လါအီးကထိဘၢၣ် ၂၉သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကီၢ်ပယီၤ ကီၢ်ဆၢ တးကီၢ်ရ့ၣ် မဲၢ်ဆီးဝ့ၢ် မဟၤဝၤသဝီကရူၢ် မဲၢ်ကိးက့သဝီအပူၤ အပူၤကွံၥ် လါအီးကထိ ဘၢၣ်(၂၇)သီအနံၤ ကမျၢၢ်လီၢ်ကဝီၤဖိ တဖၣ်မၤဝဲ တၢ်ပၥ်ဖျါထီၣ်သး ဝံၤအလီၢ်ခံ, တနံၤအံၤ လါအီးကထိဘၢၣ် (၂၉)သီ ဂီၤခီ(၅)နၣ်ရံၣ် (၃၀) မံးနံး အဆၢကတီၢ် ကျိချံလီၤတဲၥ်ကဒီးဝဲဒီး ဘၣ်ဒိဝဲ ကမျၢၢ်လီၢ်ကဝီၤပိၥ်မုၣ် (၁)ဂၤအဂ့ၢ်, ကၠီၣ်တဲၣ် တၢ်ကစီၣ် သန့တဖၣ်ပၥ်ဖျါ ထီၣ်ဝဲဒၣ် န့ၣ်လီၤ.
မဲၢ်ကိးက့ ကဝီၤဒ့နီၢ်ဂံၢ်(၉) သဝီဟီၣ်ကဝီၤအပူၤ တနံၤအံၤ ခီဖျိ (၆၀) မမကျိဖးဒိၣ်မျိၥ်သၣ်တဖျၢၣ် လၢ ရၤမတံ ကလံၤထံး မ့လဲၣ်ဟီၣ်ကဝီၤတကပၤ လီၤတဲၥ်ကဒီးဝဲအဃိ, ဘၣ်ဒိဝဲ သးနံၣ်(၅၅)နံၣ် မံးစ်လါယိနါလၣ်(นาง ลำยง นาละ) အမိၢ်ပှၢ်ဒီတဂၤ ဒီးအဟံၣ်အဃီ အဂ့ၢ်, ကၠီၣ်တဲၣ်ပၥ်ဖျါဝဲန့ၣ်လီၤ.
လၢန့ၣ်အမဲၥ်ညါ, ခီဖျိ လီၢ်ကဝီၤပိၥ်မုၣ်အံၤ တၢ်ဘၣ်ဒိဘၣ်ထံးအါဝဲအဃိ ဂ့ၢ်ဝီၢ်အူ ဘၣ်တၢ်ဆှၢထီၣ်ဝဲဆူ မဲၢ်ဆီးတၢ်ဆါ ဟံၣ်ဖးဒိၣ် အဂ့ၢ် သ့ၣ်ညါဘၣ်န့ၣ်လီၤ.
စုကဝဲၤလီၤတဲၥ်တၢ်အိၣ်သးအဖီခိၣ်, မဲၢ်ကိးက့လီၢ်ကဝီၤဖိတဂၤ စံးဝဲဒၣ်လၢ “ တုၤခဲအံၤခးလိၥ်သးရုၢ်ရုၢ်လီၤ. ဖဲမဂီၤ ခံခီခံကပၤခးလိၥ်သးဖးဆူၣ်ညါ, ကျိချံပှၥ်သၣ်လီၤတဲၥ်လၢအံၤတကပၤတဖၣ် တၢ်သမံသမိးဝဲန့ၣ် အါတက့ၢ်အိၣ်ဒၣ် ပယီၤ သုးအတၢ်လီၤ.” အဂ့ၢ်စံးဝဲန့ၣ်လီၤ.
ဒ်ကၠီၣ်တဲၣ်(The reporter)တၢ်ကစီၣ်သန့ လီၢ်ခံကတၢၢ်အ တၢ်ပၥ်ဖျါအိၣ်ဝဲအသိးန့ၣ်,ကီၢ်ပယီၤတကပၤ သုးကရူၢ် ဒီး တၢ်ပၢၢ်ဆၢ သုးပၥ်ဖှိၣ်အဘၢၣ်စၢၤ တၢ်ခးလိၥ်သးအံၤ ဆူၣ်အါထီၣ်သ့ဝဲအဃိ, ဒူသဝီပူၤ ကမျၢၢ်တဖၣ် ဃ့ၢ်ထီၣ်အိၣ် ကဒုဝဲအသး အိၣ်ဝဲအဂ့ၢ်, ပၥ်ဖျါဝဲန့ၣ်လီၤ.
တကးဒံးဘၣ်, တကီၢ်ခါခဲအံၤ ကမျၢၢ်တၢ်ဘၣ်ဒိဘၣ်ထံးအိၣ်ထီၣ်တုၤလၢ(၃)ဂၤလံအဂ့ၢ်, ပၥ်ဖျါဃုၥ်ဝဲန့ၣ်လီၤ.
သုးကရူၢ်အံၤ လၢကပၢဘၣ်က့ၤဝဲ ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ရၤမတံကလံၤထံး ဟီၣ်ကဝီၤတဖၣ်အပူၤ တၢ်လီၢ် တၢ်ကျဲအဂီၢ် တကီၢ်ခါခဲအံၤ မၤဝဲဒုးယၤတၢ်ဟူးတၢ်ဂဲၤ ဆူၣ်ဆူၣ်ကိၤကိၤအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး, တၢ်ခးလိၥ်သးတဘျီလၢ်လၢ်အပူၤ ပယီၤသုးတကပၤ စုကဝဲၤကျိချံပှၥ်သၣ် ဟဲလီၤတဲၥ်လၢ ကီၢ်ကၠီၣ်တဲၣ် တကပၤ အိၣ်ဝဲဒီး တၢ်ဘၣ်ဒိဘၣ်ထံးအိၣ်ဝဲ ခဲအံၤခဲအံၤ ဘၣ်ဆၣ် ကၠီၣ်တဲၣ်ပှၤဘၣ်မူဘၣ်ဒါတကပၤ က့ၤခီၣ်ဆၢကဒါ က့ၤဝဲ တအိၣ်ဒံးဘၣ်ဒီး မ့မ့ၢ်တခီ ဒ်ကမျၢၢ်လီၢ်ကဝီၤဖိတဖၣ် ဃ့ထီၣ်ဝဲအသိး, မၤဃံးထီၣ်ဝဲ သူမွဲထံကျိ ဒီတကျိၤအပူၤ တၢ်ဘံၣ်တၢ်ဘၢဒီး ဟ့ၣ်ဝဲတၢ်ကဟုကယၥ်ဆူ ကမျၢၢ်တၢ်ဘၣ်ဒိဘၣ်ထံးတဖၣ် အိၣ်ဝဲ အဂ့ၢ်, သ့ၣ်ညါဘၣ်န့ၣ်လီၤ.
