဒ်န့ၣ်အသိးလၢကျိဖးဒိၣ်ဒီးကဘီယူၤအံၤအဃိစ့ၢ်ကီး ကမျၢၢ်သံ ဘၣ်ဒိဘၣ်ထံး,ဟံၣ်,တၢ်ဘူၣ်တၢ်ဘါတၢ်သူၣ်ထီၣ်ဟးဂီၤဝဲဒၣ်အါမးန့ၣ်လီၤ.

ဒ်န့ၣ်အသိးဖဲအပူၤတနံၣ်အံၤ(၂၀၂၆)လါယူၤ ၂၅ သီ ဂီၤခီ ၁း၀၀ ဃၣ်ဃၣ်အဆၢကတီၢ်န့ၣ်စ့ၢ်ကီး လၢကဝီၤဒ့(၄)အပူၤ ကဘီယူၤ ပညိၣ်လဲၤခးလီၤတၢ်လၢသီခါဖၠၣ်ကရၢၢ်ပူၤအဃိ ဖဲန့ၣ်မ့ၢ်လၢကမျၢ်ဃုၥ်ဒီး သီခါစ့ၢ်ကီးဃ့ၢ်ထီၣ်ဖးယံၤလံအဖီခိၣ် ကဘီယူၤအတၢ် လဲၤခးလီၤတၢ်ဘျီဝဲန့ၣ်သီခါဖၠၣ်တၢ်သူၣ်ထီၣ်တစှၤန့ၢ်(၃)ဖျၢၣ်လီၤပှီၢ်ဟးဂူၥ်ဟးဂီၤဒိၣ်ဒိၣ်မုၢ်မုၢ်ကဲထီၣ်ဒံးဝဲ န့ၣ်လီၤ.

ဖၣ်ပူၣ်ဝ့ၢ်အံၤအိၣ်ဘူးလိၥ်အသးဒီးပယီၤအသုးကလၢၤတဖျၢၣ်လၢအဘၣ်တၢ်သ့ၣ်ညါအီၤလၢဒုးယၤသုးကလၢၤအံၤဒီး ဒ်န့ၣ်အသိး ဒုးယၤသုးကလၢၤလၢအဘၣ်တၢ်ကဝီၤခးအီၤလၢ(KNLA)သုးပၥ်ဖှိၣ်န့ၢ်ဝဲ(၃)နံၣ်ဃၣ်ဃၣ်အံၤ တုၤလၢခဲအံၤတၢ်လဲၤ ကဝီၤခးစဲးပြဲး အီၤ အဖၢမုၢ်ဒံးန့ၣ်လီၤ.

လၢတၢ်န့ၣ်အဃိစးထီၣ်ဖဲန့ၣ်ကမျၢၢ်လၢအိၣ်ဖဲဖၣ်ပူၣ်ဝ့ၢ်ပူၤဃုၥ်ဒီးဒူသဝီလၢအိၣ်ဘူးဖဲန့ၣ်သ့ၣ်တဖၣ်ဆဲးအိၣ်တဘူၣ်လၢၤဘၣ် အါဒၣ်တက့ၢ်ဘၣ်ဃ့ၢ်ထီၣ်ဟးအိၣ်ဝဲလၢတၢ်ဘံၣ်တၢ်ဘၢလီၢ်ဒီး တနီၤန့ၣ်အိၣ်ဒၣ်အိၣ်ခိးကွၢ်အဟံၣ်အဃီအတၢ်လီၢ်တၢ်ကျဲအိၣ်ဝဲလၢ တၢ်ပျံၤ တၢ်ဖုးတၢ်ဘၣ်ယိၣ်ဘၣ်ဘှီအပူၤဒ်န့ၣ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.