Home KICဂ့ၢ်ကျိၤ

KICဂ့ၢ်ကျိၤ

ကညီတၢ်ကစီၣ်၀ဲၤလီၢ် (KIC)အံၤ ဘၣ်တၢ်စးထီၣ်ဒုးအိၣ်ထီၣ်၀ဲ ဖဲ ၁၉၉၇ နံၣ်န့ၣ်လီၤႉ တၢ်ပညိၣ် ဒ်သိး တၢ်ကခီနီၤအါထီၣ်သကိး၀ဲ တၢ်ကစီၣ်တၢ်ဂ့ၢ်တၢ်ကျိၤ ၊ တၢ်သ့ၣ်ညါနၢ်ပၢၢ်တဖၣ်အဂီၢ် ဒီး အိၣ်ဆၢထၢၣ်သးလၢ ၦၤဟီၣ်ခိၣ်ဖိခွဲးယာ် ၊ ကလုာ်ဒူၣ်တဖၣ်အခွဲးအယာ် ၊ ဒံၣ်မိၣ်ကရ့ၣ်စံၣ်ဂ့ၢ်၀ီသ့ၣ်တဖၣ်အဖီခိၣ်ဒီး ထုးထီၣ်ရၤလီၤ၀ဲ “ကညီကလုာ်တၢ်ကစီၣ်” လၢ ပၣ်ဃုာ်၀ဲ ကျိာ်(၂)ကျိာ်လၢအမ့ၢ် ကညီကျိာ်ဒီး ပယီၤကျိာ်န့ၣ်လီၤႉ ဒီး စးထီၣ်လၢ ၂၀၀၄နံၣ်အံၤ ထုးထီၣ်ရၤလီၤ၀ဲဒီး “ကညီတၢ်ကစီၣ်၊ ကရင်သတင်းစဥ်”အမံၤအံၤ တုၤလၢ မုၢ်မဆါတနံၤအံၤန့ၣ်လီၤႉ

KIC (ကညီတၢ်ကစီၣ်၀ဲၤလီၢ်ခိၣ်သ့ၣ်)
ကညီတၢ်ကစီၣ်၀ဲၤလီၢ်သ့ၣ်(KIC)အံၤ မ့ၢ်၀ဲ တၢ်ကစီၣ်သန့လၢအသဘျ့တဖုန့ၣ်လီၤႉ

တၢ်ထံၣ်စိတၢ် (Vision)
ကသူၣ်ထီၣ်၀ဲ ၦၤဟီၣ်ခိၣ်ဖိတ၀ၢလၢ အအိၣ်လၢၦဲၤ၀ဲဒီး တၢ်သ့ၣ်ညါနၢ်ပၢၢ်၊ တၢ်ကူၣ်ဘၣ်ကူၣ်သ့လၢ အအိၣ်မုာ်အိၣ်ခုၣ် ဒီး အိၣ်ဒီး တၢ်ပာ်ကဲသကိးသး ယၢ်ခီယၢ်ခီလၢ ကညီကမျၢၢ်တဖၣ် အတၢ်ထံၣ်တၢ်ပာ်သးဒီး တၢ်ခွဲးတၢ်ယာ်သ့ၣ်တဖၣ်အဂီၢ်န့ၣ်လီၤႉ

တၢ်မၤမိၢ်ၦၢ်(Mission)
– ဒ်သိး ကကဲထီၣ်၀ဲ တၢ်ကစီၣ်၀ဲၤ လီၢ်အသဘျ့လၢ အတီခိၣ်ရိၣ်မဲ မၤဖျါထီၣ်၀ဲ ကညီကမျၢၢ်အကလုၢ်ဒီး တၢ်ထံၣ်တဖၣ် ဒ်တၢ်ကစီၣ်တၢ်ဂ့ၢ်တၢ်ကျိၤလၢ တၢ်နာ်န့ၢ်အီၤတဖၣ်အဂီၢ်
– KIC အံၤ ကဟံးန့ၢ်၀ဲ ခီၣ်တဃာ်လၢ ၦၤဟီၣ်ခိၣ်ဖိခွဲးယာ်ဂ့ၢ်၀ီ ၊ ကလုာ်ဒူၣ်အခွဲးအယာ်ဒီး ဒံၣ်မိၣ်ကရ့ၣ်စံၣ်ဂ့ၢ်၀ီ သ့ၣ်တဖၣ်အဖီခိၣ်ဒီး ကဒိးသန့ၤသးလၢကီၢ်ပယီၤအပူၤ ကညီကလုာ်ဒူၣ်တဖၣ် အိၣ်ဆိး၀ဲဟီၣ်က၀ီၤ လီၤလီၤဆီဆီ ဒီး ကတီခိၣ်ရိၣ်မဲမၤ၀ဲ တၢ်ကစီၣ် မံၣ်ဒံယၢၣ်(Media) တၢ်မၤလၢ အကံၢ်အစီလၢၦဲၤ၀ဲ တကးဘၣ် ဒ်သိး ကီၢ်ပူၤဒီး ထံကီၢ်ဘီမုၢ်သ့ၣ်တဖၣ် ကသ့ၣ်ညါနၢ်ပၢၢ်အါထီၣ်၀ဲ အဂီၢ်

ၦၤဟံးတၢ်ကစီၣ်ဖိတၢ်သိၣ်တၢ်သီမိၢ်ၦၢ်လၢတၢ်ဘၣ်တိၢ်ဃာ်န့ၢ်၀ဲတဖၣ် (Code of Ethic)

(၁) ဟံးန့ၢ်ခီၣ်တဃာ်လၢ တၢ်ကစီၣ်လၢ အဂံၢ်ခီၣ်ထံးခီၣ်ဘိတၢ်ဂ့ၢ်တၢ်ကျိၤအိၣ်၀ဲတဖၣ်အဖီခိၣ်ဒီး ကဘၣ်ဟံးန့ၢ်မူဒါလၢ တၢ်မ့ၢ်တၢ်တီဒီး တၢ်လီၤတံၢ်လီၤမံအဂီၢ်န့ၣ်လီၤႉ ဟံးတၢ်ကစီၣ်အကတီၢ် ကဘၣ်ထုးထီၣ်တဲဖျါထီၣ်၀ဲ ပကစၢ်တၢ်ကစီၣ်၀ဲၤလီၢ်အမံၤလၢ ဖိးသဲစးန့ၣ်လီၤႉ

(၂) ကဘၣ်သံကွၢ်ပာ်ဖျါန့ၢ်၀ဲ တၢ်ကစီၣ်အဂံၢ်ခီၣ်ထံး (Source )၊ ခံကပၤ ၃ကပၤ လၢအတဒ်သိး လိာ်သးဘၣ် (လီၤဆီလိာ်သး)တဖၣ်လၢ အသ့ကတၢၢ်န့ၣ်လီၤႉ

(၃) မ့ၢ်တဒိးန့ၢ်ဘၣ်၀ဲ တၢ်ကစီၣ်ဂံၢ်ထံး (မ့တမ့ၢ်) ၦၤဟ့ၣ်တၢ်ကစီၣ်ဖိ အတၢ်ဘၣ်သး ၊ အတၢ်ဟ့ၣ်ခွဲးဘၣ်တခီ တဘၣ်မၤဖျါထီၣ်၀ဲ အမံၤဒီး အိၣ်ဆိးလီၢ်ကျဲဘၣ်ႉ မ့ၢ်သူ၀ဲ ၦၤလၢတအဲၣ်ဒိးမၤဖျါအမံၤဘၣ် (Anonymous) ဟ့ၣ်၀ဲ တၢ်ကစီၣ်တၢ်ဂ့ၢ်တၢ်ကျိၤတဖၣ်တခီ ကဘၣ်ဒုးသ့ၣ်ညါတဲကျၢဃာ်၀ဲ တၢ်ကစီၣ်ဂံၢ်ထံး အမ့ၢ်အတီဆူ အဲဒံးထၢၣ်အအိၣ်န့ၣ်လီၤႉ

(၄) တၢ်ကစီၣ်ဂံၢ်ထံး နာ်ပ၀ဲဒီး ထုးထီၣ်တဲဖျါထီၣ်၀ဲ တၢ်ကစီၣ်တဖၣ်အဂီၢ် ကဘၣ်ပၢၤဃာ်ခူသူၣ်န့ၢ်၀ဲလၢ အ၀ဲအသးသမူ တၢ်ဘၣ်ယိၣ်အဂီၢ်န့ၣ်လီၤႉ

(၅) မ့ၢ်ပာ်ဖျါဘၣ်၀ဲ တၢ်ကစီၣ်လၢအကမၣ်တခီ ကဘၣ်က့ၤပာ်ဖျါကဒါ၀ဲ တၢ်က့ၤဘှီဘၣ်၀ဲ (မ့တမ့ၢ်) တၢ်ဂ့ၢ်တၢ်ကျိၤလၢ တၢ်ဘှါရှဲ က့ၤ လၢအချ့ ကတၢၢ်န့ၣ်လီၤႉ

(၆) ဘၣ်ထွဲ ကွီၢ်မ့ၣ်လၢ တၢ်သမံသမိး၀ဲအဖၢမုၢ်ဒီး တၢ်စံၣ်ညီၣ်၀ဲၤဘျီၣ် အတၢ်စံၣ်ညီၣ်တလီၤဒံး၀ဲတဖၣ်အဂီၢ် တဘၣ်မၤဖျါ၀ဲ ၦၤလၢ ဘၣ်တၢ်လိာ်ကွီၢ်၀ဲအံၤလၢ ၦၤမၤကမၣ်တၢ်ဖိအသိးဘၣ်ႉ

(၇) တၢ်ကွဲး၀ဲ တၢ်ကစီၣ်အကတီၢ် ကဘၣ်ပလီၢ်သးလၢ ဒ်သိး ပကစၢ်တၢ်ထံၣ်တၢ်ဆိမိၣ် သုတပၣ်ဃုာ်၀ဲတဂ့ၤအဂီၢ်ဒီး ကဘၣ်ပူၤဖျဲး၀ဲဒီး တၢ်အိၣ်ဃူသးန့ၣ်လီၤႉ မုၢ်လၢ်တၢ်လၢ ကျိၣ်စ့ ၊ တၢ်ခွဲးတၢ်ယာ် ၊ တၢ်ဟ့ၣ် ၊ တၢ်ထူးတၢ်တီၤ တမံၤတမၠိအဖီခိၣ်အဃိ ကွဲးအိၣ်ဃူန့ၢ်တၢ်ကစီၣ်လၢ ၦၤတဂၤဂၤအဂီၢ်တဖၣ် တၢ်တဘၣ်မၤ၀ဲဘၣ်ႉ

(၈) ထံရူၢ်ကီၢ်သဲးကရၢ ၊ မုၢ်ကျိၤ၀ဲၤကွာ်ကရၢ ၊ ၦၤန့ၢ်စိကမီၤတဖုဖု အတၢ်စိတၢ်ကမီၤအဃိ တဘၣ်ကွဲးအိၣ်ဃူ တၢ်ကစီၣ်လၢတမ့ၢ်တတီ၊ တၢ်ကစီၣ်ရၤလီၤသနူတဖၣ်ဘၣ်ႉ

(၉) ဒိးသန့ၤထီၣ်သးလၢ ကလုာ်၊ တၢ်ဘူၣ်တၢ်ဘါလၢ စူၣ်နာ်၀ဲ ၊ မုၣ်၊ ခွါ က့ၢ်ဂီၤ ၊ ထံရူၢ်ကီၢ်သဲးဂ့ၢ်၀ီ၊ မုာ်ကျိၤ၀ဲၤကွာ်ဂ့ၢ်၀ီ၊ ၦၤဂ့ၢ်၀ီ အတၢ်အိၣ်သးသ့ၣ်တဖၣ်အဖီခိၣ်အဃိ တဘၣ်ကွဲး၀ဲ တၢ်ကစီၣ်ဒီး တၢ်ကွဲးထီရီၤၤလၢ အမၤဘၣ်ဒိဘၣ်ထံး၀ဲ ထံဖိကီၢ်ဖိတဂၤအတၢ်ခွဲးတၢ်ယာ် လၢအမ့ၢ် တၢ်နီၤဖးတၢ်၊ တၢ်ပဲာ်အၢပဲာ်သီတၢ် ၊ တၢ်ပာ်ဒ့ၣ်ပာ်ကမၣ်တၢ် ဒီး တၢ်လၢအဒုးအိၣ်ထီၣ်န့ၢ်၀ဲ တၢ်သဘံၣ်သဘုၣ်တဖၣ်အဂီၢ်ဘၣ်န့ၣ်လီၤႉ

(၁၀) တၢ်ကစီၣ်၊ တၢ်ဂီၤ၊ တၢ်ကွဲးထီရီၤဒီး တၢ်ပဲာ်ဖးနီၤဖးလၢ ၦၤအဂၤ ကွဲးကဲထီၣ်ဒုး အိၣ်ထီၣ်ဃာ်၀ဲတဖၣ်အဂီၢ် မ့ၢ်တဒိးန့ၢ်ဘၣ်၀ဲ ၦၤဒုးကဲထီၣ်တၢ်အခီၣ်ထံး ဂၤ အတၢ်ဟ့ၣ်ခွဲးဘၣ်တခီ တဘၣ်ဟံးန့ၢ်မၤဖျါ၀ဲဘၣ်ႉ ဒိးန့ၢ်ဘၣ်အခွဲးအဃိ မ့ပာ်ဖျါ၀ဲတခီ ကဘၣ်ပာ်ဖျါဃာ်၀ဲ ၦၤဒုးကဲထီၣ်တၢ်အခီၣ်ထံးတဂၤအံၤ အမံၤန့ၣ်လီၤႉ

(၁၁) တၢ်ကစီၣ်လၢ တၢ်ကွဲးဖျါထီၣ်၀ဲ ဘၣ်ထွဲ ပိာ်မုၣ် ၊ ဖိသၣ်ဆံး ဒီး ၦၤက့ကွဲၣ်တဖၣ်အဂီၢ်အကတီၢ် ကဘၣ်ပလီၢ်သးလူၤပိာ်ထွဲ၀ဲ တၢ်ဘျၢသဲစးဘၣ်ထွဲလၢ တၢ်ဒုးအိၣ်ထီၣ်ဖျါဃာ်၀ဲ တဖၣ်န့ၣ်လီၤႉ

(၁၂) တၢ်ဟံးန့ၢ်၀ဲ တၢ်ကစီၣ်ဖဲ ၦၤဂ့ၢ်၀ီ ၦာ်ဘျးစဲတဖၣ် (လီၤဆီဒၣ်တၢ် Facebook ဒီး နီၢ်ကစၢ် Blog) တဖၣ်အပူၤ အကတီၢ် တၢ်ကစီၣ်လၢတၢ်ပာ်ဂၢၢ်ပာ်ကျၢၤ ဒီး တၢ်ပာ်ဖျါ၀ဲ တၢ်အုၣ်ကီၤတမံၤမံၤ မ့ၢ်တအိၣ်၀ဲဘၣ်တခီ တၢ်တဘၣ်သူ၀ဲဘၣ်ႉ တဘၣ်ကွဲးဖျါထီၣ်၀ဲ ဒ်သိး ပနီၢ်ကစၢ်တၢ်ကွဲးအသိးဘၣ်ႉ

(၁၃) တဘၣ်စဲးကျံးထုးထီၣ်ရၤလီၤ၀ဲ မုၣ်၊ ခွါသွံၣ်ထံးဂ့ၢ်၀ီ တၢ်ကစီၣ် ၊ တၢ်ကွဲးထီရီၤ ၊ တၢ်ဂီၤ သ့ၣ်တဖၣ်လၢ အမၤဟးဂီၤ ဘၣ်ဒိ၀ဲ ကမျၢၢ်အါဂၤအတၢ်သကဲာ်ပ၀းဘၣ်ႉ