လါအီကူး ၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ် ဒူသဝီကမျၢၢ်လၢပယီၤသုးဖီၣ်တ့ၢ်ဃၥ် ဝဲန့ၢ်လၢတနွံဃၣ်ဃၣ်အံၤတဖၣ်တုၤလၢခဲအံၤတၢ်တပျၢ်လီၤဝဲဒံးဘၣ်အဂ့ၢ်န့ၣ် ကီၢ်ရ့ၣ်နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဖဲအပူၤကွံၥ်လါအီကူး ၃၀ သီအနံၤန့ၣ် သုးမီၤစိရိၤအနီၣ်ဂံၢ်(၉)သုးလၢအိၣ်ဆီလီၤသးဖဲအလၣ်တယၣ်(အလံတစ်ရာ) တဖၣ်အံၤ နုၥ်လီၤဖီၣ်ဝဲမိကီကရူၢ် (ပုတိန်ရိုး)သ၀ီဖိပိၥ်ခွါ(၈)ဂၤလၢသဝီပူၤဝံၤက့ၤကိးဝဲဆူတၢ်ထၢဖှိၣ်သုးသီ တၢ်လီၢ် ဝဲၤဒၢးန့ၣ်လီၤ.
(ပုတိန်ရိုး)သဝီဖိ ၈ ဂၤလၢပယီၤသုးဖီၣ်က့ၤကိးဝဲသ့ၣ်တဖၣ်အံၤမ့ၢ်ဝဲ အီၤမၠဲၤ(၄၄)နံၣ်,မ့အီၤ(၄၀)နံၣ်,ဘိၤစီ(၃၈)နံၣ်,အီၤအီၤ(၃၇)နံၣ်, ယၤနဲၤ(၃၇)နံၣ်, န့ၤနဲၤ(၃၀)နံၣ်, ကွံၤကွံၤ(၁၉)နံၣ် ဒီး ဖိသါ(၂၀)နံၣ် သ့ၣ်တဖၣ်အံၤန့ၣ်လီၤ.ဒ်န့ၣ်အသိးခဲအံၤသဝီဖိလၢတၢ်ဖီၣ် က့ၤကိးဝဲတဖၣ် တၢ်ဆၢကတီၢ်န့ၢ်လၢတနွံလံဘၣ်ဆၣ်တၢ်ဆဲးကျိးတန့ၢ်ဒီးအဟံၣ်ဖိဃီဖိဘၣ်ဒီး တၢ်တပျၢ်လီၤဝဲဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်တၢ်တနံၤဃီဝဲန့ၣ်စ့ၢ်ကီး စွ့ၣ်ယီၣ်ပၠးကရူၢ် လါအီၣ်ဃၢၤသဝီဖိ စီၤသဲၣ်စှ့ၤ(၅၀)နံၣ်ဒီး ကၠးတရီသဝီဖိ စီၤကါနံၤ(၂၈)နံၣ် ၂ ဂၤအံၤ ပယီၤသုးဖီၣ်အီၤလၢကျဲကဲထီၣ်ဒံးဝဲဒီး ဘၣ်ဆၣ်သဝီဖိ(၂)ဂၤအံၤအကျါ မ့မ့ၢ်လၢစီၤသဲၣ်စှ့ၤအံၤခီန့ၣ် မ့ၢ်လၢအသးပှၢ် တစဲးအဃိတၢ်ဘၣ်လဲၤရ့ထီၣ်အီၤလၢစ့ပယီၤ အကလီၢ်(၃၀)ကၠးအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ဘၣ်ဃးပယီၤသုးနုၥ်လီၤဖီၣ်ကမျၢၢ်လၢ(ပုတိန်ရိုး)သဝီဒီးဖီၣ်ဝဲစွ့ၣ်ယီၣ်ပၠးကမျၢၢ်တၢ်ဂ့ၢ်အံၤန့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံးဝဲလၢ“သုးကီၣ်ကး နီၣ်ဂံၢ်(၉)သုးန့ၣ်နုၥ်လီၤဝဲလၢ(ပုတိန်ရိုး)သ၀ီပူၤဘျီဖီၣ်ဝဲသဝီဖိ ၈ ဂၤ. မ့မ့ၢ် လၢစွ့ၣ်ယီၣ်ပၠးကရူၢ်ပူၤ လါအီၣ်ဃၢၤသ၀ီဖိဒီးကၠးတရီ သဝီဖိ ခံဂၤအံၤခီန့ၣ်ဒိးထီၣ်စဲးကၢး ကလဲၤပှ့ၤအီၣ်လၢဝ့ၢ်ပူၤမီၤနီၤ. အဝဲလဲၤ န့ၣ်ဘၣ်လၢပယီၤသုးဟဲက့ၤထီၣ်ဖဲကါကျဲမုၢ်ခိၣ်ဘျီပယီၤသုးဖီၣ်ဃုၥ်ဝဲဒ်န့ၣ်.မ့မ့ၢ်လၢလါအီၣ်ဃၢၤသဝီဖိတဂၤန့ၣ်အသးနံၣ်(၅၀)အဃိပှၤလဲၤဃ့ရ့ထီၣ်အီၤ.ပယီၤမၢဟဲရ့ထီၣ်အကလီၢ်(၃၀)မီၤ.မ့မ့ၢ်ပှၤသးနံၣ်စၢ်တဖၣ်န့ၣ်ပှၤလဲၤဃ့ရ့ထီၣ်နါက့တန့ၢ်နီတဂၤဘၣ်.လၢ(ပုတိန်ရိုး)သဝီဖိတဖၣ်စ့ၢ်ကီးတုၤခဲအံၤတပျၢၢ်လီၤဝဲဒံးဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါအနံၤန့ၣ်လီၤ.
ဒ်လီၢ်ကဝီၤကမျၢၢ်စံးဝဲအသိးန့ၣ်တချုးတၢ်ဖီၣ်ကမျၢၢ်ကဲထီၣ်ဒံးဘၣ်ဖဲအပူၤကွံၥ်လါယူၤလံ ၂၆ သီ အနံၤခိၣ်ဃၢၤန့ၣ် ပယီၤသုး အ (ဗျူစောထီး)လၢအိၣ်(ပုတိန်ရိုး) ၂ ဂၤအံၤဖဲအဟဲထီၣ်လၢကျဲပူၤအခါတၢ်ပၢၢ်ဆၢသုးကရူၢ် ခးသံကွံၥ်ဝဲကဲထီၣ်န့ၣ်လီၤ.
လၢတၢ်ခးသံအဝဲသ့ၣ်ပှၤကဲထီၣ်ဒ်အံၤအဃိ ပယီၤသုးတကပၤသးတမံဝဲဘၣ်ဒီးဖဲန့ၣ်ဝံၤနုၥ်လီၤဖီၣ်ဝဲသဝီပူၤကမျၢၢ်ကအိၣ်လၢအဂၤ (၄၀) ဃၣ်ဃၣ်ညါဒီးဒ်န့ၣ်အသိး ပှၤသ့ၣ်တဖၣ်အံၤဘၣ်တၢ်ဆှၢအဝဲဆူမီၣ်လမၠဲၣ်တကပၤအဂ့ၢ်န့ၣ် လီၢ်ကဝီၤကမျၢၢ်လၢအိၣ်ဘူး ဖဲန့ၣ် တဂၤ စံးစ့ၢ်ကီးဝဲဒ်အံၤန့ၣ်လီၤ.
“ပနၢ်ဟူပှၤတဲလၢပှၤခးသံပယီၤအပှၤ(ဗျူစောထီး)အသံခံဂၤ.ကဘၣ်မ့ၢ်အဝဲသ့ၣ်ဟးဃ့အီၣ်တၢ်အဃိပှၤကခးအီၤလီၤဧါသၢၣ်.လၢခံအဝဲသ့ၣ်သးတမံ,သးန့ထီၣ်တၢ်အဃိဟဲဖီၣ်ဝဲပှၤသဝီဖိန့ၣ်.ဟဲဖီၣ်ဝဲပှၤသးပှၢ်,ပှၤဖိသၣ်ခဲလၢၥ်န့ၣ်အဂၤ(၄၀).လၢပှၤသးစၢ်တဖၣ်န့ၣ်ဆှၢဝဲလၢမီၣ်လမၠဲၣ်.မ့မ့ၢ်ပှၤသးပှၢ်တဖၣ်န့ၣ်မၢပှၤက့ၤရ့ထီၣ်တဂၤန့ၣ်အကလီၢ်(၃၀).ပှၤသ့ၣ်တဖၣ်အံၤတပျၢၢ်လီၤက့ၤဝဲနီတဂၤဒံးဘၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
လၢန့ၣ်အမဲၥ်ညါပယီၤသုးဖီၣ်ကမျၢၢ်ဒ်အံၤတမ့ၢ်အကဲထီၣ်သးခဲအံၤဘၣ်ဒီးမ့မ့ၢ်တခီစးထီၣ်လၢအဝဲသ့ၣ်ဒုးအိၣ်ထီၣ်တၢ်သိၣ်တၢ်သီဝံၤန့ၣ် ဖီၣ်ဆူၣ်ကမျၢၢ်လၢကကဲသုးအဂီၢ်အိၣ်ဝဲအါမးလံအသိး အတၢ်ဖီၣ်ကမျၢၢ်ဘျီဝဲအံၤစ့ၢ်ကီးလၢကဒုးကဲဆူၣ်ဝဲသုးအဂီၢ်လီၤ အဂ့ၢ်န့ၣ် ပဒိၣ်စီၤအ့နဲၤစံးအါထီၣ်ဝဲန့ၣ်လီၤ.
“မ့မ့ၢ်သုးမီၤစိရိၤတဖုအံၤဒုဖီၣ်ကမျၢၢ်ထံဖိကီၢ်ဖိဝံၤမၢအတၢ်ကဲသုးလီၤ.အပူၤကွံၥ်အဝဲသ့ၣ်ထုးထီၣ်ဝဲလၢတၢ်ကဘၣ်ကဲသုးတၢ်သိၣ်တၢ်သီဘျီပှၤလၢအကဲသုးတမုၥ်ဘၣ်တဖၣ်န့ၣ်အဝဲသ့ၣ်ဖီၣ်န့ၢ်ဆူၣ်ဝဲလီၤ.လၢတၢ်ဖီၣ်ဆူၣ်ကမျၢၢ်ထံဖိကီၢ်ဖိလၢအတၢ်ကဲသုးအဂီၢ်အံၤ မ့ၢ်တၢ်လုၢ်သ့ၣ်ခါပတၥ်ဝဲကမျၢၢ်ထံဖိကီၢ်ဖိအခွဲးအယၥ်လီၤ”အဂ့ၢ်န့ၣ် စံးဝဲန့ၣ်လီၤ.
တကီၢ်ခါခဲအံၤသထူၣ်ဝ့ၢ်ကျဲမုၢ်ဒီကကျိၤခီဖျိပယီၤသုးဖီၣ်တၢ်အိၣ်ထီၣ်အါအါဂီၢ်ဂီၢ်ဒ်အံၤအဖီခိၣ် ဝ့ၢ်ခိၣ်ဝ့ၢ်ဃၢၤဒူသဝီဃုၥ်ဒီး ကမျၢၢ်သူၣ်ဘီၣ်သးစၢ်လၢအိၣ်ခိခိၣ်ဒူသဝီပူၤတဖၣ်လဲၤလီၤလၢဝ့ၢ်ပူၤဟးထီၣ်လၢကျဲမုၢ်ခိၣ်တဘူၣ်လၢၤဘၣ်, ဘၣ်အိၣ်လၢ တၢ်ပလီၢ်ပဒီပူၤအဂ့ၢ်န့ၣ် လီၢ်ကဝီၤကမျၢၢ်လၢအိၣ်ဖဲန့ၣ်တဖၣ်စံးဝဲအသိးသ့ၣ်ညါဘၣ်န့ၣ်လီၤ.
(ပုတိန်ရိုး)သဝီလၢပယီၤသုးနုၥ်လီၤဖီၣ်ကမျၢၢ်ခဲအံၤန့ၣ် အိၣ်ဝဲဒၣ်လၢကျဲမုၢ်လါခိၣ်ဒီး ပှၤအိၣ်ဆိးလၢသဝီအံၤအပူၤတဖၣ် အါဒၣ်တက့ၢ်န့ၣ်မ့ၢ်ဝဲ ကညီကလုၥ်,တီသူကလုၥ်ဒီးပယီၤကလုၥ်အိၣ်ဘၣ်ဆၣ်အနီၣ်ဂံၢ်အိၣ်ဝဲစှၤအဂ့ၢ်န့ၣ် သ့ၣ်ညါဘၣ်လၢ လီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.