လါဒံၣ်စဲဘၢၣ် ၁၆ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်,လၢၢ်ဒိၣ်ကီၢ်ဆၣ်အပူၤ ဖဲလါဒံၣ်စဲဘၢၣ်(၆)သီအနံၤန့ၣ် ပယီၤသုးလၢအိၣ်(ဆီမံၤလူၢ်)သုးကလၢၤအံၤ မ့ၢ်လၢကညီဒီကလုၥ်ဂၢၤသးကရၢ(KNDO), တၢ်ပၢၢ်ဆၢသုးပၥ်ဖှိၣ် ခိးခးဝဲအဃိ ပယီၤသုးအပှၤသံ(၃)ဂၤအကျါပၣ်ဃုၥ်သုးခိၣ်စိ(၁)တဂၤအဂ့ၢ်န့ၣ် လီၢ်ကဝီၤအပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
ပယီၤသုးခီၣ်သုးရ့ၣ်(ခလရ-၃၀)အပှၤလၢအိၣ်ဆီလီၤသးဖဲလၢၢ်ဒိၣ်ကီၢ်ဆၣ်ပူၤသ့ၣ်တဖၣ် မ့ၢ်လၢဟးထီၣ်ဟူးဂဲၤဝဲလၢ သုးကလၢၤချၢအဃိ(KNDO)သုးရ့ၣ်(၃)အပှၤသ့ၣ်တဖၣ်ခိးခးအ၀ဲသ့ၣ်ကဲထီၣ်ဒ်အံၤလီၤ အဂ့ၢ်န့ၣ် လၢၢ်ဒိၣ်ကီၢ်ဆၣ် ပှၤကတိၤတၢ်ပၢ ပဒိၣ်စီၤဝါမုၢ်စံးဝဲဒၣ်ဒ်အံၤန့ၣ်လီၤ.
“တၢ်ကဲထီၣ်အသးန့ၣ်ဖဲဂီၤခီ(၈)နၣ်ရံၣ်ဘျဲၣ်အဆၢကတီၢ်န့ၣ်(ဆီမံၤလူၢ်)ပယီၤသုးကလၢၢၤအပှၤသ့ၣ်တဖၣ်ဟးထီၣ်ဝဲလၢသုးကလၢၤချၢအဖီခိၣ်န့ၣ်တၢ်ခးဝဲဒၣ်မီၤနီၤ. ပယီၤသုးအံၤမ့ၢ်လၢဟးထီၣ်ဟူးဂဲၤဝဲလၢသုးကလၢၤချၢအဃိသးန့ၣ်တၢ်လဲၤခးအဝဲသ့ၣ်ဒ်န့ၣ် လီၤ. (ဆီမံၤလူၢ်)ပယီၤသုးသ့ၣ်တဖၣ်န့ၣ်မ့ၢ်ဟးထီၣ်ဟူးဂဲၤဖဲသုးကလၢၤချၢအကပိၥ်ကပၤန့ၣ်တၢ်နုၥ်လီၤခးအဝဲသ့ၣ်အိၣ်ထီဘိလီၤ. ” အဂ့ၢ်န့ၣ်စံးဘၣ်ခ့ၣ် အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါ(KNDO)သုးရ့ၣ်(၃)သုးပၥ်ဖှိၣ်လဲၤခိးခးပယီၤသုး(ဆီမံၤလူၢ်)သုးကလၢၤဘျီဝဲအံၤ အပူၤန့ၣ် ပယီၤသုးတကပၤသံ(၃)ဂၤအကျါပၣ်ဃုၥ်ဒီးအသုးခိၣ်စိ(၁)ဂၤအသိး တကးဒံးဘၣ်တၢ်မၤန့ၢ်ဃုၥ်ဝဲဒၣ်ပယီၤသုးတၢ်စုကဝဲၤ(၂)ခိၣ် အဂ့ၢ်န့ၣ် လၢၢ်ဒိၣ်အပှၤကတိၤတၢ်ပၢ ပဒိၣ်စီၤဝါမုၢ်စံးဝဲအသိးန့ၣ်သ့ၣ်ညါဘၣ်န့ၣ်လီၤ.
တကးဒံးဘၣ်မ့ၢ်ဘၣ်ကွၢ်က့ၤလၢချၢၣ်လွံၢ်ထူၣ်ကီၢ်ရ့ၣ်ဟီၣ်ကဝီၤအပူၤအံၤ စးထီၣ်ဖဲအပူၤကွံၥ်လါအီးကထိဘၢၣ်ထီၣ်အခါန့ၣ် တၢ်ဒုးတၢ်ယၤဟဲက့ၤဆူၣ်ထီၣ်ဝဲဒၣ်အဃိ ကမျၢၢ်တဖၣ်ဘၣ်ကွၢ်ဆၢၣ်မဲၥ်ဘၣ်ဝဲပယီၤသုးအတၢ်ခးလီၤကျိဖးဒိၣ် သ့ၣ်တဖၣ် အိၣ်ဝဲခဲအံၤခဲအံၤအဂ့ၢ်န့ၣ် ကမျၢၢ်ဒီးလီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ဒ်န့ၣ်အသိးပယီၤသုးခးလီၤကျိဖးဒိၣ်အါထီၣ်ဒီးအသုးကျိၤစ့ၢ်ကီးဟဲထီၣ်ဝဲအဃိ လၢၢ်ဒိၣ်ကီၢ်ဆၣ်ဟီၣ်ကဝီၤအပူၤ တနံၣ်အံၤ လါစဲးပထ့ဘၢၣ်ဒီးလါအီးကထိဘၢၣ်,ခံလါအတီၢ်ပူၤအံၤ ပယီၤသုးခးလီၤကျိဖးဒိၣ်(၂၂၄)ဖျၢၣ်, ကဘီယူၤဟဲတ့ၢ်လီၤမ့ၣ်ပိၢ်(၂)ဖျၢၣ်, ခးလီၤအီၤလံကၢးကျိ(၄)ဘျီ,ဒီးဟဲတ့ၢ်လီၤဒြိမ့ၣ်ပိၢ်တစှၤန့ၢ်(၃၇)ဘျီဘၣ်အဃိကမျၢၢ်ဘၣ်သံ(၃)ဂၤ,ဘၣ်ဒိ(၂၁)ဂၤ,ဒီးဘၣ်ဟးဂီၤကမျၢၢ်ဟံၣ်(၁၆)ဖျၢၣ်,သီခါဖၠၣ်(၄)ဖျၢၣ်,တၢ်ဘါယွၤသရိၥ်(၅)ဖျၢၣ်,ဒီးကသံၣ်ဒၢး(၂)ဖျၢၣ်အဂ့ၢ်န့ၣ်သ့ၣ်ညါဘၣ်န့ၣ်လီၤ