Home တၢ်ကစီၣ် သုးဟံန့ၢ်ဆူၣ်ထံကီၢ်တၢ်စိတၢ်ကမီၤ(၅)နံၣ်ဘျဲၣ်အတီၢ်ပူၤ ကမျၢၢ်သံအိၣ်ထီၣ်တုၤလၢ(၁၂၀၀၀)ဘျဲၣ်အဂ့ၢ် ISP-Myanmar စံးဝဲ

သုးဟံန့ၢ်ဆူၣ်ထံကီၢ်တၢ်စိတၢ်ကမီၤ(၅)နံၣ်ဘျဲၣ်အတီၢ်ပူၤ ကမျၢၢ်သံအိၣ်ထီၣ်တုၤလၢ(၁၂၀၀၀)ဘျဲၣ်အဂ့ၢ် ISP-Myanmar စံးဝဲ

0
11

လါနိၣ်ဝ့ဘၢၣ် ၁၈ သီ, ၂၀၂၆ နံၣ်, ခ့ၣ်အဲးစံၣ်

ကီၢ်ပယီၤသုးဟံန့ၢ်ဆူၣ်ထံကီၢ်တၢ်စိတၢ်ကမီၤ ၅ နံၣ်ဘျဲၣ်အတီၢ်ပူၤ ခီဖျိတၢ်ဒုးတၢ်ယၤဒီးဖီၣ်စုကဝဲၤတၢ်သဘံၣ်သဘုၣ်အဃိ ကမျၢၢ်ထံဖိကီၢ်ဖိသံအနီၣ်ဂံၢ်အိၣ်ထီၣ်တုၤလၢ(၁၂,၀၀၀)ဘျဲၣ်အဂ့ၢ်န့ၣ် (Institute for Strategy and Policy-Myanmar) ထုးထီၣ်ပၥ်ဖျါ စံးဝဲန့ၣ်လီၤ.

ဒ်(ISP-Myanmar)အတၢ်ပၥ်ဖျါပူၤအိၣ်ဝဲအသိးန့ၣ် ကီၢ်ပယီၤပူၤစးထီၣ်လၢ(၂၀၂၁)လါဖ့ၤဘြူၤအါရံၤထီၣ် ၁ သီ သုးဟံန့ၢ်ဆူၣ် ထံကီၢ်တၢ်စိတၢ်ကမီၤတုၤလၢ တနံၣ်အံၤ(၂၀၂၆)လါအီးကထိဘၢၣ်လၢ(၅)နံၣ်ဘျဲၣ်အတီၢ်ပူၤအံၤ လၢတၢ်ဒုးတၢ်ယၤဒီးသုးမီၤစိရိၤ အတၢ်မၤထီဒါပှၤဟီၣ်ခိၣ်ဖိခွဲးယၥ်အံၤအဃိ ကမျၢၢ်ထံဖိကီၢ်ဖိသံပၥ်ဖှိၣ်အိၣ်ဝဲတစှၤန့ၢ်(၁၂,၈၉၃)ဂၤန့ၣ်လီၤ.

တကးဒံးဘၣ်ဖဲသုးဟံန့ၢ်တၢ်စိတၢ်မီၤကဲထီၣ်သီသီအခါ ကမျၢၢ်ထံဖိကီၢ်ဖိလၢအပၥ်ဖျါထီၣ်သးတဖၣ်ခီဖျိပယီၤသုးဖီၣ်ဝဲအိၣ်ဒီး ဖဲတၢ်က့ၤသမံသမိးအီၤလၢတၢ်သမံသမိးလီၢ်အခါ သံဝဲတစှၤန့ၢ်ဝဲ(၂,၁၈၃)ဂၤအဂ့ၢ်န့ၣ် (ISP-Myanmar)အတၢ်မၤနီၣ်အပူၤပၥ်ဖျါ ဝဲန့ၣ်လီၤ.

ကီၢ်ပယီၤပူၤစးထီၣ်လၢသုးဟံန့ၢ်တၢ်စိတၢ်ကမီၤတုၤလၢခဲအံၤ လၢကလုၥ်ဒူၣ်ဟီၣ်ကဝီၤဃုၥ်ဒီးခူဝ့ၢ်သ့ၣ်တဖၣ် အံၤအပူၤ တၢ်ဒုးကဲထီၣ်အိၣ်ဂ့ၤ,တအိၣ်ဂ့ၤ သုးမီၤစိရိၤအံၤသူဝဲကျိဒိၣ်,ဒြိဒီးကဘီယူၤလဲၤလီၤဝဲတၢ်လၢတၢ်ပၢၢ်ဆၢကရူၢ်ကရၢ အိၣ်ဆိးလီၢ်ဃုၥ်ဒီး ကမျၢၢ်ဒူသဝီ,တၢ်ဖံးအီၣ်မၤအီၣ်လီၢ်ကျဲအိၣ်ဝဲကိးမုၢ်နံၤဒဲးဃၣ်ဃၣ်န့ၣ်လီၤ.

ဟီၣ်ကဝီၤပူၤခီဖျိဒုးယၤတၢ်သဘံၣ်သဘုၣ်ဆဲးကဲထီၣ်ဒီးတၢ်ဘံၣ်တၢ်ဘၢအဃိ တၢ်ကီတၢ်ခဲအိၣ်လၢတၢ်ကနုၥ်လီၤဃိ ထံမၤနီၣ် မၤဃါအဖီခိၣ် ကမျၢၢ်ထံဖိကီၢ်ဖိသံအနီၣ်ဂံၢ်နီၣ်ဒွးလၢတၢ်ပၥ်ဖျါထီၣ်ဝဲခဲအံၤတဖၣ် ဒီးပျီပူၤဟီၣ်ခိၣ်မဲၥ်ဖံးခိၣ်န့ၣ်ဘၣ်သ့ၣ်သ့ၣ် ပှၤသံ အနီၣ်ဂံၢ်ကအါန့ၢ်ဝဲအံၤသ့ဝဲအဂ့ၢ်န့ၣ် (ISP-Myanmar)စံးဝဲန့ၣ်လီၤ.

ဘၣ်ဆၣ်မ့ဘၣ်ကွၢ်လၢ(AAPP)တၢ်မၤနီၣ်မၤဃါပူၤအသိးန့ၣ် ၂၀၂၁ သုးဟံန့ၢ်ထံကီၢ်တၢ်စိတၢ်ကမီၤတုၤလၢ တနံၣ်အံၤ ၂၀၂၆ တလါအံၤလါနိၣ် ဝ့ဘၢၣ် ၁၆ သီလၢတၢ်(၅)နံၣ်ဘျဲၣ်အတီၢ်ပူၤအံၤ လၢကျိဖးဒိၣ်,ကဘီယူၤဒီးတၢ်ထီၣ်ဒုးအကလုၥ်ကလုၥ်အဃိ ကမျၢၢ်ဃုၥ်ဒီးပှၤဟူးဂဲၤလၢဒံၣ်မိၣ်ခြ့ၣ်စံၣ်တဖၣ်သံပၥ်ဖှိၣ်အိၣ်ဝဲ(၈,၆၈၇) ဂၤ,ဘၣ်ဒိဘၣ်ထံးဝဲ(၃၀,၀၀၀)ဘျဲၣ် အဂ့ၢ်န့ၣ် ပၥ်ဖျါဝဲ ဒၣ်န့ၣ်လီၤ.