လါအ့ဖြ့ၣ် ၂၀ သီ, ၂၀၂၅ နံၣ်, ခ့ၣ်အဲးစံၣ်
ကညီကီၢ်စဲၣ်တၢ်လီၢ်အါတီၤအပူၤ တကီၢ်ခါခဲအံၤခီဖျိတၢ်ဒုးတၢ်ယၤဆူၣ်ထီၣ်အဃိ ကမျၢၢ်ထံဖကီၢ်ဖိတဖၣ်တၢ်ဂ့ၢ်အရ့ဒိၣ် မ့တအိၣ်ဘၣ်န့ၣ်တဘၣ်ဟးထီၣ်က့ၤလီၤဘၣ်အဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢ ဖှိၣ်ကရၢ လီၢ်ခၢၣ်သး ထုးထီၣ်ပၥ်ဖျါ ဟ့ၣ်ပလီၢ်၀ဲဖဲမဟါလါအ့ဖြ့ၣ် ၁၉ သီအနံၤန့ၣ်လီၤ.
ဒ်ခ့ၣ်အဲၣ်ယူၣ်လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ် တကီၢ်ခါခဲအံၤလၢကညီကီၢ်စဲၣ်တၢ်လီၢ်အါတီၤအပူၤ တၢ်ဒုးတၢ်ယၤဆူၣ်ထီၣ် အမဲၥ်ညါသုးမီၤစိရိၤအံၤပညိၣ်ခးလီၤ၀ဲကျိဖးဒိၣ်,ကဘီယူၤစ့ၢ်ကီးလဲၤခးလီၤတၢ်လၢကမျၢၢ်ထံဖကီၢ်ဖိအိၣ်ဆိးလီၢ်,တၢ်မၤလိကၠိ,သီခါဖၠၣ်,တၢ်ဘါယွၤသရိၥ်,ကမျၢၢ်ပှၤဃ့ၢ်မှံဟးဖျိးအိၣ်ဆိးလီၢ်သ့ၣ်တဖၣ်န့ၣ်လီၤ.
အဃိကမျၢၢ်ထံဖိကီၢ်ဖိတဖၣ်တၢ်ဂ့ၢ်အရ့ဒိၣ်မ့တအိၣ်ဘၣ်န့ၣ်တဘၣ်ဟးထီၣ်က့ၤလီၤဘၣ်,ကအိၣ်စီၤစုၤဒီးတၢ်သူၣ်ထီၣ်လၢသုးမီၤစိရိၤပညိၣ်၀ဲအလီၢ်တဖၣ်တကးဒံးဘၣ်အမဲၥ်ညါ ပှၤမၤတၢ်ကစီၣ်ဖိတဖၣ်ကပၥ်သူၣ်ပၥ်သးလၢတၢ်ဂ့ၢ်တၢ်ကျိၤလၢတၢ်တီၣ်ထီၣ် အီၤဆူ (စိၣ်ရှၢၣ်မံၣ်ဒံၣ်ယၢၣ်)ပူၤတဖၣ် သုတကဲထီၣ်တၢ်ဟ့ၣ်တၢ်ကစီၣ်ဆူသုးမီၤစိရိၤအအိၣ်လၢကဟဲခးလီၤတၢ်လၢ ကမျၢၢ် အိၣ်ဆိးအလီၢ်တဂ့ၤအဂ့ၢ်န့ၣ် ခ့ၣ်အဲၣ်ယူၣ် ဟ့ၣ်ပလီၢ်၀ဲဒၣ်န့ၣ်လီၤ.
တကတီၢ်ဃီဟီၣ်က၀ီၤဒ်သိးသုးမီၤစိရိၤအသုးကလၢၤကလီၤမၢ်ကွံၥ်အဂီၢ် ဒုးယၤတၢ်ဂဲၤလိၥ်န့ၣ်လိၣ်၀ဲသပှၢ်ကတၢၢ်အသိး ခါဆူမဲၥ်ညါ တၢ်ဒုးကဆူၣ်ထီၣ်အဃိဒ်သိးကမျၢၢ်သ့ၣ်တဖၣ်သုတဘၣ်ကွၢ်ဆၢၣ်မဲၥ်ဒီးတၢ်သံတၢ်ပှၢ်တဂ့ၤအဂီၢ် ဘၣ်တၢ်ထုးထီၣ်ဒုး သ့ၣ်ညါဟ့ၣ်ပလီၢ်၀ဲဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် ပှၤကတိၤတၢ်ပၢ ပဒိၣ်စီၤကျၢၤစ့ စံး၀ဲန့ၣ်လီၤ.
စံး၀ဲလၢ“ပဒုးသ့ၣ်ညါတ့ၢ်ဃၥ်လၢအပူၤ ကွံၥ်လံမီၤနီၤ.ပတၢ်ပညိၣ်န့ၣ်မ့ၢ်၀ဲဒၣ်သုးမီၤစိရိၤအသုးကလၢၤသ့ၣ်တဖၣ်တဘၣ်အိၣ်လၢ ပဟီၣ်က၀ီၤပူၤအဂီၢ်န့ၣ်မ့ၢ်ပတၢ်ဂဲၤလိၥ်တခါလီၤ.တၢ်ဂဲၤလိၥ်လၢတၢ်ဒုးတကပၤန့ၣ်လိၣ်၀ဲသပှၢ်ကတၢၢ်အဖီခိၣ်တၢ်ဒုးတၢ်ယၤကဆူၣ်ထီၣ်အဃိမ့ၢ်တၢ်ဒုးသ့ၣ်ညါကမျၢၢ်ထံဖိကီၢ်ဖိဒ်သိးကပူၤဖျဲး၀ဲဒီးတၢ်ဘၣ်ယိၣ်ဘၣ်ဘှီတၢ်ကီတၢ်ခဲကသ့အဂီၢ်လီၤမီၤနီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါသုးမီၤစရိၤအံၤကမျၢၢ်ထံဖိကီၢ်ဖိမ့ၢ်ဂ့ၤ,တၢ်ပၢၢ်ဆၢသုးကရူၢ်ကရၢတဖၣ်မ့ၢ်ဂ့ၤန့ၣ် အ၀ဲသ့ၣ်တပၥ်၀ဲတဒူၣ်ဆၢဘၣ် အလီၢ်မ့အိၣ်လၢဘၣ်မၤသံမၤ၀ဲ,မ့ဘၣ်ခး,မ့ဘၣ်ဒွဲၣ်အူကမျၢၢ်အတၢ်လီၢ်တၢ်ကျဲန့ၣ်ဒွဲၣ်၀ဲအဃိ တကီၢ်ခါခဲအံၤပှၤဃ့ၢ်မှံဟးဖျိးအိၣ်၀ဲ ဒၣ်အါမးဒီးခီဖျိတၢ်ကဲထီၣ်သးကိၢ်ကိၢ်လၢၤလၢၤအဃိမၤလီၤတံၢ်ပှၤနီၣ်ဂံၢ်နီၣ်ဒွးတန့ၢ်ဒံးဘၣ်အဂ့ၢ်န့ၣ် ပဒိၣ်စီၤကျၢၤစ့ စံး၀ဲန့ၣ်လီၤ.
တကးဒံးဘၣ်ကီးတရံး-ကြုၢ်တုဟီၣ်က၀ီၤပူၤ ဒ်သိးသုးမီၤစိရိၤအသုးကလၢၤသုတအိၣ်လၢၤတဂ့ၤအဂီၢ် စးထီၣ်ဖဲလါအ့ဖြ့ၣ် ၁၄ သီ အနံၤန့ၣ် တၢ်ပၢၢ်ဆၢကရူၢ်ကရၢတဖၣ်ဂုၥ်ကျဲးစၢးမၤဖျိးကွံၥ်၀ဲလံအဖီခိၣ် တနီၤန့ၣ်တၢ်ထီၣ်မၤန့ၢ်၀ဲအိၣ်လံအသိးဘၣ်ဆၣ်တနီၤန့ၣ် တၢ်ဂုၥ်ကျဲးစၢးထီၣ်၀ဲအဖၢမုၢ် စ့ၢ်ကီးအိၣ်၀ဲအဂ့ၢ်န့ၣ် ပဒိၣ်စီၤကျၢၤစ့ စံး၀ဲန့ၣ်လီၤ.
“လၢကြုၢ်တုတၢ်လီၢ်အါတီၤန့ၣ်သုးမီၤစိရိၤအပှၤအိၣ်မီၤ.ဒ်သိးသုးကလၢၤတဖၣ်သုတအိၣ်လၢၤတဂ့ၤအဂီၢ်န့ၣ်ပဘၣ်ဂုၥ်ကျဲးစၢးအဖီခိၣ်ခဲအံၤမ့ဘၣ်တဲန့ၣ်တနီၤန့ၣ်ပမၤန့ၢ်လံဘၣ်ဆၣ်တနီၤန့ၣ်ပဘၣ်ဂုၥ်ကျဲးစၢးအဖၢမုၢ်ဒံးလီၤ”အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးခ့ၣ်အဲၣ်ယူၣ်ဟီၣ်က၀ီၤအမဲၥ်ညါ တကီၢ်ခါခဲအံၤကလုၥ်ဒူၣ်တၢ်ပၢၢ်ဆၢကရူၢ်ကရၢလၢအဂၤသ့ၣ်တဖၣ်အဟီၣ်က၀ီၤပူၤ စ့ၢ်ကီး တၢ်ဒုးဆူၣ်ထီၣ်၀ဲအိၣ်အသိး ဟီၣ်က၀ီၤတၢ်လီၢ်တနီၤတၢ်ဒုးကဲထီၣ်တအိၣ်၀ဲဘၣ်ဆၣ် ခီဖျိသုးမီၤစိရိၤအံၤခးလီၤကျိဖးဒိၣ်, သူ၀ဲကဘီယူၤအဃိ ကမျၢၢ်သံဘၣ်ဒိဘၣ်ထံး၀ဲဒၣ်အါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.