ပျံၤ၀ဲဒၣ်ကဘီယူၤတၢ်လီၤဘၣ်ယိၣ်အဃိ ရၤမတံ၀့ၢ်လီၢ်က၀ီၤဖိတနီၤ စးထီၣ်ဃ့ၢ်ပဒ့ၣ်သး

လါအ့ဖြ့ၣ်ႇ ၈သီႇ ၂၀၂၄နံၣ်ႇ ခ့ၣ်အဲးစံၣ်

ကညီကီၢ်စဲၣ် သ့ၣ်ဃးလီၤတီၢ်(သ့ၣ်ကါညံၣ်နီၣ်)ပယီၤဒုးယာ်သုးကလၢၤလီၤ၀ံၤအလီၢ်ခံ ကီၢ်ပယီၤ-ကီၢ်ကၠီၣ်တဲၣ်ကီၢ်ဆၢရၤမတံ၀့ၢ် ၀့ၢ်ပူၤကမျၢၢ်သ့ၣ်တဖၣ်ဘၣ်ယိၣ်၀ဲလၢတၢ်ဒုးမ့ၢ်ကဲထီၣ်လၢ၀့ၢ်ပူၤဒီးပယီၤသုးကဟဲခးလီၤတၢ်ဒီးကဘီယူၤအဃိလီၢ်က၀ီၤကမျၢၢ်တနီၤစးထီၣ်ဃ့ၢ်ပဒ့ၣ်သးလံအဂ့ၢ် သ့ၣ်ညါဘၣ်လၢလီၢ်က၀ီၤတၢ်ပၢၢ်ဆၢသုးပာ်ဖှိၣ်ၦၤဘၣ်မူဘၣ်ဒါအအိၣ်န့ၣ်လီၤႉ

ရၤမတံ၀့ၢ်ခိၣ်ထိးန့ၣ်အိၣ်ဒံးပယီၤသုးခီၣ်သုးရ့ၣ်၂၇၅သုးကလၢၤတဖျၢၣ်ဒံးအဃိတၢ်ဒုးမ့ၢ်ကဲထီၣ်န့ၣ်ကမျၢၢ်သ့ၣ်တဖၣ်ပျံၤ၀ဲဒၣ်ပယီၤသုးကီၣ်ကးအကဘီယူၤအဖီခိၣ်ဃ့ၢ်ပဒ့ၣ်သးလီၤအဂ့ၢ် တၢ်ပၢၢ်ဆၢသုးပာ်ဖှိၣ်အၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“အခဲအံၤန့ၣ်ပယီၤသုးခီၣ်သုးရ့ၣ်၂၇၅အအိၣ်တ့ၢ်ဒံးအဃိန့ၣ်ပကမၤလၢအဂ့ၤကတၢၢ်လီၤႉလၢပ၀ဲတၢ်ပၢၢ်ဆၢသုးပာ်ဖှိၣ်တကပၤန့ၣ်ဒ်သိးကမျၢၢ်တၢ်ဘၣ်ဒိဘၣ်ထံးသုတအိၣ်တဂ့ၤအဂီၢ်ပဂၢၤဃာ်ကမျၢၢ်လၢအဂ့ၤကတၢၢ်န့ၣ်လီၤႉဘၣ်ဆၣ်ပယီၤသုးကီၣ်ကးတကပၤ တၢ်ဒုးမ့ၢ်ကဲထီၣ်န့ၣ်သူ၀ဲဒၣ်ကဘီယူၤအဃိကမျၢၢ်သ့ၣ်တဖၣ်ပျံၤ၀ဲဒၣ်ပယီၤသုးကဘီယူၤအဃိသတးန့ၣ်ဟးထီၣ်ဃ့ၢ်ပဒ့ၣ်သးအိၣ်လံတနီၤအသိးအိၣ်တ့ၢ်လၢ၀့ၢ်ပူၤအိၣ်တနီၤန့ၣ်လီၤႉ”အဂ့ၢ်စံး၀ဲန့ၣ်လီၤႉ

ရၤမတံ၀့ၢ်ပူၤၦၤကမျၢၢ်လၢဃ့ၢ်ပဒ့ၣ်သးသ့ၣ်တဖၣ်အံၤ ၦၤလၢသ၀ီအိၣ်သ့ၣ်တဖၣ်က့ၤကဒါက့ၤဆူနီၢ်ကစၢ်ဒူသ၀ီအိၣ်တနီၤအသိးဟဲဃ့ၢ်နုာ်၀ဲဒၣ်ဆူကီၢ်ကၠီၣ်တဲၣ်၀့ၢ်မဲၢ်ဆီးတကပၤအိၣ်၀ဲတနီၤအဂ့ၢ်သ့ၣ်ညါဘၣ်အသိးလီၤဆီဒၣ်တၢ်ကမျၢၢ်လၢအအိၣ်ဘူးဒီးပၢၤကီၢ်သုး၀ဲၤလီၢ်ဒီးသုးကီၣ်ကး၀ဲၤကျိၤအရူသ့ၣ်တဖၣ်ဃ့ၢ်ပဒ့ၣ်သးလၢၤဃၣ်ဃၣ်လံအဂ့ၢ်သ့ၣ်ညါဘၣ်ဒ်ရၤမတံလီၢ်က၀ီၤစံး၀ဲဒၣ်အသိးန့ၣ်လီၤႉ

လၢန့ၣ်အမဲာ်ညါ သုးကီၣ်ကးဖီလာ်၀ဲၤကျိၤၦၤမၤတၢ်ဖိလၢအအိၣ်ဖဲရၤမတံ၀့ၢ်ပူၤခဲလၢာ်သ့ၣ်တဖၣ်တၢ်ပၢၢ်ဆၢသုးပာ်ဖှိၣ်တကပၤဟ့ၣ်အ၀ဲသ့ၣ်တဖၣ်ခွဲးတၢ်ယာ်(၅)သီလၢကဟးထီၣ်ကွံာ်လၢမူဒါတၢ်ဖံးတၢ်မၤဒီးအခဲအံၤအ၀ဲသ့ၣ်တၢ်ခွဲးတၢ်ယာ်အိၣ်တ့ၢ်ဒံး(၂)သီလၢကဟးထီၣ်ဒံးအဂ့ၢ်လီၢ်က၀ီၤတၢ်ပၢၢ်ဆၢၦၤဘၣ်မူဘၣ်ဒါ၀ဲစံးစ့ၢ်ကီးန့ၣ်လီၤႉ

လၢတၢ်န့ၣ်အဃိ သုးကီၣ်ကးအထံဂုၤကီၢ်ဂၤမီၢ်သီကွဲးထီၣ်လံာ်ဆူကီၢ်ကၠီၣ်တဲၣ်အအိၣ်ဒီးဃ့ထီၣ်၀ဲလၢကီၢ်ကၠီတဲၣ်ကပျဲအ၀ဲသ့ၣ်ကဘီယူၤစီၢ်လီၤဖဲမဲၢ်ဆီးကဘီယူၤပျီစးထီၣ်လၢလါအ့ဖြ့ၣ် (၇)သီတုၤ(၉)သီလၢ(၃)အတီၢ်ပူၤဒ်သိးကစိာ်ဆှၢ၀ဲၦၤလဲၤတၢ်ဖိအိၣ်၀ဲဒၣ်အဂ့ၢ်သ့ၣ်ညါဘၣ်န့ၣ်လီၤႉ