လါနိၣ်ဝ့ဘၢၣ် ၅ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် လၢပယီၤသုးမၤဆူၣ်ထီၣ် ဝဲကလံၤ ကျါတၢ်ဟူးတၢ်ဂဲၤအံၤ ကျိဖးဒိၣ်ဒီးဒြိအဃိ ကမျၢၢ်ပိၥ်မုၣ်လၢအဒၢန့ၢ်ဝဲ(၄)လါတဂၤသံဝဲဒီး ဘၣ်ဒိဘၣ်ထံး(၇)ဂၤ အဂ့ၢ်န့ၣ် သ့ၣ်ညါဘၣ်လၢဒူသဝီပှၤဘၣ်မူ ဘၣ်ဒါအအိၣ်န့ၣ်လီၤ.
ဖဲလါနိၣ်ဝ့ဘၢၣ် ၃ သီအနံၤန့ၣ် သုးမီၤစိရိၤပျၢ်ထီၣ်ဝဲဒြိတဘ့ၣ်လဲၤတ့ၢ်လီၤဝဲဆူ ပလိၥ်ခံ(ဇီးပြောင်း)ကရူၢ် ပလိၥ်ခံ-၁ သဝီပူၤ ဒီး ဖဲန့ၣ်ကမျၢၢ်ပိၥ်မုၣ်(၁)ဂၤဃုၥ်ဒီး ပှၤဒီမါဝၤလၢအဂၤ(၂)ဂၤ ဘၣ်ဒိဘၣ်ထံးဝဲဒၣ်န့ၣ်လီၤ.
ပယီၤသုးလဲၤတ့ၢ်လီၤဒြိမ့ၣ်ပိၢ်ကဲထီၣ်သးဖဲန့ၣ်ဝံၤမုၢ်ဆ့ၣ်ထီၣ်မၤကဒီးဖဲမဟါလါနိၣ်ဝ့ဘၢၣ် ၄ သီအနံၤန့ၣ်စ့ၢ်ကီး ပယီၤသုး ခးလီၤကဒီးကျိဖးဒိၣ်လၢပလိၥ်ခံ-၁ သဝီပူၤအဃိ မၣ်စူၣ်မိၤအီၤ(စုမွန်အောင်) ၂၉ နံၣ်လၢအိၣ်ဒီးအဟုးအသးန့ၢ်ဝဲ (၄)လါ အံၤသံကွံၥ်ဝဲတဘျီဃီဖဲတၢ်ကဲထီၣ်သးအလီၢ်န့ၣ်ဒီး ဘၣ်ဒိစ့ၢ်ကီးပှၤလၢအဂၤ(၄)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ပှၤလၢအဘၣ်ဒိ(၄)ဂၤန့ၣ်မ့ၢ်ဝဲ အခဲၤသဝီဖိ အူစိသါ(၆၇)နံၣ်, ဒီၤဆူၣ်(၆၆)နံၣ် ဒီး ပလိၥ်ခံသဝီဖိ အူ၀့သ့(၅၀)နံၣ်ဒီး ဒီၤတ့ၤတ့ၤမူၤ(၄၀)နံၣ်သ့ၣ်တဖၣ်အံၤန့ၣ်လီၤ.
ဒ်န့ၣ်အသိးဖဲမဟါတၢ်တနံၤဃီန့ၣ်စ့ၢ်ကီး လၢဆီသုးခံကရူၢ် ခမီၣ်ခွ့ၤတကပၤန့ၣ် ပယီၤသုးဟဲထီၣ်တၢ်ဒုးကဲထီၣ် ဝဲဒီး ဖဲတဂီၤအံၤစ့ၢ်ကီးပယီၤသုးခးလီၤကျိဖးဒိၣ်တပယူၥ်ဃီအဂ့ၢ်န့ၣ် ပှၤလၢအဘူးဒီး(KNLA)တၢ်ပၢၢ်ဆၢကရူၢ်တဂၤ စံးဝဲ န့ၣ်လီၤ.
“ဖဲမုကၢးန့ၣ်ခးလီၤဝဲလဲးလိးလီၤ မ့ၢ်အလီၤတဲၥ်ဖဲလဲၣ်တကပၤလဲၣ်ဒုတသ့ၣ်ညါ. ခဲအံၤလၢခမီၣ်ခွ့ၤတကပၤန့ၣ် ပယီၤသုး ဟဲထီၣ်ဒီဒူၣ်. မဟါနါက့လၢညီၤတီၣ်တကပၤန့ၣ်တၢ်ဒုးကဲထီၣ်(၂)ဘျီညါ”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ် ဖဲတဂီၤအံၤ န့ၣ်လီၤ.
ပလိၥ်ခံသဝီလၢကမျၢၢ်သံဘၣ်ဒိဘၣ်ထံးကဲထီၣ်ခဲအံၤန့ၣ် တချုးတၢ်ကဲ ထီၣ်သးအံၤဒံးဘၣ်အပူၤကွံၥ်ဒြိ,ကျိဖးဒိၣ်,ကဘီယူၤ လဲၤခးလီၤတၢ်မ့အိၣ်ဝဲဘၣ်ဆၣ် စးထီၣ်ကဒါက့ၤဖဲအပူၤကွံၥ်လါစဲးပထ့ဘၢၣ် ၂၀ သီ လီၢ်ခံအံၤ ပယီၤသုးဟးခးလီၤနါစိၤ တၢ်ဟဲအါထီၣ်ဝဲဒၣ်ဒီး အပူၤကွံၥ်စ့ၢ်ကီးလၢသုးမီၤစိရိၤအတၢ်ဟူးတၢ်ဂဲၤအဃိ ဟီၣ်ကဝီၤဖဲန့ၣ်အပူၤကမျၢၢ်သံဘၣ်ဒိဘၣ် ထံးကဲ ထီၣ်အိၣ်ဝဲတလီၢ်လီၢ်န့ၣ်လီၤ.
တကီၢ်ခါခဲအံၤ(သုးက့ ၁)ဟီၣ်ကဝီၤဃုၥ်ဒီးကီၢ်ရ့ၣ်/သုးက့အဂၤတဖၣ်လၢ သုးမီၤစိရိၤအဲၣ်ဒိးက့ၤဒိၣ်စိကဒါက့ၤ ဝဲအံၤန့ၣ် လီၢ်ခံအံၤ တပၥ်လၢၤဝဲတၢ်ခးပနီၣ်ဆူတၢ်ပၢၢ်ဆၢကရူၢ်ကရၢအအိၣ်လၢၤဘၣ် မ့မ့ၢ်တခီပၥ်က့ၤဝဲဒၣ်လၢကမျၢၢ်ထံဖိကီၢ်ဖိ ဟဲအါထီၣ် ဝဲကွ့ၢ်ကွ့ၢ်အဃိ ကအိၣ်လၢတၢ်ဘံၣ်တၢ်ဘၢလီၢ်, ကဟးထီၣ်က့ၤ လီၤလၢတၢ်ပလီၢ်ပဒီပူၤအဂ့ၢ်န့ၣ် ခ့ၣ်အဲၣ်ယူၣ် ပှၤဘၣ်မူဘၣ်ဒါ ဒုးသ့ၣ်ညါဝဲကမျၢၢ်သ့ၣ်တဖၣ်အိၣ်ဝဲန့ၣ်လီၤ.