လါအီကူး ၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တီအူကီၢ်ရ့ၣ်(သုးက့ ၂)ဒီၣ်ဖးခိၣ်ကီၢ်ဆၣ် ဒီၣ်ဖးခိၣ်ဝ့ၢ်ကဝီၤဒ့,ဒူသဝီတနီၤအပူၤ ခီဖျိတၢ်စူၤ ထံကစၢၢ်လီၤဟီၣ်ခိၣ်လၥ်အံၤအဃိ တုၤလၢတနံၤအံၤလါအီကူး ၆ သီ ဂီၤခီန့ၣ် ကမျၢၢ်သံအိၣ်(၈)ဂၤလံဒီး ဖဲန့ၣ်အကျါ ပၣ်ဃုၥ် ဝဲဟံၣ် ဖိဃီဖိ(၄)ဂၤတဒူၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢအိၣ်ဖဲန့ၣ်တဖၣ် စံးဝဲန့ၣ်လီၤ.
ဒီၣ်ဖးခိၣ်ကီၢ်ဆၣ်ပူၤစးထီၣ်ဖဲအပူၤကွံၥ်နွံအခါန့ၣ်တုၤလၢခဲအံၤတၢ်စူၤကိးမုၢ်နံၤဒဲးထံကစၢၢ်လီၤထံဒိၣ်ထီၣ်တကးဒံးဘၣ် ကၢၢ်လၥ်ဟီၣ်ခိၣ်လၥ်အံၤအဃိ ဖဲမဟါမုၢ်နၤခီအဆၢကတီၢ်န့ၣ် ကဝီၤဒ့-၁ ဟံၣ်ဖိဃီဖိဒီဖိမိၢ်ဒီဖိပၢ်(၄)ဂၤအံၤဘၣ်သံကွံၥ်ဝဲ တကးဒံးဘၣ်အမဲၥ်ညါလၢကဝီၤဒ့-၃ ဒီး သီၣ်ယ့ၤခၣ်(သောက်ရေခပ်)သဝီတကပၤန့ၣ်စ့ၢ်ကီးကမျၢၢ်သံဝဲ(၄)ဂၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢအိၣ်ဖဲန့ၣ်တဂၤ စံးဝဲန့ၣ်လီၤ.
အဝဲစံးဝဲလၢ“တဂီၤညါအံၤတၢ်စူၤဒိၣ်ဟီၣ်ခိၣ်လၥ်အဃိဖိသၣ်ဒီပုၢ်ဝဲၢ်(၂)ဂၤဃုၥ်ဒီးအမိအပါစူၥ်ကွံၥ်သးပှၤထံၣ်က့ၤဖဲတဂီၤညါအံၤလီၤ.လၢမဟါတနံၤန့ၣ်နါက့ပှၤသံအိၣ်(၃)ဂၤ,(၄)ဂၤလံ.ကမျၢၢ်တဖၣ်ဘၣ်ကွၢ်ဆၢၣ်မဲၥ်တၢ်ဖၣ်အံၤအဃိပဆၢမုၢ်လၢ်လၢပှၤကဆီၣ်ထွဲမၤစၢၤပှၤမီၤနီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဟံၣ်ဖိဃီဖိတဒူၣ်လၢအသံအံၤန့ၣ် ဖိသၣ်အမိဒီးအပါန့ၣ်အသးနံၣ်ကအိၣ်ဝဲ (၃၀)ဘျဲၣ် မ့မ့ၢ်အဖိပိၥ်မုၣ် တဂၤန့ၣ်အသးနံၣ်အိၣ် (၉)နံၣ်, အပိၥ်ခွါတဂၤန့ၣ်အိၣ်(၄)နံၣ်န့ၣ်လီၤ.
တကးဒံးဘၣ်တကီၢ်ခါတုၤလၢခဲအံၤတၢ်စူၤကၢၢ်လၥ်ထံကစၢၢ်လီၤဒံးအဃိ ကမျၢၢ်လီၤမၢ်အိၣ်ဒံးဝဲ(၂)ဂၤတၢ်ဃုဝဲတဘၣ်ဒံးဘၣ် အဂ့ၢ်န့ၣ် လီၢ်ကဝီၤကမျၢၢ်တဂၤဃီဝဲန့ၣ်စံးဝဲန့ၣ်လီၤ.
သၣ်တီၣ်ကၠံကီၢ်ဆၣ်ပူၤ အပူၤကွံၥ်နံၣ်တၢ်စူၤဖးဒိၣ်အိၣ်ဘၣ်ဆၣ် ကၢၢ်လၥ်,တၢ်သံတၢ်ပှၢ်,တၢ်လီၤမၢ်,တၢ်ဟးဂူၥ်ဟးဂီၤ ကဲထီၣ် ဒ်သိးခဲအံၤအံၤတအိၣ်တ့ၢ်နီတဘျီဒံးဘၣ် အဂ့ၢ်န့ၣ် လီၢ်ကဝီၤကမျၢၢ် စံးဝဲအသိးသ့ၣ်ညါဘၣ်န့ၣ်လီၤ.
တကတီၢ်ဃီတနံၣ်အံၤတၢ်စူၤခါအတီၢ်ပူၤတၢ်သံတၢ်ပှၢ်,တၢ်လီၤမၢ်တကးဒံးဘၣ် တိၤ,ဟံၣ်ဃီ,ကျီးပူၤတၢ်ထူၣ်တၢ်ဘိစ့ၢ်ကီး ဟးဂီၤဝဲအါမးဘၣ်ဆၣ်မၤလီၤတံၢ်စရီတန့ၢ်ဒံးဘၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
စးထီၣ်ဖဲအပူၤကွံၥ်လါယူၤလံအသီ ၂၀ ဃၣ်ဃၣ်အခါန့ၣ် ခ့ၣ်အဲၣ်ယူၣ်တၢ်ပၢကီၢ်ရ့ၣ်/သုးက့ဟီၣ်ကဝီၤ ဝ့ၢ်,ဒူသဝီ, ကဝီၤဒ့ လၢအိၣ်ဘူးထံကျိဖးဒိၣ်,ထံကျိဖိတၢ်လီၢ်လီၤဖုၣ်သ့ၣ်တဖၣ် တၢ်စူၤထံဒိၣ်ထီၣ်ဝဲလၢတၢ်လီၢ်သကုၤဆးဒးဒီး ဖဲန့ၣ်ကမျၢၢ်သံ ,ဘၣ်ဒိဘၣ်ထံး,ဟံၣ်လီၤဘျၢ,ဘုသံတၢ်ဟးဂူၥ် ဟးဂီၤကဲထီၣ် အိၣ်ဝဲဒၣ်အါမးန့ၣ်လီၤ.