လါယူၤ ၅သီ, ၂၀၂၅နံၣ်, ခ့ၣ်အဲးစံၣ်.
တီနီၢ်မုၢ်ထီၣ်ဟီၣ်ကဝီၤ, သ့ၣ်ဘီဘိလီၢ်ကဝီၤကမျၢၢ်တဖၣ် မၤလၤကပီၤဝဲ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဒီးသုးပၥ်ဖှိၣ်သ့ၣ်တဖၣ်လၢအထီၣ်မၤန့ၢ် သ့ၣ်ဘီဘိသုးကလၢၤဖဲတနံၤလါယူၤ(၅)သီ,ဂီၤခီ(၉)နၣ်ရံၣ်အဆၢကတီၢ်အဂ့ၢ် သ့ၣ်ညါဘၣ်လၢပှၤလီၢ်ကဝီၤဖိအအိၣ်န့ၣ်လီၤ.
တၢ်ရဲၣ်တၢ်ကျဲၤဘျီဝဲအံၤန့ၣ် ကမျၢၢ်တဖၣ်သးခုလၢသုးမုၢ်ဒိၣ်ထီၣ်မၤန့ၢ်ပယီၤသုးကလၢၤဒီးဒ်သိးခါဆူညါသုးမုၢ်ဒိၣ်တၢ်ဖံးတၢ်မၤလၢတၢ်မၤလီၤပှီၢ်သုးမီၤစိရိၤကန့ၢ်အဂီၢ်မ့ၢ်ဝဲဒၣ်တၢ်ဟ့ၣ်ဂံၢ်ဟ့ၣ်ဘါတခါအဂ့ၢ် သ့ၣ်ဘီဘိလီၢ်ကဝီၤဖိတဂၤစံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ခီဖျိလၢသ့ၣ်ဘီဘိသုးကလၢၤသ့ၣ်တဖၣ်တအိၣ်လၢၤဘၣ်အဃိန့ၣ်ပှၤကမျၢၢ်လၢအိၣ်သ့ၣ်ဘီဘိသ့ၣ်တဖၣ်အဝဲသ့ၣ်သူၣ်ခုသးခုဝဲဒၣ်န့ၣ်လီၤ.အဝဲသ့ၣ်အဲၣ်ပှၤဝဲပှၤသုးဖိသ့ၣ်တဖၣ်အံၤအဃိန့ၣ် အဝဲသ့ၣ်မၤဝဲတၢ်မၤလၤကပီၤဒ်အံၤန့ၣ်လီၤ.ဒ်ပှၤသုးဖိမၤနၢၤသုးမီၤစိရိၤခဲအံၤအသိးခါဆူမဲၥ်ညါဒ်သိးပှၤသုးဖိသ့ၣ်တဖၣ် အသးသဟီၣ်ကဆူၣ်ထီၣ်လၢတၢ်မၤလီၤပှီၢ်သုးမီၤစိရိၤသ့ၣ်တဖၣ်အံၤကန့ၢ်အဂီၢ် ပဝဲဒၣ်ကညီဖိသ့ၣ်တဖၣ်မ့ၢ်ပဟ့ၣ်ဂံၢ်ဟ့ၣ်ဘါအဝဲသ့ၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါလၢတၢ်မၤလၤကပီၤသိၣ်ဒူတၢ်ရဲၣ်တၢ်ကျဲၤဘျီဝဲအံၤန့ၣ် သ့ၣ်ဘီဘိလီၢ်ကဝီၤ သးစၢ်မုၣ်,ခွါ ဒူဖိသဝီဖိသ့ၣ်တဖၣ်တီခိၣ်ရိၣ်မဲမၤဝဲဒီး KNLAတီခိၣ်ရိၣ်မဲသုးပၥ်ဖှိၣ်လၢအထီၣ်န့ၢ်သ့ၣ်ဘီဘိပယီၤသုးကလၢၤသ့ၣ်တဖၣ် ဒိးန့ၢ်ဘၣ်ဝဲတၢ်လၤကပီၤလၢကမျၢၢ်အိၣ်အဂ့ၢ် အဝဲတဲအါထီၣ်ဝဲဒၣ်စ့ၢ်ကီးန့ၣ်လီၤ.
သ့ၣ်ဘီဘိပယီၤသုးကလၢၤလၢပှၤနီၣ်ဂံၢ်အိၣ်(၁၀၀)ဘျဲၣ်ဃၣ်ဃၣ်အံၤ ဖဲအပူၤကွံၥ်လါယူၤ (၃)သီအနံၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် KNLA တီခိၣ်ရိၣ်မဲသုးပၥ်ဖှိၣ်သ့ၣ်တဖၣ်ထီၣ်ဒုးန့ၢ်ကွံၥ်ဝဲဒီးဖဲတၢ်ဒုးဘျီဝဲန့ၣ် သုးကီၣ်ကးအပှၤသံ(၃၀)ဘျဲၣ်ဒီးယူၥ်ထီၣ်နီၣ်တယၢ်ဝါပၥ်လီၤတၢ်စုကဝဲၤလၢ KNLAသုးပၥ်ဖှိၣ်အအိၣ် အိၣ်ဝဲ(၇၀)ဘျဲၣ်အဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိးလီၤ ခီဖျိလၢသ့ၣ်ဘီဘိပယီၤသုးကလၢၤတၢ်ထီၣ်န့ၢ်ကွံၥ်အီၤလံအဃိ ဖဲတနံၤဂီၤခီအဆၢကတီၢ်န့ၣ် တၢ်ဒုးကဲထီၣ်အခါကမျၢၢ်လၢဘၣ်ဃ့ၢ်အိၣ်လၢကီၢ်ကၠီၣ်တဲၣ်သ့ၣ်တဖၣ် တၢ်က့ၤဆှၢက့ၤအဝဲသ့ၣ်လံအဂ့ၢ်သ့ၣ်ညါဘၣ်စ့ၢ်ကီးလၢသ့ၣ်ဘီဘိပှၤလီၢ်ကဝီၤဖိအအိၣ်န့ၣ်လီၤ