လါအီကူး ၁၀ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် ဖွ့ဖူကၢ်ကရူၢ်အပူၤ ဖဲမဟါလါအီကူး ၉ သီ ဂီၤခီ ၉း၃၀ ဃၣ်ဃၣ် အဆၢကတီၢ် တၢ်ဒုးကဲထီၣ်တအိၣ်ပယီၤသုးအ(YAK-130)ကဘီယူၤလဲၤတ့ၢ်လီၤဝဲမ့ၣ်ပိၢ်တဖျၢၣ်လၢ ပနွဲၢ်လူၢ်သဝီပူၤအဃိ ကမျၢၢ်သံ ၁ ဂၤ, ဘၣ်ဒိ ၅ ဂၤ အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ကမျၢၢ်လၢအသံတဂၤန့ၣ်မ့ၢ်ဝဲ အူကၠီၤသ့(၆၂)နံၣ်ဒီး ပှၤလၢအဘၣ်ဒိ(၅)ဂၤန့ၣ်မ့ၢ်ဝဲ အီၤဖၠိဝ့(၃၈)နံၣ်, ဖၠိကၠံ(၂၃)နံၣ်, အီၤစိမိ(၂၅)နံၣ်, ကိၤကၠ့(၂၇)နံၣ် ဒီး ကိၤဖါကၠံ(၂၄)နံၣ် သ့ၣ်တဖၣ်အံၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
တကးဒံးဘၣ်ကဘီယူၤဟဲခးလီၤတၢ်ဘျီဝဲအံၤ ဘၣ်ဟးဂီၤဝဲကမျၢၢ်ဟံၣ် ၅ ဖျၢၣ်, သိလ့ၣ် ၃ ခိၣ်, စဲးကၢး ၃ ခိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤ သုးက့ ၁ သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံးဝဲလၢ “တၢ်လီၢ်တဖၣ်န့ၣ်ဘူးဒီးသ့ၣ်စ့ၣ်ယးဝ့ၢ်, ကၠဲးထိၣ်ဝ့ၢ်အဃိအဝဲသ့ၣ်ဟဲတ့ၢ်လီၤမ့ၣ်ပိၢ်,ခးစိကျိဖးဒိၣ်မၢ်မၢ်လီၤ.ဖဲကဘီယူၤဟဲခးလီၤတၢ်ဝံၤန့ၣ် အမျိၥ်သုးခးလီၤထွဲဒံးကျိးဖးဒိၣ် ဒံးလီၤ.ဘၣ်ဆၣ်လီၤလၢသဝီကတီၢ်.တၢ်လီၢ်ဖဲန့ၣ်ပပှၤအိၣ်ဘၣ်ဆၣ်တအိၣ်လၢသဝီပူၤဘၣ်, အိၣ်လၢတၢ်ချၢလီၤ” အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးတနံၤဃီတၢ်ကဲထီၣ်သးဝံၤဖဲဂီၤခီ ၁၀း၃၅ တုၤ ၁၀း၄၈ မံးနံးအဆၢကတီၢ်န့ၣ် လၢဝ့ၢ်တကူၣ်-မီၣ်လမၠဲၣ်ကျဲ ကၠဲးထိၣ်-ဘံလ့ အဘၢၣ်စၢၤ အံလူၢ်ကရူၢ်အပူၤ ပယီၤသုးသိလ့ၣ်(၅)ခိၣ်လၢအိၣ်ဟဲထီၣ်လၢကၠဲးထိၣ်တကပၤ သိလ့ၣ်ပူၤလၢအတီၣ်ပၣ်ဃုၥ်ဝဲ ကျိချံပှၥ်သၣ်,တၢ်အီၣ်တၢ်အီဒီးသုးဂံၢ်ဘါပှဲၤပှဲၤအံၤ ဟီၣ်ကဝီၤ(KNLA)သုးရ့ၣ်-၃ သုး, PDF သုးပၥ်ဖှိၣ်သ့ၣ်တဖၣ်ခိးခးဝဲဒၣ် လၢကျဲန့ၣ်လီၤ.
လၢတၢ်ခိးခးပယီၤသုးသိလ့ၣ်ဘျီဝဲအ့ၤန့ၣ်သိလ့ၣ်(၅)ခိၣ်အကျါသိလ့ၣ်တခိၣ်လၢအတီၣ်သုးဂံၢ်ဘါအံၤ တၢ်ခးစိဝဲလၢ(၄၀ မမ) ကျိဖးဒိၣ်ဃုၥ်ဒီးကျိဖိသ့ၣ်တဖၣ်အဃိ သိလ့ၣ်အံၤဟးဂီၤဝဲဒီးပယီၤသုးလၢအိၣ်သိလ့ၣ်ပူၤတဖၣ်သံဘၣ်ဒိဘၣ်ထံးတစှၤန့ၢ် (၁၀)ဂၤ အဂ့ၢ်န့ၣ် (KNLA)ပှၤဘၣ်မူဘၣ်ဒါတဂၤစံးဝဲန့ၣ်လီၤ.
အဝဲစံးဝဲလၢ“ဒုၣ်ဒါတၢ်သံတၢ်ဘၣ်ဒိဘၣ်ထံးခီန့ၣ်တဲလီၤတံၢ်တဘၣ်ဒံးဘၣ်.တနီၤန့ၣ်ပှၤတဲလၢအသံ(၆)ဂၤ,အဘၣ်ဒိန့ၣ်(၉)ဂၤ. တနီၤခီန့ၣ်တဲဝဲလၢအသံ(၈)ဂၤဒ်န့ၣ်.အဃိဒ်သိးကသ့ၣ်ညါဘၣ်လီၤတံၢ်လီၤဆဲးအဂီၢ်ခဲအံၤပမၤလီၢ်တံၢ်လီၤအဖၢမုၢ်လီၤ”အဂ့ၢ်န့ၣ် စံးဝဲန့ၣ်လီၤ.
(သုးက့ ၁)ကၠဲးထိၣ်,ဘံလ့,သထူၣ်ကီၢ်ဆၣ်ပူၤ ကျဲမုၢ်လၢအိၣ်ဝ့ၢ်တကူၣ်-မီၣ်လမၠဲၣ်ကျဲအံၤ လၢတၢ်ဆှၢထီၣ်သုးဂံၢ်ဘါမ့ၢ်ဂ့ၤ, တၢ်အီၣ် တၢ်အီ,ကျိချံပှၥ်သၣ်မ့ၢ်ဂ့ၤန့ၣ်သုးမီၤစိရိၤအပှၤတဖၣ်သူဝဲကျဲအံၤဒီး ဒ်န့ၣ်အသိးဟီၣ်ကဝီၤ(KNLA) သုးရ့ၣ်-၂, သုးရ့ၣ်-၃, ကညီဒီကလုၥ် ဂၢၤသးကရၢ(KNDO)သုးရ့ၣ်-၂ ဒီး(PDF)သုးပၥ်ဖှိၣ်ကရူၢ်သ့ၣ်တဖၣ်ခိးထုး,ခိးခးအဝဲသ့ၣ်ကဲထီၣ်အိၣ်ဝဲတလီၢ်လီၢ် အဂ့ၢ်န့ၣ် သ့ၣ်ညါဘၣ်န့ၣ်လီၤ.