Home တၢ်ကစီၣ် တၢ်ကီတၢ်ခဲအိၣ်ဘၣ်ဆၣ်(ဖၣ်အၣ်ကီၢ်ရ့ၣ်)ပူၤကီၢ်သူလ့ၤကၠိတဖၣ်ဒိးစဲးနံၣ်ကတၢၢ်တၢ်ဒိးစဲး၀ံၤ၀ဲလံ

တၢ်ကီတၢ်ခဲအိၣ်ဘၣ်ဆၣ်(ဖၣ်အၣ်ကီၢ်ရ့ၣ်)ပူၤကီၢ်သူလ့ၤကၠိတဖၣ်ဒိးစဲးနံၣ်ကတၢၢ်တၢ်ဒိးစဲး၀ံၤ၀ဲလံ

217
0

လါဖ့ၤဘြူၤအါရံၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ်ဒီးတန့ခၠါကီၢ်ဆၣ်အပူၤ ကညီကီၢ်သူလ့ၤကၠိလၢဘၣ်တၢ်အိးထီၣ်၀ဲလၢကညီကူၣ်သ့ဆဲးလၤ(KECD)သ့ၣ်တဖၣ်အံၤ တနံၣ်အံၤ(၂၀၂၂–၂၀၂၃)တၢ်သိလၣ်လိနံၣ်အပူၤတၢ်ကီတၢ်ခဲတၢ်တၤတၢ်အိၣ်၀ဲဘၣ်ဆၣ် ခဲအံၤဒိးစဲးနံၣ်ကတၢၢ်တၢ်ဒိးစဲး၀ံၤ၀ဲလံအဂ့ၢ်န့ၣ် ကၠိသရၣ်/မုၣ်တဖၣ်စံး၀ဲန့ၣ်လီၤႉ

ကၠိသ့ၣ်တဖၣ်အံၤလၢတၢ်ဘံၣ်တၢ်ဘၢႇကျိၣ်စ့တၢ်ဆီၣ်ထွဲမၤစၢၤႇတၢ်ကသိၣ်လိဖိဒံဖိသၣ်တဖၣ်အဂီၢ်န့ၣ် ခီဖျိကၠိသရၣ်/မုၣ်တကူတလၢႇကၠိဖိနီၣ်ဂံၢ်အါအဃိတၢ်ကီတၢ်ခဲအိၣ်လၢတၢ်ပီးတၢ်လီတကပၤဒီး ဘၣ်ဆၣ် ဖဲတလါအံၤလါဖ့ၤဘြူၤအါရံၤထီၣ်သီန့ၣ်ဒိးစဲးနံၣ်ကတၢၢ်တၢ်ဒိးစဲး၀ံၤ၀ဲလံအဂ့ၢ်န့ၣ် ကၠိၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ

တၢ်ကြဲၢ်ကီၢ်ဆၣ်(KECD)ၦၤဘၣ်မူဘၣ်ဒါတဂၤစံး၀ဲလၢ“ပတၢ်ကီတၢ်ခဲဒုအိၣ်ဒီဒူၣ်ညါႉတၢ်ကီတၢ်ခဲတဖၣ်အကျါန့ၣ်ကျိၣ်စ့မီၤနီၤႉအဂၤတခါန့ၣ်သရၣ်၊မုၣ်လၢအသိၣ်လိတၢ်ခဲအံၤတဖၣ်နါက့အိၣ်ဒီးအဟံၣ်ဖိဃီဖိႇအိၣ်ဒီးအမိအပါမီၤနီၤႉဘၣ်ဆၣ်အ၀ဲသ့ၣ်သိၣ်လိစၢၤ၀ဲလံာ်လီၤႉဒီတနံၣ်အတီၢ်ပူၤန့ၣ်အ၀ဲသ့ၣ်ဟဲသိၣ်လိကလီတၢ်မီၤနီၤႉလၢခံန့ၣ်ၦၤကၠိဖိနီၣ်ဂံၢ်ဟဲအါထီၣ်ႉတၢ်ကီတၢ်ခဲအိၣ်လၢသရၣ်/မုၣ်အိၣ်စှၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ကၠိဖိမိၢ်ပၢ်တနီၤန့ၣ်ဘၣ်ယိၣ်တၢ်လၢအဒံၣ်အဖိဂီၢ်လၢမ့ၢ်ပယီၤသုးကခးလီၤကျိဖးဒိၣ်ကဘီယူၤကဟဲတ့ၢ်လီၤမ့ၣ်ပိၢ်ဒ်န့ၣ်အိၣ်၀ဲအဂ့ၢ်န့ၣ် ကၠိသရၣ်မုၣ် နီၢ်အဲၣ်သးဆၢ စံး၀ဲဒ်အံၤန့ၣ်လီၤႉ

“ပသိၣ်လိလံာ်ဒုတၢ်ကီတၢ်ခဲတအိၣ်အါအါဘၣ်ႉအိၣ်တခါလၢၦၤကၠိဖိလၢအဟဲထီၣ်ကၠိဖဲ (KECD)ကၠိတဖၣ်အံၤအမိအပါတနီၤန့ၣ်သူၣ်ကိၢ်သးဂီၤတၢ်လၢအ၀ဲသ့ၣ်အဒံၣ်အဖိဂီၢ်အိၣ်မီၤနီၤႉဘၣ်မနုၤအဃိလဲၣ်န့ၣ်အ၀ဲသ့ၣ်နါက့တၢ်ဂ့ၢ်အိၣ်ႉတဲ၀ဲလၢမ့ၢ်ကဘီယူၤကဟဲတ့ၢ်လီၤမ့ၣ်ပိၢ်လၢကၠိကရၢၢ်ပူၤဧါႇမ့ၢ်တၢ်ဒုးကကဲထီၣ်ဧါဒ်န့ၣ်အိၣ်မီၤနီၤႉတၢ်သူၣ်ကိၢ်သးဂီၤတဖၣ်အံၤကဲထီၣ်၀ဲဒၣ်တၢ်ကီတၢ်ခဲလၢသရၣ်၊မုၣ်တဖၣ်အဂီၢ်လီၤ” အဂ့ၢ်န့ၣ် နီၢ်အဲၣ်သးဆၢ စံး၀ဲန့ၣ်လီၤႉ

သုးဟံးန့ၢ်တၢ်စိတၢ်ကမီၤ၀ံၤအလီၢ်ခံ(KECD)ကၠိလၢအိၣ်ဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ်ပူၤတဖၣ်အံၤ ခီဖျိၦၤကၠိဖိနီၣ်ဂံၢ်ဟဲအါထီၣ်အဃိ တီၤဒၢးတၢ်သူၣ်ထီၣ်ဒီးတၢ်ပီးတၢ်လီတကူတလၢတၢ်ကီတၢ်ခဲဒ်အံၤသ့ၣ်တဖၣ် အိၣ်၀ဲအဂ့ၢ်န့ၣ် ကၠိၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

ဒ်န့ၣ်အသိးခ့ၣ်အဲၣ်ယူၣ်(ဖၣ်အၣ်ကီၢ်ရ့ၣ်)တကးဒံးဘၣ်အမဲာ်ညါကီၢ်ရ့ၣ်ႇသုးက့လၢအဂၤတဖၣ်တနီၤန့ၣ် ခီဖျိဒုးယၤတၢ်သဘံၣ်သဘုၣ်အဃိတၢ်ကီတၢ်ခဲအိၣ်လၢၦၤကၠိဖိတဖၣ်တမၤလိမၤဒိးဘၣ်တၢ်ဂ့ၤဂ့ၤလၢၤဘၣ်ဒီး တနံၣ်အံၤတၢ်သိၣ်လိနံၣ်အဂီၢ်စ့ၢ်ကီးဒိးစဲး၀ဲနံၣ်ကတၢၢ်တၢ်ဒိးစဲး၀ံၤ၀ဲလံအဂ့ၢ်န့ၣ်သ့ၣ်ညါဘၣ်န့ၣ်လီၤႉ