လါအီကူး ၆ သီ, ၂၀၂၅ နံၣ်, ခ့ၣ်အဲးစံၣ်
ဖဲတနံၤအံၤလါအီကူး ၆ သီ ဂီၤခီ ၁၀း၃၀ ဃၣ်ဃၣ်အဆၢကတီၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ် (သုးက့ ၆) ကီးတရံးကီၢ်ဆၣ် ထံညၣ်လံၣ်သဝီလၢအိၣ်ဂီၤလ့ၤသုးကလၢၤအံၤ ပယီၤသုးကဘီယူၤခံဘ့ၣ်လဲၤခးလီၤတၢ်(၂)ဘျီ တ့ၢ်လီၤဝဲမ့ၣ်ပိၢ်တစှၤန့ၢ်(၁၆)ဖျၢၣ်အဂ့ၢ်န့ၣ် ဂံၢ်ခီၣ်ထံးတၢ်ကစီၣ်ထံးဝဲအသိးသ့ၣ်ညါဘၣ်န့ၣ်လီၤ.
တနံၤဃီကဘီယူၤလဲၤခးလီၤတၢ်ဝံၤ ဖဲမုၢ်ဃ့ၢ်လီၤ ၁း၀၀ နၣ်ရံၣ်ဘျဲၣ်အဆၢကတီၢ်န့ၣ်စ့ၢ်ကီး ပယီၤသုးကဘီယူၤ လဲၤတ့ၢ်လီၤဝဲ တၢ်ဘိၣ်ကအိၣ်လၢ(၁၅)ဘိၣ်ဃၣ်ဃၣ်ညါဒီး တၢ်ဘိၣ်သ့ၣ်တဖၣ်အံၤတၢ်တယးကွၢ်ဝဲလၢကမ့ၢ်တၢ်အီၣ်တၢ်အီဒီး ကျိချံပှၥ်သၣ် အဘိၣ်သ့ၣ်တဖၣ်အဂ့ၢ်န့ၣ် တၢ်ပၢၢ်ဆၢကရူၢ်လၢအိၣ်တၢ်မဲၥ်ညါတဂၤ စံးဝဲန့ၣ်လီၤ.
အဝဲစံးဝဲလၢ“ကဘီယူၤစးထီၣ်ခးလီၤတၢ်ဖဲမဂီၤ ၁၀း၂၉ မံးနံးန့ၣ် ခံဘျီ, ကဘီယူၤတဘ့ၣ်န့ၣ်ခးလီၤတၢ်ခံဘျီ. အလီၤတဲၥ်လၢ ထံညၣ်လံၣ်တကပၤန့ၣ်လီၤ. မ့ဝံၤဖဲ ၁း၀၀ နၣ်ရံၣ်ဘျဲၣ်န့ၣ်ကဘီယူၤဟဲတ့ၢ်လီၤတၢ်ဘိၣ်လၢဂီၤလ့ၤသုးကလၢၤပူၤ. ကအိၣ်လၢ(၁၆)ဘိၣ်လၢန့ၣ်ညါ.အလီၤတဲၥ်ဘူးတလၢဒီးသုးကလၢၤအဃိ မ့ၢ်ပှၤလဲၤဟံန့ၢ်ဧါတန့ၢ်ဧါတသ့ၣ်ညါဒံးဘၣ်. ဘၣ်ဒီပှၤလဲၤ တန့ၢ်ဒံးဘၣ်,အဝဲသ့ၣ်စ့ၢ်ကီးတန့ၢ်ဝဲဒၣ်စ့ၢ်ဘၣ်.”အဂ့ၢ်န့ၣ် စံးဘၣ်ခ့ၣ်အဲး စံၣ်- ကညီတၢ်ကစီၣ်န့ၣ်လီၤ.
ဂီၤလ့ၤဒုးယၤသုးကလၢၤအံၤစးထီၣ်ဖဲဟီၣ်ကဝီၤ(KNLA)သုးပၥ်ဖှိၣ်ထီၣ်ခးဝဲတုၤလၢခဲအံၤန့ၣ်တၢ်ဒုးကဲထီၣ်ဝဲကိးမုၢ်နံၤဒဲးဃၣ်ဃၣ် အသိးပယီၤသုးလၢအိၣ်သုးကလၢၤပူၤအံၤသ့ၣ်တဖၣ်စ့ၢ်ကီးဟးထီၣ်တၢ်ချၢတန့ၢ်ဘၣ်အဃိ တၢ်ဒုးတၢ်ယၤဒီတကတီၢ် အပူၤ လၢကဘီယူၤအံၤတဆီသုးမီၤစိရိၤလဲၤတ့ၢ်လီၤန့ၢ်အပှၤကျိချံပှၥ်သၣ်ဒီးတၢ်အီၣ်တၢ်အီဘိၣ်သ့ၣ်တဖၣ်ကအိၣ်တစှၤန့ၢ်အဘျီ(၁၀)လံအဂ့ၢ်န့ၣ် လီၢ်ကဝီၤပှၤဘမူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
တကးဒံးဘၣ်တဘျီလၢ်လၢ်ဖဲသုးမီၤစိရိၤကဘီယူၤလဲၤတ့ၢ်လီၤန့ၢ်အပှၤတၢ်ဘိၣ်အခါန့ၣ် တလီၤတဲၥ်လၢသုးကလၢၤပူၤ ခဲလၢၥ်ဘၣ် မ့မ့ၢ်တခီလီၤတဲၥ်လၢသုးကလၢၤချၢအိၣ်ဝဲအဃိ တၢ်ပၢၢ်ဆၢသုးပၥ်ဖှိၣ်ကရူၢ်တကပၤမၤန့ၢ်ဝဲတၢ်ဘိၣ်လၢအပူၤပၣ်ဃုၥ်ဝဲကျိချံပှၥ် သၣ်အံၤ အိၣ်လံဝဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါညါဟီၣ်ကဝီၤဖဲန့ၣ်အပူၤ လီၢ်ခံအံၤကဘီယူၤစ့ၢ်ကီးတသီခံသီတဘျီလဲၤဆှၣ်တ့ၢ်လီၤဝဲပိၢ်တလီၢ်လီၢ်ဒီး ဒ်န့ၣ်အသိးဖဲအပူၤကွံၥ်လါအီကူး ၃ သီနံၤန့ၣ်စ့ၢ်ကီး သုးမီၤစိရိၤလဲၤတ့ၢ်လီၤဒံးဝဲဒြိမ့ၣ်ပိၢ်လၢတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီ ဒ်သုးမုၢ်ဒိၣ်(DKBA) သုးဂ့ၢ်ဝီခိၣ် သုးခိၣ်ကျၢၢ်ဖိ စီၤစ့ၤဝ့ အဟံၣ် ဒီးဖဲန့ၣ်အဟံၣ်လီၤပှီၢ်ဟးဂီၤကွံၥ်ဝဲဒိၣ်ဒိၣ်မုၢ်မုၢ်ကဲထီၣ်ဒံးဝဲန့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ်ဂီၤလ့ၤဒုးယၤသုးကလၢၤလၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၣ်အံၤ ပယီၤသုးနီၣ်ဂံၢ်ပၥ်ဖှိၣ်ခဲလၢၥ်ကအိၣ်ဝဲအဂၤ(၂၀၀)ဘျဲၣ်ဒီး တကီၢ်ခါခဲအံၤပယီၤသုးကလၢၤလၢအိၣ်ဟီၣ်ကဝီၤဖဲန့ၣ်အပူၤတဖၣ် ခီဖျိတၢ်ပၢၢ်ဆၢသုးပၥ်ဖှိၣ်ကရူၢ်ထီၣ်န့ၢ်ဝဲဒၣ်လၢၥ်လံအဃိခဲအံၤအိၣ်တ့ၢ်က့ၤထဲဒုးယၤသုးကလၢၤတဖျၢၣ်ဧိၤအံၤန့ၣ်လီၤ.
