လါဖ့ၤဘြူၤအါရံၤ ၂၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ လါဖ့ၤဘြူၤအါရံၤ ၂၄ သီ တနံၤဃီအတီၢ်ပူၤ တၢ်ဒုးကဲထီၣ်တအိၣ်ပယီၤသုးခးလီၤကျိဖးဒိၣ်(၃၂)ဖျၢၣ်ဆူဒူသ၀ီတၢ်ဖံးအီၣ်မၤအိၣ်လီၢ်ကျဲအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ.
ဖဲလါဖ့ၤဘြူၤအါရံၤ ၂၄ သီ ဟါခီ ၅း၀၀ နၣ်ရံၣ်အဆၢကတီၢ် တၢ်ဒုးကဲထီၣ်တအိၣ်ပယီၤသုးခီၣ်ချ့သုးရ့ၣ်(ခမရ-၂၀၇) ဒီး(၃၁၀) အမျိၥ်သုးခးလီၤတပျုၥ်တပျီၥ်၀ဲကျိဖးဒိၣ်(၅)ဖျၢၣ် လီၤတဲၥ်ပိၢ်ဖးထီၣ်၀ဲလၢခရၢၢ်ကရူၢ် လၢၢ်ပူၣ်သ၀ီဃၢၤန့ၣ်လီၤ.
တကတီၢ်ဃီဖဲဟါခီ ၇း၄၅ မံးနံးဆၢကတီၢ်စ့ၢ်ကီး ပယီၤသုးတဒူၣ်ဃီ၀ဲအံၤခးလီၤကဒီးကျိဖးဒိၣ်(၁၂)ဖျၢၣ်လီၤတဲၥ် ပိၢ်ဖးထီၣ်၀ဲ လၢခရၢၢ်ကရူၢ် အခဲၤသ၀ီ,သိခွးသ၀ီဒီး စံပၠီ(ဇီးပြောင်း)ကရူၢ် ကည့ၤအဲၤ(ကညင်အိုင်)သ၀ီ (ဝက်ဝံတောင်)သ့ၣ်ပှၢ် ဒီး (ဝင်းကံ)ကရူၢ် (ဝင်းကံ)သ၀ီချၢ ကမျၢၢ်တၢ်ဖံးအီၣ်မၤအီၣ်လီၢ်ကျီးပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်ကဲထီၣ်သးဖဲန့ၣ်၀ံၤမၤကဒီးဖဲဟါခီ ၉း၃၀ မံးနံးအဆၢကတီၢ်န့ၣ် ပယီၤသုးတဒူၣ်ဃီ၀ဲအံၤ ခးလီၤကဒီးကျိဖးဒိၣ်(၁၅)ဖျၢၣ် လီၤတဲၥ်ပိၢ်ဖးထီၣ်လၢ ခရၢၢ်ကရူၢ် အခဲၤသ၀ီ,သိခွးသ၀ီ,စ့ၣ်ကွ့သ၀ီဒီး မိၣ်ခမီၣ်သ၀ီချၢအဃိ ကျီးပူၤတၢ်ထူၣ်တၢ်ဘိဟးဂီၤကဲထီၣ် ၀ဲဒၣ် အိၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ပယီၤသုးခးလီၤကျိဖးဒိၣ်ဘျီ၀ဲအံၤ ခီဖျိလီၤတဲၥ်ပိၢ်ဖးထီၣ်၀ဲလၢသ၀ီဃၢၤ,တၢ်ဖံးအီၣ်မၤအီၣ်လီၢ်ဒီးပှၢ်ပူၤအဃိ ပှၤကမျၢၢ် တၢ်သံတၢ်ဘၣ်ဒိဘၣ်ထံးကဲထီၣ်တအိၣ်၀ဲဒၣ်ဘၣ်ဆၣ် ခီဖျိပယီၤသုးခးလီၤကျိဖးဒိၣ်အါအါဂီၢ်ဂီၢ်ဒ်အံၤအဃိ ကဲထီၣ်၀ဲတၢ်ဘၣ်ယိၣ် ဘၣ်ဘှီလၢလီၢ်က၀ီၤကမျၢၢ် အဂီၢ်ဒီး ကမျၢၢ်တဖၣ်ဘၣ်လဲၤက့ၤဖံးမၤက့ၤတၢ်လၢတၢ်ပျံၤတၢ်ဖုးတၢ်ပလီၢ်ပဒီပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ ပယီၤသုးလၢအိၣ်ကၠဲးထိၣ်ကီၢ်ဆၣ်ပူၤတဖၣ် တၢ်ဒုးကဲထီၣ်အိၣ်ဂ့ၤတအိၣ်ဂ့ၤညီနုၢ်န့ၣ် ခးလီၤ၀ဲကျိဖးဒိၣ်ဆူ လီၢ်က၀ီၤကမျၢၢ်အိၣ်ဆိးလီၢ်ကျဲ အိၣ်၀ဲကိးမုၢ်နံၤဒဲးဃၣ်ဃၣ်အဂ့ၢ်န့ၣ် ဒူသထူၣ်ကီၢ်ရ့ၣ်ခိၣ် ပဒိၣ်စီၤစိမၠ့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“လီၤဆီဒၣ်တၢ်ဒ်သိးကၠဲးထိၣ်ကီၢ်ဆၣ်ပူၤန့ၣ် ပယီၤသုးခးလီၤတၢ်ကိးမုၢ်နံၤဒဲးလီၤ.ဒြိနါက့ကွံၥ်လီၤ,ကျိဖးဒိၣ်နါက့ကွံၥ်လီၤ. လၢသ၀ီဖိအကျါနါက့အ၀ဲသ့ၣ်လူၤကွံၥ်လီၤ၀ဲခဲလၢၥ်လီၤ.လၢအမိၣ်သးကွံၥ်၀ဲန့ၣ်ကွံၥ်၀ဲလီၤန့ၣ်ပထံၣ်ဒ်န့ၣ်လီၤမီၤနီၤ”အဂ့ၢ်န့ၣ် န့ၣ်လီၤ.
ဒ်န့ၣ်အသိး ဖဲအပူၤကွံၥ်တလါအံၤလါဖ့ၤဘြူၤအါရံၤ ၁၃ သီ အနံၤန့ၣ်စ့ၢ်ကီး အဆိကတၢၢ်တဘျီ သုးမီၤစိရိၤအကဘီယူၤ(Jet fighter) လဲၤခးလီၤ၀ဲ (၅၀၀)ပီၣ်မ့ၣ်ပိၢ် ၂ ဘျီလၢဖွ့ဖူကၢ်ကရူၢ် ပနွဲၢ်လူၢ်သ၀ီဒီး ,ဆီသုးခံကရူၢ် ကီးကးသ၀ီပူၤအဃိ ကမျၢၢ်သံ(၃)ဂၤဒီး ဘၣ်ဒိ(၈)ဂၤ အမဲၥ်ညါ ကၠိတၢ်သူၣ်ထီၣ်,ဃိၣ်,သီခါဖၠၣ်တၢ်သူၣ်ထီၣ်လီၤပှီၢ်ဟးဂီၤ၀ဲဒိၣ်ဒိၣ်မုၢ်မုၢ် ကဲထီၣ်တ့ၢ် အသးဒံးန့ၣ်လီၤ.