Home တၢ်ကစီၣ် ကဘီယူၤလဲၤခးလီၤတၢ်တနံၤဃီလၢ(သုးက့ ၄)ဒီး(သုးက့ ၅)ဟီၣ်ကဝီၤ, ကၠိဖိသံ(၂)ဂၤဒီးဘၣ်ဒိဘၣ်ထံး(၁၀)ဂၤ

ကဘီယူၤလဲၤခးလီၤတၢ်တနံၤဃီလၢ(သုးက့ ၄)ဒီး(သုးက့ ၅)ဟီၣ်ကဝီၤ, ကၠိဖိသံ(၂)ဂၤဒီးဘၣ်ဒိဘၣ်ထံး(၁၀)ဂၤ

0
10

လါနိၣ်ဝ့ဘၢၣ် ၁၇ သီ, ၂၀၂၆ နံၣ်, ခ့ၣ်အဲးစံၣ်

ဖဲ(အၣ်စံၣ်ယၣ်)ထံကီၢ်မၤဝဲတၢ်အိၣ်ဖှိၣ်ဖးဒိၣ်အကတီၢ်အံၤ မဟါတနံၤဃီန့ၣ်သုးမိၤစိရိၤသူဝဲဒၣ်ကဘီယူၤဒုးသုးလဲၤခးလီၤဝဲတၢ် လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒဝဲၢ်ကီၢ်ရ့ၣ်(သုးက့ ၄)ဒီး မုၢ်တြီၢ်ကီၢ်ရ့ၣ် (သုးက့ ၅) ဟီၣ်ကဝီၤပူၤအဃိ ပှၤကၠိဖိသံဝဲ(၂)ဂၤ, ကမျၢၢ်ဃုၥ်ဒီးဖိသၣ်ဘၣ်ဒိဘၣ်ထံးဝဲ(၁၀)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.

ဖဲမဟါလါနိၣ်ဝ့ဘၢၣ် ၁၆ သီ မုၢ်ဃ့ၢ်လီၤ ၂း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် သုးမီၤစိရိၤကဘီယူၤလဲၤတ့ၢ်လီၤဝဲမ့ၣ်ပိၢ်လၢ မုၢ်တြီၢ်ကီၢ်ရ့ၣ်(သုးက့ ၅) ဘုအါဒၢကရူၢ် ဘုအါဒၢသဝီ ခရံၥ်ဖိတၢ်ဘါယွၤသရိၥ် ဒီး လီဖျးသ့ၣ်သဝီတဖၣ်အံၤအပူၤအဂ့ၢ်န့ၣ် သ့ၣ်ညါဘၣ် န့ၣ်လီၤ.

ကဘီယူၤအတၢ်လဲၤခးလီၤတၢ်လၢ ဘုအါဒၢ တၢ်ဘါယွၤသရိၥ်ဘျီဝဲအံၤအခါန့ၣ် ဖိသၣ်ပိၥ်ခွါ(၁၂)နံၣ်ဃုၥ်ဒီးကၠိဖိမုၣ်လၢအဂၤတဂၤ သံကွံဝဲဖဲတၢ်ကဲထီၣ်သးအလီၢ်န့ၣ်တဘျီဃီဒီး ဘၣ်ဒိဘၣ်ထံးစ့ၢ်ကီးဝဲ(၈)ဂၤအဂ့ၢ်န့ၣ် သ့ၣ်ညါဘၣ်လၢ(The Reporter) ကၠီၣ်တဲၣ်တၢ်ကစီၣ်သန့ပၥ်ဖျါဝဲအသိး န့ၣ်လီၤ.

“ပှၤကၠိဖိန့ၣ်အသံ(၂)ဂၤ ဒီး မ့မ့ၢ်လၢအဘၣ်ဒိဘၣ်ထံးန့ၣ်(၈)ဂၤ. ပှၤဘၣ်ဒိတဖၣ်အံၤအါဒၣ်တက့ၢ်လၢအနးလီၤ” အဂ့ၢ်န့ၣ် လီၢ်ကဝီၤကမျၢၢ်လၢအိၣ်ဟီၣ်ကဝီၤပူၤဖဲန့ၣ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

ဒ်လီၢ်ကဝီၤတၢ်ကစီၣ်ပၥ်ဖျါဝဲအသိးန့ၣ် ကဘီယူၤအတၢ်လဲၤခးလီၤတၢ်လၢတၢ်လီၢ်ခံတီၤအံၤန့ၣ် ဘုအါဒၢ တၢ်ဘါယွၤသရိၥ်ဃုၥ်ဒီး ကၠိတီၤဒၢး,ဘီဒၢၣ်တၢ်သူၣ်ထီၣ်တစှၤန့ၢ်(၄)ဖျၢၣ်ဟးဂီၤဝဲခဲလၢၥ်ဃၣ်ဃၣ်ဒီး ဘၣ်ဆၣ်မ့မ့ၢ်လၢလီဖျးသ့ၣ်သဝီကဘီယူၤအတၢ်လဲၤ ခးလီၤတၢ်န့ၣ် တၢ်သံတၢ်ဘၣ်ဒိဘၣ်ထံးတအိၣ်ဝဲဘၣ်အဂ့ၢ်န့ၣ် စံးဝဲဒၣ်န့ၣ်လီၤ.

မုၢ်တြီၢ်ကီၢ်ရ့ၣ်ပူၤ ဖဲတလါအံၤလါနိၣ်ဝ့ဘၢၣ်ထီၣ် ၃ သီအခါန့ၣ်စ့ၢ်ကီး လၢလူၤသီကီၢ်ဆၣ် ပ့က့ကရူၢ် ဒ့ၣ်ဘူးနိၣ် ဒီး လဲၢ်နၢ်ဒၢသဝီ (၂)ဖျၢၣ်အံၤအပူၤ ကဘီယူၤဒီးဒြိလဲၤတ့ၢ်လီၤဝဲမ့ၣ်ပိၢ်အါအါဂီၢ်ဂီၢ်အဃိ လံၥ်စီဆှံကၠိဖိပိၥ်မုၣ်သံဒံးဝဲ(၂)ဂၤဒီး ဘၣ်ဒိဘၣ်ထံးတစှၤန့ၢ် (၈)ဂၤကဲထီၣ်ဒံးဝဲန့ၣ်လီၤ.

တကးဒံးဘၣ်မဟါကဘီယူၤလဲၤခးလီၤတၢ်လၢ(သုးက့ ၅)ဟီၣ်ကဝီၤပူၤဝံၤတနံၤဃီဖဲဟါခီ ၃း၀၀ နၣ်ရံၣ်အဆၢကတီၢ်န့ၣ် သုးမီၤစိရိၤ(K8W Jet fighter)ကဘီယူၤခံဘ့ၣ် လဲၤတ့ၢ်လီၤဝဲပီၣ်(၂၅၀)မ့ၣ်ပိၢ် ၄ ဖျၢၣ်လၢဘျံးဒဝဲၢ်ကီၢ်ရ့ၣ်(သုးက့ ၄) ကစၢၢ်ဒိၣ် ကီၢ်ဆၣ် တီၤပၠီၣ်ကရူၢ် ဝၣ်ကပီ(ဝင်းကဖော်)ဒီးထံဃ့သဝီပူၤန့ၣ်လီၤ.

ဒီးကဘီယူၤအတၢ်လဲၤခးလီၤတၢ်ဘျီဝဲအံၤ ကမျၢၢ်သးစၢ်ပိၥ်ခွါ(၁၈)နံၣ်တဂၤဒီးပိၥ်မုၣ်(၇၃)နံၣ်ခံဂၤအံၤဘၣ်ဒိဘၣ်ထံးအမဲၥ်ညါ ဟံၣ်တၢ်သူၣ်ထီၣ်ဟးဂီၤစ့ၢ်ကီးဝဲ(၃)ဖျၢၣ်အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဒၣ်ဒီး ဒ်န့ၣ်အသိးဝၣ်ကပီသဝီလၢကဘီယူၤ လဲၤခးလီၤတၢ်အံၤဖဲ ၁၅ သီအနံၤစ့ၢ်ကီးကဘီယူၤလဲၤတ့ၢ်လီၤဒံးဝဲမ့ၣ်ပိၢ်ဒံးန့ၣ်လီၤ.

(သုးက့ ၄ )ဒီး(သုးက့ ၅)အမဲၥ်ညါ ဖဲမဟါ ၁၆ သီတနံၤဃီ လၢတလၢၤကီၢ်စဲၣ် မိၣ်ကီၢ်သီပၣ်တံၣ်(NMSP)တၢ်ပၢဟီၣ်ကဝီၤ ဖလၤခၠီဝၣ်(ဖလံချောင်း၀)၊ ကရ့ၣ်နံၣ်ကီၢ်စဲၣ် ဒံမီၣ်စိၤကီၢ်ဆၣ် ဒီး ရခၢၣ်ကီၢ်စဲၣ် ကၠီၣ်တီၤဝ့ၢ်တကပၤန့ၣ်စ့ၢ်ကီး သုးမီၤစိရိၤအဒြိဒီး ကဘီယူၤလဲၤတ့ၢ်လီၤ ဝဲမ့ၣ်ပိၢ်အါအါဂီၢ်ဂီၢ်အဃိ တၢ်လီၢ်သၢတီၤအံၤကၠိတီၤဒၢး,တၢ်ဘါယွၤသရိၥ်,ဟံၣ်ဟးဂီၤဝဲအါမးအသိး ကမျၢၢ် တစှၤန့ၢ်(၃)ဂၤသံဝဲ ဒီးဘၣ်ဒိဘၣ်ထံးစ့ၢ်ကီးဝဲအဂၤ(၂၀)ဘျဲၣ်န့ၣ်လီၤ.

သုးမီၤစိရိၤအံၤတုၤကဒီးလၢ(၄၉)ဝီတဝီ အၣ်စံၣ်ယၣ်ထံကီၢ်တၢ်အိၣ်ဖှိၣ်အံၤဒၣ်လဲၥ်တၢ်ကွဲမုၥ်ဝဲတအိၣ်ဒံးဘၣ်အသိး လၢတကပၤ မ့ဘၣ်ကွၢ်ဆၢၣ်မဲၥ်ဝဲထံဂုၤကီၢ်ဂၤအတၢ်ဆီၣ်သနံးဒ် လဲၣ်ဘၣ်ဆၣ် တုၤလၢခဲအံၤတပဲၥ်ဖးနီၤဖးဝဲအဒုၣ်အဒါဒီး ကမျၢၢ်ဒူသဝီ တၢ်ဘါယွၤ သရိၥ်,သီခါဖၠၣ်,ကၠိတၢ်သူၣ်ထီၣ်အံၤလၢၤဘၣ် မ့မ့ၢ်တခီဆဲးပၥ်ဒံးဝဲတၢ်ခးပနီၣ် မၤထီဒါဝဲဟီၣ်ခိၣ်ဒီဘ့ၣ်သုးဂ့ၢ်ဝီ အကွီၣ်မ့ၣ် သ့ၣ်တဖၣ်အံၤအဖၢမုၢ်န့ၣ်လီၤ.