လါအီးကထိဘၢၣ် ၁၀ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ယိၤကျါကရူၢ်အပူၤ ဖဲမဟါလါအီးကထိဘၢၣ် ၉ သီ မုၢ်နၤခီ ၈း၁၅ မံးနံးအဆၢကတီၢ်န့ၣ် တၢ်ဒုးကဲထီၣ်တအိၣ်သုးမီၤစိရိၤဘီယူၤ လဲၤတ့ၢ်လီၤ မ့ၣ်ပိၢ်လၢထံဖးဒိၣ်ထၣ်သဝီမုၢ်နုၥ် ကဘီယူၤပျီသဝီပူၤ အဃိ ဖိသၣ်(၁၂)နံၣ်ဆူဖီလၥ်သံဝဲ(၅)ဂၤ ဒီး ဘၣ်ဒိ(၉)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ကဘီယူၤလဲၤခးလီၤတၢ်ဘျီဝဲအံၤတ့ၢ်လီၤဝဲပီၣ်(၅၀၀)မ့ၣ်ပိၢ် ၁ ဖျၢၣ် လီၤတဲၥ်ပိၢ်ဖးထီၣ်ဝဲလိၤလိၤလၢသဝီပူၤတီတီဒီး ဘၣ်လၢပှၤဘူးထီၣ်ကမံလံအဃိ တၢ်သံတၢ်ဘၣ်ဒိဘၣ်ထံးဘၣ်ကဲထီၣ်အါဝဲဒ်အံၤလီၤအသိး ပှၤလၢအဘၣ်ဒိနးတဖၣ်န့ၣ် ဘၣ်တၢ်ဆှၢ အဝဲသ့ၣ်ဆူတၢ်ဆါဟံၣ်လၢအိၣ်ဘူးဖဲန့ၣ်အဂ့ၢ်န့ၣ် ဒူသဝီ ပှၤဘၣ် မူဘၣ်ဒါစံးဝဲလီၤ.
ဘၣ်ဃးကဘီယူၤလဲၤခးလီၤတၢ်ဘျီဝဲအံၤ သဝီပှၤဘၣ်မူဘၣ်ဒါတဂၤစံးဝဲလၢ“အဟဲတ့ၢ်လီၤတၢ်ဘျီညါအံၤပီၣ်(၅၀၀)န့ၣ် ၁ ဖျၢၣ်ဒီး မ့မ့ၢ်(၁၂၀)န့ၣ် ၂ ဖျၢၣ်. အလီၤတဲၥ်လိၤလိၤဖဲဟံၣ်ကပၤန့ၣ်လီၤ .ကဲထီၣ်တဘျီဃီန့ၣ်ပှၤဖိသၣ်သံ(၃)ဂၤ. ပှၤဘၣ်ဒိတဖၣ်န့ၣ်ပှၤလဲၤ ဆှၢ လၢတၢ်ဆါဟံၣ်ဘျီ သံကဒီးဖဲန့ၣ်(၂)ဂၤ.ပှၤသံ(၅)ဂၤအံၤဖိသၣ်ကိးဂၤဒဲးလီၤ. မ့မ့ၢ်တၢ်လၢအဂၤဒုလိၣ်တဲလၢၤဘၣ်.ဟံၣ်ဒုလီၤပှီၢ် လၢၤစီ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပှၤဖိသၣ်လၢအသံသ့ၣ်တဖၣ်န့ၣ်မ့ၢ်ဝဲ နီၢ်မၣ်ပူၣ်လိ(၁၂)နံၣ်, နီၢ်မုၣ်ခၠံးခၠံး(၁၀)နံၣ်, စီၤလ့ထဲၣ်သါ(၇)နံၣ်, နီၢ်မဲၤကလၤဖီ(၉)နံၣ်, စီၤထိထိမ့အိၣ်ဝဲ(၆)နံၣ် အဂ့ၢ်န့ၣ် သ့ၣ်ညါဘၣ်လၢပှၤဘၣ်မူဘၣ်ဒါအအိၣ်န့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ပှၤလၢအဘၣ်ဒိဘၣ်ထံးသ့ၣ်တဖၣ်အကျါ(၄)ဂၤလၢအသးနံၣ်အိၣ်(၃၁ တုၤ ၆၁)နံၣ် ဘၢၣ်စၢၤတဖၣ်အံၤ ခီဖျိမ့ၣ်ပိၢ်အက့အခီ ဘၣ်ဝဲအမိၢ်ပှၢ်, အခီၣ်အစု,အချၢဃံ,အကပၤ,အခံကိၢ်အဃိ ခဲအံၤအိၣ်ဝဲလၢသးသမူ တၢ်ဘၣ်ယိၣ်ဘၣ်ဘှီအပူၤန့ၣ်လီၤ.
ဒ်န့ၣ်အသိးတၢ်လဲၤတ့ၢ်လီၤမ့ၣ်ပိၢ်ဘျီဝဲအံၤကမျၢၢ်သံဘၣ်ဒိဘၣ်ထံးအမဲၥ်ညါ ဟံၣ်တၢ်သူၣ်ထီၣ်ဘၣ်ဒိဘၣ်ထံးခဲလၢၥ် (၁၁)ဖျၢၣ် အကျါ (၂)ဖျၢၣ်လီၤပှီၢ်လီၤကရဲကွံၥ်ဝဲခဲလၢၥ်ဒီး ကျီၢ်(၂),ထိး(၂)ဒု,သၣ်မံညီၤ,ဆီသ့ၣ်တဖၣ်သံဝဲဒၣ်န့ၣ်လီၤ. တကီၢ်ခါခဲအံၤခီဖျိ ကဘီယူၤ လဲၤခးလီၤတၢ်တၢ်အံၤအဃိ ဒူသဝီကမျၢၢ် လၢအိၣ်ဘူးဖဲန့ၣ်တဖၣ်ဘၣ်ယိၣ်ဝဲလၢတၢ်ကဟဲခးလီၤ ကဒီးတၢ်အဖီခိၣ် ဟးပလဲၥ်သးအိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ထံဖးဒိၣ်ထၣ်မုၢ်နုၥ်သဝီလၢကဘီယူၤလဲၤတ့ၢ်လီၤဝဲမ့ၣ်ပိၢ်ခဲအံၤန့ၣ် အိၣ်ဘူးလိၥ်အသးဒီးထံဆံၣ်ဘီ,ဃီဖိပျဲၢ်,ထံဆံၣ်ဘီခံ သဝီ လၢကဘီယူၤလဲၤတ့ၢ်လီၤမ့ၣ်ပိၢ်ဖဲ(၂၀၂၄)ဒီးတနံၣ်အံၤ(၂၀၂၅)အံၤန့ၣ်လီၤ. ဒ်န့ၣ်အသိးကဘီယူၤလဲၤခးလီၤတၢ်အခါဖဲန့ၣ်စ့ၢ်ကီး သီခါတပွဲ,ကမျၢၢ်သံဘၣ်ဒိဘၣ်ထံးဆှုၣ်မဲၥ်ကဲၥ်မဲၥ်တကးဒံးဘၣ်ကၠိ,သီခါဖၠၣ်,တၢ်ဘါယွၤသရိၥ်ဒီးကမျၢၢ်ဟံၣ်တၢ်သူၣ်ထီၣ်လီၤပှီၢ်လီၤကရဲကဲထီၣ်ဒံးဝဲဒိၣ်ဒိၣ်မုၢ်မုၢ် ဒံးန့ၣ်လီၤ.
စးထီၣ်ဖဲတလါအံၤလါအီးကထိဘၢၣ်ထီၣ်အံၤန့ၣ် လၢကလုၥ်ဒူၣ်ဟီၣ်ကဝီၤတၢ်လီၢ်အါတီၤဃုၥ်ဒီးခ့ၣ်အဲၣ်ယူၣ် ဟီၣ်ကဝီၤအပူၤ သုးမီၤစိရိၤအံၤ သူဝဲကဘီယူၤဟးတ့ၢ်လီၤဝဲမ့ၣ်ပိၢ်သ့ၣ်တဖၣ်ဟဲအါထီၣ်ဝဲအသိးကမျၢၢ်စ့ၢ်ကီး သံဘၣ်ဒိဘၣ်ထံး, တၢ်သူၣ်ထီၣ် ဟးဂီၤလီၤပှီၢ်အိၣ်ဝဲအါမးဒီး လၢပှၤသံဘၣ်ဒိဘၣ်ထံးတဖၣ်အကျါန့ၣ်ပၣ်ဃုၥ်ဝဲဖိဒံဖိသၣ်သ့ၣ်တဖၣ်အါမးအဂ့ၢ်န့ၣ် သ့ၣ်ညါဘၣ် န့ၣ်လီၤ.