နီၢ်မုၣ်နီၤကဒိးန့ၢ်ဘၣ်တၢ်တီတၢ်တြၢ်အဂီၢ် ကၠီၣ်တဲၣ်ကညီကရူၢ် ဆှၢထီၣ်လံာ်ဆူအမဲရံၤကၤဒီး ကီၢ်ပယီၤမီၢ်သီရူ

လါယူၤလံ ၂၆ သီႇ ၂၀၂၀ နံၣ်ႇ ခ့ၣ်အဲးစံၣ်

မုၢ်တြီၢ်(ဖၣ်ပူၣ်)လီၢ်က၀ီၤဖိ နီၢ်မုၣ်နီၤ ဘၣ်တၢ်ခးသံအီၤအံၤ ဒ်သိးကဒိးန့ၢ်ဘၣ်တၢ်တီတၢ်တြၢ်အဂီၢ် ဖဲလါယူၤလံ ၁၃ သီအနံၤ ကၠီၣ်တဲၣ်ကညီကရူၢ် (Karen Thai Group-KTG) လၢအအိၣ်ကီၢ်ကၠီၣ်တဲၣ်ပူၤအံၤန့ၣ် ဆှၢထီၣ်၀ဲလံာ်တၢ်ဃ့ထီၣ်အံၤဆူ အမဲရၤကၤမီၢ်သီရူဒီး ကီၢ်ပယီၤမီၢ်သီအရူလၢအအိၣ်ဆီလီၤအသး ဖဲကီၢ်ကၠီၣ်တဲၣ်ႇ ကံၢ်မဲ၀့ၢ် အဂ့ၢ်န့ၣ် KTG ကရူၢ် စံးဘၣ်ခ့ၣ်အဲးစံၣ်လီၤႉ

နီၢ်မုုၣ််နီၤသံတၢ်ဂ့ၢ်အံၤ တၢ်မၤသံအီၤလၢအတၢ်ကမၣ်တအိၣ်နီတမံၤဘၣ်ဒီး လၢတၢ်န့ၣ်အဃိ ဒ်သိးကဒိးန့ၢ်ဘၣ်တၢ်တီတၢ်တြၢ်ဒီး ကမၤစၢၤဟံးထီၣ်ဖီၣ်ထီၣ်အီၤအဂီၢ် ဘၣ်တၢ်ဆှၢထီၣ်လံာ်ဆူအမဲရံၣ်ကၣ်ဃုာ်ဒီး ဟီၣ်ခိၣ်ဒီဘ့ၣ်ဒီး ကီၢ်ပယီၤပဒိၣ်တဖၣ်အအိၣ်အဂ့ၢ်န့ၣ် KTG ကရူၢ် ၦၤကတိၤတၢ်ပၢ စီၤလွဲဖီ စံး၀ဲန့ၣ်လီၤႉ

အ၀ဲစံး၀ဲလၢ “နီၢ်မုၣ်နီၤသံတၢ်ဂ့ၢ်အံၤန့ၣ် ပတူၢ်လိာ်လ့ၤတက့ၤတသ့ဘၣ်ႇ အဃိန့ၣ် တၢ်လၢပဃ့ထီၣ်၀ဲအခိၣ်သ့ၣ်န့ၣ် လီၢ်က၀ီၤလၢပကညီဖိအိၣ်အပူၤတဖၣ်န့ၣ် ပယီၤသုးကလၢၤတဖၣ် ထုးကွံာ်အီၤႇ သုးကလၢၤတဖၣ်မ့ၢ်အိၣ်န့ၣ် တၢ်သဘံၣ်သဘုၣ်တဖၣ်ႇ တၢ်သံတၢ်လီၤမၢ်တဖၣ် ကအိၣ်၀ဲဒၣ်ထီဘိလီၤႉ အဃိန့ၣ် လၢပကညီဟီၣ်က၀ီၤအပူၤ သုးကလၢၤတဖၣ် ကဟးထီၣ်ကွံာ်၀ဲဒၣ်လၢအချ့န့ၣ်လိၣ်၀ဲလီၤ” အဂ့ၢ်န့ၣ် စံး၀ဲလီၤႉ

လၢန့ၣ်အမဲာ်ညါ ကပျဲအိၣ်၀ဲလီၢ်က၀ီၤဖိတဖၣ် ဒ်ထံကီၢ်ဒီဘ့ၣ်တၢ်ပတုာ်တၢ်ခးလံာ်ဃံးဃာ် (NCA) တၢ်သးလီၤပလိာ်အိၣ်ပာ်အသိးဒီးႇ ဒ်သိးနီၢ်မုၣ်နီၤကဒိးန့ၢ်ဘၣ်တၢ်တီတၢ်တြၢ်အဂီၢ် ကညီဒီတလုာ်ကပာ်ဖှိၣ်ပၣ်ဃုာ်၀ဲလၢအကပၤကပၤအဂီၢ် လိၣ်၀ဲဒၣ်အဂ့ၢ်န့ၣ် စီၤလွဲဖီ ဆဲးစံး၀ဲလီၤႉ

တၢ်လဲၤဆှၢထီၣ်၀ဲလံာ်တၢ်ဃ့ထီၣ်အံၤန့ၣ် အမဲရၤကၤမီၢ်သီရူ တူၢ်လိာ်ဒိးန့ၢ်ဘၣ်၀ဲဒၣ်အသိးႇ လၢမီၢ်သီရူတပၤစ့ၢ်ကီး က့ၤစံးဆၢကဒါ၀ဲလၢ တၢ်ဂ့ၢ်အံၤအဖီခိၣ်ကဒုးသ့ၣ်ညါ၀ဲဒၣ်ဆူ ကမဲရၤကၤ ထံကီၢ်ဃုာ်ဒီးဟီၣ်ခိၣ်ဒီဘ့ၣ်အအိၣ်လီၤအဂ့ၢ်န့ၣ် KTG ကရူၢ် စံး၀ဲလီၤႉ
ဒ်န့ၣ်အသိး ကညီကလုာ်ဒူၣ်လၢအအိၣ်(ခဲနဒၣ်)ထံကီၢ်တဖၣ်စ့ၢ်ကီး ပယီၤသုးခးသံ၀ဲနီၢ်မုၣ်နီၤတၢ်ဂ့ၢ်အံၤအဖီခိၣ် ပဲာ်အၢပဲာ်အဲာ်သီ၀ဲဒၣ်အဂ့ၢ် ထုးထီၣ်၀ဲဒၣ်လံာ်တၢ်ဘၣ်သးဒီးႇ (ခဲနဒၣ်)ထံကီၢ်ဃုာ်ဒီး ဟီၣ်ခိၣ်ဒီဘ့ၣ် သုးအတၢ်ဘၣ်ဘျုးဘၣ်ဖှိၣ်မုၢ်ကျိၤ၀ဲၤကွာ်လၢအစဲဘူးလိာ်သး မုၢ်ကျိၤ၀ဲၤကွာ်တၢ်ဖံးတၢ်မၤတဖၣ်ဒီး တၢ်ပာ်ဖှိၣ်မၤသကိးတၢ်ဟူးတၢ်ဂဲၤတဖၣ်န့ၣ် ကဘၣ်ပတုာ်ကွံာ်၀ဲအမဲာ်ညါ တၢ်ကဘၣ်ဟံး၀ဲအ&့လၢတၢ်ကးတံၢ်ဃာ် မုၢ်ကျိၤ၀ဲၤကွာ်တၢ်ဖံးတၢ်မၤတဖၣ်အဂီၢ်န့ၣ် ဃ့ထီၣ်၀ဲဒၣ်လီၤႉ

လၢန့ၣ်အမဲာ်ညါ ဖဲလါယူၤလံ ၂၃ သီအနံၤ ကညီကလုာ်ဒူၣ်လၢအအိၣ်ယပၣ်ကီၢ်တဖၣ်ဒီး ကလုာ်ဒူၣ်အဂၤတဖၣ်စ့ၢ်ကီး ပာ်ဖျါထီၣ်၀ဲတၢ်ဘၣ်သးဒီးကိးသတြီထီၣ်၀ဲဒ်အမ့ၢ် ပယီၤသုးအံၤ လၢကလုာ်ဒူၣ်ဟီၣ်က၀ီၤအပူၤ မၤတံာ်တာ်မၤဟးဂီၤ၀ဲဒၣ် (Covid-19) တၢ်သမံသမိးတၢ်အိၣ်ဆူၣ်အိၣ် ချ့အလီၢ်တဖၣ်ႇ ခီဖျိခးလီၤ၀ဲဒၣ်ကျိဖးဒိၣ်အဃိ လီၢ်က၀ီၤဖိတဖၣ်သံဒီးဘၣ်ဒိဘၣ်ထံးဒီး တၢ်ခးသံ၀ဲနီၢ်မုၣ်နီၤအမဲာ်ညါ ကလုာ်ဒူၣ်လီၢ်က၀ီၤလၢအဂၤတဖၣ် ဟးတလၢ၀ဲတၢ်လီၢ်လၢတၢ်ပာ်ပနီၣ်အီၤ တၢ်ခးလိာ်သးတဖၣ်ႇ လုၢ်သ့ၣ်ခါပတာ်၀ဲဒၣ် NCA တၢ်ပတုာ်တၢ်ခးလံာ်ဃံးဃာ်တၢ်သိၣ်တၢ်သီတဖၣ်အံၤ ထီဒါပဲာ်အၢပဲာ်သီ၀ဲတဲာ်တဲာ်ဖျုဖျုဒီး ပာ်ဖျါထီၣ်အတၢ်ဘၣ်သးန့ၣ်လီၤႉ

ဖဲလါယူၤလံ ၂၂ သီအနံၤစ့ၢ်ကီး တၢ်ခးသံနီၢ်မုၣ်နီၤကဲထီၣ်သးအမဲာ်ညါႇ ဖၣ်ပူၣ်လီၢ်က၀ီၤပူၤ တၢ်ခးသံ၀ဲ KNU သ့ၣ်ၦၢ် ၦၤမၤတၢ်ဖိႇ တၢ်ခးသံ၀ဲလီၢ်က၀ီၤခိၣ်နၢ်တဂၤႇ ကျိဖးဒိၣ်တဖၣ်လီၤတဲာ်ဒီးဘၣ်ဒိ၀ဲဒၣ်ကမျၢၢ်တဖၣ်အဃိ ဒ်သိးအ၀ဲသ့ၣ်ကဒိးန့ၢ်ဘၣ်တၢ်တီတၢ်တြၢ်အဂီၢ် မုၢ်တြီၢ်(ဖၣ်ပူၣ်)ကီၢ်ရ့ၣ်ႇ ဒွဲၣ်လိကီၣ်ဆၣ် လီၢ်က၀ီၤသ၀ီဖိခဲလၢာ် ၁ႇ၅၀၀ ဘျဲၣ် လဲၤပာ်ဖျါထီၣ်အသးလၢပယီၤသုးကလၢၤ ၄ ဖျၢၣ်အမဲာ်ညါန့ၣ်လီၤႉ