လါနိၣ်ဝ့ဘၢၣ် ၅သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ, အူးပၠၣ်ကညီဘၣ်ကီဘၣ်ခဲဒဲကဝီၤအပူၤ ပှၤဒဲကဝီၤဖိလၢ အမ့ၢ်ဝဲ ပှၤလိၣ်ဘၣ်တၢ်မၤ စၢၤ(V) ဒီးပှၤလိၣ်ဘၣ်တၢ်မၤစၢၤလီၤဆီဒိၣ် (MV) ကရူၢ်သ့ၣ်တဖၣ် အံၤ တလါအံၤ လါနိၣ်ဝ့ဘၢၣ်အပူၤ တၢ်ကဒိန့ၢ်ဝဲ ဘၣ်ကီဘၣ်ခဲဖိတၢ်ဂီၤ(ကးဒ်)တၢ်အုၣ်ကီၤသး လၢ ကၠီၣ်တဲၣ်ပၥ်ပနီၣ်ဝဲ တခါအဂ့ၢ်, သ့ၣ်ညါဘၣ်န့ၣ်လီၤ.
ဘၣ်ဃးဒီး တၢ်ကဒိန့ၢ်ဝဲ ဒဲကဝီၤဖိတဖၣ် တၢ်အုၣ်ကီၤသး တၢ်ဂီၤ(ကးဒ်) အဖီခိၣ် အူးပၠၣ်ဒဲကဝီၤခိၣ်(၂) စီၤနံၤဒိၣ် စံးဝဲဒ်အံၤန့ၣ်လီၤ.
“တၢ်ဂီၤန့ၣ်, ကကဲဝဲဒ်သိး တၢ်မၤနီၣ်မၤဃါ ပှၤဒဲကဝီၤဖိတဂၤအ (Refugee ID card) န့ၣ်လီၤ. ပလးသ့ၣ်တဖၣ်န့ၣ် တတဲဝဲလၢ အမ့ၢ်အနံၣ်(၁၀)တၢ်ဂီၤ ဒ်သိးပှၤလၢအိၣ်တၢ်ချၢတဖၣ်အသိးဘၣ်. ဘၣ်ဆၣ် တၢ်ကသူဝဲအီၤ အသးနံၣ်ကအိၣ်ဝဲ အနံၣ်(၁၀)ဒီး ကမ့ၢ်ဝဲ ဒ်သိး တၢ်မၤနီၣ်မၤဃါပှၤတဂၤအဂ့ၢ်အကျိၤလၢအ တမ့ၢ်လၢ လံၥ်လဲၢ်ပူၤလၢၤဘၣ် မ့မ့ၢ်တခီ ကမ့ၢ်က့ၤဝဲလၢ (ကးဒ်) တဘ့ၣ်အပူၤ ဒ်န့ၣ်မီၤနီၤ ”အဂ့ၢ် စံးဝဲန့ၣ်လီၤ.
(V)ဒီး(MV)ကရူၢ်ဖိလၢ တၢ်ကဒိန့ၢ်ဝဲ ဘၣ်ကီဘၣ်ခဲတၢ်အုၣ်ကီၤသး(ကးဒ်) သ့ၣ်တဖၣ်အံၤ ကဘၣ်မ့ၢ်ဝဲဒၣ်ထဲ ပှၤလၢအိၣ်ဒီး (၂၀၁၉) ကၠီၣ်တဲၣ်ပလး တၢ်နီၢ်ဂံၢ်(၁၃)ဖျၢၣ်သ့ၣ်တဖၣ် ဒီးတၢ်ပၥ်ပနီၣ်ဝဲ သးနံၣ်(၅)နံၣ် တုၤ (၇၀) ဘၢၣ်စၢၤ အဂ့ၢ်, သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ, တၢ်မၤဆိန့ၢ်ဝဲ ပှၤသ့ၣ်တဖၣ်အံၤတၢ်ဂီၤ ဝံၤအလီၢ်ခံ, လၢခံပတီၢ်တပီၢ်အဂီၢ် တၢ်နဲၣ်လီၤဝဲလၢ ဒဲကဝီၤကမံးတံၥ်, ကဝီၤခိၣ်နၢ်, ကူၣ်သ့/ဆူၣ်ချ့ပှၤမၤတၢ်ဖိဒီး ပှၤတဝၢ ပှၤမၤတၢ်ဖိတဖၣ် ကအိၣ်ကတီၤပၥ်သး အဂ့ၢ်, သ့ၣ်ညါဘၣ်န့ၣ်လီၤ.
လၢတၢ်ကဒိန့ၢ်ဝဲ ဒဲကဝီၤအပူၤ (V)ဒီး(MV) ကရူၢ်ခံဖု အတၢ်ဂီၤ(ကးဒ်)အဂီၢ် ဒ်ကၠီၣ်တဲၣ်(ပလး) ပှၤဘၣ်မူ ဘၣ်ဒါတဖၣ် နဲၣ်လီၤဝဲအသိး, တၢ်စးထီၣ်ထၢဝဲစရီလံဒီး တၢ်ကဒိဝဲဖဲ လါနိၣ်ဝ့ဘၢၣ်(၉)သီတုၤ(၁၃)လၢ (၅)သီအတီၢ်ပူၤအဂ့ၢ်, ဒဲကဝီၤပှၤဘၣ်မူဘၣ်ဒါတဖၣ် စံးဝဲန့ၣ်လီၤ.
တကတီၢ်ဃီ, တကီၢ်ခါခဲအံၤ အူးပၠၣ်ဒဲကဝီၤအပူၤ(V)ဒီး(MV) ကရူၢ် ပှၤလၢအိၣ်ဒီး (၂၀၁၉) ပလး နီၢ်ဂံၢ်(၁၃)ဖျၢၣ် တဖၣ် ပၥ်ဖှိၣ်သး အိၣ်ဝဲလၢ (၆၀၀)ဘျဲၣ်လံအသိး, တၢ်ထၢစရီ တလၢၥ်ဒံးဝဲဒၣ်ဘၣ်အဂ့ၢ်, သ့ၣ်ညါဘၣ်န့ၣ်လီၤ.
ဒ်န့ၣ်အသိး, တၢ်ဂီၤလၢ ကၠီၣ်တဲၣ်ပှၤဘၣ်မူဘၣ်ဒါတဖၣ် ကဒိန့ၢ်ဝဲ အူးပၠၣ်ဒဲကဝီၤဖိ လီၤဆီဒၣ်တၢ်(V)ဒီး(MV) သ့ၣ် တဖၣ်အံၤ တၢ်ဆိးကါဝဲအီၤလၢ တၢ်ဟးထီၣ်က့ၤလီၤ,တၢ်အိၣ်ဆူၣ်အိၣ်ချ့ ဒီး နီၢ်တဂၤ တၢ်လိၣ်ဘၣ်အဂီၢ် သ့ဝဲဘၣ် ဆၣ်, အိၣ်ဝဲဒီး တၢ်ပၥ်ပနီၣ်အသိး, ပှၤတဂၤလၢ်လၢ် လၢ မၤတဖိးသဲစး မၤကမၣ် တၢ်သိၣ်တၢ်သီတၢ်ဘျၢ န့ၣ် တၢ်ကထုးကွံၥ်ဝဲ အတၢ်ဂီၤ အဂ့ၢ်, ဒဲကဝီၤပှၤဘၣ် မူဘၣ်ဒါတဖၣ် စံးဝဲန့ၣ်လီၤ.