လါမ့ၤ ၃ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲလါမ့ၤ ၂ သီအနံၤ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဆဲးမၤ၀ဲ(၁၇)ဘျီတဘျီ လီၢ်ခၢၣ်သးခီကရဲးတၢ်ဃုထၢဒီး တၢ်ဃုထၢအံၤအပူၤ ပဒိၣ်စီၤကွဲၤထူ၀့ ကဲထီၣ်၀ဲ(ခ့ၣ်အဲၣ်ယူၣ်)ကရၢခိၣ် ၁၀ ဂၤတဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ
(၁၇)ဘျီတဘျီ ခ့ၣ်အဲၣ်ယူၣ်ခီကရဲးတၢ်ဃုထၢအံၤဘၣ်တၢ်စးထီၣ်မၤအီၤဖဲအပူၤကွံာ်လါအ့ဖြ့ၣ် ၂၄ သီ လၢခ့ၣ်အဲၣ်ယူၣ်တၢ်ပၢဟီၣ်က၀ီၤတၢ်လီၢ်တတီၤဒီး ကီၢ်ရ့ၣ်ႇသုးက့(၇)ဘ့ၣ်လၢာ်ခၢၣ်စးဟဲထီၣ်၀ဲအဂၤ(၁၀၀)ဘျဲၣ်ဒီး ခၢၣ်စး(၅၆)ဂၤနုာ်လီၤဒိးဃုထၢအသးန့ၣ်လီၤႉဖဲန့ၣ်လီၢ်ခံတၢ်ဃုထၢထီၣ်ခိၣ်နၢ်သီတဖၣ်အံၤလၢတၢ်ခူသူၣ်တၢ်ဖးအခါ ပဒိၣ်စီၤကွဲၤထူ၀့လၢအဟံးတ့ၢ်ဃာ်ကရၢခိၣ်–၂ မူဒါအံၤ ကဲထီၣ်က့ၤ၀ဲကရၢခိၣ်န့ၣ်လီၤႉ
ခီကရဲးတၢ်ဃုထၢအပူၤ ခ့ၣ်အဲၣ်ယူၣ်ကရၢခိၣ်အလီၢ်န့ၣ် တၢ်ဃုထၢထီၣ်၀ဲ ပဒိၣ်စီၤကွဲၤထူ၀့၀ံၤ တၢ်ကဆဲးဃုထၢထီၣ်ကဒီး၀ဲ ကရၢခိၣ်–၂ႇ နဲၣ်ရွဲၣ်ခိၣ်ကျၢၢ်ႇ နဲၣ်ရွဲၣ်သဃဲၤ(၁)ဒီး နဲၣ်ရွဲၣ်သဃဲၤ(၂)သ့ၣ်တဖၣ်အံၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခ့ၣ်အဲၣ်ယူၣ်လီၢ်ခၢၣ်သးခီကရဲးလၢအဘၣ်တၢ်မၤအီၤခဲအံၤန့ၣ်ကီၢ်ရ့ၣ်ႇသုးက့(၇)ဘ့ၣ်လၢာ်ခၢၣ်စးတဖၣ်ဟဲထီၣ်၀ဲဒီး တီအူကီၢ်ရ့ၣ်(သုးက့ ၂)ဒီး မုၢ်တြီၢ်ကီၢ်ရ့ၣ်(သုးက့ ၅)အခၢၣ်စးဟဲထီၣ်၀ဲခီကရဲးဘၣ်ဆၣ် တနုၤလီၤဟ့ၣ်တၢ်ဖးႇ တနုာ်လီၤဒိးဃုထၢသးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်စှၤသီအခါစ့ၢ်ကီးဘၣ်ဃးခီကရဲးတၢ်ဃုထၢအဖီခိၣ်အံၤခ့ၣ်အဲၣ်ယူၣ်(သုးက့ ၅) ကွဲးဆှၢထီၣ်အတၢ်ထံၣ်တၢ်ဟ့ၣ်ကူၣ်လံာ်တဘ့ၣ်ဆူခီကရဲးအအိၣ်ဒံးအဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ
ကီၢ်ရ့ၣ်ႇသုးက့(၇)ဘ့ၣ်လၢာ်အကျါမ့မ့ၢ်ကီၢ်ရ့ၣ်ႇသုးက့(၂)ဘ့ၣ်ခၢၣ်စးတနုာ်လီၤဟ့ၣ်တၢ်ဖးႇတနုာ်လီၤဒိးဃုထၢသးဘၣ်ႇဘၣ်ဆၣ်ခီဖျိကီၢ်ရ့ၣ်ခၢၣ်စးလၢအဂၤတဖၣ်ခဲလၢာ်ဟဲထီၣ်၀ဲခီကရဲးအဃိ ဒ်ခ့ၣ်အဲၣ်ယူၣ်တၢ်သူၣ်ထီၣ်ဆီလီၤအိၣ်အသိး ခီဖျိၦၤဟဲထီၣ်တၢ်ဃုထၢအိၣ်(၇၅)မျးကယၤညါအဃိတၢ်မၤ၀ဲတၢ်ဃုထၢအံၤန့ၣ်လီၤႉ
ခီကရဲးအပူၤတချုးတၢ်ဃုထၢထီၣ်ခ့ၣ်အဲၣ်ယူၣ်ခိၣ်နၢ်ဒိၣ်ထီ(၅)ဂၤအံၤဒံးဘၣ်အခါန့ၣ်တၢ်ဃုထၢထီၣ်ဆိ၀ဲကတီၤဆိလီၢ်ခၢၣ်သးထီဘိကမံးတံာ်(၄၅)ဂၤ၀ံၤႇတၢ်ဆဲးဃုထၢထီၣ်၀ဲလီၢ်ခၢၣ်သးထီဘိကမံးတံာ်(၄၅)အံၤန့ၣ်လီၤႉဖဲန့ၣ်၀ံၤလီၢ်ခံတၢ်ဟ့ၣ်တၢ်ဖးဃုထၢထီၣ်ခိၣ်နၢ်ဒိၣ်ထီ(၅)ဂၤသ့ၣ်တဖၣ်အံၤဒီးပၢဆှၢတၢ်ကမံးတံာ်ဖိႇ၀ဲၤကျိၤဘၣ်ထွဲခိၣ်နၢ်လၢအအိၣ်တ့ၢ်သ့ၣ်တဖၣ်အံၤတၢ်က့ၤဃုထၢထီၣ်၀ဲန့ၣ်လီၤႉ
အပူၤကွံာ်လါအ့ဖြ့ၣ် ၂၉ သီအခါ ဖဲတၢ်ဟ့ၣ်တၢ်ဖးဃုထၢထီၣ်ကတီၤဆိလီၢ်ခၢၣ်သးထီဘိကမံးတံာ်တဖၣ်အခါန့ၣ် ခီဖျိတၢ်နုာ်လီၤမၤတံာ်တာ်တၢ်လၢ(အီၤလါ)ပူၤအဃိခီကရဲးတၢ်ဃုထၢတကဲထီၣ်၀ဲလၢၤဘၣ်ဒီးတၢ်က့ၤစးထီၣ်မၤကဒါအီၤဖဲလါမ့ၤထီၣ် ၁ သီ ဒီးဖဲန့ၣ်တၢ်က့ၤဃုထၢထီၣ်ကဒါခိၣ်နၢ်အသီတဖၣ်န့ၣ်လီၤႉ
ခီကရဲး(၁၇)ဘျီတဘျီတၢ်ဃုထၢအပူၤန့ၣ် ခ့ၣ်အဲၣ်ယူၣ်ကရၢခိၣ် သုးခိၣ်ကျၢၢ်ဒိၣ်စိ စီၤမူၤတူစ့ဖိ တနုာ်လီၤဒိးဃုထၢသးလၢလၢၤဘၣ်အသိး ခီကရဲးအပူၤတၢ်ဆၢတဲာ်လီၤ၀ဲလၢ ကရၢခိၣ်ဒီးကီၢ်ရ့ၣ်ခိၣ်လီၢ်လၤအံၤ တၢ်မၤအီၤန့ၢ်ထဲခံဘျီလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
အပူၤကွံာ်(၁၆)ဘျီတဘျီ ခ့ၣ်အဲၣ်ယူၣ်ခီကရဲးအံၤဘၣ်တၢ်မၤတ့ၢ်အီၤဖဲ(၂၀၁၇)နံၣ် လါအ့ဖြ့ၣ်အခါဒီး ဒ်ခ့ၣ်အဲၣ်ယူၣ်တၢ်သူၣ်ထီၣ်ဆီလီၤအသိး လီၢ်ခၢၣ်သးႇကီၢ်ရ့ၣ်ဒီးကီၢ်ဆၣ်အပတီၢ်န့ၣ််ကဘၣ်မၤ၀ဲခီကရဲး(၄)နံၣ်တဘျီ ဘၣ်ဆၣ် ခီဖျိခိ၀ံၣ်တၢ်အိၣ်သးဒီးကီၢ်ပယီၤသုးဟံးန့ၢ်တၢ်စိတၢ်ကမီၤတၢ်အိၣ်သးတဖၣ်အဃိ တၢ်သုးကွံာ်၀ဲခီကရဲးအံၤ(၂)နံၣ်ဒီးန့ၢ်(၆)နံၣ်မးတၢ်က့ၤမၤကဒါ၀ဲတၢ်ဃုထၢအံၤန့ၣ်လီၤႉ