လါနိၣ်ဝ့ဘၢၣ် ၉ သီ, ၂၀၂၆ နံၣ်, ခ့ၣ်အဲးစံၣ်
ကညီကီၢ်စဲၣ် ဖၣ်အၣ်ကီၢ်ဆၣ်အပူၤ ခီဖျိလၢ ရ့ၣ်နီၣ်သိတဖၣ် တအိၣ်အါအါဘၣ်ဒီး အၦ့ၤထီၣ်အဃိ ပှၤလီၢ်ကဝီၤဖိလၢ အသူၣ်ဘုတဖၣ် ဖဲအဝဲသ့ၣ် တၢ်မၤထံထီၣ်ထံလီၤလၢ ဘုတၢ်ဖံးတၢ်မၤပူၤအခါ ထံၣ်ဘၣ်ဝဲဒီး တၢ်ကီတၢ်ခဲတဖၣ်အဃိ တၢ်သူၣ်တၢ်ဖျးတၢ်မၤအဂီၢ် ကီခဲထီၣ်ဝဲအဂ့ၢ် သ့ၣ်ညါဘၣ်လၢ ပှၤလီၢ်ကဝီၤဖိတဖၣ်အအိၣ်န့ၣ်လီၤ.
ခဲအံၤဖၣ်အၣ်ကီၢ်ဆၣ်အပူၤ ရ့ၣ်နီၣ်သိတၢ်ဆါလီၢ်တဖၣ် ဆါဝဲလၢတၢ်ပာ်ပနီၣ်အမဲာ်ညါ ပှၤလီၢ်ကဝီၤဖိတဖၣ် လိၣ်ဘၣ်အါထဲလဲၣ်န့ၣ် ပှ့ၤန့ၢ်ဝဲတသ့ဘၣ်ဒီး မ့ၢ်ပှ့ၤလၢ ပှၤဆါကဒါက့ၤတၢ်ဖိတဖၣ်အအိၣ်န့ၣ် ဘၣ်ဟ့ၣ်အဘူးအလဲအါအဃိ ပှၤလီၢ်ကဝီၤဖိတဖၣ်အဂီၢ် တၢ်သူၣ်တၢ်ဖျးအတၢ်သူစ့တဖၣ် အါထီၣ်ဝဲအဂ့ၢ် သ့ၣ်ညါဘၣ်န့ၣ်လီၤ.
ၦၤမၤစံၥ်တဖၣ်အံၤ လၢကသူၣ်ဘုအဂီၢ် ဘၣ်သူဝဲစဲးဖီကဟၣ်တဖၣ် လၢကထဲၣ်ထီၣ်ဟီၣ်ခိၣ် ဒီး ဖဲသူၣ်ဘုဝံၤအလီၢ်ခံ လၢကမၤထံထီၣ်ထံလီၤလၢ ဘုတၢ်ဖံးတၢ်မၤအဂီၢ်န့ၣ်လီၤ. အဃိ အဝဲသ့ၣ်လိၣ်ဘၣ်ဝဲ သိဒွဲၣ်ဒီး ဒံၢ်စဲသိ ဘၣ်ဆၣ် ခဲအံၤ ခီဖျိလၢ သိဒွဲၣ် တအိၣ်အါအါဘၣ်ဒီး အၦ့ၤထီၣ်အဃိ ထံၣ်ဘၣ်ဝဲတၢ်ကီတၢ်ခဲတဖၣ်အဂ့ၢ် ပှၤသူၣ်ဘုဖိတဂၤ လၢဖၣ်အၣ်ကီၢ်ဆၣ်အပူၤ စံးဝဲန့ၣ်လီၤ.
အဝဲစံးဝဲလၢ “တၢ်မၤန့ၢ်ဘုလၢထံ အဂီၢ် တၢ်ထဲတၢ်ဒီး တၢ်ထူစံၥ်ထူၦဲၤအဂီၢ် သိဒွဲၣ်ဒီး ဒံၢ်စဲသိ တဖၣ် ပှၤဘၣ်ပှ့ၤအီၤလၢဖၠါသူဒီး အဘူးအလဲအါအဃိ တၢ်အၦ့ၤလၢၥ်ဝဲဒၣ်အါမးလီၤ. ပှၤလဲၤပှ့ၤလၢ သိကျးဖးဒိၣ်တဖၣ် တသ့ဘၣ်. QR Code အိၣ်မး ပှ့ၤသ့လီၤ. သိလ့ၣ်ယီၢ်လၢ အအိၣ်ဒီး လံာ်တၢ်ပျဲစ့ၢ်ကီး ပှၤမ့ၢ်အဲၣ်ဒိးပှ့ၤသနၥ်က့ တပှ့ၤဘၣ်စ့ၢ်ကီးဘၣ်. သိကျးဖးဒိၣ်တဖၣ်န့ၣ် ဘၣ်ဟ့ၣ်ပှ့ၤအီၤလၢ တၢ်ပာ်ပနီၣ်အိၣ်ဝဲလီၤ. ကိးနံၤဒဲးစ့ၢ်ကီး တအိးထီၣ်ဝဲဘၣ်” အဂ့ၢ်စံးဘၣ် KIC န့ၣ်လီၤ.
ခဲအံၤ လၢဝ့ၢ်ပူၤ သိကျးဖးဒိၣ်တဖၣ်အပူၤ တပှ့ၤဘၣ်အါအါဂီၢ်ဂီၢ် ဖဲ အဝဲသ့ၣ်အဲၣ်ဒိးဝဲ ဒ်လၢညါအသိးလၢၤဘၣ်. လံာ်တၢ်ပျဲ ဒီး QR Code အိၣ်မး ပှၤပှ့ၤသ့ဝဲအဃိ တၢ်ပှ့ၤသိအနီၣ်ဂံၢ်စ့ၢ်ကီး ဘၣ်တၢ်ပာ်ပနီၣ်ဃာ်ဝဲန့ၣ်လီၤ.
လၢန့ၣ်အမဲာ်ညါ သိဒွဲၣ်ကျးတဖၣ် တအိးထီၣ်ဝဲကိးနံၤဒဲးဘၣ်အဃိ လီၢ်ကဝီၤပှၤသူၣ်အီၣ်ဖျးအီၣ်တဖၣ် ဘၣ်ပှ့ၤသိလၢ ပှၤဆါကဒါက့ၤသိတဖၣ်အအိၣ် လၢအဘူးအလဲအပှ့ၤထီၣ်အဖီခိၣ်န့ၣ်လီၤ. ခဲအံၤ လၢဝ့ၢ်ပူၤ သိဒွဲၣ်တလံးထၢၣ်န့ၣ် အပှ့ၤအိၣ်ဝဲ ၈,၀၀၀ ကၠး တုၤ ၈,၅၀၀ ကၠး ဒီး ဒံၢ်စဲသိ တကါလၣ်န့ၣ် အပှ့ၤအိၣ်ဝဲ တုၤလၢ ၃၀,၀၀၀ ကၠး လီၤအဂ့ၢ် လီၢ်ကဝီၤဖိတဖၣ်အအိၣ် သ့ၣ်ညါဘၣ်ဝဲန့ၣ်လီၤ.
ကီၢ်ပယီၤအပူၤ ပှၤသူၣ်အီၣ်စံာ်တဖၣ် သူၣ်ဝဲဘုသၢကတီၢ် လၢအမ့ၢ် တၢ်စူၤခါဘု တၢ်ဂိၢ်ခါဘုဒီး တၢ်ကိၢ်ခါဘုန့ၣ်လီၤ. ဖဲတၢ်သူၣ်တၢ်ဂိၢ်ခါဘု ဒီး တၢ်ကိၢ်ခါဘုအခါန့ၣ် ပှၤမၤအီၣ်စံာ်တဖၣ် ဘၣ်သူဝဲ စဲးဖီကဟၣ်တဖၣ် ဒ်သိးကထုးထီၣ်ထံလၢ ထံပူၤ ဒီး ထံကမါတဖၣ်အပူၤ ဝံၤပျၢ်လီၤက့ၤထံလၢ စံာ်ပူၤအဂီၢ်န့ၣ်လီၤ.
စဲးဖီကဟၣ်တဖၣ် ကလဲၤတရံးအသးအဂီၢ် ခဲအံၤ သိဒွဲၣ်တဖၣ် တအိၣ်အါအါဘၣ် ဒီး အပှ့ၤထီၣ်ဝဲအဃိ ပှၤသူၣ်အီၣ်စံာ်တဖၣ် ထံၣ်ဘၣ်တၢ်ကီတၢ်ခဲ လၢကမၤဝံၤ တၢ်သွီလီၤထံ ဒီး တၢ်ထုးထီၣ်ထံလၢ စံာ်ပူၤအတၢ်ဖံးတၢ်မၤတဖၣ် လၢအကတီၢ်ဘၣ်ဘၣ်အဂီၢ်န့ၣ်လီၤ.
လၢန့ၣ်အမဲာ်ညါ တၢ်ကိၢ်ထီၣ်အဃိ ထံပူၤဒီး ထံကမါတဖၣ်အပူၤ တၢ်ယီၤဃ့ဝဲအမဲာ်ညါ လၢသဝီတဖၣ်အပူၤ သးစၢ်အါဂၤ လဲၤဆူ ထံဂၤကီၢ်ဂၤ ဒ်သိးကဃုမၤတၢ်အဂီၢ် အါထီၣ်ဝဲအဃိ ပှၤသူၣ်အီၣ်စံာ်တဖၣ် ကွၢ်ဆၢၣ်မဲၥ်ဘၣ်စ့ၢ်ကီး ပှၤမၤတၢ်ဖိတဖၣ် တအိၣ်အါအါလၢၤဘၣ်အဂ့ၢ် စံးဝဲန့ၣ်လီၤ.
ဘုတၢ်သူၣ်တၢ်ဖျးအဂီၢ် ကိးဃုဝဲ ပှၤမၤတၢ်ဖိလၢ အငါအီၤတဖၣ်အခါ တသီအဂီၢ် အဘူးအလဲ ကဘၣ်ဟ့ၣ်ဝဲ စ့ ၂၅,၀၀၀ တုၤ ၃၀,၀၀၀ ကၠး သနာ်က့ တမၤန့ၢ်ဘၣ် ပှၤမၤတၢ်ဖိညီညီဘၣ်အဂ့ၢ် ပှၤသူၣ်ဘုဖိလၢလီၢ်ကဝီၤဖဲန့ၣ်တဖၣ် ပာ်ဖျါထီၣ်ဝဲန့ၣ်လီၤ.
ဖၣ်အၣ်ကီၢ်ဆၣ်အပူၤ ပှၤသူၣ်ဘုတဖၣ် တၢ်သူၣ်ဘုတၢ်မၤအံၤ ဒ်သိးဒီးကအိၣ်မူအိၣ်ဂဲၤအဂီၢ်လီၤ. ပှၤတနီၤန့ၣ် သူၣ်ဘုဒ်တၢ်ဖံးတၢ်မၤတခါအသိး ဒ်သိးကမၤန့ၢ်စ့အါအဂီၢ် ဘၣ်ဆၣ် ပှၤအါတက့ၢ်န့ၣ် သူၣ်ဘုလၢ ကမၤလၢပှဲၤဟံၣ်ဖိဃီဖိတဖၣ် အတၢ်အီၣ်တၢ်အီဒီး တၢ်အိၣ်မူအဂီၢ်န့ၣ်လီၤ.
တၢ်ဂိၢ်ခါဘုအံၤ စးထီၣ်သူဝဲဖဲ လါအီးကထိဘၢၣ်န့ၣ်လီၤ. ဖဲသူၣ်ဘုဝံၤ ၆၀ သီအတီၢ်ပူၤန့ၣ် ကဘၣ်မၤဝဲ တၢ်ထုးထီၣ်ထံဒီးတၢ်ထၢနုၥ်လီၤထံ တၢ်မၤတဖၣ် ဘၣ်ဆၣ် ခီဖျိလၢ သိဒွဲၣ်တအိၣ်အါအါဘၣ် အဃိ ဒီး တၢ်ကီတၢ်ခဲအဂၤတဖၣ်အဃိ ဘုသၣ်တဖၣ် ဘၣ်ဒိဘၣ်ထံးဒီး ဟးဂီၤ အိၣ်ထီၣ်စ့ၢ်ကီးဝဲအဂ့ၢ် သ့ၣ်ညါဘၣ်န့ၣ်လီၤ.
တၢ်ဂိၢ်ခါဘုအံၤ တၢ်ကူးတၢ်စူၤခါဘုဝံၤအလီၢ်ခံ ဖဲလါအီးထိဘၢၣ်ဒီး လါနိၣ်ဝ့ဘၢၣ်တဖၣ်အခါ စးထီၣ်သူၣ်ဝဲညီနုၢ်ဒီး ဖဲလါဖ့ၤဘြူၤအါရံၤဒီး လါမၢ်ရှးတဖၣ်အခါ ကူးဝဲညီနုၢ်အဂ့ၢ် သ့ၣ်ညါဘၣ်န့ၣ်လီၤ.
