လါယူၤ ၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် မဲၢ်ကနးကရူၢ်အပူၤ ဖဲမဟါဂီၤခီအဆၢကတီၢ် န့ၣ် သ၀ီဖိပိၥ်မုၣ်တဂၤယီၢ်ဘၣ်၀ဲ(တိုက်မိုင်း)မ့ၣ်ပိၢ်အဃိ အစုဘၣ်ဒိ၀ဲတကပၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
ဖဲမဟါလါယူၤ ၄ သီ ဂီၤခီ ၆း၁၀ မံးနံးအဆၢကတီၢ်န့ၣ် ဖါပီၢ်သ၀ီဖိပိၥ်မုၣ် နီၢ်အဲၣ်(၃၀)နံၣ်တဂၤအံၤ ဖဲအ၀ဲလဲၤဃုထၢအီၣ် ကုၤတလးအီဒံၣ် လၢမဲၢ်ကနးခံသ၀ီပှၢ်ပူၤအခါ ထွဲဘၣ်၀ဲဟီၣ်လၥ်မ့ၣ်ပိၢ်(တိုက်မိုင်း) လၢဟီၣ်က၀ီၤ(KNLA) ဒိးလီၤ၀ဲအံၤအဃိ အစုဘိဖိတဖၣ်တဲၥ်ကွဲၥ်၀ဲဒီးအခီၣ်ကံၣ်ဒုၣ်ညၣ်တဖၣ်ဘၣ်ဒိ၀ဲဘၣ်ထံးကဲထီၣ်သး ဒ်အံၤလီၤအဂ့ၢ်န့ၣ် ကမျၢၢ်တဖၣ် စံး၀ဲန့ၣ်လီၤ.
ဟီၣ်က၀ီၤတၢ်လီၢ်လၢတၢ်ကဲထီၣ်သးခဲအံၤန့ၣ် မ့ၢ်၀ဲကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၁)ဟီၣ်က၀ီၤအသိး တၢ်လီၢ်ဖဲန့ၣ်ပယီၤသုးဟဲထီၣ်တဘျီလၢ်လၢ်အခါသူ၀ဲကျဲအံၤအဃိဘၣ်တၢ်ဒိးလီၤဃၥ်၀ဲမ့ၣ်ပိၢ်ဒီး တၢ်လီၢ်၀ဲန့ၣ်တၢ်ပံးဃၥ်၀ဲ လၢကမျၢၢ်တဘၣ်လဲၤဘၣ်အိၣ်၀ဲအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဂၤ စံး၀ဲန့ၣ်လီၤ.
အ၀ဲစံး၀ဲလၢ “ပှၤသ၀ီဖိတဲ၀ဲလၢဘၣ်လၢအလဲၤဃုအီၣ်ကုၤတလးအီဒံၣ်မီၤနီၤ. ပှၤတဲအီၤလၢမ့ၣ်ပိၢ်အိၣ်လဲၤတဂ့ၤ. လၢမဟိတနံၣ် နါက့ပှၤသ၀ီဖိန့ၣ်ပှၤတဲအီၤလၢမ့ၣ်ပိၢ်အိၣ်,လဲၤတဂ့ၤန့ၣ်အ၀ဲသ့ၣ်တကနၣ်၀ဲဘၣ်လဲၤ၀ဲလီၤ.ပအဲၣ်ဒိးတဲပှၤကမျၢၢ်တဖၣ်လၢဟီၣ်က၀ီၤပှၤဘၣ်မူဘၣ်ဒါမ့တဲန့ၣ်ကနၣ်အကလုၢ်,တဘၣ်လဲၤဖဲသးက့ၤဖဲသးတဂ့ၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤကမျၢၢ်လၢအဘၣ်ဒီးဟီၣ်လၥ်မ့ၣ်ပိၢ်(တိုက်မိုင်း)တဂၤအံၤ တၢ်လဲၤဆှၢကူစါယါဘျါအီၤဆူဖၣ်အၣ်တၢ်ဆါဟံၣ် သးသမူတၢ်ဘၣ်ယိၣ်တအိၣ်၀ဲဘၣ်အဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤ.
တၢ်လီၢ်လၢတၢ်ကဲထီၣ်သးခဲအံၤန့ၣ်အပူၤကွံၥ်ခီဖျိကမျၢၢ်တဖၣ်တလူၤပိၥ်မၤထွဲ၀ဲတၢ်ကလုၢ်ဘၣ်အဃိ ပှၤကမျၢၢ် ဘၣ်ဒိတ့ၢ် ဃၥ်အိၣ်၀ဲအသိးလၢကမျၢၢ်ကလ့ၢ်ထီၣ်လ့ၢ်လိၤအဂီၢ်တၢ်အိးထီၣ်ဃၥ်ကျဲအိၣ်၀ဲအဂ့ၢ်န့ၣ် သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စ့ၢ်ကီးစံး၀ဲ န့ၣ်လီၤ.
“တၢ်လီၢ်၀ဲန့ၣ်အလဲၢ်,ဒုၣ်ဒါဟဲထီၣ်သုကတန့ၢ်တဂ့ၤအဂီၢ်ပဘၣ်ပံးကျဲ,ပဘၣ်ဒိးလီၤဃၥ်မ့ၣ်ပိၢ်လီၤ.ပဒိးလီၤဃၥ်န့ၣ်ပတဲပှၤကမျၢၢ်မူၤနီၢ်လီၤတဒ်သိးပယီၤဘၣ်.ကျဲ၀ဲန့ၣ်လဲၤတဂ့ၤ,တၢ်လီၢ်၀ဲန့ၣ်လဲၤတဂ့ၤပပံးဃၥ်အီၤအိၣ်မီၤနီၤ.မ့၀ံၤပတပံးခဲလၢၥ်ဘၣ်ကျဲစ့ၢ်ကီးလၢကလ့ၢ်ထီၣ်လ့ၢ်လိၤအဂီၢ်ပပျဲဟိအီၤအိၣ်တဘိခံဘိညါ.တၢ်လီၢ်တခါန့ၣ်အပူၤကွံၥ်ခီဖျိပှၤတကနၣ်တၢ်ဘၣ်အဃိပှၤဘၣ်တဘျုးဂၤလံ.တၢ်ကဲထီၣ်သးလံအဃိမၤတဘၣ်ဘၣ်.”အဂ့ၢ်န့ၣ် စံး၀ဲန့ၣ် လီၤ.
ဒ်န့ၣ်အသိးဘၣ်ဃးကမျၢၢ်ယီၢ်ဘၣ်မ့ၣ်ပိၢ်ကဲထီၣ်ဘျီ၀ဲအံၤစ့ၢ်ကီး တၢ်တီၣ်ထီၣ်ပၥ်ဖျါစံး၀ဲလၢခ့ၣ်အဲၣ်ယူၣ်လီၢ်က၀ီၤပှၤဘၣ်မူဘၣ်ဒါ လဲၤဃ့အီၤမ့ၣ်ပိၢ်အပှ့ၤလၢစ့ပယီၤအကလီၢ်တဆံ(၁,၀၀၀,၀၀၀)အိၣ်၀ဲဒီးဘၣ်ဆၣ်ဘၣ်ဃးတၢ်ဂ့ၢ်အံၤလ့ၤတက့ၤတသ့ၣ်ညါထွဲတၢ်ဂ့ၢ်နီတမံၤဘၣ်အဂ့ၢ်န့ၣ် သုးက့ခိၣ်စံးအါထီၣ်၀ဲန့ၣ်လီၤ.
လၢတၢ်န့ၣ်အဃိဘၣ်ဃးတၢ်ဂ့ၢ်အံၤအဖီခိၣ်ဒ်သိးကသ့ၣ်ညါဘၣ်တၢ်လီၤတံၢ်လီၤဆဲးအဂီၢ် လီၢ်က၀ီၤပှၤဘၣ်မူဘၣ်ဒါလဲၤထံၣ်လိၥ် သံဒိးသံကွၢ်၀ဲကမျၢၢ်လၢအဘၣ်ဒီးမ့ၣ်ပိၢ်တဂၤအံၤအဘူးအတံၢ်သ့ၣ်တဖၣ်၀ံၤ အ၀ဲသ့ၣ်တကပၤစံး၀ဲလၢပှၤဟဲဃ့စ့တအိၣ်နီတဂၤ ဘၣ်အဂ့ၢ်န့ၣ် ခ့ၣ်အဲၣ်ယူၣ် ပှၤဘၣ်မူဘၣ်ဒါစံး၀ဲန့ၣ်လီၤ.
ဖၣ်အၣ်ကီၢ်ဆၣ် ၀ဲပၠၣ်ကရူၢ်ပူၤ သုးဟံန့ၢ်တၢ်စိတၢ်ကမီၤ၀ံၤလီၢ်ခံ ပယီၤသုးကလၢၤလၢအိၣ်ကမၤမိၢ်၀့ၢ်ပူၤအံၤတဖၣ် ခးစိဃီၤ၀ဲ ကျိဖးဒိၣ်အိၣ်၀ဲတလီၢ်လီၢ်ဒီး ဒ်န့ၣ်အသိးဖဲအပူၤကွံၥ်တနံၣ်အံၤလါဖ့ၤဘူၤအါရံၤဒီးလါမးရှး အခါစ့ၢ်ကီး ခီဖျိလၢကမၤမိၢ်အပယီၤ သုး အကျိဖးဒိၣ်ဒီးကဘီယူၤလဲၤတ့ၢ်လီၤမ့ၣ်ပိၢ်အဃိ ကမျၢၢ်ဟံၣ်,သီခါဖၠၣ် တၢ်သူၣ်ထီၣ်ဟးဂီၤ၀ဲအါအါဂီၢ်ဂီၢ် ဒီး ဖါပီၢ်သ၀ီဃုၥ်ဒီး ဒူသ၀ီလၢ အဂၤ(၁၁)ဖျၢၣ် ကမျၢၢ်(၇၀၀၀)ဘျဲၣ် ဘၣ်ဃ့ၢ်ထီၣ် ဒံး၀ဲန့ၣ်လီၤ.
