လါစဲးပထ့ဘၢၣ် ၃၀, ၂၀၂၅နံၣ်,ခ့ၣ်အဲးစံၣ်.
ဒ်သိးကညီဖီၣ်ကစုကဝဲၤကရူၢ်လၢအလီၤဖးသ့ၣ်တဖၣ်ကအိၣ်က့ၤလၢတၢ်တီခိၣ်ရိၣ်မဲတခါဃီအဖီလၥ်အဂီၢ် စးထီၣ်တၢၣ်ပီၣ်တဲသကိးဝဲလၢကဒုးအိၣ်ထီၣ်ဝဲ(KNA-Karen National Association) ကညီဒီကလုၥ်ကရၢ အဂ့ၢ် သ့ၣ်ညါဘၣ်လၢ ကညီဖီၣ်စုကဝဲၤလီၤဖး(၃)ဖုအပှၤဘၣ်မူဘၣ်ဒါအအိၣ်န့ၣ်လီၤ.
ဖဲအပူၤကွံၥ်လါစဲးပထ့ဘၢၣ်(၂၈)သီအနံၤ ကညီဖီၣ်ကစုကဝဲၤလီၤဖး(၃)ဖုဒ်အမ့ၢ် ဒံၣ်မိၣ်ကရ့ၣ်စံၣ်တၢ်ဘၣ်ဘျုးကညီသုးမုၢ်ဒိၣ်(DKBA), ကညီတၢ်မုၥ်တၢ်ခုၣ်ကီၣ်ကးကရၢ(PC)ဒီးကညီကီၢ်စဲၣ်သုးခိးကီၢ်ဆၢ(BGF)သ့ၣ်တဖၣ် မၤဝဲတၢ်ထံၣ်လိၥ်အိၣ်ဖှိၣ်လၢ(BGF)သုးဟီၣ်ကဝီၤနီၣ်ဂံၢ်ခံဝဲၤလီၢ်ခိၣ်သ့ၣ် အဆၢကတီၢ်န့ၣ် ဒ်သိးကညီဖီၣ်စုကဝဲၤကရူၢ်လၢအလီၤဖးသ့ၣ်တဖၣ်အံၤကအိၣ်က့ၤလၢတၢ်တီခိၣ်ရိၣ်မဲတခါဃီအဖီလၥ်အဂီၢ် တၢၣ်ပီၣ်တဲသကိးဝဲလၢကကရၢကရိထီၣ်ဝဲ(KNA)အဂ့ၢ် DKBA သုးဂ့ၢ်ဝီခိၣ် သုးခိၣ်ကျၢၢ်ဖိစီၤစ့ၤဝ့စံးဘၣ်ဝဲ ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“(KNA)န့ၣ် မ့ၢ်ဝဲဒၣ်(Karen National Association)ကညီဒီကလုၥ်ကရၢန့ၣ်လီၤ.ပမုၢ်လၢ်ကွၢ်စိလၢ ကညီဖီၣ်စုကဝဲၤသ့ၣ်တဖၣ်အံၤမုၢ်တနံၤန့ၣ် ကက့ၤအိၣ်က့ၤလၢတၢ်တီခိၣ်ရိၣ်မဲတခါဃီအဖီလၥ်အဂီၢ်န့ၣ်လီၤ.ပမ့ၢ်ဘၣ်တဲန့ၣ် (DKBA),(PC),(BGF) သ့ၣ်တဖၣ်အံၤန့ၣ်မ့ၢ်ဝဲကညီဒီကလုၥ်ဖီၣ်စုကဝဲၤခဲလၢၥ်န့ၣ်လီၤ.Association ခီန့ၣ်မုၢ်တနံၤဒ်သိးကညီကက့ၤပၥ်ဖှိၣ်ထီၣ်သးတခါဃီ အကသ့အဂီၢ်န့ၣ် ပမုၢ်လၢ်ကွၢ်စိဒီးပစးထီၣ် ဃုကျဲတဘိဒီးပပၥ်လီၤအီၤဒ်အံၤန့ၣ်လီၤ.ကမ့ၢ်ဝဲ (DKBA-KNA),(BGF-KNA), (PC-KNA) န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ Association လၢတၢ်ကဒုးအိၣ်ထီၣ်အီၤခဲအံၤန့ၣ်အိၣ်ဒၣ်လၢတၢ်တၢၣ်ပီၣ်တဲသကိးတၢ်အပတီၢ်ဒီးဒ်သိးခါဆူညါကအိၣ်ဂၢၢ်ကျၢၤအဂီၢ် ကမၤဝဲတၢ်ထံၣ်လိၥ်သးဘူးဘူးတံၢ်တံၢ်ဝံၤကလဲၤက့ၤဝဲဒၣ်လၢတၢ်ပၥ်ဂၢၢ်ပၥ်ကျၢၤအပတီၢ်အဂ့ၢ် သုးခိၣ်ကျၢၢ်ဖိစီၤစ့ၤဝ့တဲအါထီၣ်ဝဲဒၣ်စ့ၢ်ကီးန့ၣ်လီၤ.
ဘၣ်ဃးဒီးတၢ်ကရၢကရိထီၣ်ဝဲ(KNA)အံၤန့ၣ် မ့ၢ်ဒၣ်ထဲကညီဖီၣ်စုကဝဲၤလၢလီၤဖး(၃)ဖုအတၢ်ပၥ်သးဒီးကရၢမိၢ်ပှၢ်(KNU)တၢ်ပၥ်သးတပၣ်ဃုၥ်ဘၣ်အဂ့ၢ်ကညီဖီၣ်စုကဝဲၤ(၃)ဖုအပှၤဘၣ်မူဘၣ်ဒါစံးဝဲဒၣ်အသိးသ့ၣ်ညါဘၣ်န့ၣ်လီၤ.
လါစဲးပထ့ဘၢၣ်(၂၈)သီတၢ်အိၣ်ဖှိၣ်ဘျီဝဲန့ၣ်အပူၤန့ၣ် တၢၣ်ပီၣ်တဲသကိးဝဲဒၣ် ခါလၢကဟဲလါဒံၣ်စဲဘၢၣ်အတီၢ်ပူၤပယီၤသုးကရူၢ်ကမၤဝဲတၢ်ဃုထၢတၢ်အိၣ်သး, တၢ်ကဒုးအိၣ်ထီၣ်(KNA),ဒီးလီၢ်ကဝီၤတၢ်မုၥ်တၢ်ခုၣ်ကအိၣ်အဂီၢ်ကဘၣ်ဃုသကိးကျဲဒ်လဲၣ်န့ၣ်တဲသကိးဝဲဒၣ်အဂ့ၢ် သုးခိၣ်ကျၢၢ်ဖိစီၤစ့ဝ့ စံးဝဲဒၣ်န့ၣ်လီၤ.
ကညီဖီၣ်စုဝဲၤလီၤဖး(၃)ဖုလၢကကရၢကရိထီၣ်(KNA)ခဲအံၤန့ၣ် ပှၤလၢကဟ့ၣ်တၢ်ဖးဖဲတၢ်ဃုထၢလၢပယီၤသုးကရူၢ်တီခိၣ်ရိၣ်မဲမၤဝဲသ့ၣ်တဖၣ် ကဒီသဒၢဝဲဒီးက ကဟုကယၥ်ဝဲဒၣ်အဂ့ၢ် ပၥ်ဖှိၣ်သးဒီးထုးထီၣ်ပၥ်ဖျါတ့ၢ်ဝဲအလံၥ်တၢ်ပၥ်သးဖဲအပူၤကွံၥ်လါစဲးပထ့ဘၢၣ်(၂၈)သီအနံၤအိၣ်ဝဲဒၣ်စ့ၢ်ကီးန့ၣ်လီၤ.