လါစဲးပထ့ဘၢၣ် ၈ သီႇ ၂၀၂၀ နံၣ်ႇ ခ့ၣ်အဲးစံၣ်
ဖဲလါအီကူး ၁၂ သီအနံၤ တၢ်မၤလၤကပီၤ၀ဲ နံၣ် ၇၀ ၦဲၤ ကညီဒီကလုာ်မၤထူရၤမုၢ်နံၤအံၤ ဖဲ၀့ၢ်တကူၣ်ခၢၣ်သး မဟၣ်ဘၤဒူၣ်လၣ်ဖီကရၢၢ်အပူၤအဖီခိၣ် စးသ့စီၣ်မ့ႇစီၤဆၣ်ကွၢ်လၢ်ဒီးဒီၣ်စ့ၣ်ထွ့တဖၣ် ပဒိၣ် လိာ်ဘၢလိာ်ကွၢ်အ၀ဲသ့ၣ်လၢ တၢ်ထုးဖှိၣ်ရိၣ်ဖှိၣ်သးလၢတၢ်မုာ်တၢ်ခုၣ်ဒီး တၢ်ဟးဒုးနဲၣ်တၢ်ပာ်ဖျါထီၣ်တၢ်ပာ်သး တၢ်ဘျၢသဲစး အဆၢဖိ(၂၀)ဒီး ဖဲတနံၤအံၤ လါစဲးပထ့ဘၢၣ် ၈ သီ ကၠီၣ်တတါကီၢ်ဆၣ် ကွီၢ်ဘျီၣ်ရူစံၣ်ညီၣ်ဆၢတဲာ်၀ဲလၢကဘၣ်လီၤလၢဃိာ်ပူၤ ၁၅ သီန့ၣ်လီၤႉ
ၦၤ ၃ ဂၤအံၤန့ၣ် ဒ်၀့ၢ်တကူၣ်ကီၢ်ခီဒိၣ်ႇ ပၢၤကီၢ်ရူအတၢ်နဲၣ်လီၤအသိး ကၠီၣ်တတါကီၢ်ဆၣ် ပၢၤကီၢ်ခိၣ် မၠိသဲၣ်အံၤ မ့ၢ်၀ဲဒၣ်ၦၤလိာ်ကွီၢ်တၢ်ဖိဒီး ဖဲလါအီကူး ၂၄ သီအနံၤန့ၣ် တၢ်စးထီၣ်လိာ်ဘၢဘိာ်ကွီၢ်အ၀ဲသ့ၣ် ဖဲကၠီၣ်တတါကီၢ်ဆၣ် ကွီၢ်ဘျီၣ်ရူ၀ံၤ ဖဲတနံၤအံၤ လါစဲးပထ့ဘၢၣ် ၈ သီအနံၤန့ၣ် ဘၣ်တၢ်စံၣ်ညီၣ်ဆၢတဲာ်၀ံၤတဘျီဃီဒ်အခဲအံၤလီၤႉ
“ဘၣ်တၢ်ထၢနုာ်၀ဲဒၣ်လၢဃိာ်ပူၤႇ တၢ်ဆီၣ်တံၢ်မၤနၢၤႇ တၢ်မၤပျံၤမၤဖုးတဖၣ်အိၣ်၀ဲဘၣ်ဆၣ် ယဲဒၣ်ဒု ကညီမၤထူရၤမုၢ်နံၤအံၤန့ၣ် ကဆဲးမၤဒံး၀ဲဒၣ်လီၤ” အဂ့ၢ်န့ၣ် စးသ့စီၣ်မ့ စံးဘၣ်ခ့ၣ်အဲးစံၣ်လီၤႉ
တၢ်စံၣ်ညီၣ်ဆၢတဲာ်လၢကဘၣ်အိၣ်ဃိာ်ပူၤဒ်ခဲအံၤဘၣ်ဆၣ် ခီဖျိတၢ်က့ၤထုးကွံာ်၀ဲဒၣ်လၢအိၣ်တ့ၢ်ဃာ်လၢ တၢ်ဒုးဃာ်အပူၤမုၢ်နံၤမုၢ်သီတဖၣ်အဃိ တနံၤအံၤ ၃ ဂၤလၢာ် ဟဲက့ၤပူၤဖျဲးထီၣ်၀ဲဒၣ်လံအဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ
၀့ၢ်တကူၣ်ခၢၣ်သးႇ မဟၣ်ဘၤဒူၣ်လၣ်ဖီကရၢၢ်အမဲာ်ညါ ဖဲလါအီကူး ၁၂ သီအနံၤန့ၣ် လၢအလီၤဘၣ်၀ဲ နံၣ် ၇၀ ၦဲၤ ကညီဒီကလုာ်မၤထူရၤမုၢ်နံၤအံၤ ၦၤလၢအတီခိၣ်ရိၣ်မဲတၢ်တဖၣ် ဒ်တၢ်ထုးဖှိၣ်ရိၣ်ဖှိၣ်သးလၢတၢ်မုာ်တၢ်ခုၣ်ဒီး တၢ် ဟးဒုးနဲၣ်တၢ်ပာ်ဖျါတၢ်ပာ်သး တၢ်ဘျၢသဲစး အဆၢဖိ(၂၀)အသိး တီၣ်ဖျါထီၣ်၀ဲလၢအဖိးသဲစးဆူ ကၠီၣ်တတါ ကီၢ် ဆၣ်ပၢၤကီၢ်သုးအအိၣ်ဒီး လီၢ်က၀ီၤၦၤဘၣ်မူဘၣ်ဒါတဖၣ်စံး၀ဲလၢ ကဘၣ်မၤ၀ဲတၢ်ရဲၣ်တၢ်ကျဲၤအံၤစးထီၣ် ဖဲဂီၤခီ ၈ နၣ်ရံၣ် တုၤလၢ ၂ နၣ်ရံၣ်လီၤအဂ့ၢ်န့ၣ် သ့ၣ်ညါဘၣ်လၢၦၤရဲၣ်ကျဲၤတၢ်ဖိတဖၣ်အအိၣ်န့ၣ်လီၤႉ
ဘၣ်ဆၣ် ဖဲတၢ်မၤ၀ဲဒၣ်မူးတၢ်ရဲၣ်တၢ်ကျဲၤအဆၢကတီၢ် မုၢ်ထူၣ် ၁၁ နၣ်ရံၣ်အခါ တၢ်ကဘၣ်ထုးကွံာ်၀ဲဒၣ်တၢ်ရဲၣ်တၢ်ကျဲၤအံၤန့ၣ် ပၢၤကီၢ်သုးတဖၣ်ဟဲဟ့ၣ်၀ဲဒၣ်တၢ်ဆီၣ်သနံးအဃိ တၢ်တဲအါလိာ်သးအိၣ်ထီၣ်၀ဲဒၣ်ဒီး ၦၤလၢအတီခိၣ်ရိၣ်မဲတၢ် စးသ့စီၣ်မ့ဒီးစီၤဆၣ်ကွၢ်လၢ်တဖၣ်အံၤ ပၢၤကီၣ်သုးတဖၣ် ဖီၣ်ဒီးက့ၤကိးအ၀ဲသ့ၣ်န့ၣ်လီၤႉ
မ့မ့ၢ်လၢ ဒီၣ်စ့ၣ်ထွ့အံၤ ဖဲအပူၤကွံာ် ၂၀၁၉ နံၣ် တၢ်မၤလၤကပီၤ၀ဲဒၣ် ၆၉ ဘျီတဘျီ ကညီမၤထူရၤမုၢ်နံၤအဃိ ၦၤလၢတၢ်လိာ်ဘၢလိာ်ကွီၢ်၀ဲတဖၣ် ခီဖျိလၢအ၀ဲဟဲဟ့ၣ်ဂံၢ်ဟ့ၣ်ဘါဆီၣ်ထွဲ၀ဲတၢ်ဂ့ၢ်အဖီခိၣ် ဘၣ်တၢ်လိာ်ဘၢလိာ်ကွၢ်၀ဲအီၤန့ၣ်လီၤႉ ဒီးတနံၣ်အံၤ နံၣ် ၇၀ ၦဲၤ ကညီမၤထူရၤမုၢ်နံၤအံၤ အ၀ဲဟဲဟ့ၣ်ထီၣ်တၢ်ယူးယီၣ်ဒီး ဖးဖျါထီၣ်၀ဲကညီမၤထူရၤမုၢ်နံၤလံာ်ဟ့ၣ်ယုၢ်တဖၣ်၀ံၤ တၢ်ဖီၣ်က့ၤကိး၀ဲဒၣ်ဒီၣ်စ့ၣ်ထွ့၀ံၤအလီၢ်ခံ တၢ်စံၣ်ညီၣ်ဆၢတဲာ်လၢဘၣ်လီၤဃိာ်ပူၤ ၁၅ သီအသိးႇ တနံၣ်အံၤတၢ်ကဲထီၣ်သးအဂီၢ် ဘၣ်တၢ်လိာ်ဘၢလိာ်ကွီၢ်ကဒီး၀ဲဒၣ်အီၤန့ၣ်လီၤႉ
၀့ၢ်တကူၣ်အပူၤ ခီဖျိလၢတၢ်မၤလၤကပီၤ၀ဲဒၣ် ကညီဒီကလုာ်မၤထူရၤမုၢ်နံၤအဃိ ဖဲအပူၤကွံာ်နံၣ် နီၢ်အိလၣ်ႇ စးသ့စီၣ်မ့ဒီး စီၤအဲလ်ဘၢၣ်ခၠိၤတဖၣ်အံၤ ပဒိၣ် စံၣ်ညီၣ်၀ဲလၢဘၣ်လီၤဃိာ်ပူၤ တဂၤ ၁၅ သီစုာ်စုာ်န့ၣ်လီၤႉ
