ကရ့ၣ်နံၣ်ကီၢ်စဲၣ်လါအီးထိဘၢၣ်တလါအတီၢ်ပူၤ သုးမီၤစိရိၤမၤထီဒါပှၤဂ့ၢ်ဝီခွဲးယၥ်(၃၀)ဘျဲၣ်ဒီး ကမျၢၢ်သံဘၣ်ဒိ(၃၆)ဂၤ

လါနိၣ်ဝ့ဘၢၣ် ၆ သီ, ၂၀၂၆ နံၣ်, ခ့ၣ်အဲးစံၣ်

ကရ့ၣ်နံၣ်ကီၢ်စဲၣ်ဟီၣ်ကဝီၤ လါအီးကထိဘၢၣ် ၁ သီတုၤလၢ ၃၁ သီလၢတလါအတီၢ်ပူၤ သုးမီၤစိရိၤမၤထီဒါကဒီးဝဲ ပှၤဂ့ၢ်ဝီခွဲးယၥ် (၃၂)ဘျီအဃိ ကမျၢၢ်ဃုၥ်ဒီးဖိဒံဖိသၣ်သံဝဲ(၈)ဂၤဒီး ဘၣ်ဒိဘၣ်ထံးဝဲ(၂၈)ဂၤအဂ့ၢ်န့ၣ် ကရ့ၣ်နံၣ်ဂ့ၢ်ဝီခွဲးယၥ်ကရူၢ်(KnHRG) ထုးထီၣ်ပၥ်ဖျါဝဲ န့ၣ်လီၤ.

ဖဲၤခိၤ,ဒံမီၣ်စိၤ,လွဲၤကီၤ,ဖရူၤစိၤ,ဘီလ်ခဲ ဒီးရှါတီကီၢ်ဆၣ်ဟီၣ်ကဝီၤအပူၤ သုးမီၤစိရိၤလဲၤတ့ၢ်လီၤဝဲမ့ၣ်ပိၢ်ဒီးကဘီယူၤ အိၣ်ဝဲ (၁၀)ဘျီ, ဒြိ(၁၄)ဘျီဒီး ခးလီၤဝဲကျိဖးဒိၣ်(၅)ဘျီ, ဟီၣ်လၥ်မ့ၣ်ပိၢ်ပိၢ်ထီၣ်(၂)ဘျီဒီး ဒွဲၣ်အူအီၣ်ဝဲကမျၢၢ်ဟံၣ်ကဲထီၣ်ဝဲ(၁)ဘျီ အဂ့ၢ်န့ၣ် သ့ၣ်ညါဘၣ်န့ၣ်လီၤ.

ခီဖျိလၢသုးမီၤစိရိၤအတၢ်မၤထီဒါပှၤဂ့ၢ်ဝီခွဲးယၥ်သ့ၣ်တဖၣ်အံၤအဃိ တလါအတီၢ်ပူၤကမျၢ်ပိၥ်ခွါ(၃)ဂၤ,ပိၥ်မုၣ်(၂)ဂၤ,ဖိသၣ်(၃)ဂၤ ခဲလၢၥ်(၈)ဂၤသံဝဲဒၣ်ဒီး လၢန့ၣ်အမဲၥ်ညါဘၣ်ဒိဘၣ်ထံးစ့ၢ်ကီးဝဲ(၂၈)ဂၤ မ့ၢ်ဝဲကမျၢၢ်ပိၥ်ခွါ(၁၇)ဂၤ,ပိၥ်မုၣ်(၅)ဂၤ,ဖိသၣ်(၆)ဂၤ အဂ့ၢ်န့ၣ် KnHRG လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.

ဒီးလီၢ်ကဝီၤကမျၢၢ်လၢအသံဘၣ်ဒိဘၣ်ထံးသ့ၣ်တဖၣ်အံၤအါဒၣ်တက့ၢ်သံဘၣ်ဒိဘၣ်ထံးခီဖျိလၢကဘီယူၤဒီး ဒြိ အဃိလီၤအဂ့ၢ်န့ၣ် စံးစ့ၢ်ကီးဝဲန့ၣ်လီၤ.

ကရ့ၣ်နံၣ်ကီၢ်စဲၣ်ဟီၣ်ကဝီၤလၢအမ့ၢ် ရှါတီ,ဖါဆီဒီးမဲၤစဲၣ်ကီၢ်ဆၣ်တဖၣ်အပူၤ စးထီၣ်လၢလါအီးကထိဘၢၣ် ၁၈ သီ သုးမီၤစိရိၤ မၤအါထီၣ်ကဒီးဝဲသုးတၢ်ပၢတၢ်ြပးဟီၣ်ကဝီၤလၢအသီ(၉၀)ဝံၤလီၢ်ခံ ပၥ်ဝဲတၢ်ခးပနီၣ်လဲၤခးလီၤတၢ်ဒီးဒြိ,ကဘီယူၤလၢလွဲၤကီၤဝ့ၢ် မုၢ်ထီၣ် ပှၤလီၢ်အိၣ်ကမှံအိၣ်ဆိးလီၢ်အိၣ်ထီၣ်ဝဲတလီၢ်လီၢ်အဂ့ၢ်န့ၣ် (KnHRG)စံးဝဲန့ၣ်လီၤ.

တကးဒံးဘၣ်အမဲၥ်ညါခီဖျိလၢသုးမီၤစိရိၤအကျိဖးဒိၣ်,ဒြိဒီးကဘီယူၤအံၤအဃိစ့ၢ်ကီး တလါအတီၢ်ပူၤ ကမျၢၢ်ဟံၣ်(၂၁)ဖျၢၣ်, (ကၠိ(၂)ဖျၢၣ်,သိလ့ၣ်,ဆဲးကၢး(၁၃)ခိၣ်,ကျီးပူၤတၢ်ဖံးအီၣ်မၤအီၣ်လီၢ်(၁၁)လီၢ်,ကျဲ(၂)ဘိဒိးတၢ်ဖိတၢ်လံၤလၢအဂၤ(၁၀)ခါဟးဂီၤ ဘၣ်ဒိဘၣ်ထံးဝဲဒၣ်န့ၣ်လီၤ.

လၢတၢ်န့ၣ်အဃိလၢကမျၢၢ်ထံဖိကီၢ်ဖိအဖီခိၣ်ကလံၤကျါတၢ်ထီၣ်ဒုးလၢသုးမီၤစိရိၤသူဝဲကိးမုၢ်နံၤဒဲးဃၣ်ဃၣ်အံၤဒ်သိးကကတၢၢ် ကွံၥ်အဂီၢ် ကပၥ်ပနီၣ်ဝဲဟီၣ်ကဝီၤလၢပူၤဖျဲးဒီးကဘီယူၤ(No Fly Zone),ကတြီဝဲတၢ်ဆါန့ၢ်ဝဲသုးမီၤစိရိၤကဘီယူၤသိ, စုကဝဲၤ ပီးလီ တကးဒံးဘၣ် ကဖီၣ်ဃံးဝဲသုးမီၤစိရိၤခိၣ်နၢ်ဃုၥ်ဒီးမုၢ်ကျိၤဝဲၤကွၥ်လၢအဘၣ်ဃးဒီးသုးမုၢ်ဒိၣ်အံၤတဖၣ်အဂ့ၢ်န့ၣ် KnHRG ဃ့ထီၣ်ကဒီးဝဲထံဂုၤ ကီၢ်ဂၤန့ၣ်လီၤ.

ကရ့ၣ်နံၣ်ကီၢ်စဲၣ်အပူၤ အပူၤကွံၥ်လါယူၤလံ,လါအီကူး,လါစဲးပထ့ဘၢၣ်လၢ(၃)လါအတီၢ်ပူၤအံၤန့ၣ် ခီဖျိလၢ သုးမီၤစိရိၤအကျိဖး ဒိၣ်,ဒြိဒီးကဘီယူၤအဃိ လီၢ်ကဝီၤကမျၢၢ်သံဝဲ(၂၅)ဂၤ,ဘၣ်ဒိဘၣ်ထံးဝဲ(၁၀၁)ဂၤဒီး တၢ်သူၣ်ထီၣ်(၂၁၂)ဖျၢၣ် ဟးဂီၤဘၣ်ဒိဘၣ်ထံး ဒံးဝဲဒၣ်န့ၣ်လီၤ.