လါဒံၣ်စ့ဘၢၣ် ၂၅ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)ဟီၣ်က၀ီၤအပူၤ သုးမီၤစိရိၤအံၤအိၣ်ဒီးတၢ်ရဲၣ်တၢ်ကျဲၤလၢ ကမၤက့ၤသုးဂ့ၢ်၀ီတၢ်ဒိၣ်စိလၢဟီၣ်က၀ီၤပူၤတဖၣ်အဃိ ကမျၢၢ်ထံဖိကီၢ်တဖၣ်ကပလီၢ်သးလၢတၢ်လဲၤတၢ်က့ၤပူၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ဟ့ၣ်ပလီၢ်ဒုးသ့ၣ်ညါလီၤ၀ဲဖဲတနံၤအံၤလါဒံၣ်စ့ဘၢၣ် ၂၅ သီ အနံၤ န့ၣ်လီၤ.
ဒ်ဘျံးဒ၀ဲၢ်ကီၢ်ရ့ၣ်လံၥ်တၢ်ဒုးသ့ၣ်ညါပူၤပၥ်ဖျါ၀ဲအသိးန့ၣ် ပယီၤသုးမီၤစိရိၤအံၤအိၣ်ဒီးတၢ်ရဲၣ်တၢ်ကျဲၤလၢကမၤက့ၤသုးဂ့ၢ်၀ီတၢ်ဒိၣ်စိ လၢသုးက့ဟီၣ်က၀ီၤတဖၣ်အပူၤတကးဒံးဘၣ် တၢ်ရဲၣ်တၢ်ကျဲၤအိၣ်စ့ၢ်ကီးလၢကဖီၣ်၀ဲဒၣ်ကမျၢၢ်အသိလ့ၣ်, လ့ၣ်ယီၢ်စဲးလၢ ဒ၀ဲၢ်မုၢ်ထီၣ် ၀့ၢ်တၢ်အဲၣ်,ကၠီးမဲဒိၣ်ဟီၣ်က၀ီၤကပိၤကပၤအဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်လၢန့ၣ်အမဲၥ်ညါ လီၢ်က၀ီၤကမျၢၢ်လၢအသးနံၣ်စးထီၣ်(၁၈)နံၣ်တုၤလၢ(၃၅)နံၣ်တဖၣ်အံၤ သုးမီၤစိရိၤအပှၤတၢ်ရဲၣ် တၢ်ကျဲၤအိၣ်လၢကဖီၣ်ဆူၣ်၀ဲသုးအဃိ ကမျၢၢ်ထံဖိကီၢ်ဖိတဖၣ်ကပလီၢ်ပဒီသးဖဲတၢ်လဲၤတၢ်က့ၤအခါကိးဂၤဒဲးအဂ့ၢ်န့ၣ် ဘျံးဒ၀ဲၢ်ကီၢ်ရ့ၣ်လံၥ်တၢ်ပၥ်ဖျါအပူၤ စံး၀ဲန့ၣ်လီၤ.
ဘၣ်ဃးတၢ်ဂ့ၢ်အံၤန့ၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲလၢ“ဒုၣ်ဒါဒုထီဘိလီၤမီၤနီၤဘၣ်ဃးလၢတၢ်ထၢဆူၣ်သုး တဖၣ်န့ၣ်.ခီဖျိလၢအ၀ဲသ့ၣ်န့ၣ်ကမၤပှဲၤထီၣ်က့ၤအသုးဂံၢ်ဘါအဂီၢ်န့ၣ် ပှၤသးစၢ်မ့ၢ်ဂ့ၤ,ပှၤလၢအသးအိၣ်(၃၅)နံၣ်ဆူဖီလၥ်မ့ၢ်ဂ့ၤန့ၣ် ထီဘိအ၀ဲသ့ၣ်ဃုထံၣ်၀ဲတၢ်ခွဲးတၢ်ယၥ်လၢကဖီၣ်ဆူၣ်လီၤမီၤ.ဒီးဒ်န့ၣ်အသိးဒုၣ်ဒါတဖၣ်ဖဲအ၀ဲသ့ၣ်မၤ၀ဲတၢ်ထီၣ်ဒုးအဆၢကတီၢ်န့ၣ် သူ၀ဲဒၣ်ကမျၢၢ်အသိလ့ၣ်အိၣ်,ဆှၢ၀ဲဒၣ်ပှၤဆူးပှၤဆါသ့ၣ်တဖၣ်န့ၣ်သူ၀ဲဒၣ်အသိလ့ၣ်အိၣ်မီၤနီၤ.လၢဒ၀ဲၢ်မုၢ်ထီၣ်တပၤနါက့ အသုးကျိၤန့ၣ်ဟဲထီၣ်တုၤလၢ(ကၠီးမဲတီၤ)တဘိအဃိပတၢ်ဘၣ်ယိၣ်အိၣ်ထီၣ်လၢအ၀ဲသ့ၣ်ကဟူးဂဲၤအါထီၣ်ကဖီၣ်၀ဲဒၣ်ကမျၢၢ်တဖၣ်မ့ၢ်ဂ့ၤ,ကဖီၣ်ဆူၣ်၀ဲကမျၢၢ်အသိလ့ၣ်တဖၣ်လီၤပဃိအဲၣ်ဒိးလၢကမျၢၢ်တဖၣ်ကပၥ်သူၣ်ပၥ်သးထီဘိလီၤ.”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်ဖဲ တနံၤအံၤန့ၣ်လီၤ.
ဒ်န့ၣ်အသိးဖဲအပူၤကွံၥ်လါဒံၣ်စ့ဘၢၣ် ၂၁ သီအနံၤစ့ၢ်ကီး ပယီၤသုးဂံၢ်ဘါ(၂၀၀)ဃၣ်ဃၣ် ဟဲထီၣ်နုၤလီၤ၀ဲဒၣ်လၢ တနီသရံၣ်ကီၢ်ခီဒိၣ် ဒ၀ဲၢ်မုၢ်ထီၣ် ဟီၣ်က၀ီၤပူၤဒီး ဖဲဟဲထီၣ်လၢကျဲအခါန့ၣ်ဖီၣ်ဆူၣ်၀ဲဒၣ်ကမျၢၢ်သူ၀ဲဒ်တၢ်ဒီသဒၢတခါအသိးအဃိ ကမျၢၢ်သ့ၣ်တဖၣ်ဘၣ်ဟး စံၣ်အိၣ်ခူသူၣ်သးအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤ.
တကီၢ်ခါခဲအံၤ ဘျံးဒ၀ဲၢ်ကီၢ်ရ့ၣ်အမဲၥ်ညါ ၀့ၢ်ပူၤက၀ီၤဒ့,ဒူသ၀ီတၢ်လီၢ်ကိးတီၤဒဲးဃၣ်ဃၣ်အပူၤ သုးကီၣ်ကးအံၤလၢကမၤပှဲၤ အါထီၣ်သုး ဂံၢ်ဘါအဂီၢ် ဟးထၢ၀ဲဒၣ်သုးတကးဒံးဘၣ်အိၣ်ခိးသမံသမိးဖီၣ်တၢ်လၢကျဲပူၤအိၣ်အဃိ သူၣ်ဘီၣ်သးစၢ်ကမျၢၢ် တဖၣ်အိၣ်ဒီး တၢ်ဘၣ်ယိၣ်ဘၣ်ဘှီဒီးတနီၤန့ၣ် ဟးစံၣ်ပလဲၥ်သးလၢတၢ်လီၢ်အဂၤစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
လီၤဆီဒၣ်တၢ်တလါအံၤလါဒံၣ်စ့ဘၢၣ်အတီၢ်ပူၤ မ့ၢ်၀ဲခရံၥ်အိၣ်ဖျဲၣ်လါအသိး လါဒံၣ်စ့ဘၢၣ် ၃၀ သီ စ့ၢ်ကီး မ့ၢ်၀ဲဒၣ် ကညီဒီကလုၥ် နံၣ်ထီၣ်သီအဃိ လၢတၢ်လီၢ်အါတီၤအပူၤတၢ်မၤ၀ဲမူးသးဖှံတၢ်ရဲၣ်တၢ်ကျဲၤအါ၀ဲအဖီခိၣ်အံၤ ပယီၤသုးအံၤကသူ၀ဲတၢ်ခွဲးတၢ်ယၥ်လၢ ကခိးသမံသမိးဖီၣ်တၢ်လၢကျဲပူၤသ့၀ဲအဂ့ၢ်န့ၣ် တၢ်ပဲၥ်ထံနီၤဖးစံး၀ဲအိၣ်န့ၣ်လီၤ.
