လါအီးကထိဘၢၣ် ၁သီ, ၂၀၂၅နံၣ်, ခ့ၣ်အဲးစံၣ်,
(၂၀၂၅)နံၣ်သုးကရူၢ်ကမၤဝဲတၢ်ဃုထၢအဖီခိၣ်,တၢ်ဃုထၢအံၤမ့ၢ်တၢ်လၢကဒုးအိၣ်ထီၣ်ဝဲတၢ်လဲလိၥ်အဃိထံၣ်ဃုၥ်ဝဲလၢမ့ၢ်တၢ်ဂ့ၤဒီးအိၣ်ပှိၤဝဲသုးကရူၢ်တၢ်ဃုထၢအံၤလီၤအဂ့ၢ်,ခ့ၣ်အဲၣ်ယူၣ်-ဒူပျၥ်ယၥ်ကီၢ်ရ့ၣ်ခိၣ်လီၢ်လံၤပဒိၣ်စီၤရွ့ၣ်မီၣ်စံးဝဲဒၣ်န့ၣ်လီၤ.
တၢ်ဃုထၢအံၤမ့ၢ်ဒၣ်လၢတၢ်ကဆီတလဲက့ၤတၢ်အဂီၢ်ဒီးမ့ၢ်တၢ်ဂ့ၤလၢထံကီၢ်အဂီၢ်အဃိ,ခါဆူညါထံရူၢ်ကီၢ်သဲးတၢ်ဖံးတၢ်မၤအဂီၢ်ထံၣ်ဃုၥ်ဝဲလၢကြၢးဝဲဘၣ်ဝဲလၢတၢ်ဘၣ်မၤဝဲအီၤအခီၣ်ထံးတပတီၢ်အဂ့ၢ်,ဒူပျၥ်ယၥ်ကီၢ်ရ့ၣ်ခိၣ်လီၢ်လံၤပဒိၣ်စီၤရွ့ၣ်မီစံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
“တၢ်ဃုထၢအိၣ်ထီၣ်က့ၤအံၤန့ၣ်,ဂ့ၤလၢပထံကီၢ်ဝဲအံၤအဂီၢ်လီၤ.ဘၣ်မနုၤဃိလဲၣ်န့ၣ်,တၢ်ဃုထၢမ့တအိၣ်န့ၣ်တၢ်လဲလိၥ်အိၣ်ထီၣ်တညီဘၣ်.တၢ်ခဲလၢၥ်န့ၣ်ကအိၣ်ဝဲထဲလၢပှၤတဂၤ,မ့တမ့ၢ်ပှၤတဖုအစုပူၤလၢၥ်လၢၥ်ဆ့လီၤ.တၢ်ဃုထၢမ့အိၣ်ခီန့ၣ်တၢ်ခဲလၢၥ်အိၣ်လၢပှၤတဂၤပှၤတဖုအစုပူၤတသ့လၢၤဘၣ်,တၢ်ကဘၣ်နီၤလီၤတၢ်စိကမီၤတဖၣ်လၢပှၤအါဂၤအစုပူၤလီၤ.အဃိန့ၣ်,တၢ်ဃုထၢအံၤမ့ၢ်ဒၣ်လၢတၢ်ဆီတလဲအဂီၢ်လီၤအဃိမ့ၢ်တၢ်အခီၣ်ထံးတခါလၢတၢ်ြကၢးမၤအီၤလီၤ”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,တကီၢ်ခါခဲအံၤထံရူၢ်ကီၢ်သဲးတၢ်အိၣ်သးအဖီခိၣ်ကမျၢၢ်တၢ်ဘၣ်ဒိဘၣ်ထံးဒီးတၢ်သံတၢ်ပှၢ်အိၣ်အါဝဲအဖီခိၣ်,ဂ့ၤကတၢၢ်လၢခိၣ်နၢ်တဖၣ်ကဃုထၢက့ၤကျဲလၢတၢ်ကထိၣ်ဃူတဲသကိးက့ၤတၢ်လီၤအဂ့ၢ်,စံးအါထီၣ်စ့ၢ်ကီးဝဲဒၣ်န့ၣ်လီၤ.
တကးဒံးဘၣ်,ဒ်သိးတၢ်ကဒိကနၣ်ကမျၢၢ်ကလုၢ်ဒီးတၢ်ကွၢ်ကပၥ်ကမျၢၢ်တၢ်လိၣ်ဘၣ်သုတအိၣ်လၢၤတဂ့ၤအဂီၢ်ထံရူၢ်ကီၢ်သဲးတၢ်ဂ့ၢ်ကီအံၤတၢ်ကဘှါရှဲဒီးမၤကတၢၢ်က့ၤအီၤလၢစီၢ်နီၤခိၣ်တၢ်တဲအိၣ်သကိးအဂ့ၢ်,ဆီၣ်တခူစံးစ့ၢ်ကီးဝဲကရူၢ်ကရၢခိၣ်နၢ်ဒီးပှၤလၢဟူးဂဲၤလၢထံရူၢ်ကီၢ်သဲးတၢ်ဖံးတၢ်မၤအပူၤတဖၣ်စ့ၢ်ကီးန့ၣ်လီၤ.
သုးကရူၢ်အတၢ်ဃုထၢအံၤကညီကီၢ်စဲၣ်တၢ်ပၢဟီၣ်ကဝီၤအပူၤ(KNU)တကပၤထီဒါဝဲတဲၥ်တဲၥ်ဖျူဖျူဒီးဆီၣ်တခူဝဲကညီဖီၣ်စုကဝဲၤကရူၢ်ကရၢဃုၥ်ဒီးကမျၢၢ်တဖၣ်လၢကထီဒါဃုၥ်ဝဲဘၣ်ဆၣ်,သုးခိးကီၢ်ဆၢ(BGF),ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ဃုၥ်ဒီးကညီတၢ်မုၥ်တၢ်ခုၣ်ကီၣ်ကးကရၢ(KNU/KNLA-PC)ကရူၢ်ကရၢတဖၣ်ကဆီၣ်ထွဲဝဲပယီၤသုးကရူၢ်အတၢ်ဃုထၢအံၤလၢတၢ်ဘံၣ်တၢ်ဘၢတပၤအိၣ်ဝဲအဂ့ၢ်,ထုးထီၣ်ပၥ်ဖျါတ့ၢ်ဝဲအတၢ်ပၥ်သးကိးဖုစုၥ်စုၥ်အိၣ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ.
တကတီၢ်ဃီ,ကညီဖီၣ်စုကဝဲၤကရူၢ်ကရၢလၢကဟံးန့ၢ်ဝဲတၢ်ဘံၣ်တၢ်ဘၢတဖၣ်အံၤတူၢ်လိၥ်ဒီးအိၣ်ပှိၤဝဲသုးကရူၢ်အတၢ်ဃုထၢခီဖျိထံၣ်ဝဲလၢတၢ်ဃုထၢအံၤမ့ၢ်ခါဆူညါကဒုးအိၣ်ထီၣ်ထံရူၢ်ကီၢ်သဲးတၢ်ဆီတလဲဒီးအဲၣ်ဒိးဝဲထံလီၢ်ကီၢ်ပူၤတၢ်မုၥ်တၢ်ခုၣ်အဃိတူၢ်လိၥ်ဝဲအဂ့ၢ်,ဖီၣ်စုကဝဲၤကရူၢ်ကရၢခိၣ်နၢ်ဒိၣ်ထီတဖၣ်ကတိၤပၥ်ဖျါဝဲအိၣ်ဝဲဒၣ်န့ၣ်လီၤ.
သုးကရူၢ်တီခိၣ်ရိၢ်မဲတၢ်ဃုထၢအံၤကမၤဝဲဖဲ(၂၀၂၅)နံၣ်ဘူးကလၢၥ်အပူၤဒီးအဆိကတၢၢ်အကူၥ်(၁)တၢ်ရဲၣ်တၢ်ကျဲၤအပူၤကစးထီၣ်ဝဲဖဲလါဒံၣ်စဲဘၢၣ်(၂၈)သီအနံၤအဂ့ၢ်,ဘိးဘၣ်ပၥ်ဖျါတ့ၢ်ဝဲဖဲလါအီကူၥ်(၁၈)သီအနံၤအိၣ်ဝဲဒၣ်န့ၣ်လီၤ.
ဒ်န့ၣ်အသိး,လၢတၢ်မၤဝဲတၢ်ဃုထၢအဂီၢ်အပူၤလါစဲးပထ့ဘၢၣ်အပူၤမၤတ့ၢ်ဝဲတၢ်ဟ့ၣ်(တၢ်ဖးစဲးဖီကဟၣ်)တၢ်သ့ၣ်ညါနၢ်ပၢၢ်တၢ်မၤလိလၢကညီကီၢ်စဲၣ်ဒူပျၥ်ယၥ်ကီၢ်ရ့ၣ်,နိၣ်တကီကီၢ်ဆၣ်ဒီးဖၣ်အၣ်ကီၢ်ရ့ၣ်ကီၢ်ဆၣ်ဟီၣ်ကဝီၤတနီၤအပူၤအိၣ်ဝဲအသိး,တကီၢ်ခါခဲအံၤမၤဝဲတၢ်ဘိးဘၣ်ရၤလီၤတၢ်ကဘၣ်ဟ့ၣ်ထီၣ်တၢ်ဖးမံၤစရီတဖၣ်လၢအဝဲၤကျိၤဘၣ်ထွဲတၢ်လီၢ်တၢ်ကျဲတဖၣ်အပူၤအိၣ်ဝဲလံအဂ့ၢ်,ပၥ်ဖျါဝဲလၢအတၢ်ကစီၣ်သန့တဖၣ်အပူၤအိၣ်ဝဲဒၣ်န့ၣ်လီၤ.
