လါဖ့ၤဘြူၤအါရံၤ ၂၈ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲက၀ီၤအပူၤ တၢ်သိၣ်တၢ်သီ(၆)ထံၣ်လၢကၠီၣ်တဲၣ်ဒီးဒဲက၀ီၤပှၤဘၣ်မူ ဘၣ်ဒါထုးထီၣ်ပၥ်လီၤ၀ဲအံၤ တၢ်မ့တလူၤပိၥ်မၤထွဲမၤကမၣ်၀ဲန့ၣ် တၢ်ကဟံထီၣ်ဖီၣ်ထီၣ်ဂ့ၢ်၀ီဒီးအးလီၤက့ၤဆူကၠီၣ်တဲၣ် ပှၤဘၣ်မူ ဘၣ်ဒါစုပူၤအဂ့ၢ်န့ၣ် ဒဲက၀ီၤပှၤဘၣ်မူဘၣ်ဒါထုးထီၣ်ဒုးသ့ၣ်ညါဟ့ၣ်ပလီၢ်၀ဲကမျၢၢ်တဖၣ်ဖဲမဟါလါဖ့ၤဘြူၤအါရံၤ ၂၇ သီအနံၤ န့ၣ်လီၤ.
မဲၢ်လးဒဲက၀ီၤအပူၤ စးထီၣ်ဖဲ(၂၀၂၁)၀ံၤလီၢ်ခံန့ၣ် တၢ်ဂ့ၢ်(၆)ထံၣ်လၢအမ့ၢ် တၢ်မူးတၢ်ဘှီး,တၢ်မၤဟုၣ်သ့ၣ်, တၢ်ရၤလီၤတၢ်ကစီၣ် လၢအကမၣ်,တၢ်ဟးထီၣ်က့ၤလီၤ,တၢ်စိၥ်ကျိ(ပဲပျိၢ်),တၢ်တၢၥ်ကွံၥ်တၢ်ကမှံၤလၢတဘၣ်ဘျိးဘၣ်ဒါ တၢ်သ့ၣ်တဖၣ်အံၤ ဟဲအါထီၣ်၀ဲဖျိဖျိဖျါဖျါအဂ့ၢ်န့ၣ် ဒဲက၀ီၤပှၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤန့ၣ် မဲၢ်လးဒဲက၀ီၤ နဲၣ်ရွဲၣ် စီၤဆါဒ့ စံး၀ဲလၢ“ပကွၢ်ကဒါက့ၤစးထီၣ်ဖဲ(၂၀၂၁)န့ၣ်ပဒဲက၀ီၤဖိတနီၤန့ၣ် အကျီသ့ၣ် ကျီ၀ၣ်ဟဲအါထီၣ်မီၤနီၤ.ဘၣ်ဃးလၢသ့ၣ်ပဟံၣ်,သ့ၣ်ဃ့မ့ၢ်ဂ့ၤ,အသံသိမ့ၢ်ဂ့ၤအ၀ဲသ့းဟဲက့ၤယိး၀ဲဒၣ်လၢဒဲက၀ီၤပူၤ.ပထံၣ်လၢတၢ်သ့ၣ်တဖၣ်အံၤပမ့တတြီဆၢဒီသဒၢအီၤဘၣ်န့ၣ် ကကဲထီၣ်ကဒါ က့ၤလၢပဒဲက၀ီၤတၢ်ဂ့ၢ်ကီမီၤနီၤ. တၢ်သ့ၣ်တဖၣ်အံၤ စးထီၣ်ဖဲ(၂၀၂၁),(၂၀၂၂)ဘျီန့ၣ်အါထီၣ်တစဲး,(၂၃),(၂၄)ဘူးကလၢၤလါနိၣ်၀့ဘၢၣ်ဒီးလါဒံၣ်စ့ဘၢၣ်န့ၣ်တၢ်ကျီသ့ၣ်တဖၣ်အါထီၣ်. မ့၀ံၤတၢ်ကမှံၤတဖၣ်မ့ၢ်ဂ့ၤ,ကသံၣ်မူၤဘှီးသ့ၣ်တဖၣ်မ့ၢ်ဂ့ၤအါထီၣ်မီၤနီၤ” အဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်တၢ်သ့ၣ်တဖၣ်အံၤတဘၣ်လိၥ်ဖိးမံ၀ဲဒီးကၠီၣ်တဲၣ်တၢ်သိၣ်တၢ်သီဘၣ်အသိး ကဲထီၣ်တၢ်ကီတၢ်ခဲသ့အဃိ ခါလၢကဟဲတၢ်သ့ၣ်တဖၣ်အံၤသုတအိၣ်ထီၣ်လၢၤတဂ့ၤအဂီၢ်န့ၣ် ကမျၢၢ်တဖၣ်ကလူၤပိၥ်မၤထွဲဒီး ပှၤလၢအမၤကမၣ် တၢ်သ့ၣ်တဖၣ် တၢ်ကဟံဂ့ၢ်၀ီအးလီၤက့ၤဆူကၠီၣ်တဲၣ်ပှၤဘၣ်မူဘၣ်ဒါစုပူၤအဂ့ၢ်န့ၣ် မဲၢ်လးဒဲက၀ီၤ နဲၣ်ရွဲၣ် စီၤဆါဒ့ စံးအါထီၣ် ၀ဲဒၣ်န့ၣ်လီၤ.
“ပအဲၣ်ဒိးဒုးသ့ၣ်ညါနၢ်ပၢၢ်ပှၤဒဲက၀ီၤဖိကိးဂၤဒဲးလၢဘၣ်ဃးပတၢ်ကီတၢ်ခဲသ့ၣ်တဖၣ်အံၤဆူမဲၥ်ညါသုတအိၣ်ထီၣ်လၢၤ တဂ့ၤအဂီၢ် န့ၣ်ပဃ့၀ံသးစူၤပှၤဒဲက၀ီၤဖိတဖၣ်လၢကလူၤပိၥ်ထွဲမၤထွဲဘၣ်ဃးတၢ်သိၣ်တၢ်သီလၢဘၣ်ဘျးသးဒီးကၠီၣ်တဲၣ်တၢ်သိၣ်တၢ်သီအဃိ လ့ၤတက့ၤ တဘၣ်မၤတဂ့ၤမီၤနီၤ.အဃိပှၤလၢမ့တဒိကနၣ်ကၠီၣ်တဲၣ်တၢ်သိၣ်တၢ်သီတၢ်ဘျၢမ့ၢ်ဂ့ၤ,သ့ၣ်ပှၢ်တၢ်သိၣ်တၢ်သီတၢ်ဘျၢ မ့ၢ်ဂ့ၤ မ့တလူၤပိၥ်ထွဲမၤထွဲဘၣ်န့ၣ်ဆူမဲၥ်ညါန့ၣ်ပဒဲက၀ီၤပူၤပကထံၣ်ဘၣ်တၢ်ဂ့ၢ်ကီသ့၀ဲမီၤနီၤ .အဃိပှၤလၢအမၤကမၣ်တၢ်တဖၣ် ပက အးလီၤက့ၤကၠီၣ်တဲၣ်ပှၤဘၣ်မူဘၣ်ဒါစုပူၤလီၤ” အဂ့ၢ်န့ၣ် စံး၀ဲန့ၣ်လီၤ.
ဒ်ဒဲက၀ီၤပှၤဘၣ်မူဘၣ်ဒါစံး၀ဲအသိးန့ၣ် တၢ်သိၣ်တၢ်သီတၢ်ဘျၢလၢတၢ်ထုးထီၣ်ဟ့ၣ်ပလီၢ်၀ဲအံၤအိၣ်ဆီလီၤပၥ်လီၤအသး ဖးယံၤလံဘၣ်ဆၣ် ခီဖျိတၢ်လူၤပိၥ်မၤထွဲအီၤတတုၤထီၣ်ထီၣ်ဘးဘၣ်ဒီးဟဲအါထီၣ်အါကွ့ၢ်ကွၢ်အဖီခိၣ် ကၠီၣ်တဲၣ်ပှၤဘၣ်မူဘၣ်ဒါနုၥ် လီၤသမံသမိး သတူၢ်ကလၥ်သ့၀ဲအဃိတချုးဒံးလၢတၢ်နုၥ်လီၤဃိထံသမံသမိးကဲထီၣ်ဒံးဘၣ်န့ၣ် ဘၣ်တၢ်ထုးထီၣ်ဒုးသ့ၣ်ညါကဒီး ပှၤဒဲက၀ီၤဖိတဖၣ်ဒ်အံၤလီၤအဂ့ၢ်န့ၣ် စံး၀ဲန့ၣ်လီၤ.
ဖဲတလါအံၤလါဖ့ၤဘြူၤအါရံၤ ၁၄ သီအနံၤ ဒ်(TBC)ထုးထီၣ်ပၥ်ဖျါ၀ဲအသိးန့ၣ် မဲၢ်လးဘၣ်ကီဘၣ်ခဲဒဲက၀ီၤအံၤ ပှၤနီၣ်ဂံၢ်ပၥ်ဖှိၣ်ခဲလၢၥ် အိၣ်၀ဲ(၃၄၀၀၀)ဘျဲၣ်ဒီး အပူၤကွံၥ်လါယနူၤအါရံၤ ၂၇ သီအနံၤ ဆူၣ်ချ့, တၢ်ကမှံၤ,ထံတၢ်ဆီၣ်ထွဲမၤစၢၤလၢ တၢ်ပတုၥ်ကွံၥ်၀ဲအံၤ ပၣ်ဃုၥ်စ့ၢ်ကီး၀ဲဒၣ်န့ၣ်လီၤ.
ဒ်န့ၣ်အသိးဒဲက၀ီၤ(၉)ဘ့ၣ်အကျါမဲၢ်လးဘၣ်ကီဘၣ်ခဲဒဲက၀ီၤအံၤ မ့ၢ်ဒဲက၀ီၤတဘ့ၣ်လၢပှၤနီၣ်ဂံၢ် အါကတၢၢ်ဒီး တၢ်ဖီၣ်န့ၢ်၀ဲ ကသံၣ်မူၤဘှီး,တၢ်ဟုၣ်တၢ်ဘျၣ်ဃုၥ်ဒီးတၢ်ဂ့ၢ်လၢအဂၤတဖၣ်စ့ၢ်ကီးကဲထီၣ်အိၣ်၀ဲတလီၢ်လီၢ်အဃိ ကၠီၣ်တဲၣ်ပှၤဘၣ်မူဘၣ်ဒါ မၤဃံး၀ဲတၢ်နုၥ်လီၤဟးထီၣ်ဒိၣ်န့ၢ်ဒဲက၀ီၤလၢအဂၤတဖၣ်အဂ့ၢ်န့ၣ် တၢ်ပဲၥ်ထံနီၤဖး၀ဲအိၣ်န့ၣ်လီၤ.