လါယနူၤအါရံၤ ၄သီ၊ ၂၀၁၉နံၣ်၊ ခ့ၣ်အဲးစံၣ်
တလၢၤကီၣ်စဲၣ်၊ ဘံလ့ကီၢ်ဆၣ် အလူလ့သ၀ီအပူၤ ကသံၣ်ဒၢးလီၢ်လၢတၢ်ပပာ်ပနီၣ်ဃာ်လၢအပူၤကွံာ်န့ၣ် ဒ်သိးကန့ၢ်အဂီၢ် သ၀ီဖိကမျၢၢ်တဖၣ် မၤ၀ဲတၢ်ဒုးသ့ၣ်ညါ တၢ်ကစီၣ်ဖိအမူးတခါဒီး ပာ်ဖျါထီၣ်ဃုာ်တၢ်ဘၣ်သးတၢ်ဟူးတၢ်ဂဲၤတခါ ဖဲလါယနူၤအါရံၤ၁သီအနံၤန့ၣ်လီၤႉ
ကသံၣ်ဒၢးအလီၢ်၀ဲန့ၣ်အခဲအံၤ ၦၤလၢလဲၤအိၣ်တဖၣ်တအဲၣ်ဒိးက့ၤဟ့ၣ်ကဒါက့ၤ၀ဲတၢ်လီၢ်၀ဲန့ၣ်ဘၣ်ဒီး အ၀ဲသ့ၣ်ဘၣ်ထုးထီၣ်ပာ်ဖျါ၀ဲ တၢ်ဘၣ်သးဒ်သိးအံၤန့ၣ်လီၤအဂ့ၢ်ၦၤတီခိၣ်ရိၣ်မဲတၢ်တဂၤလၢအမ့ၢ် အလူလ့သ၀ီဖိ ဒီၤနွဲးလ့တဲဘၣ် ခ့ၣ်အဲးစံၣ် ကညီတၢ်ကစီၣ်န့ၣ်လီၤႉ
“သ၀ီကသံၣ်ဒၢးအလီၢ်အံၤ ကဲထီၣ်သးယံာ်လံ၀ံၤမး အ၀ဲသ့ၣ်ဟဲအိၣ်၊ ၀ဲၤကျိၤတဖၣ်၊ ကရူၢ်ကရၢသ့ၣ်တဖၣ်ပာ်ဖှိၣ်ထီၣ်အသးဒီး မၤန့ၢ်၀ဲဟီၣ်ခိၣ်လံာ်တဖၣ်၊ တက့ၤဟ့ၣ်၀ဲ တၢ်လီၢ်အ၀ဲန့ၣ်ဘၣ်တအဲၣ်တၢ်ကက့ၤသူၣ်ထီၣ်၀ဲကသံၣ်ဒၢးဘၣ်ႉ ၀ဲၤကျိၤဘၣ်မူဘၣ်ဒါ တနီၤဟဲကွၢ်၀ဲဒီးၦၤဟဲအိၣ်တဖၣ်လံာ်အုၣ်သးအိၣ်အဃိ တဲ၀ဲလၢအ၀ဲသ့ၣ်ဟီၣ်ခိၣ်လီၢ်လီၤႉ လၢအမဲာ်ညါခါန့ၣ် ဟီၣ်ခိၣ်လံာ်အုၣ်သး နာ်က့ၤတအိၣ်ဘၣ်ႉကသံၣ် ဒၢးလီၢ်လံၤအိၣ်ဒီ တဖျၢၣ်မးတဲ၀ဲလၢအ၀ဲဟီၣ်ခိၣ်လီၤႉလဲၤတၢၢ်လၢသုအဲၣ်ဒိးလဲၤတၢၢ်ခီတဲ၀ဲ၊ ၦၤထုးထီၣ်ဟ့ၣ်လံာ်အုၣ်သး တဖၣ်နာ်က့ၤတကွၢ်ထံတၢ်ဘၣ်ဒီးထုးထီၣ်ဟ့ၣ်န့ၢ်၀ဲလံာ်အုၣ်သးလီၤ”အဂ့ၢ်တဲ၀ဲလီၤ။
ကသံၣ်ဒၢးလီၢ်၀ဲန့ၣ်အလဲၢ်အထီအိၣ်၀ဲအ့ကၢၣ်(၀ႉ၈၀)ဒီးဟီၣ်ခိၣ်လီၢ်၀ဲန့ၣ်စးထီၣ်လၢ၁၉၇၃နံၣ်ကတီၢ်လီၢ်က၀ီၤကမျၢၢ်တဖၣ်စးထီၣ်ပာ်ပနီၣ်၀ဲလၢကသံၣ်ဒၢးဟီၣ်ခိၣ်လီၢ်ဒီး ဖဲ၁၉၈၇နံၣ်အပူၤၦၤအဂၤဟဲနုာ်လီၤအိၣ်၀ဲအဂ့ၢ်လီၢ်က၀ီၤမျၢၢ်တဖၣ်စံး၀ဲန့ၣ်လီၤႉ
လၢန့ၢ်အမဲာ်ညါဖဲတၢ်လီၢ်၀ဲန့ၣ်အပူၤလီၢ်က၀ီၤဖိသ့ၣ်တဖၣ်တ့ထီၣ်ကသံၣ်ဒၢးအလီၢ်လံၤအိၣ်ဃာ်တဖျၢၣ်ဒီးဖဲ၂၀၁၂နံၣ်န့ၣ် တလၢၤကိတိာ်ခိၣ်ကျၢၢ်အူအိမၠ့ဆဲးလီၤဃာ်စုမုၢ်ကျၢၢ်လၢအပ့ၣ်အိၣ်၀ဲ၄၀ အထီ၂၂၀ ဟီၣ်ခိၣ်လီၢ်အံၤ ဟ့ၣ်လီၤက့ၤ၀ဲလီၢ်က၀ီၤဖိတဖၣ်ဘၣ်ဆၣ် မ့မ့ၢ်လၢ လီၢ်က၀ီၤဖိတဖၣ်လိးကီက့ၤ၀ဲကသံၣ်ဒၢးလီၢ်လံၤလီၤအဂ့ၢ်တဲ၀ဲသ့ၣ်လီၤႉ
လီၢ်က၀ီၤဖိတဖၣ်ပာ်ဖျါထီၣ်၀ဲတၢ်ဘၣ်သးတခီမ့ၢ်ဒ်သိးကဒိးန့ၢ်ဘၣ်က့ၤတၢ်ဘျၢသဲစးလၢအတီအလိၤ၊ ကဒိးန့ၢ် ဘၣ်က့ၤကသံၣ်ဒၢးလီၢ်၊ ကီၢ်ပဒိၣ်ၦၤဘၣ်မူဘၣ်ဒါတဖၣ်ဟ့ၣ်လီၤ၀ဲလံာ်အုၣ်သးလၢတမ့ၢ်တတီတဖၣ်တၢ်ကက့ၤထုးကွံာ်က့ၤအီၤ ဒီးၦၤလၢအဟဲအိၣ်လၢကသံၣ်ဒၢးဟီၣ်ခိၣ်လီၢ်တဖၣ်ကသုးကွံာ်သးလၢအဆိအချ့တၢ်ကိးသတြီထီၣ်၀ဲဒ်န့ၣ်ဒီးလီၢ်က၀ီၤကမျၢၢ်ခဲလၢာ်၃၀၀ ဃၣ်ဃၣ် လဲၤထီၣ်ပၣ်ဃုာ်သကိး၀ဲန့ၣ်လီၤႉ
