လါနိၣ်ဝ့ဘၢၣ် ၈ သီ, ၂၀၂၆ နံၣ်, ခ့ၣ်အဲးစံၣ်
ဖဲမဟါလါနိၣ်ဝ့ဘၢၣ် ၇ သီ ဂီၤခီအဆၢကတီၢ်န့ၣ် ပယီၤသုးဂံၢ်ဘါအါအါဂီၢ်ဂီၢ်ဟဲထီၣ်မၤန့ၢ်ဝဲခ့ၣ်အဲၣ်ယူၣ် ဒူသထူၣ်ကီၢ်ရ့ၣ် (သုးက့ ၁) ကၠဲးထိၣ်ကီၢ်ဆၣ်ပူၤ ကညီဒီကလုၥ်တၢ်ထူၣ်ဖျဲးသုးမုၣ်ဒိၣ်(KNLA) သုးရ့ၣ်-၃ သုးဝဲၤလီၢ်ခိၣ်သ့ၣ်တၢ်လီၢ် အဂ့ၢ်န့ၣ် သ့ၣ်ညါဘၣ် န့ၣ်လီၤ.
ဖဲအပူၤကွံၥ်လါနိၣ်ဝ့ဘၢၣ် ၄ သီအနံၤန့ၣ် ပယီၤသုးဂံၢ်ဘါ(၅၀၀)ဃၣ်ဃၣ်အံၤ နုၥ်လီၤဝဲဒၣ်ဆူတၢ်ပၢၢ်ဆၢ သုးကရူၢ်ဟီၣ်ကဝီၤ ခမီၣ်ခွ့ၤဟီၣ်ကဝီၤဝံၤ ထီၣ်မၤန့ၢ်ကွံၥ်ဝဲ(KNLA) သုးရ့ၣ်-၃ သုးဝဲၤလီၢ်ခိၣ်သ့ၣ်တၢ်လီၢ်ဘၣ်ဟဲအိၣ်ထီၣ် ဝဲဒ်အံၤ န့ၣ်လီၤ.
KNLA သုးရ့ၣ်-၃ ဝဲၤလီၢ်ခိၣ်သ့ၣ်တၢ်လီၢ်လၢပယီၤသုးဟဲထီၣ်န့ၢ်ဝဲခဲအံၤ အိၣ်ဆီလီၤသးလၢဆီသုးခံကရူၢ် ကီးကးသဝီဃၢၤဒီး သုးကလၢၤဝဲအံၤအိၣ်ဆီလီၤတ့ၢ်သးဖဲန့ၣ်တချုးလၢတၢ်စဲလီၤဝဲထံကီၢ်ဒီဘ့ၣ်တၢ်ပတုၥ်တၢ်ခးအံၤဒံးဘၣ်လံၤလံၤအခါလံအဂ့ၢ်န့ၣ် ကမျၢၢ်စံးဝဲဘၣ်ဆၣ် ပခ့ၣ်အဲးစံၣ်-ကညီတၢ်ကစီၣ်ပၥ်ဂၢၢ်ပၥ်ကျၢၤမၤလီၤတံၢ်ဝဲတန့ၢ်ဒံးဘၣ်န့ၣ်လီၤ.
ဘၣ်ဆၣ်ဖဲအပူၤကွံၥ်စှၤလါအခါန့ၣ် ခီဖျိသုးမီၤစိရိၤကဘီယူၤလဲၤခးလီၤတၢ်တပယူၥ်ဃီအဃိ သုးဖိသံၣ်ဖိလၢအိၣ်ဖဲန့ၣ် တဖၣ်သုးလီၢ်သုးကျဲတအိၣ်လၢၤဝဲဖဲန့ၣ်ဘၣ် အဂ့ၢ်န့ၣ် လီၢ်ကဝီၤကမျၢၢ်လၢအိၣ်ဘူးဖဲန့ၣ်တဂၤစံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
“တၢ်လီၢ်တခါန့ၣ် အပူၤကွံၥ်ကဘီယူၤလဲၤခးလီၤဒံးတၢ်တဘျီဒံး.အဃိပှၤသုးလီၢ်သုးကျဲန့ၣ် လၢလါအီကူးအခါန့ၣ်လံ. ပှၤအိၣ်တဘူၣ်လၢၤဘၣ်. ပှၤသုးက့ၤတၢ်ဖိတၢ်လံၤဘျီ ပှၤဟးထီၣ်လီၤ.ဖဲမဟါန့ၣ်အဝဲသ့ၣ်ဟဲထီၣ်အဃိ ပှၤခိးခးလၢ တၢ်ဘၢၣ်စၢၤ ဘၣ်ဆၣ် လၢအဝဲသ့ၣ်ဟဲထီၣ်တၢ်လီၢ်န့ၣ်ဟဲခးလီၤတဲဒီးကဘီယူၤအဃိ ပှၤမၤတန့ၢ်လၢၤဘၣ်ဘျီ အဟဲထီၣ်န့ၢ်ဝဲဒ်အံၤလီၤ” အဂ့ၢ်န့ၣ် စံးဝဲန့ၣ်လီၤ.
တချုးပယီၤသုးဟဲတုၤဒံးလၢ KNLA သုးရ့ၣ်-၃ သုးဝဲၤလီၢ်ခိၣ်သ့ၣ်တၢ်လီၢ်ဒံးဘၣ်ဒီး နုၥ်လီၤဖဲသုးကလၢၤတၢ်လီၢ်ပူၤအခါ န့ၣ် ဘၣ်တၢ်ခိးခးအဝဲသ့ၣ်အဃိ ပယီၤသုးတကပၤသံဘၣ်ဒိဘၣ်ထံးဝဲအါမးအဂ့ၢ်န့ၣ် ပှၤလၢဘူးဒီးတၢ်ပၢၢ်ဆၢသုးကရူၢ်တဂၤ စံးဝဲန့ၣ် လီၤ.
“ပှၤခးအီၤသံဖးအါဖိညါ.ဖဲအဝဲသ့ၣ်ကလဲၤထီၣ်သုးရ့ၣ်-၃ တၢ်လူၢ်အခါန့ၣ် ပှၤထုးအီၤဒီးမ့ၣ်ပိၢ်ဖဲန့ၣ်သံဖးအါဖိညါ. ပှၤခိးခးဖဲန့ၣ် တဘျီ. ဘၣ်ဒိဒုဖးအါညါဘၣ်ဆၣ်မၤလီၢ်တံၢ်တန့ၢ်ခဲလၢၥ်ဒံးဘၣ်. မ့ဝံၤဖဲအလဲၤဝၣ်နုၥ်သုးရ့ၣ်ပူၤန့ၣ်အယီၢ်ဘၣ်မ့ၣ်ပိၢ် အက့ၤယိး လီၤသးကအိၣ်လၢ(၆)ဂၤညါ.ယဆိမိၣ်မ့မ့ၢ်လၢအသံတဖၣ်န့ၣ်တက့ၤစိၥ်ဝဲဘၣ်”အဂ့ၢ်န့ၣ် စံးဝဲန့ၣ်လီၤ.
တကီၢ်ခါခဲအံၤပယီၤသုးထီၣ်န့ၢ် သုးရ့ၣ်-၃ သုးဝဲၤလီၢ်ခိၣ်သ့ၣ်တၢ်လီၢ်ဝံၤ ဆဲးလဲၤထီၣ်ဟူးဂဲၤတုၤဝဲဒၣ်လၢ ခၠီၣ်ဆီၣ် သဝီတကပၤလၢ အစီၤစုၤယံၤဝဲဒီး သုးရ့ၣ်တၢ်လီၢ်အံၤ(၃)တၢၣ်ဃၣ်ဃၣ်လံ န့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် တချုးပယီၤသုးဟဲထီၣ်မၤန့ၢ်ဝဲသုးရ့ၣ်-၃ ဝဲၤလီၢ်သ့ၣ်တၢ်လီၢ်အံၤဒံးဘၣ်အခါ ဖဲလါနိၣ်ဝ့ဘၢၣ် ၅ သီအနံၤန့ၣ် ဟီၣ်ကဝီၤ(PDF)တၢ်လီၢ်တတီၤလၢအိၣ်ဆီလီၤသးဖဲကမီၣ်ခွ့ၤသဝီ ဃၢၤအံၤ ပယီၤသုးထီၣ်မၤန့ၢ်ဒံး န့ၣ်လီၤ.
ဟီၣ်ကဝီၤပူၤဖဲန့ၣ်တချုးလၢပယီၤသုးဟဲထီၣ်ဒီး တုၤလၢအဟဲထီၣ်တုၤမဟါဟါခီတစု ပယီၤသုးခးလီၤဝဲကျိဖးဒိၣ်,လဲၤတ့ၢ်လီၤ တၢ်ဒီးဒြိမ့ၣ်ပိၢ်တကးဒံဘၣ် ပယီၤသုးကဘီယူၤလဲၤခးလီၤဝဲမ့ၣ်ပိၢ်တပယူၥ်ဃီအဂ့ၢ်န့ၣ် သ့ၣ်ညါဘၣ်န့ၣ်လီၤ.
ပှၤလၢဘူးဒီးတၢ်ပၢၢ်ဆၢသုးကရူၢ်တဂၤဃီဝဲန့ၣ် စံးဝဲလၢ“ခးကိးမုၢ်နံၤဒဲးလီၤ. ဖဲမဟါစ့ၢ်ကီးကဘီယူၤဟဲခးလီၤတၢ်လၢပယီၤသုး လဲၤထီၣ်အကျဲ တဖၣ်န့ၣ်ဝးဝးတရံးလီၤ.အဟဲခးလီၤတၢ်ခဲအံၤန့ၣ်ခးလီၤဝဲထဲလၢပီၣ်(၅၀၀)မ့ၣ်ပိၢ်လီၤ သီၣ်ကယၢ်မးလီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်- ကညီတၢ်ကစီၣ်န့ၣ်လီၤ.
ဖဲမဟါခံခီခံကပၤတၢ်ဒုးအပူၤ ပယီၤသုးတကပၤသံဘၣ်ဒိဘၣ်ထံးမ့အါဝဲဘၣ်ဆၣ်ဟီၣ်ကဝီၤ(KNLA)သုးပၥ်ဖှိၣ်တကပၤ တၢ်သံ ဘၣ်ဒိဘၣ်ထံးတအိၣ်ဝဲဘၣ်ဒီး လၢပယီၤသုးအတၢ်ဟဲထီၣ်နုၥ်လီၤဘျီဝဲအံၤခီဖျိပှၤဒိးန့ၢ်ဃၥ်တၢ်ကစီၣ်အဃိ လီၢ်ကဝီၤ ကမျၢၢ်သ့ၣ် တဖၣ်သုးဃၥ်အလီၢ်အကျဲဟးပလဲၥ်ဃၥ်သးအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်ဟီၣ်ကဝီၤတၢ်ကစီၣ်တနီၤပၥ်ဖျါဝဲအသိးန့ၣ် တၢ်ထီၣ်န့ၢ်သုးရ့ၣ်-၃ သုးဝဲၤလီၢ်ခိၣ်သ့ၣ်ဘျီဝဲအံၤ ပယီၤသုးမၤန့ၢ်ဝဲကျိချံပှၥ်သၣ် ပီးလီအိၣ်ဝဲတနီၤန့ၣ်လီၤ.
ဘၣ်ဃးတၢ်ကဲထီၣ်သးဘျီဝဲအံၤ ဒ်သိးကသ့ၣ်ညါအါထီၣ်ဘၣ်တၢ်အိၣ်သးလီၤတံၢ်လီၤဆဲးအဂီၢ် ပခ့ၣ်အဲးစံၣ်-ကညီကစီၣ်ဆဲးကျိး ဝဲသုးက့ပှၤဘၣ်မူ ဘၣ်ဒါ ဘၣ်ဆၣ်ဆဲးကျိးတန့ၢ်ဝဲဘၣ်န့ၣ်လီၤ.