တၢ်ဒုးကဲထီၣ်၀ံၤလီၢ်ခံဒုးယၤတၢ်ဖ့ၣ်စၢအိၣ်ဒံးအဃိကမျၢၢ်က့ၤအိၣ်လၢသ၀ီပူၤတဘူၣ်ဒံးဘၣ်

လါမ့ၤ ၂ သီႇ ၂၀၂၃ နံၣ်ႇ ခ့ၣ်အဲးစံၣ်

လၢတလၢၤကီၢ်စဲၣ် ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ဖဲလါအ့ဖြ့ၣ် ၂၉ သီအနံၤ လၢအလူလ့သ၀ီဒီး သပၠ့ၤနံၤသ၀ီပူၤန့ၣ် တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီး ပယီၤသုးဘၢၣ်စၢၤ၀ံၤလီၢ်ခံခီဖျိခံခီခံကပၤဒုးယၤတၢ်ဖ့ၣ်စၢအိၣ်ဒံးတုၤလၢခဲအံၤအဃိလီၢ်က၀ီၤကမျၢၢ်က့ၤအိၣ်လၢသ၀ီပူၤတဘူၣ်ဒံး၀ဲဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ

လၢအလူလ့သ၀ီပူၤ တၢ်ဒုးကဲထီၣ်၀ဲလၢပယီၤသုးဒီး KNLA သုးရ့ၣ်(၃)သုးပာ်ဖှိၣ်အဘၢၣ်စၢၤ၀ံၤလီၢ်ခံန့ၣ် သပၠ့ၤနံၤသ၀ီ,အလူလ့ဒီးအလဲၤသ၀ီဖိတဖၣ်ဘၣ်ဃ့ၢ်ထီၣ်၀ဲဒီးခီဖျိခံခီခံကပၤဒုးယၤတၢ်ဖ့ၣ်စၢအိၣ်တုၤလၢခဲအံၤအဃိ ကမျၢၢ်တဖၣ်ပျံၤတၢ်ဖုးတၢ်က့ၤအိၣ်လၢသ၀ီပူၤတဘူၣ်ဒံးဘၣ်အဂ့ၢ်န့ၣ် ကမျၢၢ်လၢအိၣ်ဘံလ့၀့ၢ်ပူၤတဂၤ စံး၀ဲန့ၣ်လီၤႉ

အ၀ဲစံး၀ဲလၢ“တနံၤညါအံၤဒုတၢ်ဒုးတကဲထီၣ်လၢၤဘၣ်ႉကမျၢၢ်လၢအစံၣ်ထီၣ်တဖၣ်န့ၣ်က့ၤအိၣ်လၢသ၀ီပူၤတဘူၣ်ဒံးဘၣ်ႉအိၣ်ဒၣ်လၢၦၤက့ၤကွၢ်ၦၤဟံၣ်ၦၤဃီတၢ်အိၣ်သးဒ်န့ၣ်လီၤႉတၢ်အိၣ်သးခဲအံၤဒုတၢ်ဒီသဒၢကမျၢၢ်သုးမ့ၢ်ဂ့ၤႇပယီၤသုးမ့ၢ်ဂ့ၤန့ၣ်နကွၢ်စူၣ်ယၤကွၢ်စူၣ်လီၤႉတၢ်ဒုးကကဲထီၣ်ကဒါသ့အဃိအါဒၣ်တက့ၢ်န့ၣ်ၦၤက့ၤအိၣ်လၢသ၀ီပူၤတဘူၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါမ့ၤ ၁ သီအခါန့ၣ်လီၤႉ

ဖဲလါအ့ဖြ့ၣ် ၂၉ သီ ဂီၤခီအဆၢကတီၢ် ခံခီခံကပၤတၢ်ခးလိာ်သးကဲထီၣ်၀ံၤလီၢ်ခံ ဘံလ့(မြင်သာတောင်) ပယီၤသုးကလၢၤခးလီၤကျိဖးဒိၣ်လီၤတဲာ်ပိၢ်ဖးထီၣ်လၢ(အလူလ့)သ၀ီကပၤအသိးဖဲတၢ်တနံၤန့ၣ်ဟါခီအဆၢကတီၢ်န့ၣ်စ့ၢ်ကီးခီဖျိတၢ်ပၢၢ်ဆၢသုးပာ်ဖှိၣ်လဲၤတ့ၢ်လီၤမ့ၣ်ပိၢ်လၢ(သပြေနီ)သ၀ီကပၤပယီၤသုး(သံတံတား)တိၤတၢ်သမံသမိးတြဲၤလီၢ်အဃိပယီၤသုးက့ၤခးလီၤကဒါကျိဖးဒိၣ်ဆူသပၠ့ၤနံၤသ၀ီပူၤဒီးကမျၢၢ်သံ၀ဲ(၁)ဂၤႇဘၣ်ဒိ(၁)ဂၤအဂ့ၢ်န့ၣ် ခ့ၣ်အဲၣ်ယူၣ် ဂံၢ်ခီၣ်ထံး ၦၤဟ့ၣ်တၢ်ကစီၣ်ဖိဒီးလီၢ်က၀ီၤကမျၢၢ်စံး၀ဲန့ၣ်လီၤႉ

တၢ်ဒုးကဲထီၣ်ဖဲအလူလ့သ၀ီပူၤအခါန့ၣ်ပယီၤသုးသံ(၃)အဂ့ၢ်လီၢ်က၀ီၤမ့ၣ်ဒံၣ်ယၣ်တၢ်ကစီၣ်ပာ်ဖျါထီၣ်၀ဲအိၣ်တနီၤဒီး မ့မ့ၢ်သုးပာ်ဖှိၣ်တကပၤတၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲန့ၣ်လီၤႉ

“ပယီၤသုးခးလီၤဆိကျိဖးဒိၣ်လၢအလူလ့သ၀ီတကပၤန့ၣ်(၉)ဖျၢၣ်ႇလီၤတဲာ်လၢသ၀ီကပၤကျဲမုၢ်ခိၣ်န့ၣ်တဖျၢၣ်ႉမ့၀ံၤလီၤတဲာ်လၢကမျၢၢ်တၢ်ဖံးအီၣ်မၤအီၣ်လီၢ်န့ၣ်(၈)ဖျၢၣ်ႉကမျၢၢ်ဒုဘၣ်ဒိဘၣ်ထံးတအိၣ်ဘၣ်ႉ(KNLA)သုးပာ်ဖှိၣ်နါက့သံဘၣ်ဒိဘၣ်ထံးတအိၣ်ဘၣ်ႉမ့မ့ၢ်ပယီၤသုးတကပၤခီန့ၣ်အသံအဘၣ်ဒိၦဲၤဂၤလဲၣ်ဒုပတသ့ၣ်ညါဒံးဘၣ်”အဂ့ၢ်န့ၣ် အ၀ဲစံး၀ဲန့ၣ်လီၤႉ

တၢ်ကဲထီၣ်သးဖဲန့ၣ်၀ံၤလီၢ်ခံဖဲဟါခီအဆၢကတီၢ်တၢ်ဒုးကဲထီၣ်ကဒီးဖဲသပၠ့ၤနံၤသ၀ီကပၤ(သံတံတား)တိၤအခါန့ၣ် ပယီၤသုးသံဘၣ်ဒိဘၣ်ထံး၀ဲ(၇)ဂၤအဂ့ၢ် တၢ်ပၢၢ်ဆၢသုးပာ်ဖှိၣ်စံး၀ဲဘၣ်ဆၣ် မ့မ့ၢ်ပခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ခီန့ၣ် ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံး၀ဲဘၣ်န့ၣ်လီၤႉ

ဒ်န့ၣ်အသိးဖဲအပူၤကွံာ်လါအ့ဖြ့ၣ် ၁၉ သီအခါစ့ၢ်ကီး ပယီၤသုးလၢအိၣ်ဆီလီၤသးဖဲ(အလုံတောင်)တဖၣ်အံၤ ခးလီၤကျိဖးဒိၣ်ဆူအလူလ့သ၀ီပူၤအဃိလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲဒီးတၢ်ဘၣ်ဒိဘၣ်ထံးတအိၣ်နီတမံၤဘၣ် ဘၣ်ဆၣ်ခီဖျိတၢ်ဒုးကဲထီၣ်ကဒီးတဘျီအံၤအဃိလီၢ်က၀ီၤကမျၢၢ်တဖၣ်က့ၤအိၣ်လၢသ၀ီပူၤတဘူၣ်ဘၣ်ဒီးထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် ဘံလ့၀့ၢ်ပူၤကမျၢၢ်တဖၣ်စံး၀ဲန့ၣ်လီၤႉ