လါအ့ဖြ့ၣ် ၆ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲလါအ့ဖြ့ၣ် ၅ သီအနံၤ လၢဖၣ်အၣ်ကီၢ်ရ့ၣ် လူၢ်ပျဲၢ်ကီၢ်ဆၣ် ချၢၣ်ဒ့သ၀ီအပူၤ တၢ်မၤလၤကပီၤ၀ဲကညီပိာ်မုၣ်ကရၢ(KWO)မုၢ်နံၤၦဲၤထီၣ် ၃၈ ၀ီတ၀ီမူးတၢ်ရဲၣ်တၢ်ကျဲၤအံၤဒီး လၢတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ် လီၢ်က၀ီၤၦၤပိာ်ခွါတဖၣ်ဟဲပၣ်ဃုာ်ပၣ်ဂီၢ်ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လါအ့ဖြ့ၣ် ၅ သီအနံၤ လၢအလီၤဘၣ်၀ဲကညီပိာ်မုၣ်ကရၢမုၢ်နံၤၦဲၤထီၣ်(၃၈)၀ီတ၀ီအံၤန့ၣ် ဖၣ်အၣ်ရ့ၣ်(KWO)ပိာ်မုၣ်ကရၢခိၣ်နၢ်တီခိၣ်ရိၣ်မဲမၤ၀ဲမူးတၢ်ရဲၣ်တၢ်ကျဲၤအံၤဒီးလၢမုၢ်နံၤမုၢ်သီ၀ဲအံၤၦၤပိာ်ခွါဟဲထီၣ်ပၣ်ဃုာ်ပၣ်ဂီၢ်၀ဲဒ်အံၤအဃိအ၀ဲသ့ၣ်အံၤလၢကသ့ၣ်ညါအါထီၣ်ၦၤပိာ်မုၣ်ခွဲးယာ်အဂီၢ်န့ၣ်ကျဲထီၣ်တၢ်တိစၢၤမၤစၢၤအါမးအဂ့ၢ်န့ၣ် ၦၤပိာ်ခွါလၢအဟဲထီၣ်မူးတၢ်ရဲၣ်တၢ်ကျဲၤအံၤတဖၣ်စံး၀ဲန့ၣ်လီၤႉ
တၢ်မၤလၤကပီၤကညီပိာ်မုၣ်ကရၢမုၢ်နံၤမူးတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ် သ၀ီကရူၢ်(၃)ဘ့ၣ် လီၢ်က၀ီၤကမျၢၢ် အဂၤ(၃၀၀)ဘျဲၣ်ဟဲထီၣ်၀ဲဒီး လၢတၢ်ရဲၣ်တၢ်ကျဲၤအပူၤန့ၣ်ပိာ်မုၣ်ကရၢခိၣ်တဖၣ် ဆှဲပၠးလီၤ၀ဲ(KWO)ဟဲကဲထီၣ်သး အတၢ်စံၣ်စိၤတဲစိၤအဂ့ၢ်အကျိၤသ့ၣ်တဖၣ်န့ၣ်လီၤႉ
ဖၣ်အၣ်ကီၢ်ရ့ၣ်(KWO)ကရၢခိၣ်လီၢ်လံၤ နီၣ်အဲၣ်စ့ စံး၀ဲလၢ“(KWO)ဟဲကဲထီၣ်အံၤလၢတၢ်ကဒုးအိၣ်ဖျဲၣ်ထီၣ်၀ဲ ၦၤပိာ်မုၣ်ခိၣ်နၢ်တဖၣ်အဂီၢ်လီၤႉခီဖျိလၢ(KWO)အိၣ်အဃိန့ၣ်ၦၤပိာ်မုၣ်သးစၢ်လၢဒူသ၀ီမ့ၢ်ဂ့ၤႇဘၣ်ကီဘၣ်ခဲဒဲက၀ီၤပူၤမ့ၢ်ဂ့ၤႇအိၣ်လၢကီၢ်ဆၣ်ကီၢ်ရ့ၣ်ကိးဘ့ၣ်ဒဲးအပူၤတဖၣ်အံၤတၢ်မၤမူဒါလၢအ၀ဲသ့ၣ်ဘၣ်မၤ၀ဲတဖၣ်၊လၢတၢ်ပၢၢ်ဆၢအဂီၢ်ကကဲထီၣ်တၢ်တိစၢၤမၤစၢၤအဂီၢ်၊ကသ့ၣ်ညါနၢ်ပၢၢ်အါထီၣ်အ၀ဲသ့ၣ်တၢ်ခွဲးတၢ်ယၤဒီးကသ့ၣ်ညါနၢ်ပၢၢ်အါထီၣ်ထံရူၢ်ကီၢ်သဲးအဂီၢ်န့ၣ်ကဲထီၣ်၀ဲတၢ်တိစၢၤမၤစၢၤဖးဒိၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဒ်န့ၣ်အသိးကညီပိာ်မုၣ်ကရၢ(KWO)မုၢ်နံၤလၢအလီၤဘၣ်လၢဘျီ၀ဲအံၤန့ၣ် တၢ်မၤလၤကပီၤအီၤလၢ ခ့ၣ်အဲၣ်ယူၣ်(သုးက့)ႇကီၢ်ရ့ၣ်(၇)ဘ့ၣ်လၢာ်အပူၤတကးဒံးဘၣ်အမဲာ်ညါ လၢကီၢ်ကၠီၣ်တဲၣ်–ကီၢ်ပယီၤကီၢ်ဆၢ ကညီဘၣ်ကီဘၣ်ခဲဒဲက၀ီၤပူၤဒီး ကီၢ်ဆၢတၢ်လီၢ်သ့ၣ်တဖၣ်စ့ၢ်ကီးတၢ်မၤလၤကပီၤ၀ဲမူးတၢ်ရဲၣ်တၢ်ကျဲၤအံၤဒီး ကညီပိာ်မုၣ်ခိၣ်နၢ်တနီၤလၢအမၤတၢ်န့ၢ်ဖးယံၤတဖၣ်တၢ်ဟ့ၣ်မၤလၤကပီၤအ၀ဲသ့ၣ်လၢခိၣ်ဖးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်သိးပိာ်မုၣ်တဖၣ်အတၢ်အိၣ်မူပတီၤပတီၢ်ကထီထီၣ်ဒီးအတၢ်အိၣ်မူကထူၣ်ဖျဲးထီၣ်လၢတၢ်ဆီၣ်တံၢ်မၤနၢၤအကလုာ်ကလုာ်ပူၤအဂီၢ်န့ၣ်ကညီပိာ်မုၣ်ကရၢ(KWO)အံၤဟူးဂဲၤ၀ဲဒီး ကရၢအံၤဘၣ်တၢ်ဒုးအိၣ်ထီၣ်အီၤဖဲ ၁၉၈၅ နံၣ် ဖၣ်အၣ်ကီၢ်ရ့ၣ် ခ့ၣ်အဲၣ်ယူၣ်၀ဲၤလီၢ်ခိၣ်သ့ၣ်လီၢ်လံၤ(မၤနၢၤပျီ)တၢ်လီၢ်န့ၣ်လီၤႉ