လါအီကူး ၃ သီ, ၂၀၂၅ နံၣ်, ခ့ၣ်အဲးစံၣ်
တၢ်သဘံၣ်သဘုၣ်တၢ်ခးလိၥ်သးလၢအဟဲကဲထီၣ်လၢမုၢ်တြီၢ်ကီၢ်ရ့ၣ်(သုးက့ ၅) ဘုသိၣ်ကီၢ်ဆၣ်ပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အပှၤဒီး ကညီသုးခိး ကီၢ်ဆၢ(BGF)အဘၢၣ်စၢၤအံၤ ဒ်သိးသုတဆဲးကဲထီၣ်လၢၤ တဂ့ၤအဂီၢ် ကဘှါဆှဲသကိးအီၤလၢစီၤနီၢ်ခိၣ်အဂ့ၢ်န့ၣ် သုးခိၣ်ကျၢၢ်ဖိ စီၤတ့ၤဝ့ ဃ့ကညးဝဲန့ၣ်လီၤ.
ဖဲမဟါလါအီကူး ၂ သီ ဟါခီ ၃း၃၀ ဃၣ်ဃၣ်အဆၢကတီၢ်န့ၣ် (BGF) ၁၀၁၃ သုးရ့ၣ် သုးရ့ၣ်ခိၣ် သုးခိၣ်စီၤလၣ်ကၠဲၤအပှၤ လၢအိၣ်ဆီလီၤသး ဖဲဝါဒူသဝီအံၤတဖၣ် ဟီၣ်ကဝီၤ(KNLA) သုးရ့ၣ်(၁၀၂) သုးဒ့-၃ လဲၤခးစဲးပြဲးဝဲတဘျီအဂ့ၢ်န့ၣ် (BGF)ပှၤဘၣ် မူဘၣ်ဒါတကပၤစံးဝဲန့ၣ်လီၤ.
တကးဒံးဘၣ်မၤကဒီးဖဲတနံၤအံၤလါအီးကူး ၃ သီ ဂီၤခီ ၇း၃၀ အဆၢကတီၢ်န့ၣ် သုးဒ့-၃ အပှၤ လဲၤခးကဒီးဝဲ(BGF)လၢအိၣ် တဃ့ၣ်ခိၣ်သဝီအံၤတဘျီအဂ့ၢ်န့ၣ် စံးဝဲန့ၣ်လီၤ.
အဃိဘၣ်ဃးတၢ်ဂ့ၢ်လၢအဟဲကဲသးခဲအံၤတဖၣ်ခါဆူမဲၥ်သုတအိၣ်ထီၣ်လၢၤတဂ့ၤအဂီၢ်န့ၣ် ကဘှါဆှဲဃုသကိးအစၢလၢစီၤနီၢ်ခိၣ် အဂ့ၢ်န့ၣ် (BGF)သုးဟီၣ်ကဝီၤ-၂ အခိၣ်သုးခိၣ်ကျၢၢ်ဖိ စီၤတ့ၤဝ့ ဃ့ကညးစံးဝဲဒ်အံၤန့ၣ်လီၤ.
“ဖဲမဟါန့ၣ်ပှၤသုးက့(၅)အပှၤ ဟဲခးပပှၤဖဲတဃ့ၣ်ခိၣ်န့ၣ်တဘျီ.ဖဲတဂီၤအံၤန့ၣ်ဟဲခးကဒီးဝဲဖဲဝါဒူန့ၣ်တဘျီ.တမံၤဂ့ၤတမၠိဂ့ၤ တၢ်ဂ့ၢ်ကီမ့အိၣ်ထီၣ်န့ၣ်ပတဲဃၥ်အိၣ်လၢကအိၣ်သကိးလီၤသးလၢစီၤနီၢ်ခိၣ်န့ၣ်.မ့ၢ်မတဂၤကမၣ်လဲၣ်,မ့ၢ်မတဂၤဘၣ်လဲၣ်မီၤနီၤ. ပပှၤမ့ကဘၣ်န့ၣ်ပကဘှီက့ၤ,အ၀ဲသ့ၣ်ပှၤမ့ကမၣ်ဒီးဘှီ.ပကဘၣ်မၤဒ်န့ၣ်.တဘၣ်မ့ၢ်လၢတခါခါဒီးခးဒ်န့ၣ်ဘၣ်.ပှၤကညီဖိကဒဲကဒဲ ခးလိၥ်သးဒ်အံၤကလဲၤန့ၢ်ထံန့ၢ်ကီၢ်ဒ်လဲၣ်ခးလီၤသးတဘၢးဘၢးအံၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ
ဒ် BGF ပှၤဘၣ်မူဘၣ်ဒါစံးဝဲအသိးန့ၣ် BGF သုးလၢအိၣ်ဆီလီၤသးဖဲတၢ်လီၢ်ခံတီၤအံၤတဖၣ် အပူၤကွံၥ်အိၣ်ဝဲလၢ ကတၢတံၥ် သုးကလၢၤတကပၤဒီး အပူၤကွံၥ်ပယီၤသုးလၢအိၣ်ဆီလီၤသးဖဲန့ၣ်တဖၣ်(KNLA)လဲၤထီၣ်ခးဝဲအဃိ အဝဲသ့ၣ်ဘၣ်ပျဲက့ၤအလီၢ် ဟးထီၣ်ကွံၥ်က့ၤအိၣ်ဆီလီၤက့ၤသးဖဲတၢ်လီၢ်အံၤလီၤအဂ့ၢ်န့ၣ် သုးခိၣ်ကျၢၢ်ဖိ စီၤတ့ၤဝ့ စံးအါထီၣ်ဝဲန့ၣ်လီၤ.
ဘၣ်ဃးခံခီခံကပၤတၢ်ကဲထီၣ်သးတၢ်ဂ့ၢ်ဘျီဝဲအံၤန့ၣ် သုးက့(၅)သုးက့ခိၣ် သုးခိၣ်ကျၢၢ်ဖိ စီၤဂံၢ်နွံ စံးဝဲ“တၢ်လီၢ်ဖဲန့ၣ်အိၣ်ဝဲပပှၤ သုးရ့ၣ်(၁၀၂) သုးဒ့-၃ လီၤ. အဝဲန့ၣ်အိၣ်ခံခူၣ်လိၥ်သးဒီးပယီၤတပူၤဃီ,တိထီၣ်စၢၤဝဲကယီ ကယီဒ်န့ၣ်လီၤ. ဒ်သိးတၢ်အီၣ်တၢ်အီ နါက့ဖဲအဟဲတ့ၢ်လီၤဝဲဖဲအပူၤကွံၥ်ကတၢၢ်တံၥ်တဘျီန့ၣ်စ့ၢ်ကီးဆှၢစၢၤန့ၢ်ဝဲလီၤ. တၢ်ဘံဘူကၠၢၤ သီဒ်အံၤအဃိအါစုအါဘျီကကဲ ထီၣ်ဝဲလီၤ.လၢအဂၤဒုတအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
(သုးက့ ၅)ဟီၣ်ကဝီၤပူၤအပူၤကွံၥ်တၢ်လဲၤဃုၥ်က့ၤဃုၥ်တၢ်အိၣ်ဒီးပယီၤသုးအိၣ်ဘၣ်ဆၣ် လီၤဆီဒၣ်တၢ်စးထီၣ်(၂၀၂၄) တၢ်ဆၢတဲၥ်အိၣ်ထီၣ်လၢတၢ်ကဆီတလဲ BGF ဆူ KNA အံၤန့ၣ် လ့ၤတက့ၤတၢ်ပၥ်ဖှိၣ်မၤသကိး တၢ်ဒီးပယီၤသုးတအိၣ်ဝဲ လၢၤဘၣ်အဂ့ၢ်န့ၣ် သုးခိၣ်ကျၢၢ်ဖိ စီၤတ့ၤဝ့ စံးဝဲန့ၣ်လီၤ.
ဒ်န့ၣ်အသိးကညီဖီၣ်စုကဝဲၤကဒဲကဒဲတၢ်ခးလိၥ်သးသုတအိၣ်ထီၣ်တဂ့ၤအဂီၢ်စ့ၢ်ကီး အပူၤကွံၥ်ခ့ၣ်အဲၣ်ယူၣ်ဒီး(BGF)ခိၣ်နၢ် အိၣ်သကိးဝဲလၢကမၤဃူမၤဖိးက့ၤတၢ်အဖီခိၣ် အလီၢ်အိၣ်လၢတၢ်ဖီလၥ်သုးဖိတဖၣ်ကဘၣ်လူပိၥ်မၤထွဲဝဲ အဂ့ၢ်န့ၣ် (BGF)ပှၤဘမူဘၣ်ဒါ စံးဝဲန့ၣ်လီၤ.
အဃိဘၣ်ဃးတၢ်ဂ့ၢ်လၢအကဲထီၣ်သးခဲအံၤတဖၣ် ဆၢမုၢ်လၢ်လၢကကတၢၢ်ကွံၥ်လၢအဆိအချ့အဂ့ၢ်န့ၣ် သုးခိၣ်စီၤတ့ၤဝ့ စံးအါထီၣ်ဝဲန့ၣ်လီၤ.
“လၢပအိၣ်တကပၤအံၤပတဲဃၥ်ပပှၤလၢကဒဲကဒဲန့ၣ်တဘၣ်ခးလိၥ်သးတဂ့ၤ.လၢန့ၣ်တကပၤခီမ့ၢ်အခိၣ်အနၢ်တဲအဝဲသ့ၣ်ဒ်လဲၣ်ပတဲတဘၣ်ဘၣ်.အဃိပအဲၣ်ဒိးတဲန့ၣ်ပကဘၣ်ထ့စၢၤလီၤသးကိးကပၤဒဲးလီၤ.ပမ့တထ့စၢၤလိၥ်သးမ့အိၣ်ထီၣ်တဘျီတစဲးတဘျီတစဲးဒ်အံၤယံၤထီၣ်န့ၣ်ပဘၣ်ယိၣ်လၢကတွံၢ်ရဲၤသးကထီတလၢမီၤနီၤ”အဂ့ၢ်န့ၣ် စံးဝဲန့ၣ်လီၤ.
(သုးက့ ၅)ဟီၣ်ကဝီၤအပူၤ စးထီၣ်လၢ ၂၀၂၁ သုးဟံန့ၢ်တၢ်စိတၢ်ကမီၤဝံၤလီၢ်ခံန့ၣ် ဒုးယၤတၢ်ဖ့ၣ်စၢကဲထီၣ်ဝဲဒိၣ်ဒိၣ်မုၢ်မုၢ်လၢ သုးမီၤစိရိၤဒီး ဟီၣ်ကဝီၤ(KNLA)အဘၢၣ်စၢၤတုၤလၢခဲအံၤကဲထီၣ်အဖၢမုၢ်ဒံးအသိး လၢတၢ်ဒုးတၢ်ယၤဒီတကတီၢ်အပူၤစ့ၢ်ကီး (BGF)အပှၤပၣ်ဃုၥ်ပၣ်ဂီၢ်ဝဲလၢပယီၤသုးအကျါ အိၣ်ဝဲအဂ့ၢ်န့ၣ် ခ့ၣ်အဲၣ်ယူၣ်လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
တကီၢ်ခါခဲအံၤပယီၤသုးကလၢၤလၢအိၣ်ဟီၣ်ကဝီၤပူၤဖဲန့ၣ်သ့ၣ်တဖၣ်အါဒၣ်တက့ၢ်န့ၣ် တၢ်ပၢၢ်ဆၢသုးကရူၢ်ထီၣ်ဒုးဖျိးကွံၥ်ဝဲလံ ဘၣ်ဆၣ်ဖဲအပူၤကွံၥ်စှၤလါအခါန့ၣ်သုးကလၢၤလၢ(သုးက့ ၅)အပှၤထီၣ်န့ၢ်ဝဲတဖၣ်အကျါစှၤဖျၢၣ်ပယီၤသုးက့ၤထီၣ် န့ၢ်ကဒါ ဝဲအိၣ်အဂ့ၢ်န့ၣ် ခိၣ်နၢ်တဖၣ်စံးဝဲအသိး သ့ၣ်ညါဘၣ်န့ၣ်လီၤ.
