လါအီကူာ် ၁၉ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် KNLA သုးရ့ၣ်(၁)ဟီၣ်က၀ီၤပူၤ အပူၤကွံာ်တနွံဃၣ်ဃၣ်အခါ ဂၢၤကီၢ်သုးလၢသုးကီၣ်ကးဟ့ၣ်လီၤဖီၣ်၀ဲကျိတၢ်စုက၀ဲၤတဖၣ်က့ၤအးကဒါက့ၤကျိဆူသုးကီၣ်ကးဒီး(BGF)အအိၣ် ခဲလၢာ် လံအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ
ဖၣ်အၣ်ကီၢ်ဆၣ်ပူၤ သုးကီၣ်ကးအၦၤဂၢၤကီၢ်သုးလၢအိၣ်(KNLA)သုးရ့ၣ်(၁)ဟီၣ်က၀ီၤအပူၤတဖၣ် ခီဖျိတအဲၣ်ဒိး အိၣ်လၢ သုးမီၤစိရိၤတၢ်တီခိၣ်ရိၣ်မဲဖီလာ်လၢၤဘၣ်အဃိ ဖဲလါအီကူာ် ၁၀ သီအနံၤန့ၣ် လဲၤအးကဒါက့ၤကျိ(၆၀)ခိၣ် ဆူ သုးကီၣ်ကးအအိၣ်ဖဲဖၣ်အၣ်၀့ၢ်နီၣ်ဂံၢ်(၁၅၁)ပယီၤသုးတၢ်လီၢ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ
တကတီၢ်ဃီမၤကဒီးဖဲလါအီကူာ် ၁၂ သီအနံၤ သုးကီၣ်ကးအဂၢၤကီၢ်သုးလဲၤအးကဒီးကျိ(၁၁)ခိၣ်ဆူ သုးခိးကီၢ်ဆၢ (BGF)သုးဟီၣ်က၀ီၤ(၂)အခိၣ် သုးခိၣ်စီၤတ့၀့အအိၣ်ဒီးဒ်န့ၣ်အသိးကယဲၢ်မ့ၢ်သုးကီၣ်ကးအဂၢၤကီၢ်သုးလၢအိၣ်ဖဲန့ၣ်သ့ၣ် တဖၣ်လဲၤအးက့ၤကျိခဲလၢာ်လံအဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤႉ
အ၀ဲစံး၀ဲလၢ“ဖဲအသီ(၁၀)အနံၤန့ၣ်အ၀ဲသ့ၣ်လဲၤအးက့ၤကျိလၢဖၣ်အၣ်၀့ၢ်(၁၅၁)သုးကလၢၤန့ၣ်ႉ ၦၤကညီအနီၣ်ဂံၢ် န့ၣ် ကအိၣ်လၢအခိၣ်(၆၀)ညါဘၣ်မနုၤလဲၣ်န့ၣ်တၢ်လီၢ်ဖဲန့ၣ်န့ၣ်ဂၢၤကီၢ်သုးအိၣ်ဒီဒူၣ်ညါႉမ့မ့ၢ်လၢ(၁၁)ခိၣ်ခါန့ၣ်(BGF)ဟ့ၣ်လီၤအီၤအဃိလဲၤအးက့ၤ၀ဲလၢ(BGF)သုးဟီၣ်က၀ီၤ(၂)အခိၣ် သုးခိၣ်တ့ၤ၀့ အအိၣ်န့ၣ်လီၤႉဖဲဟီၣ်က၀ီၤတခါန့ၣ် အပူၤန့ၣ် ကယဲၢ်မ့ၢ်ၦၤလၢတၢ်ဟ့ၣ်လီၤစုက၀ဲၤန့ၣ်လဲၤအးက့ၤ၀ဲခဲလၢာ်ခဲစ့လီၤတအိၣ်တ့ၢ်နီဂၤလၢၤဘၣ်”အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါသုးကီၣ်ကးအဂၢၤကီၢ်သုးလၢအက့ၤအးကဒါကျိသ့ၣ်တဖၣ်အံၤအိၣ်ဃာ်ဖဲဟီၣ်က၀ီၤပူၤ၀ဲန့ၣ် တချုးလၢ သုးဟံန့ၢ်တၢ်စိတၢ်ကမီၤဒံးဘၣ်အခါလံၤလံၤလံဒီးသုးဟံန့ၢ်တၢ်စိတၢ်ကမီၤ၀ံၤလီၢ်ခံခီဖျိတၢ်ဘံၣ်တၢ်ဘၢ ဒီးသးသမူ တၢ်အုၣ်ကီၤသးတအိၣ်လၢအ၀ဲသ့ၣ်ဂီၢ်လၢၤဘၣ်အဃိဘၣ်က့ၤအးကဒါကျိဒ်အံၤလီၤအဂ့ၢ်န့ၣ် ပဒိၣ်စီၤအ့နဲၤ စံး၀ဲန့ၣ်လီၤႉ
စံး၀ဲလၢ“အ၀ဲသ့ၣ်က့ၤအးကျိတၢ်ဂ့ၢ်အံၤယသံကွၢ်ၦၤအဂၤန့ၣ်တဲ၀ဲလၢဂၢၤကီၢ်သုးတဖၣ်အံၤလဲၤပာ်ဖျါထီၣ်သုးကီၣ်ကးလၢ ပမ့ဆဲးဖီၣ်ကျိန့ၣ်ပဒီသဒၢလီၤက့ၤသးတန့ၢ်ဘၣ်မီၤႉအဃိကျိ၀ၣ်သ့ၣ်တဖၣ်အံၤကကဲထီၣ်တၢ်ပၢၢ်ဆၢကျိ၀ၣ်လီၤႉ ဒီးပဖီၣ် စ့ၢ်ကီးတဘူၣ်လၢၤဘၣ်ႉတဲ၀ဲလၢသုဒီသဒၢန့ၢ်ၦၤမ့န့ၢ်မးပဖီၣ်န့ၢ်သုကဘူၣ်လီၤႉသုဒီသဒၢန့ၢ်ၦၤမ့တန့ၢ်ဘၣ်ဒု ၀ဲဒၣ်ပနီၢ်ကစၢ် ဒုပဒီသဒၢလီၤသးတန့ၢ်လၢၤဘၣ်ႉအ၀ဲသ့ၣ်န့ၣ်အိၣ်ပာ်တချုးလၢၦၤမၤတၢ်ပတုာ်တၢ်ခးဒံးဘၣ်အခါန့ၣ်လံႉခဲအံၤတုၤလၢသုးဟံန့ၢ်တၢ်စိတၢ်ကမီၤဘျီအ၀ဲသ့ၣ်န့ၣ်မၤထွဲဒံး၀ဲဒၣ်သုးမီၤစိရိၤအတၢ်သိၣ်တၢ်သီအဃိတကြၢးအိၣ်လၢၤဘၣ်”အဂ့ၢ်န့ၣ် စံး၀ဲန့ၣ်လီၤႉ
သုးကီၣ်ကးအဂၢၤကီၢ်သုးလၢအက့ၤအးကဒါကျိတဖၣ်ပာ်ဖှိၣ်ခဲလၢာ်အိၣ်၀ဲ(၇၁)ခိၣ်ႇ ၦၤက့ၤအးကျိတဖၣ်အကျါ (၉)ဂၤ န့ၣ်ဟဲအၢၣ်လီၤသးလၢကအိၣ်ဆၢထၢၣ်က့ၤလၢ(ခ့ၣ်အဲၣ်ယူၣ်)တၢ်တီခိၣ်ရိၣ်မဲဖီလာ်ဘၣ်ဆၣ်ၦၤလၢအဂၤတဖၣ် န့ၣ် ဟဲအၢၣ်လီၤသးတအိၣ်ဒံး၀ဲဘၣ်အဂ့ၢ်န့ၣ် ခ့ၣ်အဲၣ်ယူၣ်လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ
ဒ်န့ၣ်အသိးသုးကီၣ်ကးအဂၢၤကီၢ်သုးလၢအက့ၤအးကဒါကျိသ့ၣ်တဖၣ်န့ၣ်အိၣ်၀ဲလၢ(KNLA)သုးရ့ၣ်(၁)ဟီၣ်က၀ီၤလၢမ့ၢ် မဲၢ်ကရီသ၀ီႇလါမဲၢ်တကီႇကၠီတလူၢ်ႇနီဖးဒိၣ်ႇ၀ၣ်တရဲၢ်ႇဖှ့ဒူကျူႇနိရါႇထံဃီ၀ါသ၀ီသ့ၣ်တဖၣ်အံၤအဂ့ၢ်န့ၣ် လီၢ်က၀ီၤၦၤဘၣ် မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ
ဒ်လီၢ်က၀ီၤၦၤဘၣ်မူဘၣ်ဒါစံး၀ဲအသိးန့ၣ်သုးဟံန့ၢ်တၢ်စိတၢ်ကမီၤ၀ံၤလီၢ်ခံဒူသ၀ီလၢသုးကီၣ်ကးအဂၢၤကီၢ်သုးအိၣ်ဆီသးတဖၣ်အံၤတၢ်သဘံၣ်သဘုၣ်အိၣ်ထီၣ်၀ဲဒၣ်လၢတၢ်ပၢၢ်ဆၢသုးကရူၢ်အဘၢၣ်စၢၤတကးဒံးဘၣ်အမဲာ်ညါအ၀ဲသ့ၣ်န့ၣ်ဖီၣ်ဃံာ်မၤပျံၤကမျၢၢ်အိၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢအိၣ်ဖဲန့ၣ်တဖၣ်စံး၀ဲန့ၣ်လီၤႉ
