လါဒံၣ်စ့ဘၢၣ် ၂၃ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ စှၤသီအတီၢ်ပူၤအံၤ ပယီၤသုးခးလီၤ ကျိဖးဒိၣ်ဟဲအါထီၣ်အဃိ ကမျၢၢ်တၢ်သံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ဖဲအပူၤကွံၥ်လါဒံၣ်စ့ဘၢၣ် ၁၉ သီ ဟါခီ ၉း၄၅ နၣ်ရံၣ်အဆၢကတီၢ်န့ၣ် လၢ၀ီၢ်ကျီၢ်ကရူၢ်အပူၤ တၢ်ဒုးကဲထီၣ်တအိၣ် သုးကီၣ်ကး(၆၀၂)သုးရ့ၣ် ခးလီၤကျိဖးဒိၣ်(၂)ဖျၢၣ် လီၤတဲၥ်ပိၢ်ဖးထီၣ်၀ဲလၢ ကၠီယွၤသ၀ီဃၢၤ(၁)ဖျၢၣ်ဒီး လၢ ၀ီၢ်ကျီၢ်သ၀ီပူၤ ပှၤဟံၣ်ဖီခိၣ်(၁)ဖျၢၣ်အဃိ ကိၤမၠိလဲၤ၀့(၃၂)နံၣ်အံၤ ဘၣ်၀ဲဒီးကျိဖးဒိၣ်အက့အခီသံ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ် ကိၤမၠိလဲၤ၀့သံအမဲၥ်ညါ အမါမၣ်ကၠူကၠူ၀့(၂၇)နံၣ်အံၤစ့ၢ်ကီး ဘၣ်ဒိ၀ဲဒၣ်နးနးခီဖျိကျိဖးဒိၣ်အက့ဘၣ်၀ဲအခိၣ်ဒီး အိၣ်၀ဲဒၣ်လၢသးသမူတၢ်ဘၣ်ယိၣ်ပူၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲလါဒံၣ်စ့ဘၢၣ် ၁၈ သီ ဟါခီ ၇း၀၀ နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး တၢ်ဒုးကဲထီၣ်တအိၣ် သုးကီၣ်ကး(၃၁၀) အမျိၥ်သုးအံၤ ခးလီၤကျိဖးဒိၣ်(၃)ဖျၢၣ် လီၤတဲၥ်ပိၢ်ဖးထီၣ်၀ဲလၢ လၢခရၢၢ်ကရူၢ်ပူၤ သိခွးသ၀ီခိၣ်ထိး(၂)ဖျၢၣ်, လၢ၀ီၢ်ကျီၢ်ကရူၢ် လၢၢ်ပူၤသ၀ီဃၢၤ ကျဲမုၢ်ခိၣ်(၁)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကတီၢ်ဃီဖဲတနံၤန့ၣ် ဟါခီ ၁၀း၄၀ မံးနံးအဆၢကတီၢ် သုးကီၣ်ကးအပှၤလၢအိၣ်ဆီလီၤသးဖဲ(သုးက့ ၃) ၀ီကီၢ်ဆၣ် လဲၣ်ပၤသ၀ီပူၤအံၤ စ့ၢ်ကီး ခးလီၤ၀ဲကျိဖးဒိၣ်(၂)ဖျၢၣ် လီၤတဲၥ်ပိၢ်ဖးထီၣ်၀ဲလၢ(သုးက့ ၁) ကၠဲးထိၣ်ကီၢ်ဆၣ် ခရၢၢ်သ၀ီခိၣ်ထိး မဲၤတီၤကၠံလူၢ် (မယ်တော်ကြီးကုန်း)ဃၢၤ ကမျၢၢ်တၢ်ဖံးအီၣ်မၤအီၣ်လီၢ်ကျီးပူၤအဃိ တၢ်ထူၣ်တၢ်ဘိဟးဂီၤ၀ဲဒၣ်အိၣ် အဂ့ၢ်န့ၣ် သ့ၣ်ညါဘၣ် န့ၣ်လီၤ.
ကၠဲးထိၣ်ကီၢ်ဆၣ်ပူၤ တၢ်ဒုးကဲထီၣ်အိၣ်ဂ့ၤတအိၣ်ဂ့ၤ ညီနုၢ်န့ၣ်ပယီၤသုးကလၢၤတဖၣ်ခးလီၤကျိဖးဒိၣ်အိၣ်၀ဲတလီၢ်လီၢ် ဒီး ပှၤကမျၢၢ်သံဘၣ်ဒိဘၣ်ထံးကဲထီၣ်သးအိၣ်၀ဲခဲအံၤခဲအံၤအဂ့ၢ်န့ၣ် ကီၢ်ဆၣ်ခိၣ် စီၤထိအူ စံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်အိၣ်န့ၣ်လီၤ.
ဒ်ကီၢ်ဆၣ်ပှၤဘၣ်မူဘၣ်ဒါစံး၀ဲအသိးန့ၣ် အပူၤကွံၥ်ဖဲပယီၤသုးကျိၤနုၥ်ဟူးဂဲၤလၢဒူသ၀ီပူၤအခါတၢ်ဒုးကဲထီၣ်၀ဲဒီး ဟီၣ်က၀ီၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၃)သုးပၥ်ဖှိၣ်အဃိ ပယီၤသုးသံဘၣ်ဒိဘၣ်ထံးအါအဖီခိၣ် လီၢ်ခံအံၤ ပယီၤသုးအိၣ်လၢအသုးကလၢၤပူၤဟးထီၣ်လၢတၢ်ချၢတဘူၣ်လၢၥ်ဘၣ်ဒီးခးလီၤဆိ၀ဲကျိဖးဒိၣ်ဆူကမျၢၢ်အိၣ်ဆိးလီၢ်ကျဲတလီၢ်လီၢ်န့ၣ်လီၤ.