Home တၢ်ကစီၣ် ပယီၤသုးလၢအအိၣ်ဖဲဃိၣ်လိာ်တၢ်မုာ်တၢ်ခုၣ်ကရၢၢ်အပူၤတဖၣ်ကဟးထီၣ်ကွံာ်အဂီၢ် လီၢ်က၀ီၤဖိတဖၣ် ပာ်ဖျါထီၣ်တၢ်ဘၣ်ဒီးသးဃ့ထီၣ်၀ဲ

ပယီၤသုးလၢအအိၣ်ဖဲဃိၣ်လိာ်တၢ်မုာ်တၢ်ခုၣ်ကရၢၢ်အပူၤတဖၣ်ကဟးထီၣ်ကွံာ်အဂီၢ် လီၢ်က၀ီၤဖိတဖၣ် ပာ်ဖျါထီၣ်တၢ်ဘၣ်ဒီးသးဃ့ထီၣ်၀ဲ

1834
0

လါမးရှး ၃ သီႇ ၂၀၂၁ နံၣ်ႇ ခ့ၣ်အဲးစံၣ်

KNU- ကညီဒီကလုာ်စၢဖှိၣ်ကရၢႇမုၣ်တြီၢ်ကီၢ်ရ့ၣ် ဘုသိၣ်ဒီးလူၢ်သီကီၢ်ဆၣ် လီၢ်က၀ီၤသ၀ီဖိ ၂၅၀၀ ဘျဲၣ်အံၤ ဒ်သိးပယီၤသုးလၢအအိၣ်ဆိးဆီလီၤအသးဖဲအ၀ဲသ့ၣ်ဟီၣ်က၀ီၤအပူၤတဖၣ် ကဟးထီၣ်ကွံာ်အဂီၢ် ဖဲလါမးရှး ၂ သီအနံၤန့ၣ် မၤ၀ဲတၢ်ထီဒါပာ်ဖျါထီၣ်၀ဲတၢ်ဘၣ်သးတခါဒီး ဃ့ထီၣ်၀ဲန့ၣ်လီၤႉ

ဒူသ၀ီ ၃၄ ဖျၢၣ်လၢအအိၣ်ဖဲဃိၣ်လိာ်တၢ်မုာ်တၢ်ခုၣ်ကရၢၢ်ဟီၣ်က၀ီၤအပူၤတဖၣ်ပာ်ဖှိၣ်ထီၣ်သးဒီး ခီဖျိလၢပယီၤသုးဟဲနုာ်လီၤအိၣ်ဆိး၀ဲဒၣ်လၢအ၀ဲသ့ၣ်ဟီၣ်က၀ီၤအပူၤဒီး မၤပျံၤမၤဖုး၀ဲဒၣ်အ၀ဲသ့ၣ်အဃိ ဘၣ်ပာ်ဖျါထီၣ်တၢ်ဘၣ်သးဒ်အံၤလီၤအဂ့ၢ်န့ၣ် ၦၤတီခိၣ်ရိၣ်တၢ်တဖၣ် စံး၀ဲန့ၣ်လီၤႉ

ၦၤလၢအတီခိၣ်ရိၣ်မဲတၢ်ပာ်ဖျါထီၣ်တၢ်ဘၣ်သးတဂၤလၢအမ့ၢ် နီၢ်သဲန့ၢ် စံး၀ဲလၢ “ ပတၢ်မုာ်တၢ်ခုၣ်အဖီ ကရၢၢ်န့ၣ် ပတသးလီကီ၀ဲဒၣ်လၢပယီၤသုးကလၢၤကအိၣ်ဘၣ်ႉ တၢ်တဘၣ်မၤပျံၤမၤဖုးၦၤဘၣ်ႉ ၦၤထူလံၤဖိတဖၣ်န့ၣ်ကအိၣ်ဘၣ်၀ဲမုာ်မုာ်ခုၣ်ခုၣ်ႇ ဒ်သိးကပူၤဖျဲးဒီးတၢ်ဘၣ်ယိၣ်ဘၣ်ဘှီအဂီၢ် အဃိပပာ်ဖျါထီၣ်တၢ်ဘၣ်သးလီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တၢ်ပာ်ဖျါထီၣ်သးဘျီ၀ဲန့ၣ် လီၢ်က၀ီၤဖိလၢအအိၣ်ဖဲဃိၣ်လိာ်အကပိၤကပၤတဖၣ် ပာ်ဖျါထီၣ်တၢ်ဘၣ်သး ဒ်အမ့ၢ်ဒိးထီၣ်၀ဲချံစဲးဒီးပိာ်ထီၣ်၀ဲထံကျိဒီတကျိၤဒီးဃ့ထီၣ်၀ဲလၢ မ်ကလုာ်ဒိၣ်စိသနူဒီး သုးမီၤစိရိၤသနူကလီၤၦီၢ်ကွံာ်ႇ ထူးသံကွံာ် ၂၀၀၈တၢ်ဘျၢခိၣ်သ့ၣ်ႇ သူၣ်ထီၣ်ဖဲဒရၢၣ်ကီၢ်စၢဖှိၣ်ႇ ကဘၣ်အိၣ်ဒီး တၢ်ထဲသိးတုၤသိးဒီးနီၢ်ကစၢ်တၢ်စံၣ်ညီၣ်ပၢလီၤသးခွဲးယာ်ႇ ဘီမုၢ်စၢဖှိၣ်ကရၢဒီးထံဂုၤကီၢ်ဂၤ တဘၣ်ပာ်ဖှိၣ်မၤသကိးတၢ်ဒီးသုးကီၣ်ကးဘၣ်အမဲာ်ညါ ထုးကွံာ်သုးကလၢၤလၢအအိၣ်လၢ ဟီၣ်က၀ီၤအပူၤတဖၣ်အဂ့ၢ်န့ၣ် ဃ့ထီၣ်၀ဲဒၣ်န့ၣ်လီၤႉ

ပယီၤသုးဟဲနုာ်လီၤအိၣ်ဆိး၀ဲဒၣ်လၢဟီၣ်က၀ီၤအပူၤအံၤ တဘၣ်လိာ်ဖိးဒ့လိာ်အသးဒီး တၢ်အိၣ်ဃုာ်ဒ်သိးအလုၢ်အၦ့ၤတဖၣ်ဘၣ်ဒီး လၢကမျၢၢ်အဖီၣ်ခိၣ်ကပတုာ်ကွံာ်တၢ်ထီၣ်ဒုးတဖၣ်ဒီး ဟးထီၣ် ကွံာ်လၢဟီၣ်က၀ီၤအပူၤတဘျီဃီအဂီၢ် လီၢ်က၀ီၤဖိတဖၣ်ထုးထီၣ်ပာ်ဖျါဒီးဃ့ထီၣ်၀ဲန့ၣ်လီၤႉ

လီၢ်က၀ီၤဖိတဖၣ် မ့ၢ်ၦၤလၢအအိၣ်၀ဲဒၣ်လၢဃိၣ်လိာ်တၢ်မုာ်တၢ်ခုၣ်ကရၢၢ်အဟီၣ်က၀ီၤအပူၤ လၢအအိၣ်ဒီးအ၀ဲသ့ၣ်နီၢ်ကစၢ်တၢ်စံၣ်ညီၣ်ပၢလီၤသးခွဲးယာ်ဒီး ဒ်ထံရူၢ်ကီၢ်သဲးအသိး အ၀ဲသ့ၣ်လီၤမ့ၢ်ၦၤလၢအအိၣ်ဒီးအစိအကမီၤတဖၣ်လီၤအဂ့ၢ်ဒီး ထီဒါ၀ဲတၢ်ပၢတၢ်ပြးသနူခဲလၢာ်လၢလီၢ်ခၢၣ်သးဖီၣ်ဃာ်နဲၣ်လီၤ၀ဲတဖၣ်အဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါ ထီဒါ၀ဲသုးတၢ်ဟံးဆူၣ်ကွံာ်ထံကီၢ်တၢ်စိတၢ်ကမီၤအဂ့ၢ်ႇထီဒါစ့ၢ်ကီး၀ဲ တၢ်သူတၢ်စုဆူၣ်ခီၣ်တကးလၢကမျၢၢ်လၢအပာ်ဖျါထီၣ်သးလၢတၢ်မုာ်တၢ်ခုၣ်အပူၤတဖၣ်အဂ့ၢ်ႇ တူၢ်လိာ်ဟ့ၣ်ဂံၢ်ဟ့ၣ်ဘါ၀ဲၦၤလၢအထီဒါသုးမီၤစိရိၤတဖၣ်အဂ့ၢ်ႇကလဲၤ၀ဲတုၤလၢ ဖဲၣ်ဒရၢၣ်ကီၢ်စၢဖှိၣ်လၢအမ့ၢ်အတီလၢအအိၣ်ၦဲၤဒီးတၢ်ထဲသိးတုၤသိးဒီးနီၢ်ကစၢ်တၢ်စံၣ်ညီၣ်ပၢလီၤသးန့ၢ်တစုအဂ့ၢ်န့ၣ် ဃ့ထီၣ်၀ဲဒၣ်န့ၣ်လီၤႉ