လါအ့ဖြ့ၣ် ၉ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ကီၢ်ဆၣ်ခံဘ့ၣ်အပူၤ သုးကီၣ်ကးထုးထီၣ် တၢ်ကဘၣ်ကဲသုးတၢ်ဘျၢ၀ံၤလီၢ်ခံ ၦၤသူၣ်ဘီၣ်သးစၢ်ဟဲစံၣ်အိၣ်ကဒုသးအိၣ်၀ဲခဲလၢာ်(၂၀၀)ဘျဲၣ်အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ စံး၀ဲဒၣ်န့ၣ်လီၤႉ
သုးကီၣ်ကးထုးထီၣ်တၢ်ကဘၣ်ကဲသုးတၢ်ဘျၢ၀ံၤလီၢ်ခံလၢဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်ဒီးသထူၣ်ကီၢ်ဆၣ် ကီၢ်ဆၣ်(၂)ဘ့ၣ်အံၤအပူၤန့ၣ် ၦၤသးစၢ်ဟဲအိၣ်ကဒုသးအနီၣ်ဂံၢ်အိၣ်၀ဲ(၃၀၀)ဃၣ်ဃၣ်လံဒီးဘၣ်ဆၣ်မ့မ့ၢ် ကီၢ်ရ့ၣ် ဒီတဘ့ၣ်အပူၤၦၤစးစၢ်ဟဲအိၣ်ကဒုသးအနီၣ်ဂံၢ်ခီန့ၣ်ခီဖျိတၢ်သမံသမိး၀ဲတ၀ံၤတတဲာ်ဒံးဘၣ်အဃိ အနီၣ်ဂံၢ်နီၣ်ဒွး လီၤတံၢ်လီၤဆဲးန့ၣ်တသ့ၣ်ဒံးဘၣ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲန့ၣ်လီၤႉ
“အခဲအံၤန့ၣ်ပဟးထၢစရီအဖၢမုၢ်လီၤတ၀ံၤတတဲာ်ဒံးဘၣ်ႉအနီၣ်ဂံၢ်နီၣ်ဒွးခဲလၢာ်ဒုပတသ့ၣ်ညါလီၤတံၢ်လီၤဆဲးခဲ လၢာ်ဒံးဘၣ်ႉမ့မ့ၢ်လၢကၠဲးထိၣ်ကီၢ်ဆၣ်န့ၣ်ဟဲထီၣ်၀ဲဒၣ်အိၣ်(၁၇၅)ဂၤခဲအံၤကအိၣ်လၢ(၂၀၀)ဖီခိၣ်လံႉတၢ်မၢၤလၢ သထူၣ်ကီၢ်ဆၣ်ခီန့ၣ်အိၣ်၀ဲဒၣ်(၃၈)ဂၤခဲအံၤကအိၣ်လၢ(၅၀)ဃၣ်ဃၣ်လံမီၤႉမ့မ့ၢ်လၢကၠဲးထိၣ်ကီၢ်ဆၣ်တကပၤန့ၣ် (BPLA)ဟဲဆ့ၣ်နီၤအိၣ်ဖဲန့ၣ်တခါႉအဃိန့ၣ်ပနၢ်ဟူလၢအ၀ဲသ့ၣ်ဆဲးကျိး၀ဲဒီးပာ်ဖှိၣ်ဃာ်၀ဲဖဲန့ၣ်ဘျီဆှၢထီၣ်၀ဲဆူ (သုးက့ ၅)တကပၤန့ၣ်အိၣ်တဘျုးလၢအကယၤညါလံ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ဖဲအပူၤကွံာ်လါဖ့ၤဘြူၤအါရံၤအခါန့ၣ်လၢကီၢ်ပယီၤဒီတဘ့ၣ်အပူၤသုးကီၣ်ကးထုးထီၣ်တၢ်ကဘၣ်ကဲသုးသဲစးဒီး ခီဖျိလၢတၢ်ဂ့ၢ်အံၤအဃိသူၣ်ဘီၣ်သးစၢ်တဖၣ်အိၣ်ဒီးတၢ်ဘၣ်ယိၣ်ဘၣ်ဘှီလၢကဘၣ်ကဲသုးအဃိတနီၤန့ၣ်အ၀ဲသ့ၣ် ဟးထီၣ်၀ဲဒၣ်လၢထံဂုၤကီၢ်ဂၤအိၣ်၀ဲအသိးတနီၤန့ၣ်လဲၤနုာ်လီၤအိၣ်ကဒုသးလၢကလုာ်ဒူၣ်ဖီၣ်စုက၀ဲၤတၢ်လီၢ်စ့ၢ်ကီး အိၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
တကီၢ်ခါခဲအံၤၦၤသးစၢ်လၢအဟဲအိၣ်ကဒုသးဖဲဒူသထူၣ်ကီၢ်ရ့ၣ် ကီၢ်ဆၣ်(၂)ဘ့ၣ်အံၤအပူၤတဖၣ် အါဒၣ်တက့ၢ် အ၀ဲသ့ၣ်တၢ်တူၢ်ခီၣ်ပာ်သးအိၣ်လၢကဒုးပၢၢ်ဆၢက့ၤသုးမီၤစိရိၤဒီးလၢန့ၣ်အမဲာ်ညါသုးကီၣ်ကးထုးထီၣ်တၢ်ကဘၣ်ကဲသုးသဲးစးအံၤလၢကမၤၦဲၤထီၣ်က့ၤအဂံၢ်အဘါအဂီၢ်လီၤအဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံးအါထီၣ် ၀ဲဒ်အံၤန့ၣ်လီၤႉ
“ခဲအံၤၦၤလၢအဟဲစိပာ်သ့ၣ်တဖၣ်န့ၣ်ပမ့ဘၣ်ကွၢ်န့ၣ်အ၀ဲသ့ၣ်ကဲ၀ဲဒၣ်သုးတမုာ်ဘၣ်ႉခဲအံၤၦၤသူၣ်ဘီၣ်သးစၢ်လၢအဟဲအိၣ်ကဒုသးခဲအံၤတဖၣ်အ၀ဲသ့ၣ်အသးဆူၣ်လၢကဒုးထီဒါက့ၤသုးမီၤစိရိၤန့ၣ်အမျးကယၤအိၣ်အါ၀ဲဒၣ်မီၤနီၤႉ သုးမီၤစိရိၤတဖုအံၤပမ့ဘၣ်ကွၢ်န့ၣ်အဂံၢ်အဘါလီၤစှၤႉခဲအံၤဒ်သိးအဂံၢ်အဘါကအိၣ်ထီၣ်အဂီၢ်န့ၣ်တၢ်ကစီၣ်ဟူထီၣ် လၢကမၤအါထီၣ်၀ဲသုးတလါန့ၣ်(၅၀၀၀)ကပျဲထီၣ်၀ဲတၢ်မၤလိႉအဃိကမျၢၢ်တဖၣ်ပျံၤတၢ်ဖုးတၢ်ကဲ၀ဲဒၣ်သုးတမုာ်ဘၣ်ႉသုးကီၣ်ကးထုးထီၣ်တၢ်ဘျၢအံၤဒ်သိးကမၤၦဲၤထီၣ်က့ၤအဂံၢ်အဘါအဂီၢ်လီၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါၦၤသူၣ်ဘီၣ်သးစၢ်လၢအဟဲအိၣ်ကဒုသးတဖၣ်အံၤဟီၣ်က၀ီၤၦၤဘၣ်မူဘၣ်ဒါထၢအ၀ဲသ့ၣ်တၢ်ပာ်သး မ့၀ံၤန့ၣ်ၦၤလၢအသးမ့အိၣ်လၢကဒုးထီဒါက့ၤသုးကီၣ်ကးတဖၣ်အံၤန့ၣ်တၢ်ရဲၣ်တၢ်ကျဲၤအိၣ်လၢတၢ်ကဒုးထီၣ်၀ဲ ဂံၢ်ခီၣ်ထံးသုးတၢ်မၤလိအဂ့ၢ်န့ၣ် ဟီၣ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ
ဒူသထူၣ်ကီၢ်ရ့ၣ်အပူၤဒ်သိးပယီၤသုးလၢအဟဲစံၣ်ထီၣ်ဟဲပာ်လီၤစုက၀ဲၤတဖၣ်အံၤဒီးသူၣ်ဘီၣ်သးစၢ်ကဟဲအိၣ်ကဒု သးလၢဟီၣ်က၀ီၤပူၤကန့ၢ်အဂီၢ်န့ၣ်တၢ်ရဲၣ်ကျဲၤကတဲာ်ကတီၤဃာ်န့ၢ်၀ဲတၢ်လီၢ်လီၤလီၤဆီဆီခံတီၤလၢၦၤသ့ၣ်တဖၣ် အံၤအဂီၢ်အိၣ်၀ဲအဂ့ၢ်န့ၣ် ကီၢ်ရ့ၣ် ၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ