Home တၢ်ကစီၣ် တၢ်မ့ဆဲးဟ့ၣ်ဝဲတၢ်ဆီၣ်သနံးလၢကျဲအဘိဘိဘၣ်ဆၣ် ကၠါဖၠၣ်ရၤလီၤသးဟဲအါထီၣ်ကွ့ၢ်ကွ့ၢ်လၢ(DKBA)ဟီၣ်ကဝီၤပူၤ

တၢ်မ့ဆဲးဟ့ၣ်ဝဲတၢ်ဆီၣ်သနံးလၢကျဲအဘိဘိဘၣ်ဆၣ် ကၠါဖၠၣ်ရၤလီၤသးဟဲအါထီၣ်ကွ့ၢ်ကွ့ၢ်လၢ(DKBA)ဟီၣ်ကဝီၤပူၤ

0
12

လါနိၣ်ဝ့ဘၢၣ် ၁၈ သီ, ၂၀၂၆ နံၣ်, ခ့ၣ်အဲးစံၣ်

(DKBA)ဃုၥ်ဒီးအီၣ်လါကၠါဖၠၣ်လၢအိၣ်ကညီကီၢ်စဲၣ်ပူၤတဖၣ် ပှၤလၢအမၤဖျါထီၣ်ဒီးကျိၤကျဲလၢက့ၤဟံကဒါက့ၤစ့လၢတၢ်လံၣ်အီၣ် လီအီၣ်ဝဲန့ၢ်တဖၣ်အံၤန့ၣ် ကဟ့ၣ်ဝဲခိၣ်ဖးလၢအမဲရံၣ်ကၤစ့ဒီၣ်လၣ်(၁၀)ကကွဲၢ်အဂ့ၢ် လါနိၣ်ဝ့ဘၢၣ် ၁၆ သီအနံၤန့ၣ် တၢ်မ့ထုးထီၣ် ပၥ်ဖျါကဒီးဝဲအသီတဘျီဘၣ်ဆၣ် လၢကညီတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ဟီၣ်ကဝီၤအပူၤန့ၣ် ကၠါဖၠၣ်တၢ်သူၣ်ထီၣ်အသီသ့ၣ်တဖၣ်ဟဲအါထီၣ်ဝဲ ကွ့ၢ်ကွ့ၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဒ်န့ၣ်အသိးဖဲလါနိၣ်ဝ့ဘၢၣ် ၁၆ သီ ကီၢ်အမဲရကၤ ဖဲၣ်ဒရၢၣ်ပဒိၣ်(Jeanine Ferris Pirro) ထံၣ်လိၥ်သးဒီး ကီၢ်ကၠီၣ်တဲၣ်ပၢၤကီၢ် ခိၣ် (Pol. Gen. Samran Nualma)အခါန့ၣ်စ့ၢ်ကီး ဒ်သိးကၠါဖၠၣ်လၢအပညိၣ် လံၣ်အီၣ်လီအီၣ်ဝဲကီၢ်အမဲရကၤထံဖိကီၢ်ဖိ အကျိၣ် အစ့အံၤကလီၤမၢ်ကွံၥ်အဂီၢ် ကမၤပၥ်ဖှိၣ်မၤသကိး,မၤဆူၣ်ထီၣ်ဝဲတၢ်ဟူးတၢ်ဂဲၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဒ်ကီၢ်အမဲရကၤထုးထီၣ်ပၥ်ဖျါဝဲအသိးန့ၣ် ထဲဒၣ်လၢ(၂၀၂၅)နံၣ်အတီၢ်ပူၤ လၢကလံၤထံးအ့ရှါဟီၣ်ကဝီၤပူၤအီၣ်လါကၠါဖၠၣ်တၢ်ဖံး တၢ်မၤအံၤအဃီ ကီၢ်အမဲရကၤထံဖိကီၢ်ဖိ အကျိၣ်အစ့ဆှူကွံၥ်လီၤမၢ်ကွံၥ်ဝဲ ဒီၣ်လၣ်(၇.၂) ဘံၣ်လံၣ် ယၢၣ်ဘျဲၣ် အဂ့ၢ်န့ၣ် စံးဝဲန့ၣ်လီၤ.

ဘၣ်ဆၣ်အပူၤကွံၥ်လါအ့ဖြ့ၣ်လၢကီၢ်အမဲရကၤတၢ်ဆီၣ်သနံးတၢ်ထုးထီၣ်လံၥ်ဘိးဘၣ်ရၤလီၤအံၤအဃိ ကၠါဖၠၣ်တၢ်ဖံးတၢ်မၤလီၢ်လၢ အိၣ်ဆီလီၤသးဖဲ DKBA တၢ်ပၢ ကၠီးခဲး-ဖလူဟီၣ်ကဝီၤအပူၤတဖၣ်အံၤ တၢ်သုးကွံၥ်ဝဲဆူ ဆိၣ်စံမၠဲၣ်, မီၣ်လီၣ်အံးကစၢၢ်ခီၣ်ထံး တုၤဃီၤဝဲဆူ(ကၠၤအ့စ့ၣ်ကၠံ)ဃုၥ်ဒီးတၢ်လီၢ်လၢအဂၤတဖၣ်အိၣ်ဒံးဝဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.

ဒီးလၢအတကပၤထံဂုၤကီၢ်ဂၤဟ့ၣ်ဝဲတၢ်ကဆီၣ်သနံးအိၣ်ဝဲအကပၤကပၤဘၣ်ဆၣ် (DKBA)ဟီၣ်ကဝီၤအပူၤကၠါဖၠၣ်တၢ်ဖံးတၢ်မၤ သ့ၣ်တဖၣ်အံၤရၤလီၤသးဟဲအါထီၣ်ဝဲ ဒီးတကးဒံးဘၣ် ဆဲးတ့ထီၣ်ဘှီထီၣ်ဝဲတၢ်သူၣ်ထီၣ်သ့ၣ်တဖၣ်အါမးအဂ့ၢ်န့ၣ် လီၢ်ကဝီၤ ပှၤဘၣ် မူဘၣ်ဒါစံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်အိၣ် အသိး ဟီၣ်ကဝီၤတၢ်ကစီၣ်ဃုၥ်ဒီးကၠီၣ်တဲၣ်တၢ်ကစီၣ်သန့တဖၣ် ပၥ်ဖျါထီၣ်ဝဲ ဒၣ်အိၣ်တလီၢ်လီၢ်န့ၣ်လီၤ.

ဘၣ်ဃးတၢ်ဂ့ၢ်အံၤလီၢ်ခံကတၢၢ်တၢ်အိၣ်သးတဖၣ်န့ၣ် လီၢ်ကဝီၤပှၤဘၣ်မူဘၣ်ဒါလၢတအဲၣ်ဒိးပၥ်ဖျါအမံၤတဂၤစံးဝဲလၢ “ခဲအံၤ လၢသ့ၣ်ဘီဘိသဝီကပၤ ဝၣ်မံၤထၣ်, စွ့ၤအ့မၠဲၤ,ဆိၣ်စံမၠဲၣ်,တနီးထၣ်န့ၣ်အဝဲလဲၣ်လဲၣ်လီၤ.ခဲအံၤ ဆဲးတ့ဒံးရုၢ်ရုၢ်လီၤ လၢယိၤကီၢ် တကပၤ သိလ့ၣ်တဖၣ်ခီဝ့ၢ်ခီဝီၤ ဖဲန့ၣ်ကိးမုၢ်နံၤဒဲးလီၤ. တၢ်ဖံးတၢ်မၤတဖၣ်အံၤ တပတုၥ်သးဘၣ်အမဲၥ်ညါန့ၣ် ခဲအံၤဟီၣ်ကဝီၤ ပူၤဖဲအံၤန့ၣ်ကၠါဖၠၣ် ရၤလီၤသးပှဲၤလၢၥ်လံဟဲအါထီၣ်မၢ်မၢ်လီၤ. အပူၤကွံၥ်ဟီၣ် ကဝီၤတၢ်လီၢ်တတီၤဒီးတတီၤန့ၣ်နဟးမး တဘူၣ်ဘၣ်. ခဲအံၤတမ့ၢ်ဒ်န့ၣ်လၢၤဘၣ်စးထီၣ် ဖဲသ့ၣ်ဘီဘိတီနီၢ်ကၠိ တလၢထီၣ်ကျဲဒီတကျိၤန့ၣ် မ့ၢ်ဟိၤထဲဧါ,အိၣ်ခဲလၢၥ်လီၤ. နကွၢ်တၢ်သ့ၣ် တဖၣ်အံၤ နသးဟးဂီၤလၢၥ်” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.

ဒီးလၢတၢ်ဖံးတၢ်မၤသ့ၣ်တဖၣ်အံၤအဃိ လီၢ်ကဝီၤကမျၢၢ်သ့ၣ်တဖၣ်မ့တအဲၣ်ဒိးတူၢ်လိၥ်ဝဲဘၣ်ဆၣ် ပျံၤဘၣ်ဝဲတၢ်ဒီး ဒ်န့ၣ်အသိး ဟီၣ်ကဝီၤလၢကၠါဖၠၣ်အိၣ်ဆီလီၤသးအံၤ အိၣ်ဝဲဒၣ်လၢ(DKBA)ဒီး(ခ့ၣ်အဲၣ်ယူၣ်)ဟီၣ်ကဝီၤပူၤအဃိ ဟီၣ်ကဝီၤခ့ၣ်အဲၣ်ယူၣ်ပှၤ ဘၣ်မူ ဘၣ်ဒါအကျါတနီၤ ဒိးန့ၢ်ဘၣ်ဝဲတၢ်အထိးအနါအိၣ်ဝဲအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢအိၣ်ဆၢထၢၣ်လၢ တၢ်မ့ၢ်တၢ်တီ အပူၤတဖၣ် ပဲၥ်ထံနီၤဖးစံးဝဲအိၣ် န့ၣ် လီၤ.

ဒ်န့ၣ်အသိးမ့ဘၣ်ကွၢ်လၢအတကပၤ ကၠါဖၠၣ်တၢ်သူၣ်ထီၣ်လၢအိၣ်စွ့ၤကိၣ်ကိၤ KNA သုးခိၣ်စီၤခၠ့ၣ်သူၤ အဟီၣ်ကဝီၤလၢ အဘၣ်ကွၢ်ဆၢၣ်မဲၥ်ဝဲထံဂုၤကီၢ်ဂၤတၢ်ဆီၣ်သနံးအံၤစ့ၢ်ကီး တုၤလၢတလါအံၤလါနိၣ်ဝ့ဘၢၣ် ၁၀ သီဘျဲၣ်အံၤတစု ဆဲးမၤဟးဂီၤလီၤ ပှီၢ်ဝဲအဂ့ၢ် သုးမီၤစိရိၤထုးထီၣ်ပၥ်ဖျါဝဲမ့အိၣ်ဘၣ်ဆၣ် တၢ်ဖံးတၢ်မၤတဖၣ်အံၤတၢ်သုးကွံၥ်အလီၢ်အကျဲဆူတၢ်လီၢ်အဂၤဒီး ဆဲးလဲၤ တရံးသး,ရၤလီၤအသးဟဲထီၣ်အါထီၣ်ဝဲဒၣ်စ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤ.