လါအီးကထိဘၢၣ် ၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢ, ဘျံးဒဝဲၢ်ကီၢ်ရ့ၣ်, ထံမိၢ်ပှၢ်ဟီၣ်ကဝီၤပူၤ, ဖဲတနံၤအံၤစးထီၣ် ဂီၤခီ ၉ နၣ် ရံၣ်ဘျဲၣ်တုၤ ၁၀ နၣ်ရံၣ်ဘျဲၣ်လၢတနၣ်ရံၣ်အတီၢ်ပူၤန့ၣ် ပယီၤသုးမီၤစိရိၤ Y12 ကဘီယူၤဟဲတ့ၢ်လီၤမ့ၣ်ပိၢ် ဖဲထံခံသဝီ အပူၤအဖျၢၣ်ခဲလၢၥ် ၄၀ ဘျဲၣ်အဂ့ၢ်ဘျံးဒဝဲၢ်ကီၢ်ရ့ၣ်ခိၣ်နၢ်ပှၤဘၣ်မူဘၣ်ဒါစံး ဝဲန့ၣ်လီၤ.
ဖဲတနံၤအံၤလါအီးကထိဘၢၣ် ၈ သီအနံၤန့ၣ်ပယီၤသုးမီၤစိရိၤဟဲတ့ၢ်လီၤမ့ၣ်ပိၢ်ဒီး Y12 ကဘီယူၤဖဲ ထံမိၢ်ပှၢ်ဟီၣ်ကဝီၤ, ဖဲမဲၢ်သမံခံ (ကိး) ထံခံသဝီအပူၤအဘျီ ၁၀, တဘျီန့ၣ်တ့ၢ်လီၤဝဲ(၄)ဖျၢၣ်တုၤ(၅)ဖျၢၣ်ဒီးတ့ၢ်လီၤဝဲမ့ၢ်ပိၢ်ခဲလၢၥ်အဖျၢၣ် ၄၀ ဘျဲၣ်အဃိကမျၢၢ်ဟံၣ်ဃီအမဲၥ်ညါကမျၢၢ်တၢ်သူၣ်ထီၣ်စ့ၢ်ကီးဘၣ်ဟးဂီၤကွံၥ်အဂ့ၢ်ဘျံးဒဝဲၢ်ကီၢ်ရ့ၣ် နဲၣ်ရွဲၣ်ပဒိၣ်စီၤ အဲၣ်နၤစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“ကဘီယူၤန့ၣ်လၢယိၤနီၣ်ထိၣ်ဂီၤခီ ၉ နၣ်ရံၣ်ဘျဲၣ်န့ၣ်ဟဲတ့ၢ်လီၤဝဲမ့ၣ်ပိၢ်လီၤ. အဝဲသ့ၣ်ဟဲတ့ၢ်လီၤဝဲမ့ၣ်ပိၢ်အဘျီ ၁၀ န့ၣ်, တဘျီန့ၣ်ဟဲတ့ၢ်လီၤဝဲမ့ၣ်ပိၢ်ကအိၣ်ဝဲ ၄ ဖျၢၣ် ၅ ဖျၢၣ်အဃိမ့ၣ်ပိၢ်ကအိၣ်လၢအဖျၢၣ် ၄၀ တုၤ ၅၀ ခိၣ်ဃၢၤန့ၣ်လီၤ . အဝဲသ့ၣ်ဟဲတ့ၢ်လီၤဝဲတုၤလၢ ၁၀း၄၂ မံးနံးမးက့ၤကဒါဝဲလီၤ. တၢ်ဒုးတၢ်ယၤတအိၣ်ဘၣ်,ဒီးတၢ်တအိၣ်နီမံၤဘၣ်.” အ ဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါမဲၢ်သမံခံ (ကိး) ထံခံသဝီတၢ်လီၢ်လၢပယီၤသုးဟဲတ့ၢ်လီၤမ့ၣ်ပိၢ်ခဲအံၤန့ၣ်တမ့ၢ်ဟီၣ်ကဝီၤတၢ်လီၢ်လၢ တၢ်ဒုးတၢ်ယၤကဲထီၣ်သးအလီၢ်ဘၣ်အသိးတမ့ၢ်တၢ်ပၢၢ်ဆၢဖိအိၣ်ဆိးတၢ်အလီၢ်စ့ၢ်ကီးဘၣ်အဂ့ၢ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
လၢန့ၣ်အမဲၥ်ညါဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ်ပယီၤသုးကဘီယူၤဟဲတ့ၢ်လီၤတၢ်တဘျီအံၤအပူၤကမျၢၢ်တၢ်ဘၣ်ဒိဘၣ်ထံးတအိၣ်ဘၣ်ဘၣ်ဆၣ်မ့မ့ၢ်ကမျၢၢ်ဟံၣ်ဒီးတၢ်ဘူၣ်တၢ်ဘါတၢ်သူၣ်ထီၣ်ဘၣ်ဟးဂီၤကွံၥ်ဝဲန့ၣ်လီၤ. တကီၢ်ခါ ခဲအံၤပှၤသဝီဖိဖဲန့ၣ်သ့ၣ်တဖၣ်သုးကပၤကွံၥ်သးဆူတၢ်ပူၤဖျဲးအလီၢ်လၢကီၢ်ဆၢတၢ်လီၢ်တကပၤပှၤနီၣ်ဂံၢ်အိၣ်(၃၀၀), (၄၀၀) ဂၤအဂ့ၢ်ပဒိၣ်စီၤအဲၣ်နၤစံးအါထီၣ်ဝဲဒၣ်န့ၣ်လီၤ.
ဒ်န့ၣ်အသိးတနံၤဃီအတီၢ်ပူၤဘျံးဒဝဲၢ်ကီၢ်ရ့ၣ်,ဖဲကစၢၢ်ဒိၣ်ကီၢ်ဆၣ်,KNLAသုးရ့ၣ်(၁၂)တၢ်ပၢဟီၣ်ကဝီၤအပူၤပယီၤသုးကဘီယူၤလဲၤတ့ၢ်လီၤစ့ၢ်ကီးဝဲမ့ၣ်ပိၢ်ဆူထံဖးဒိၣ်သဝီပူၤဒီးတၢ်ဒုးစ့ၢ်ကီးကဲထီၣ်ဝဲဖဲထံဖးဒိၣ်သဝီပူၤအဃိတၢ်မၤလီၤတံၢ်ဝဲတၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤတန့ၢ်ဒံးဘၣ်အဂ့ၢ်ကစၢၢ်ဒိၣ်ကီၢ်ဆၣ်ပှၤဘၣ်မူဘၣ်ဒါစံးဝဲန့ၣ်လီၤ.
