Home တၢ်ကစီၣ် ဘံလ့ကီၢ်ဆၣ်ပူၤ တၢ်လဲၤတ့ၢ်လီၤကဒီးမ့ၣ်ပိၢ်ခံဘျီတဘျီလၢထံဆံၣ်ဘီကၠိ

ဘံလ့ကီၢ်ဆၣ်ပူၤ တၢ်လဲၤတ့ၢ်လီၤကဒီးမ့ၣ်ပိၢ်ခံဘျီတဘျီလၢထံဆံၣ်ဘီကၠိ

158
0

လါယနူၤအါရံၤ ၁၆ သီ, ၂၀၂၅ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်အပူၤ ဖဲတနံၤအံၤဟါခီအဆၢကတီၢ်န့ၣ် တၢ်လဲၤတ့ၢ်လီၤမ့ၣ်ပိၢ်ခံဘျီတဘျီလၢထံဆံၣ်ဘီကၠိအဃိ ကၠိတၢ်သူၣ်ထီၣ်လီၤပှီၢ်ဟးဂီၤကဒီး၀ဲတက့အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဖဲတနံၤအံၤလါယနူၤအါရံၤ ၁၆ သီ ဟါခီ ၅း၀၀ ဃၣ်ဃၣ်အဆၢကတီၢ်န့ၣ် ကဘီယူၤဒြိခံဘ့ၣ်ဟဲတ့ၢ်လီၤမ့ၣ်ပိၢ် လီၤတဲၥ်ပိၢ်ဖးထီၣ်၀ဲလၢ ထံဆံၣ်ဘီတီၤခၢၣ်သးကၠိတၢ်သူၣ်ထီၣ်ဖီခိၣ်(၁)ဖျၢၣ်ဒီး လၢသ၀ီဃၢၤ(၁)ဖျၢၣ်အဂ့ၢ်န့ၣ် ထံဆံၣ်ဘီကၠိခိၣ် သရၣ်စီၤအ့ထိ စံး၀ဲန့ၣ်လီၤ.

အ၀ဲစံး၀ဲလၢ“ကဘီယူၤဒြိဟဲတ့ၢ်လီၤမ့ၣ်ပိၢ်ဖဲမုကၢၤကဘၣ်ဖဲ(၅)နၣ်ရံၣ်န့ၣ်လီၤ. ဘၣ်ဖဲကၠိပျၢၢအဆၢကတီၢ်ပှၤကၠိဖိက့ၤလၢၥ်လံ. ပတပၥ်သူၣ်ပၥ်သးဘၣ်,တၢ်ဟဲသီၣ်န့ၣ်ပဆိမိၣ်လၢကဘီယူၤ.တစိၢ်ဖိဘျီပှၤတဲအဟဲကွံၥ်လီၤတၢ်လၢကၠိ.ကၠိလီၤပှီၢ်ဒီးတခီ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲတဟါအံၤန့ၣ်လီၤ.

ဒြိလၢတၢ်လဲၤတ့ၢ်လီၤ၀ဲဖဲထံဆံၣ်ဘီကၠိဘျီ၀ဲအံၤန့ၣ်မ့ၢ်၀ဲ ဒြိတဘျီဂီၢ်လီၤဒီး ဒ်န့ၣ်အသိး တချုးတၢ်ဟဲတ့ၢ်လီၤဒြိကဲထီၣ်ဒံးဘၣ် စှၤသီအတီၢ်ပူၤန့ၣ် ဒြိဟဲဆှၣ်လၢသ၀ီပူၤတၢ်ဖီခိၣ်အိၣ်၀ဲအဂ့ၢ်န့ၣ် သ၀ီဖိသ့ၣ်တဖၣ်စံး၀ဲန့ၣ်လီၤ.

ခီဖျိတၢ်လဲၤတ့ၢ်လီၤဒြိမ့ၣ်ပိၢ်ကဲထီၣ်ဒ်အံၤအဖီခိၣ် ကဲထီၣ်တၢ်ဘၣ်ယိၣ်ဘၣ်ဘှီလၢပှၤကၠိဖိသ့ၣ်တဖၣ်အဂီၢ်အဃိ လၢကဆဲးအိး ထီၣ်ကၠိကမၤလိတၢ်အဂီၢ်တၢ်ဘၣ်ယိၣ်အိၣ်၀ဲအသိး တကီၢ်ခါခဲအံၤပှၤသ၀ီဖိသ့ၣ်တဖၣ်စ့ၢ်ကီးဘၣ်အိၣ်လၢတၢ်ပျံၤတၢ်ဖုးပူၤအဂ့ၢ်န့ၣ် ထံဆံၣ်ဘီကၠိခိၣ် သရၣ်စီၤအ့ထိ စံးအါထီၣ်၀ဲန့ၣ်လီၤ.

ဒ်န့ၣ်အသိးဖဲအပူၤကွံၥ်(၂၀၂၄)နံၣ် လါအ့ဖြ့ၣ် ၂၈ သီအခါန့ၣ်စ့ၢ်ကီး သုးမီၤစိရိၤအကဘီယူၤလဲၤတ့ၢ်လီၤဒံးမ့ၣ်ပိၢ်လၢထံဆံၣ်ဘီ သ၀ီပူၤအဃိ ဖဲန့ၣ်သ၀ီပူၤပှၤကမျၢၢ်တၢ်သူၣ်ထီၣ်ဃုၥ်ဒီးထံဆံၣ်ဘီကၠိ တၢ်သူၣ်ထီၣ် တနီၤဟးဂီၤကဲထီၣ်တ့ၢ်အသးဒံးန့ၣ်လီၤ.