လါယူၤ ၁၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,မုၢ်တြီၢ်ကီၢ်ရ့ၣ်-သုးက့(၅)ဟီၣ်ကဝီၤအပူၤလၢ(၁၅)သီအတီၢ်ပူၤတၢ်ဒုးကဲထီၣ် ဝဲလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KLNA)သုးက့(၅)ဒီးပယီၤသုးကီၣ်ကးအဘၢၣ်စၢၤ(၃၅)ဘျီ,ပယီၤသုးတကပၤအပှၤသံ(၁၁)ဂၤအဂ့ၢ်ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ်ထုးထီၣ်ပၥ်ဖျါဖဲမဟါလါယူၤ(၁၈)သီအနံၤန့ၣ်လီၤ.
စးထီၣ်လၢလါယူၤ(၁)သီတုၤ(၁၅)သီအနံၤလၢလါတဝၥ်အတီၢ်ပူၤန့ၣ်တၢ်ဒုးကဲထီၣ်ဝဲဒၣ်လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KLNA)သုးက့နီၣ်ဂံၢ်(၅)ဒီးပယီၤသုးကီၣ်ကးအဘၢၣ်စၢၤ(၃၅)ဘျီဒ်အံၤအဖီခိၣ်,ပယီၤသုးတကပၤအပှၤသံ(၁၁)ဂၤအသိးဘၣ်ဒိစ့ၢ်ကီးဝဲ(၁၂)ဂၤအဂ့ၢ်ဒ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ.
ဒ်န့ၣ်အသိးလၢခံခီခံကပၤတၢ်ဒုးကဲထီၣ်ဝဲ(၃၅)ဘျီဒ်အံၤအဖီခိၣ်လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KLNA)တကပၤတၢ်ဘၣ်ဒိဘၣ်ထံးအိၣ်ဝဲတဆံးတက့ၢ်အဂ့ၢ်မုၢ်တြီၢ်ကီၢ်ရ့ၣ်ပၥ်ဖျါဝဲဒၣ်အသိးခီဖျိလၢတၢ်ဒုးကဲထီၣ်အဃိပယီၤသုးကီၣ်ကးသ့ၣ်တဖၣ်ခးတပျုၤတပျီၤဝဲကျိဖးဒိၣ်(၂)ဘျီ,လၢကလံၤကျါကဘီယူၤန့ၣ်(၁)ဘျီအဂ့ၢ်ပၥ်ဖျါစ့ၢ်ကီးဝဲန့ၣ်လီၤ.
တကတီၢ်ဃီမ့ၢ်လၢပယီၤသုးကီၣ်ကးခးတပျုၤတပျီၤကျိဖးဒိၣ်,မၤဝဲကလံၤကျါတၢ်ဟဲတ့ၢ်လီၤမ့ၣ်ပိၢ်အဃိမၤဟးဂီၤကွံၥ်ဝဲမုၢ်တြီၢ်ကီၢ်ရ့ၣ်ကမျၢၢ်ဒူဖိသဝီဖိသ့ၣ်တဖၣ်တၢ်ဖံးအီၣ်မၤအီၣ်လီၢ်ကျဲဒီးကမျၢၢ်သ့ၣ်တဖၣ်ပျံၤတၢ်ဖုးတၢ်,ဘၣ်သုးလီၢ်သုးကျဲအိၣ်ထီၣ်ဝဲအဂ့ၢ်ဒ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ.
ဖဲအပူၤကွံၥ်လါယူၤ(၉)သီအနံၤစ့ၢ်ကီးန့ၣ်ဒွဲၣ်လိၣ်ကီၢ်ဆၣ်ဟီၣ်ကဝီၤအပူၤပယီၤသုးကီၣ်ကးအသုးကလၢၤတဖျၢၣ်လၢအမ့ၢ်(ကတၢတံး)သုးကလၢၤအံၤပယီၤသုးဟဲက့ၤထီၣ်အိၣ်က့ၤဝဲဃုၥ်ဒီးအပှၤနီၣ်ဂံၢ်(၁၀၀)ဃၣ်ဃၣ်အဂ့ၢ်(သုးက့-၅)အ သုးက့ခိၣ်စံးစ့ၢ်ကီးဝဲန့ၣ်လီၤ.
လၢန့ၣ်အမဲၥ်ညါမ့ၢ်ဘၣ်ကွၢ်က့ၤဝဲဖဲအပူၤကွံၥ်မဟါတလါ,လါမ့ၤအတီၢ်ပူၤန့ၣ်မုၢ်တြီၢ်ကီၢ်ရ့ၣ်ဟီၣ်ကဝီၤအပူၤတၢ်ဒုးကဲထီၣ်ဝဲလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KLNA)ဒီးပယီၤသုးကီၣ်ကးအဘၢၣ်စၢၤ(၈၅)ဘျီ,ပယီၤသုးတကပၤအပှၤသံ(၁၇)ဂၤဒီးဘၣ်ဒိဝဲအိၣ်(၂၂)ဂၤအဂ့ၢ်သ့ၣ်ညါဘၣ်ဒ်အပူၤကွံၥ်မုၢ်တြီၢ်ကီၢ်ရ့ၣ်တၢ်ပၥ်ဖျါပူၤအသိးန့ၣ်လီၤ.
