လါဒံၣ်စဲဘၢၣ် ၁၇ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်,တနီသရံၣ်ကီၢ်ဆၣ်အပူၤ ကျဲမုၢ်တဘိလၢအမ့ၢ်ဝဲ(ပၠံၣ်ဒီၣ်စူၣ်)ကျဲမုၢ်ဖးဒိၣ်အံၤ ဖဲတလါအံၤ လါဒံၣ်စဲဘၢၣ်(၁၅)သီအနံၤန့ၣ် ပယီၤသုးဒီၣ်တဲၥ်ကွံၥ်ဝဲတၢ်အီၣ်တၢ်အီၣ်ကျဲအဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါစံးဘၣ်ဝဲခ့ၣ်အဲးစံၣ်-ကညီတၢ်ကစီၣ်ဖဲမဟါ(၁၆)အနံၤန့ၣ်လီၤ.
ပယီၤသုးအံၤလၢကဟဲထီၣ်မၤန့ၢ်က့ၤအသုးကလၢၤဒီးကျဲမုၢ်ကျဲဘိလၢအဘၣ်တၢ်စူးကါအီၤလၢမုၢ်ကျိၤဝဲၤကွၥ်သ့ၣ်တဖၣ်အံၤ အဂီၢ်န့ၣ် စးထီၣ်ဒီၣ်တဲၥ်ကွံၥ်ဝဲတၢ်အီၣ်တၢ်အီကျဲ, တပျဲပှၤစိၥ်တီဆှၢဝဲတၢ်အီၣ်တၢ်အီ တကးဒံးဘၣ်စဲးဖီကဟၣ်အသိစ့ၢ်ကီး တပျဲစိၥ်ဝဲလၢၤဘၣ်အဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါ ပဒိၣ်စီၤထံဝါ စံးဝဲဒၣ်ဒ်အံၤန့ၣ်လီၤ.
“သိလ့ၣ်တီပနံၥ်လၢအိၣ်ဘျံးဝ့ၢ်ဒီးဟဲထီၣ်ဝဲဆူခိခိၣ်ဒူသဝီန့ၣ်တၢ်တပျဲဟဲထီၣ်လၢၤဘၣ်. အခဲအံၤန့ၣ်ပှၤစိၥ်တၢ်အီၣ်တၢ်အီမ့ၢ်ဂ့ၤ, ဟု သးမ့ၢ်ဂ့ၤ, တၢ်အီၣ်ဃ့ၢ်မ့ၢ်ဂ့ၤန့ၣ်တၢ်ပံးကွံၥ်ဝဲလၢၤလံ. ပယီၤသုးကီၣ်ကးဒီၣ်တဲၥ်ကွံၥ်ဝဲဒၣ်ကျဲအံၤန့ၣ်အဝဲသ့ၣ်တၢ်ကူၣ်အဒိၣ်ကတၢၢ် န့ၣ်အဝဲသ့ၣ်ကထီၣ်ဝဲဒၣ်တနီသရံၣ်ကီၢ်ဆၣ်လၢအမ့ၢ်သုးရ့ၣ်(၁၁)ဟီၣ်ကဝီၤမီၤနီၤ.အဝဲသ့ၣ်အိၣ်ဒီးတၢ်ရဲၣ်တၢ်ကျဲၤလၢကထီၣ်ဝဲတနီသရံၣ်ကီၢ်ဆၣ်ထံဆၢကီၢ်ဆၢဒီး(မိတီၤ)ကျဲမုၢ်လီၤ. ” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပၠံၣ်ဒီၣ်စူၣ် ကျဲမုၢ်ဖးဒိၣ်အဖီခိၣ်အံၤအပူၤကွံၥ်ပယီၤသုးအိၣ်ခိးသမံသမိးတၢ်အိၣ်ဝဲဘၣ်ဆၣ် စးထီၣ်ဖဲတလါအံၤ လါဒံၣ်စဲဘၢၣ်ထီၣ်(၁၅)သီအနံၤန့ၣ် ပယီၤသုးအံၤ သိလ့ၣ်ဖးဒိၣ်မ့ၢ်ဂ့ၤ,သိလ့ၣ်ဖိမ့ၢ်ဂ့ၤ မ့ၢ်ဝံစိၥ်တီဆှၢဟုသး, တၢ်အီၣ်ဃ့, စဲးဖီကဟၣ်အသိတဖၣ် တပျဲစိၥ်ထီၣ်စိၥ်လီၤဝဲဒၣ်လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိး သိလ့ၣ်လၢအတီဆှၢတၢ်ဖိတၢ်လံၤတၢ်အီၣ်တၢ်အီလၢကလဲၤလီၤဒူသဝီပူၤသ့ၣ်တဖၣ်စ့ၢ်ကီး ပယီၤသုးအံၤ အိၣ်ခိးသမံသမိးဝဲဒီးလ့တက့ၤတပျဲလဲၤဝဲဒၣ်ဘၣ် မ့မ့ၢ်တခီပျဲက့ၤလီၤကဒါက့ၤဝဲဆူဘျံးဝ့ၢ်ဒီးဘၣ်ဆၣ်မ့မ့ၢ်လၢသိလ့ၣ် တီပှၤလဲၤတၢ်က့ၤတၢ်ဖိသ့ၣ်တဖၣ်န့ၣ်တၢ်ပျဲလ့ၢ်ထီၣ်လ့ၢ်လိၤဝဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိတၢ်မ့ၢ်တပျဲသိလ့ၣ်တီတၢ်အီၣ်တၢ်အီသ့ၣ်တဖၣ်ဘၣ်န့ၣ် ခါဆူမဲၥ်ညါပှၤကမျၢၢ်သ့ၣ်တဖၣ် ကထံၣ်ဘၣ်ဝဲ တၢ်အီၣ်တၢ်အီ,ကသံၣ်ကသီ, ဒီး စဲးဖီကဟၣ်သိတၢ်ဂ့ၢ်ကီသ့ၣ်တဖၣ်အကလုၥ်ကလုၥ်သ့ဝဲအဂ့ၢ်န့ၣ် တနီသရံၣ်ကီၢ်ဆၣ် အပှၤဘၣ်မူဘၣ်ဒါစံးစ့ၢ်ကီးဝဲဒၣ်န့ၣ်လီၤ.
“အဝဲသ့ၣ်မ့ၢ်မၤဝဲဒ်သိးအံၤန့ၣ်ပှၤလီၢ်ကဝီၤဖိသ့ၣ်တဖၣ်ကပှ့ၤအီၣ်ဝဲဟံၣ်ပူၤဃီပူၤတၢ်အီၣ်တၢ်အီဒီးဟုသးအဂီၢ်န့ၣ်ကကဲထီၣ်ဝဲတၢ်ကီတၢ်ခဲလီၤ. ဒီးကသံၣ်ကသီလၢတၢ်ကူဆါယါဘျါဝဲတၢ်ဆူးတၢ်ဆါအဂီၢ်စ့ၢ်ကီးကကီခဲဝဲလီၤ. မ့ၢ်ဝံၤန့ၣ်စဲးဖီကဟၣ်သိနါက့န့ၣ်တၢ် ဝံစိၥ်တီဆှၢအီၤတညီလၢၤဘၣ်အဃိန့ၣ်လၢပှၤလီၢ်ကဝီၤဖိသ့ၣ်တဖၣ်အဂီၢ်ကဲထီၣ်ဝဲတၢ်ကီတၢ်ခဲဖးဒိၣ်န့ၣ်လီၤ. ” အဂ့ၢ်န့ၣ်စံးဝဲဒၣ် န့ၣ်လီၤ.
လၢန့ၣ်အမဲၥ်ညါစးထီၣ်ဖဲပယီၤသုးပံးကွံၥ်တၢ်အီၣ်ကျိၤဝံၤ လီၢ် ခံဖဲမဟါလါဒံၣ်စဲဘၢၣ်(၁၆)သီအနံၤန့ၣ် ပယီၤသုးအသုးသိလ့ၣ် (၁၁)ခိၣ်,အကျါစိၥ်ဃုၥ်ဝဲကျိဖးဒိၣ်(၂)ခိၣ်,သ့ၣ်တဖၣ်ဟဲထီၣ်တုၤဃီၤ၀ဲလၢတနီသရံၣ်ဝ့ၢ်ပူၤလံဒီး ခါဆူညါအတၢ်ဟူးတၢ်ဂဲၤ ကအိၣ်ဝဲဒ်လဲၣ်န့ၣ်တသ့ၣ်ညါဒံးဘၣ်အဂ့ၢ်န့ၣ် လီၢ်ကဝီၤအပှၤဘၣ်မူဘၣ်ဒါစံးဝဲဒၣ်န့ၣ်လီၤ.
ဒ်န့ၣ်အသိးသုးကီၣ်ကးအံၤလၢကမၤဆူၣ်ထီၣ်က့ၤဒုးယၤတၢ်ဟူးတၢ်ဂဲၤအဂီၢ် ဖဲလါဒံၣ်စဲဘၢၣ်ထီၣ်(၉)သီအနံၤန့ၣ် ဆှၢအါထီၣ်ဝဲအသုးဂံၢ်ဘါအဂၤ(၁၀၀၀)ဒီးကဘီချံအံၤဆူဘျံးဝ့ၢ်ဟီၣ်ကဝီၤသုးဝဲၤလီၢ်ခိၣ်သ့ၣ်တၢ်လီၢ် အဂ့ၢ်န့ၣ် တနီသရံၣ်ကီၢ်ဆၣ် ပှၤဘၣ်မူဘၣ်ဒါစံးဘၣ်တ့ၢ်ဝဲခ့ၣ်အဲးစံၣ်-ကညီတၢ်ကစီၣ်အိၣ်စ့ၢ်ကီးဝဲဒၣ်န့ၣ်လီၤ.
