လါယူၤ ၃၀ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်အပူၤ ပယီၤသုးမီၤစိရိၤအကဘီ ယူၤလဲၤ တ့ၢ်လီၤကဒီးမ့ၣ်ပိၢ်အဃိ ကမျၢၢ်ဘၣ်ဒိ(၅)ဂၤအကျါပၣ်ဃုၥ်၀ဲဖိသၣ်(၃)ဂၤဒီးဟံၣ်တၢ်သူၣ်ထီၣ်ဟးဂီၤ၀ဲ(၉)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သးတၢ်ကစီၣ်ထုးထီၣ်ပၥ်ဖျါ၀ဲဖဲတနံၤအံၤန့ၣ်လီၤ.
ဖဲလါယူၤ ၂၈ သီ မုၢ်ဃ့ၢ်လီၤ ၁း၂၂ မံးနံးအဆၢကတီၢ် လၢဟ့သၤ၀ဲသ၀ီအပူၤခီဖျိသုးမီၤစိရိၤအကဘီယူၤလဲၤတ့ၢ်လီၤမ့ၣ်ပိၢ်အဃိ ဟံၣ်တၢ်သူၣ်ထီၣ်ဟးဂီၤ(၉)ဖျၢၣ်အမဲၥ်ညါ သးစၢ် ကိၤခၠ့ၣ်တိ(၂၂)နံၣ်,နီၢ်ဒီစွ့ၤ(၃၆)နံၣ်, ၀ၤဆိၤအူ(၁၂)နံၣ်, နီၢ်လးအဲၣ်ဖီ (၂)နံၣ် ဒီး စီၤဒံၤထူ (၂)နံၣ် သ့ၣ်တဖၣ်အံၤ ဘၣ်ဒိဘၣ်ထံး၀ဲအဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးဖဲအပူၤကွံၥ်လါယူၤ ၂၆ သီအနံၤ မူကီၢ်ဆၣ်အပူၤ ပယီၤသုးခီၣ်ချ့သုးရ့ၣ်(ခမရ-၄၃၉)သုးရ့ၣ်လၢအိၣ်ဆီလီၤသး ဖဲ ကညိၣ်ကွ့( ကညွတ်ကွင်း)သ့ၣ်တဖၣ်အံၤ ခးလီၤ၀ဲကျိဖးဒိၣ်အဃိ ခၠီၣ်အ့ၤဆူၣ်(ခြောက်အိမ်စု)သ၀ီဖိသးစၢ်တဂၤ ဒီး ကည့ၤတဲ (ကညင်တဲ) သ၀ီဖိသးစၢ်တဂၤ သံကွံၥ်၀ဲကဲထီၣ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်ကီၢ်ရ့ၣ်တၢ်ကစီၣ်တၢ်မၤနီၣ်စရီပူၤပၥ်ဖျါ၀ဲအသိးန့ၣ် လၢၢ်ဒိၣ်ဒီးမူကီၢ်ဆၣ်အပူၤ စးထီၣ်တလါအံၤလါယူၤ ၉ သီ တုၤလၢ ၂၈ သီ အနံၤ ခီဖျိလၢပယီၤသုးခးလီၤကျိဖးဒိၣ်ဒီးကဘီယူၤအံၤအဃိ ကမျၢၢ်သံ(၄)ဂၤ,ဘၣ်ဒိအိၣ်(၁၀)ဂၤဒီးလၢန့ၣ်အမဲၥ်ညါတၢ်ဘူၣ်တၢ်ဘါ တၢ်သူၣ်ထီၣ်,ကၠိ,ကမျၢၢ်အဟံၣ်စ့ၢ်ကီးဘၣ်ဒိဘၣ်ထံးဟးဂီၤ၀ဲအါမးန့ၣ်လီၤ.
လၢန့ၣ်အမဲၥ်ညါတနံၣ်အံၤ(၂၀၂၅)လါမးရှးတုၤလၢလါမ့ၤ လၢ(၃)လါအတီၢ်ပူၤ ခီဖျိလၢသုးမီၤစိရိၤအကဘီယူၤဒီးကျိဖးဒိၣ်အံၤအဃိ ကမျၢၢ်သံ(၁၅)ဂၤ,ဘၣ်ဒိ(၄၅)ဂၤဒီးသီခါဖၠၣ်(၄)ဖျၢၣ်,ဟံၣ်တၢ်သူၣ်ထီၣ်(၄၁)ဖျၢၣ်ဃုၥ်ဒီးစဲးဖီကဟၣ်တၢ်ဖိတၢ်လံၤလၢအဂၤ,ဆၣ်ဖိကီၢ်ဖိသံဘၣ်ဒိဘၣ်ထံးဟးဂီၤဒၣ်အါမးအဂ့ၢ်န့ၣ် လါယူၤ ၄ သီ ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါ၀ဲအသိးသ့ၣ်ညါဘၣ်န့ၣ်လီၤ.
လၢတၢ်န့ၣ်အဃိ ဒ်သိးသုးမီၤစိရိၤအတၢ်ဟူးတၢ်ဂဲၤတဖၣ်အံၤကပတုၥ်ကွံၥ်လၢအဆိအချ့အဂီၢ် ကီၢ်ပူၤကီၢ်ချၢဂံၢ်ခီၣ်ထံးတၢ်ကရၢ ကရိ, တၢ်ပၢၢ်ဆၢကရူၢ်ကရၢ,ထံဂုၤကီၢ်ဂၤပှၤဘၣ်မူဘၣ်ဒါဒီးထံဂုၤကီၢ်ဂၤဘၣ်ထွဲပှၤဂ့ၢ်၀ီခွဲးယၥ်ကရူၢ်ကရၢတဖၣ် ကဟံထီၣ်ဖီၣ် ထီၣ်ဂ့ၢ်၀ီ တုၤလီၤတီၤလီၤအဂ့ၢ်န့ၣ် လၢၢ်ဒိၣ်ကီၢ်ဆၣ် ကညီဂ့ၢ်ဂီၢ်အူတၢ်တိစၢၤမၤစၢၤကရူၢ် ဃ့ထီၣ်တ့ၢ်ဃၥ်၀ဲအိၣ်န့ၣ်လီၤ.